Jehovah hemel wagi ini boeweigi
„Ini a tori foe den wiel, na den den ben kari ala di mi ben e jere, ’O wielwroko!’” — ESEKIÈL 10:13.
1. Sortoe sani foe rèi na ini Jehovah abi?
INI a ten disi pe den abi moi model jet-opolani, grontapoe tiriman e firi kande taki den e njanboen foe na heimarki tapoe a kontren foe rèis na wan toemoesi boen fasi. Tokoe 2600 jari pasa kaba Jehovah ben tjari kon a krin taki a abi wan sani foe rèi na ini di no abi en speri, èn di no wan sma di e meki sani ben si oiti wan ten. A de wan kefarlek bigi wagi di e foeroe joe nanga respeki! A de wan freimde sani taki Jehovah e rèi na ini wan sani di gersi wan wagi? Nôno, bika Jehovah hemel wagi de krinkrin trafasi leki ibri wagi di libisma oiti ben denki foe meki.
2. Fa Esekièl kapitel 1 e prenki Jehovah hemel wagi, èn na soema na profeiti e poti wi prakseri fosi?
2 Na ini kapitel 1 foe na profeititori foe Esekièl, den e prenki Jehovah leki a e rèi na ini wan kefarlek bigi hemel wagi. Na wagi disi di abi fo wiel èn di e foeroe joe nanga respeki e boeweigi foe en eigi krakti ede èn a kan doe froewondroe sani. Esekièl ben si na hemel wagi disi na ini wan fisjoen na ini 613 bifo G.T., di a ben de na wan foe den kanari foe na owroe Babilon. Na profeiti e poti wi prakseri fosi na tapoe den wan di e waka makandra nanga na hemel wagi foe Jehovah. Meki te wi e leisi, wi proeberi foe si san Esekièl ben si.
Fo libi mekisani
3. San den fo fesi foe ibriwan foe den fo cherub e agersi?
3 Esekièl e froeteri: „Mi ben bigin foe si, èn loekoe! wan tranga winti ben kon foe na noordsei, wan bigi groepoe wolkoe nanga faja di e dansi, èn a ben abi wan brenki na lontoe . . . Èn foe a mindri foe en sani ben de di ben gersi fo libi mekisani” (Esekièl 1:4, 5). Ibriwan foe den fo libi mekisani disi, ofoe cherub, ben abi fo frei nanga fo fesi. Den ben abi wan lew fesi, di e agersi na geregteghèit foe Jehovah; wan mankaw fesi, di e prenki na makti foe Gado; èn wan aka fesi, di wani taki na koni foe Jehovah. Den ben abi so srefi wan libisma fesi, di e sori tapoe na lobi foe Jehovah. — Deuteronomium 32:4; Job 12:13; Jesaja 40:26; Esekièl 1:10; 1 Johanes 4:8.
4. Foe san-ede den cherub ben abi fo fesi, èn o esi den cherub ben kan boeweigi densrefi?
4 Ibriwan foe den cherub ben abi wan fesi di e loekoe go na wan foe den fo sei. Foe dati-ede den cherub ben kan kenki wantewante a sei pe den e go èn waka na baka na fesi di ben loekoe go na a sei di a wani foe go. Èn o esi den cherub ben boeweigi densrefi? We, den ben kan boeweigi densrefi net so esi leki te faja e koti! (Esekièl 1:14) No wan enkri wagi di libisma meki oiti ben doro so wan esi-esi fasi foe rèi.
5. Fa Esekièl ben froeteri foe den wiel foe na wagi èn foe den oeproe?
5 Wantronso den wiel foe na wagi e kon de foe si. Fa den wiel de wan aparti sani! Vers 16 nanga 18 e taki: „A fasi fa den ben gersi èn fa den ben bow ben de ne leki te wan wiel de mindri na ini wan wiel. Èn den oeproe foe den ben abi so wan hei, taki den ben meki joe frede; èn den oeproe foe den ben foeroe nanga ai na lontoe ala fo foe den.” Efoe wan wiel ben de na sei ibri cherub, dan dati ben sa wani taki taki fo wiel ben de na tapoe fo presi, di abi foe doe nanga makandra. Den wiel ben brenki leki krysoliet, dati na wan geri ofoe groen ston di joe kan loekoe pasa en go na a tra sei ofoe di leti e skèin doro en. Disi e poti ekstra krinfasi èn moifasi na a glori fisjoen disi. Foe di den oeproe foe den wiel ben „foeroe nanga ai na lontoe”, meki den no ben e go na ibri sei nomo sondro foe loekoe. Èn den wiel ben de kefarlek hei, so taki den ben man foe go boen fara nanga soso wán drai, lontoe na as foe den. Ne leki den fo cherub, den ben kan boeweigi densrefi so esi leki te faja e koti.
Wiel na inisei foe wiel
6. (a) Fa na wagi ben abi wiel na inisei foe wiel? (b) Na san den wiel ben fiti na sei pe den ben boeweigi go?
6 Wan tra sani ben de di ben de wan aparti sani. Ibriwan foe den wiel ben abi wan wiel na inisei foe en — wan wiel di ben bigi a srefi èn di ben fiti kroisi-abra na ini a fosi wiel. Soso na a fasi disi den ben kan taki, taki den wiel ben „go na tapoe den fo aparti sei” (vers 17). Wantewante den wiel ben kan kenki na sei pe den ben go bika wan sei foe na wiel ben loekoe go na ibri sei. Den wiel ben fiti na sei pe den ben boeweigi go na a sei pe den fo cherub ben boeweigi go. Na tapoe den fo wiel na skin foe a wagi foe Gado ben kan rèi nanga jepi di no de foe si, ne leki wan krakti boto di winti e opo ala di a e grati abra a watra.
7. San ben de na fonten foe krakti gi den wiel?
7 Pe den wiel ben kisi na krakti disi foe fiti densrefi na ala den boeweigi foe den fo cherub? Foe na santa jeje foe na Almakti Gado. Vers 20 e taki: „Ala pe na jeje ben firi foe go, den ben go . . . Na jeje foe na libi mekisani ben de na ini den wiel”. Na srefi wroko-krakti foe Gado di no de foe si èn di ben de na ini den cherub, ben de na ini den wiel dati.
8. Sortoe nen den ben gi den wiel, èn foe san-ede?
8 Den e sori tapoe den wiel nanga a wortoe „wielwroko” (Esekièl 10:13). Disi ben kon, leki fa a e sori, foe san ibri wiel e doe. A e lolo doro ofoe e drai lontoe. Foe sori tapoe a pisi disi foe na hemel wagi na a fasi disi, e kari notisi gi na esi-esi fasi nanga san na hemel wagi e boeweigi. Ala di den wiel foe en e drai lontoe so esi-esi, den ben kan si ala ten pe den ben e go foe di den foeroe nanga ai.
9. Fa Esekièl ben froeteri san ben de na tapoesei foe den fo wiel foe na wagi di e boeweigi esi-esi?
9 Ma meki wi loekoe now èn si san de na tapoesei foe den fo hei wiel di e boeweigi esi-esi èn di e foeroe joe nanga respeki. Vers 22 foe Esekièl kapitel 1 e taki: „Na tapoesei foe den ede foe den libi mekisani wan sani ben de di ben gersi wan firmamenti, ne leki na brenkifasi foe ijs di e foeroe joe nanga respeki, èn di bradi na tapoesei foe den ede”. Ala di na firmamenti ben de steifi, leti ben skèin doro en „ne leki na brenkifasi foe ijs di e foeroe joe nanga respeki”. A ben brenki leki doesoendoesoen diamanti te na son e skèin na tapoe den. Troetroe, den sani disi e foeroe joe nanga respeki!
Na glori wagi Tjariman
10. (a) Fa den e froeteri foe na kownoestoeroe èn foe na Sma di ben sidon na tapoe na kownoestoeroe? (b) San a e agersi taki na wagi Tjariman de ini glori?
10 Leki fa a sori, na wagi e stòp, so taki na wagi Tjariman kan taki nanga Esekièl. Tapoesei foe na firmamenti wan sani de di gersi wan kownoestoeroe èn di de leki saffier, ofoe dipi blaw. Wan sma de na tapoe a kownoestoeroe di gersi wan grontapoe sma. Na libisma skin ben de a moro boen fasi foe jepi Esekièl foe warderi na sori disi di Gado sori ensrefi. Ma na libisma skin dati ben de ini glori, so taki a ben abi na brenki foe elektrum, wan brenki moksi morion foe solfroe nanga gowtoe. Fa disi de wan moifasi di e seki joe! Komoto foe den djonkoe foe a skin disi di gersi wan man-nengre, a glorifasi disi e go na tapoesei èn so srefi na ondrosei. Soboen glori de lontoe na heri skin. Disi e sori taki Jehovah de glori na wan fasi di joe no man froeteri fa a de. Boiti foe dati, wan moi alenbo e go makandra nanga na wagi Tjariman. Fa wan alenbo e tjari bedarifasi nanga rostoe kon baka wan sibiboesi! Nanga na bedarifasi disi Jehovah e hori den eigifasi foe en so leki koni, geregteghèit, makti nanga lobi ini volmaakti balansi.
11. Fa na fisjoen foe Jehovah hemel wagi nanga en kownoestoeroe ben abi krakti na tapoe Esekièl?
11 Leti èn toemoesi moi kloroe de lontoe na wagi nanga a kownoestoeroe foe Jehovah. Fa disi de kontrari Satan, na prins foe doengroe èn foe afkodrei! Èn fa ala disi ben wroko na tapoe Esekièl? „Di mi ben kisi foe si dati”, a e taki, „mi ben fadon tapoe mi fesi, èn mi ben bigin foe jere na sten foe wan sma di ben e taki.” — Esekièl 1:28.
San na wagi ben prenki
12. San Jehovah hemel wagi e prenki?
12 San na toemoesi moi wagi disi e prenki? Na hemel organisâsi foe Jehovah Gado. A de ala den santa jeje mekisani foe en na ini a kondre di no de foe si — seraf, cherub nanga engel. Foe di Jehovah na a Moro Hei Gado, dan ala en jeje mekisani saka densrefi na en ondro, èn a e rèi den na a fasi, taki a e tiri den na wan boen fasi èn a e gebroiki den ini akroederi nanga en prakseri. — Psalm 103:20.
13. (a) Foe san-ede sma kan taki taki Jehovah e rèi en organisâsi? (b) Fa na fisjoen foe Jehovah fo wiel wagi di de ini boeweigi abi krakti na tapoe joe?
13 Jehovah e rèi na organisâsi disi leki a e rèi wan wagi, foe di a e meki a boeweigi ensrefi go na a sei pe en jeje e poesoe en go. A no e go na ibrisei nomo, sondro tiri ofoe foe wan koni sma loekoe en. Gado no e meki na organisâsi disi go na iniwan sei di kande a ben wani foe go. Na presi foe dati a e waka na baka na tiri foe en. Makandra, den alamala e go na fesi ini wánfasi foe meki den plan foe Gado kon troe dorodoro. Fa wan hemel organisâsi di e gi froewondroe e tjari kon a krin nanga jepi foe na fisjoen disi foe na fo wiel hemel wagi foe Jehovah di de ini boeweigi! Ini akroederi nanga disi den e prenki na organisâsi foe Jehovah leki a de wan fokanti, ini volmaakti balansi.
Den poti en leki wan waktiman
14. Soema na profeiti Esekièl e prenki?
14 Ma soema na profeiti Esekièl e prenki? Foe den troe tori foe historia a e kon a krin taki na skin foe Kotoigi foe Jehovah di kisi salfoe nanga santa jeje, ben tai nanga na hemel wagi. So boen, Esekièl de wan boen prenki foe na salfoe fikapisi foe Jehovah Kotoigi sensi 1919. Na ini a jari dati, Gado en hemel organisâsi ben miti nanga na salfoe fikapisi, na jeje fasi, foe meki den kon a libi baka leki Kotoigi foe Jehovah gi na heri grontapoe. (Teki gersi Openbaring 11:1-12.) Na wagi dati di joe kan teki gersi nanga wan organisâsi, ben de ini boeweigi na a ten dati, ne leki fa a de ini boeweigi na ini a ten disi. Foe taki en leti, den wiel foe go na fesi e drai lontoe moro esi leki oiti wan ten. Jehovah e rèi go esi-esi na fesi!
15. San na sten foe na Tjariman foe na hemel wagi e taki, èn sortoe ordroe Esekièl e kisi?
15 Esekièl ben wani sabi foe san-ede na hemel wagi ben rèi kon na en fesi èn ben stòp. A ben kon sabi disi, di a ben jere wan sten komoto foe a Sma di ben sidon na tapoe a wagi. Foe di na sani disi, di e foeroe joe nanga respeki, ben moro en, meki Esekièl ben fadon tapoe en fesi. Arki te na sten foe na Tjariman foe na hemel wagi e taki: „Libisma pikin, opo tanapoe na tapoe joe foetoe so taki mi kan taki nanga joe” (Esekièl 2:1). Dan Jehovah e gi Esekièl na ordroe foe de wan waktiman èn foe warskow na tranga-ede oso foe Israèl. A e kisi srefi na ordroe foe taki ini a nen foe Gado. Na nen foe Esekièl wani taki „Gado e gi tranga”. Na so toe Gado tranga na Esekièl-groepoe èn seni den go foe di a poti den leki wan waktiman gi na krestenhèit.
16, 17. (a) Fa na fisjoen foe na hemel wagi ben tjari wini kon gi Esekièl? (b) Fa na froestan di na Esekièl-groepoe nanga na bigi ipi e froestan na fisjoen foe na hemel wagi ben abi krakti na tapoe den na ini wi ten?
16 Na fisjoen foe na hemel wagi no wawan ben abi wan serjoesoe krakti na tapoe Esekièl èn ben meki taki a no ben sabi san foe taki, ma a ben sreka en toe gi na ordroe di a ben kisi leki waktiman foe meki sma jere na warskow foe na pori di ben o kon gi Jerusalem. A srefi ben de troe foe na waktiman-groepoe na ini a ten disi. Na froestan di den e froestan na fisjoen foe Jehovah hemel wagi di de ini boeweigi ben abi bigi krakti tapoe na salfoe fikapisi. Na ini 1931 den ben leri moro foe na fisjoen foe Esekièl, so leki disi ben tjari kon a krin na ini Nomroe 1 foe na boekoe Vindication. Den ben kon foeroe nanga so wan serjoesoe warderi, taki foe sensi na uitgave foe 15 oktober 1931 te na di foe 1 augustus 1950, na fesisei blad foe Na Waktitoren (Ingrisitongo) ben abi na ini a leti-anoe tapoesei oekoe, wan prenki foe Esekièl fisjoen foe na hemel wagi, so leki fa wan tekenaar ben froestan en. Na so fasi na Esekièl-groepoe ben handri na tapoe na ordroe di den ben kisi, èn den ben doe dienst leki waktiman foe di den meki sma jere na warskow foe Gado. Na ten foe na faja pori foe na krestenhèit foe na sei foe Jehovah di sidon na tapoe en hemel wagi, de moro krosibei leki oiti wan ten!
17 Ini a ten disi „wan bigi ipi” foe sma di gersi skapoe, moksi densrefi na a salfoe fikapisi (Openbaring 7:9). Makandra den e meki sma jere na warskow foe na pori di e kon gi na krestenhèit èn na heri didibri seti foe sani disi. Na warskow wroko dati e go doro esi-esi, èn leki fa Openbaring 14:6, 7 e sori, dan den engel e horibaka gi a wroko disi.
Boeweigi wi srefi nanga na hemel wagi
18. San wi moesoe doe foe tan kisi na jepi foe den engel, èn san wi moesoe teki?
18 Den engel di e saka densrefi, e boeweigi densrefi ini wánfasi leki wan pisi foe Gado hemel organisâsi, ala di den e jepi Jehovah en grontapoe dienstknekti foe doe na ordroe di den kisi foe meki den kroetoe warskow foe Gado bekenti. Efoe wi wani tan kisi na kibri nanga tiri foe den makti engel dienstknekti disi foe Gado, dan wi toe moesoe boeweigi wi srefi ini wánfasi èn hori foetoe nanga na agersi wielwroko. Boiti foe dati, leki wan pisi foe Jehovah en organisâsi di de foe si èn di e boeweigi skinskin nanga en hemel wagi, wi moesoe teki na tiri foe Gado jeje. (Teki gersi Filipi sma 2:13.) Efoe wi de Kotoigi foe Jehovah wi moesoe boeweigi go na a srefi sei pe na hemel wagi e go. Wi no moesoe wroko kontrari en kwetikweti. Te wi e kisi tiri foe na pasi di wi moesoe waka, dan wi moesoe waka na baka dati. Na a fasi disi na gemeente no sa prati. — 1 Korente sma 1:10.
19. (a) Gi san Jehovah pipel moesoe de na ai ne leki fa ai de lontoe heri den wiel foe na wagi? (b) San moesoe de na fasi foe handri foe wi na ini den djoegoedjoegoe ten disi?
19 Den ai di de lontoe heri den wiel foe na wagi foe Gado, e bodoi, de na ai. Ne leki fa na hemel organisâsi de na ai, na so wi toe moesoe de na ai foe horibaka gi Jehovah grontapoe organisâsi. Na ini den gemeente wi kan sori na horibaka dati foe di wi e wroko makandra nanga den owroeman foe a gemeente pe wi de (Hebrew sma 13:17). Èn na ini den djoegoedjoegoe ten disi, kresten moesoe tan toemoesi krosibei foe na organisâsi foe Jehovah. Wi no wani poti wi eigi froeklari foe sani di e pasa, bika dan wi no ben sa boeweigi wi srefi nanga Jehovah hemel wagi. Meki wi aksi wi srefi ala ten: ’Na sortoe sei na hemel wagi e boeweigi ensrefi go?’ Efoe wi e boeweigi wi srefi go na fesi makandra nanga Gado organisâsi di de foe si, dan wi sa boeweigi wi srefi toe makandra nanga na organisâsi di no de foe si.
20. Sortoe toemoesi moi rai na apostel Paulus e gi na ini Filipi sma 3:13-16?
20 Foe a tori disi Paulus ben skrifi: „Brada, mi no e denki foe mi srefi taki mi ben graboe en kaba, ma wán sani de faste: E frigiti den sani di de na mi baka èn e langa mi srefi go na den sani di de na fesi mi, mi e feti na baka a marki foe na prijs foe na kari foe tapoesei, di Gado e meki kon nanga jepi foe Krestes Jesus. Meki wi foe dati-ede, so meni foe wi di lepi, abi na jeje fasi disi; èn efoe joe na iniwan fasi e firi tra fasi, dan Gado sa tjari na jeje fasi disi di den taki foe en na tapoesei, kon a krin gi joe. Awansi fa a no fa, foe so fara wi ben go na fesi kaba, meki wi go doro foe waka ini a srefi routine disi, na wan orde fasi.” — Filipi sma 3:13-16.
21. A waka na baka sortoe routine e meki taki a kan, foe go na fesi na jeje fasi nanga Gado organisâsi?
21 Djaso na wortoe „routine” no wani taki wan takroe gwenti, foe san wi no kan loesoe wi srefi poeroe. Den dienstknekti foe Jehovah abi wan boen routine nanga jepi foe san den e go na fesi na jeje fasi. A de wan routine foe doe persoonlijk bijbel studie, fisiti den gemeente konmakandra, preiki na boen njoensoe foe na Kownoekondre doronomo èn foe sori den eigifasi foe na hemel organisâsi foe Gado. So wan routine e meki taki den kan waka na baka a tiri foe Jehovah hemel organisâsi di gersi wan wagi. Te wi e horidoro na ini a fasi disi, wi sa doro na marki foe wi, efoe a de now na prijs foe libi na ini a hemel sondro foe dede, ofoe foe libi foe têgo na tapoe wan paradèis grontapoe.
22. (a) San moesoe doe foe na salfoe fikapisi nanga na bigi ipi foe tra skapoe orga ini wánfasi? (b) San Jehovah no e lasi na ai?
22 Ne leki fa Johanes 10:16 e sori, den „tra skapoe” èn na Esekièl-groepoe ben sa orga ini wánfasi. A de so boen wan prenspari sani taki ala sma na ini Jehovah organisâsi froestan dorodoro san a wani taki èn o prenspari a fisjoen de di skrifi na ini Esekièl kapitel 1, efoe den wani boeweigi densrefi ini wánfasi nanga Gado hemel wagi. Na fisjoen foe na wagi e jepi wi foe warderi taki wi moesoe boeweigi ini wánfasi nanga Gado organisâsi, di wi kan si èn na wan di wi no kan si. Hori na prakseri so srefi taki den ai foe Jehovah „e loekoe lontoe a heri grontapoe foe sori a tranga foe en, foe na boen foe den di na ati foe den de krinkrin gi en” (2 Kroniki 16:9). Jehovah no e lasi no wan enkri sani na ai, spesroetoe iniwan sani di abi foe doe nanga na prakseri foe en foe meki ensrefi kisi leti leki na Universeel Soeverein.
23. San wi moesoe doe foe di Jehovah hemel wagi de ini boeweigi?
23 Jehovah en hemel wagi seiker de ini boeweigi na ini a ten disi. Heri-esi ibri sani sa tjari kon glori ini akroederi nanga na glori wagi Tjariman dati — èn ala disi de foe meki En leki na Soeverein Masra foe na universum kisi leti. En seraf, cherub nanga engel e horibaka gi wi ini a bigi preikiwroko foe wi na a heri grontapoe. Meki wi so boen go na fesi, makandra nanga Jehovah hemel organisâsi. Ma fa wi kan hori foetoe nanga na hemel wagi dati di e boeweigi esi-esi?
Fa joe ben sa piki?
◻ Sortoe eigifasi den fo libi mekisani di Esekièl ben si e prenki?
◻ San Jehovah hemel wagi e prenki?
◻ Soema Gado profeiti Esekièl e prenki?
◻ Fa na froestan di na Esekièl-groepoe nanga na bigi ipi e froestan Jehovah hemel wagi ben abi krakti na tapoe den?