Wi orga fu du a wani fu Yehovah

NA HERI grontapu furu difrenti organisâsi de. Yu abi kerki organisâsi, politiek organisâsi, bisnis organisâsi, noso organisâsi di e du ala sortu wroko fu yepi sma. Ma den sani di den e du, nanga den sani di den e bribi no de a srefi. Toku wán organisâsi de di e difrenti fu den alamala. Dati na a organisâsi fu Yehovah Kotoigi. Den de tra fasi fu di na ini ala sani den e hori densrefi na san Bijbel e taki.

² Wi breiti taki yu kon na ini na organisâsi fu Yehovah. Yu kon sabi san na a wani fu Yehovah èn yu e du en tu (Ps. 143:10; Rom. 12:2). Yu na wan preikiman di e wroko fayafaya makandra nanga yu brada nanga sisa na heri grontapu di lobi makandra (2 Kor. 6:4; 1 Petr. 2:17; 5:9). Soleki fa Gado Wortu pramisi, a sani disi e tyari furu blesi kon gi yu èn a e gi yu prisiri (Odo 10:22; Mark. 10:30). Fu di yu e tan du a wani fu Yehovah nownow kaba, meki yu e sreka yusrefi fu kisi têgo blesi te fu kaba.​—1 Tim. 6:18, 19; 1 Yoh. 2:17.

³ Yehovah na a Edeman fu ala sma. En na wi Gran Mekiman èn a abi wan moi organisâsi na heri grontapu di ensrefi e tiri. Wi e frutrow en dorodoro. En na wi Krutuman, en na a sma di e gi wi wet, èn en na wi Kownu (Yes. 33:22). Fu di en na wan Gado di wani taki ala sani waka bun, meki a seti sani taki wi man „wroko makandra nanga en” fu du san a abi na prakseri.​—2 Kor. 6:1, 2.

⁴ Now di a kaba fu a grontapu disi de krosibei, wi e tan go na fesi na ondro a tiri fu Yesus Krestes di Gado poti leki Kownu (Yes. 55:4; Openb. 6:2; 11:15). Yesus srefi ben taki na fesi dati den bakaman fu en ben o du moro bigi sani leki san en du di a ben de na grontapu (Yoh. 14:12). Disi ben o de so fu di den bakaman fu Yesus ben o kon moro furu èn den ben o abi moro ten fu wroko wan moro bigi kontren leki Yesus. Den ben o preiki a bun nyunsu fu a Kownukondre te na den moro farawe presi fu grontapu.​—Mat. 24:14; 28:19, 20; Tori 1:8.

⁵ A sani disi e pasa trutru. Ma leki fa Yesus ben taki, dan a wroko di wi e du fu preiki a bun nyunsu o kon na wan kaba na wan ten di Yehovah srefi poti. Ala den sani di den profeiti taki na ini Gado Wortu e sori taki a bigi dei fu Yehovah di o meki sma frede srefisrefi de krosibei.​—Yoèl 2:31; Sef. 1:14-18; 2:2, 3; 1 Petr. 4:7.

⁶ Fu di wi kon frustan san na a wani fu Yehovah na ini den lasti dei disi, meki wi musu du moro muiti fu du san Gado e aksi fu wi. Disi wani taki dati wi musu kon sabi bun fa na organisâsi fu Gado e wroko, èn taki wi musu wroko makandra nanga en organisâsi, na ini ala sani. Ala sani di na organisâsi e du teki puru na ini Gado Wortu di abi komando, wet, nanga leri fu Gado na ini.​—Ps. 19:7-9.

⁷ Te a pipel fu Yehovah e hori densrefi na san skrifi na ini Bijbel, dan den e libi èn wroko makandra na ini freide nanga wánfasi (Ps. 133:1; Yes. 60:17; Rom. 14:19). Fa a du kon taki wi brada nanga sisa na heri grontapu kan abi a wánfasi dati? Na fu di wi lobi makandra. Wi e sori a lobi dati na ini ala san wi e du (Yoh. 13:34, 35; Kol. 3:14). Fu di Yehovah blesi en pipel nanga wánfasi, meki wi man tan wroko makandra nanga a pisi fu Yehovah organisâsi di de na hemel.

A PISI FU YEHOVAH ORGANISÂSI DI DE NA HEMEL

⁸ Den profeiti Yesaya, Esekièl, nanga Danièl ben si fisyun fu a pisi fu Yehovah organisâsi di de na hemel (Yes. kap. 6; Esek. kap. 1; Dan. 7:9, 10). Na apostel Yohanes ben kisi wan fisyun tu fu a fasi fa sani seti na hemel èn na ini a buku Openbaring a fruteri wi pikinso fu dati. A ben si Yehovah na tapu en kownusturu nanga ala en glori. Den engel ben e lontu en èn den ben e taki: „Yehovah Gado de santa, santa, santa. En na a Almaktiwan di ben de kaba, di de nownowde èn di o kon” (Openb. 4:8). Boiti dati, Yohanes ben si „wan pikin skapu e tanapu krosibei fu a kownusturu”. A skapu di a si na Yesus Krestes, a Pikin Skapu fu Gado.​—Openb. 5:6, 13, 14; Yoh. 1:29.

⁹ A fisyun disi, pe Yehovah e sidon na tapu en kownusturu, e sori taki en na a Edeman tu fu a pisi fu en organisâsi di de na hemel. Luku san 1 Kroniki 29:11, 12 e taki fu a hei posisi di a abi: „Yehovah, yu bigi, yu abi makti, ala moi sani na fu yu, yu abi furu glori èn na yu musu kisi ala grani. Ala sani na hemel èn na grontapu na fu yu. A kownukondre na fu yu, Yehovah, yu di e poti yusrefi leki edeman fu ala sma. Ala gudu nanga glori na fu yu. Yu e tiri ala sani èn yu abi makti nanga krakti. Na yu abi a makti fu meki sma kon bigi èn fu gi ala sma krakti.”

¹⁰ Yesus Krestes di e wroko makandra nanga Yehovah, abi wan hei posisi na ini hemel èn a kisi furu makti. Gado „poti ala sani na en ondro èn a meki a tron edeman fu ala sani di abi fu du nanga a gemeente” (Ef. 1:22). Na apostel Paulus ben taki fu Yesus: „Gado poti en moro hei tu leki fa a ben de kaba èn a gi en wan nen di bigi moro ibri tra nen. Na so ala den wan di de na hemel, den wan di de na grontapu, nanga den wan di de na ondro gron, ben o boigi den kindi na ini a nen fu Yesus. Ala sma ben o taki krin dati Yesus Krestes na Masra èn na so Gado a Tata o kisi glori” (Fil. 2:9-11). Dati meki wi kan de seiker taki Yesus Krestes o tiri wi na wan reti fasi.

¹¹ Na ini wan fisyun a profeiti Danièl ben si „a Graniwan di de sensi owruten” e sidon na tapu en kownusturu. „Dusun tron dusun engel ben e dini en èn tin dusun tron tin dusun ben e tanapu leti na en fesi” (Dan. 7:9, 10). Bijbel e taki dati den engel disi di de wan bigi legre „na yeye di musu du santa wroko èn di Gado seni kon fu dini den sma di o kisi frulusu” (Hebr. 1:14). Ala den engel disi kisi difrenti frantwortu na ini Gado organisâsi.​—Kol. 1:16.

¹² Te wi e teki ten fu prakseri fu den sani di abi fu du nanga a pisi fu Yehovah organisâsi di de na hemel, dan wi kan frustan fa Yesaya ben e firi di a kisi a fisyun pe a „si Yehovah sidon na tapu wan hei kownusturu na wan hei presi” èn „den seraf-engel ben de tapusei fu en”. Yesaya ben taki: „Helu fu mi! Bika na dede mi o dede now. Mi na wan man di no abi wan krin mofo èn mi e tan na mindri sma di no abi krin mofo tu. Ma toku mi si Kownu Yehovah di e tiri den legre, nanga mi eigi ai!” Iya, di Yesaya kon frustan o bigi na organisâsi fu Yehovah de, dan a ben fruwondru fu dati srefisrefi èn a ben firi ensrefi so pikin. A sani di a ben ondrofeni ben abi so furu krakti na en tapu, taki di Yehovah ben aksi komoto fu hemel suma ben wani go du a spesrutu wroko fu meki den krutuboskopu fu en bekènti, dan Yesaya ben taki wantewante: „Dya mi de! Seni mi.”​—Yes. 6:1-5, 8.

¹³ Te wi kon si taki disi na a organisâsi fu Yehovah èn wi e warderi dati, dan wi o wani de neleki Yesaya. Dati meki wi e tan du muiti fu go na fesi makandra nanga na organisâsi fu Yehovah. Wi wani sori tu taki wi e frutrow tapu na organisâsi fu Yehovah na ini a ten disi.

NA ORGANISÂSI FU YEHOVAH E TAN GO NA FESI

¹⁴ Na ini kapitel wán fu a profeititori fu Esekièl, wi e leisi taki Yehovah e rèi wan bigi hemel wagi. A kefalek wagi fu Gado e prenki a pisi fu na organisâsi fu Yehovah di wi no man si. Te Bijbel e taki dati Gado e rèi a wagi disi, dan dati wani taki dati na en e tiri en èn taki a e gebroiki en fu du san a abi na prakseri. A e tiri en organisâsi nanga furu lobi.​—Ps. 103:20.

¹⁵ Ibriwan fu den wiel fu a wagi disi abi ete wan wiel na ini. Den ala tu bigi a srefi, so taki a wán e fiti na ini a trawan. Ma den no e sori go na a srefi sei. Dati meki den man drai „go na iniwan sei” èn den man du disi esi-esi (Esek. 1:17). Ma disi no wani taki dati a wagi e drai go pe a wani. Na Yehovah e tiri ala sani èn a no e gi pasi taki en organisâsi e go sortu sei a wani. Esekièl 1:20 e taki: „Awinsi pe a yeye ben wani den fu go, na drape den ben e go tu.” Sobun, Yehovah e gebroiki a yeye fu en fu meki na organisâsi fu en go pe en wani taki a go. Dati meki wi musu aksi wisrefi: ’Mi e tan waka nanga na organisâsi, awinsi pe a e go?’

¹⁶ Te wi e tan waka nanga na organisâsi fu Yehovah, dan dati no wani taki nomo dati wi e go na den konmakandra èn na ini a preikiwroko. San prenspari, na taki wi e go na fesi na ini a tru anbegi. Wi wani hori na prakseri „san na den moro prenspari sani” èn wi wani du muiti fu sabi ala den nyun sani di wi e leri (Fil. 1:10; 4:8, 9; Yoh. 17:3). Wi musu hori na prakseri tu taki te sani orga bun, dan sma kan wroko bun nanga makandra èn den o frustan densrefi. Dati meki a prenspari fu gebroiki wi ten, wi krakti, a koni fu wi nanga ala den gudu di Yehovah gi wi, fu du a wroko fu en. Efu wi e go awinsi pe a hemel wagi fu Yehovah e go, dan wi e sori taki wi e du san wi e fruteri tra sma.

¹⁷ Na organisâsi fu Yehovah e yepi wi fu tan du a wani fu Gado. Memre taki a sma di e rèi a hemel wagi disi, na Yehovah. Sobun, te wi e go awinsi pe a hemel wagi fu Yehovah e go, dan wi e sori taki wi abi lespeki gi Gado èn taki wi e frutrow tapu Yehovah di de leki wan „stonbergi” gi wi (Ps. 18:31). Bijbel e pramisi: „Na Yehovah srefi o gi en pipel krakti. Na Yehovah srefi o blesi en pipel. A o meki sani waka bun gi den” (Ps. 29:11). Te wi de na ini na organisâsi fu Yehovah na ini a ten disi, dan wi e kisi wini fu a krakti nanga a freide di a e gi a pipel fu en. Iya, a no de fu taki dati wi o kisi furu blesi te wi du a wani fu Yehovah now èn fu têgo.