Jesus libi nanga diniwroko

Jesus de a libi!

TE DEN oema e si taki a grebi foe Jesus leigi, Maria Magdalena e lon gowe foe froeteri Petrus nanga Johanes. Ma den tra oema e tan, so leki fa a e sori, na a grebi. No langa a baka wan engel e sori ensrefi èn a e kari den oema foe kon na inisei.

Djaso den oema e si wan tra engel, èn wan foe den engel e taigi den: „No frede, bika mi sabi taki oenoe e soekoe Jesus di den ben spikri na wan postoe. A no de djaso, bika a kisi wan opobaka, so leki fa a ben taki. Kon loekoe a presi pe a ben e didon. Go froeteri en disipel esi-esi èn taigi den taki a ben opo baka foe dede.” So boen nanga frede èn bigi prisiri, den oema disi toe e lon gowe.

Na a ten disi, Maria feni Petrus nanga Johanes, èn a e froeteri den: „Den ben poeroe Masra foe a memregrebi èn wi no sabi pe den poti en.” Wantewante den apostel e hasti densrefi go drape. Johanes e waka moro esi — kande foe di a de moro jongoe — èn a e doro a grebi leki na fosiwan. Na a ten disi den oema gowe kaba, so taki no wan sma de ini a birti drape. Johanes e boekoendoe go na fesi, e loekoe so dôên go na ini a grebi èn a e si den doekoe, ma a e tan a dorosei.

Te Petrus e doro drape a no e draidrai, ma a e waka langalanga go na ini a grebi. A e si den doekoe di e didon drape èn so srefi a krosi di den ben gebroiki foe tai Jesus ede. Den domroe en poti na wán presi. Now Johanes e go toe na ini a grebi, èn a e bribi san Maria ben froeteri den. Ma no Petrus, no Johanes e froestan taki Jesus opo baka foe dede, ala di A ben taigi den foeroe leisi taki disi ben o pasa. Ini broeja den toe disi e drai go baka na oso, ma Maria, di drai kon baka na a grebi, e tan.

Disiten den tra oema e hasti densrefi foe froeteri den disipel taki Jesus opo baka, so leki fa den engel ben taigi den foe doe. Ala di den e lon so esi leki den kan, Jesus e miti den èn a e taki: „Odi!” Den e fadon na en foetoesei èn den e gi en grani. Dan Jesus e taki: „No frede! Go, froeteri den brada foe mi, taki den moesoe go na Galilea èn drape den sa si mi.”

A fesi, di na gronseki ben kon èn den engel ben sori densrefi, den sroedati di ben e hori wakti drape ben kon steifi èn ben kon leki dede sma. Di den ben kon kisi densrefi baka, den ben go wantewante na foto èn ben froeteri den granpriester san ben pasa. Baka di den soekoe a rai na den „owroeman” foe den djoe, den e teki a bosroiti, foe proeberi foe kibri a tori foe di den e gi den sroedati wan tjoekoe. Den e taigi den: „Taki: ’Den disipel foe en ben kon a neti èn ben foefoeroe en ala di wi ben sribi.’”

Foe di Romen sroedati kan kisi dedestrafoe efoe den e fadon a sribi na a presi pe den de foe hori wakti, meki den priester e pramisi den: „Efoe a granman kisi foe jere disi [na tori taki oenoe ben fadon a sribi], dan wi sa taki nanga en foe hari en kon na wi sei, èn wi sa sorgoe taki oenoe no abi foe broko oen ede.” Foe di na moni di gi leki tjoekoe bigi nofo, meki den sroedati e doe so leki den ben taigi den foe doe. Leki wan bakapisi foe disi, a falsi tori foe na foefoeroe di sma ben foefoeroe a dede skin foe Jesus, e panja na ala sei a mindri den djoe.

Maria Magdalena, di e tan a baka na a grebi, e sari srefisrefi. Pe Jesus ben sa kan de? Te a e boekoendoe a fesi foe loekoe go na ini a grebi, a e si den toe engel ini weti krosi, di sori densrefi baka! Wan foe den e sidon na a edesei èn a trawan na a foetoesei foe na presi pe a skin foe Jesus ben didon. „Oema, foe san-ede joe e krei?”, den e aksi.

„Den poeroe mi Masra,” Maria e piki, „èn mi no sabi pe den poti en.” Dan a e drai èn e si wan sma di e poti na aksi wantron moro: „Oema, foe san-ede joe e krei?” Èn a sma disi e aksi toe: „Soema joe e soekoe?”

Foe di a e prakseri taki a sma disi na a sma di e sorgoe foe a djari pe a grebi de, a e taigi en: „Masra, efoe joe tjari en gowe, froeteri mi dan pe joe poti en, èn mi sa teki en poeroe.”

„Maria”, a sma e taki. Èn wantewante a sabi foe na famriari fasi fa a e taki nanga en, taki a de Jesus. „Rabboni!” (san wani taki „Leriman!”) a e bari taki. Èn nanga toemoesi bigi prisiri a e graboe en hori. Ma Jesus e taki: „No hori mi moro langa. Bika mi no opo go ete na mi Tata. Ma go na den brada foe mi èn taigi den: ’Mi e opo go na mi Tata èn oenoe Tata èn na mi Gado èn oenoe Gado.’”

Maria e lon go now na a presi pe den apostel nanga den tra disipel ben kon makandra. A e poti na tori foe en na a njoensoe di den tra oema ben froeteri kaba, taki den si Jesus di kisi wan opobaka foe dede. Tokoe den man disi, di no ben bribi den fosi oema, so leki fa a e sori, no e bribi Maria toe. Mateus 28:3-15; Markus 16:5-8; Lukas 24:4-12; Johanes 20:2-18.

◆ San Maria Magdalena e doe, te a e si taki a grebi leigi èn sortoe ondrofeni den tra oema abi?

◆ Fa Petrus nanga Johanes e doe te den e si taki a grebi leigi?

◆ San den tra oema e miti te den de a pasi foe go froeteri den disipel taki Jesus opobaka?

◆ San e pasa nanga den sroedati di e hori wakti, èn san den priester e doe te den sroedati e froeteri den foe disi?

◆ San e pasa te Maria Magdalena de en wawan na a grebi, èn san den disipel e doe tapoe den sani di den oema e froeteri den?