Poti Gado na a fosi presi ini joe osofamiri libi!

ROBBY NANGA JOHANA — na trowpaar di den taki foe en ini na artikel a fesi — no ben go broko na trow. Na presi foe dati den taki foe den problema nanga wan kresten bedinari. Heri-esi a ben kon froestan taki den problema foe den, moro foeroe ben doe kon foe den bakagron foe den di de kontrari makandra.

Foe eksempel, foe di Robby ben kon foe wan osofamiri foe anoe wrokoman nanga fabriki wrokoman èn ensrefi ben wroko nanga en anoe, meki a ben wani wan steifi mamanten njanjan ibri mamanten. Johana, di ben kon foe wan osofamiri foe kantoro wrokoman, ben gi en soso kofi nanga brede. Na so wan kesekese foe mamanten njanjan ben gro kon tron wan troetroe feti!

Robby nanga Johana ben moesoe meki den takimakandra foe den kon moro betre. Ma na troetroe roetoe foe na problema foe den ben go moro dipi srefi. „Oenoe e si makandra ini a leti foe 1 Korente sma 13:4?” na bedinari ben aksi. Na bijbel tekst dati e taki: „Lobi abi langa-pasensi èn switifasi. Lobi no e djaroesoe, a no e soekoe foe prodo, no e meki ensrefi bigi.” Na tra vers e taki, taki lobi „no e handri na wan fasi di no fiti, no e soekoe en eigi belang, no e mandi. A no e memre ogri foe trawan.” Johana so boen leki Robby ben wani foe gebroiki den wortoe disi gi na matifasi foe den.

Den problema foe na trowpaar disi ben aksi na a fosi presi wan loesoe na jeje fasi. Foe di Robby nanga Johana ben wani foe hori wan boen matifasi nanga Gado, meki a tapoe foe ala sani den ben moesoe gebroiki bijbel gronprakseri èn ben moesoe froestan taki „efoe Jehovah srefi no e bow na oso, dan na foe soso den bowman foe en wroko tranga na en” (Psalm 127:1). Vers 3 te nanga 5 abi foe doe nanga a bow foe wan osofamiri. Èn na moro boen bakapisi ini a jepi foe na osofamiri foe kon kolokoe, e kon foe na poti di sma e poti Gado na a fosi presi ini na osofamiri libi. — Efeise sma 3:14, 15.

San de alamala ini a poti foe Gado na a fosi presi

Foe poti Gado na a fosi presi ini joe osofamiri libi e go krinkrin moro fara leki na Ingrisi odo: „Na osofamiri di e begi makandra e tan makandra.” Akroederi na tijdschrift Family Relations, dan foeroe sma e bribi taki „relisi e meki wan positief èn gesontoe libimakandra a mindri famiri kon moro makriki èn e meki na satisfaksi ini libi foe den memre foe en kon moro bigi.” Ma soso foe abi wan relisi a no a srefi leki foe poti Gado na a fosi presi. Foeroe sma formeel e hori na wan relisi soso foe di a de wan gwenti, wan famiri gwenti noso foe sociaal wini ede. Gado abi pikinso krakti tapoe na aladei libi foe den. Moro prenspari, no ala relisi na „a soifri fasi foe anbegi di de krin èn de sondro flaka foe a sei foe wi Gado.” — Jakobus 1:27.

Foe poti Gado na a fosi presi ini wi osofamiri libi, dan wi nanga wi lobiwan moesoe anbegi Jehovah, „na Moro Heiwan foe na heri grontapoe”, akroederi den sani di a e aksi (Psalm 83:18). Gado manpikin, Jesus Krestes, ben taki: „A joeroe e kon èn a de now, pe den troe anbegiman sa anbegi na Tata nanga jeje èn waarheid, ija, bika na Tata e soekoe den sortoe sma disi foe anbegi en. Gado na wan Jeje, èn den sma di e anbegi en, moesoe anbegi en nanga jeje èn waarheid” (Johanes 4:23, 24). Foe anbegi Jehovah Gado „nanga jeje”, dan wan ati di foeroe nanga lobi èn bribi moesoe boeweigi wi foe doe wi santa dienst gi en (Markus 12:28-31; Galasia sma 2:16). Foe anbegi Jehovah nanga „waarheid” e aksi foe wi trowe falsi fasi foe relisi èn libi doronomo akroederi en wani so leki a e kon a krin ini bijbel. Wi no man foe poti Jehovah na a fosi presi efoe wi relisi no e miti den markitiki foe en.a San na wan toe foe den? Èn fa na gebroiki foe den kan tjari wini gi joe osofamiri?

Poti Gado na a fosi presi leki trowmasra

Na ini 1 Korente sma 11:3 na bijbel e taki: „Na ede foe ibri man na Krestes; na man foe en sei na a ede foe na oema èn Gado na a ede foe Krestes.” Efoe joe na wan trowmasra, dan joe abi na frantiwortoe di Gado gi joe foe teki den moro prenspari bosroiti ini joe osofamiri. Ma disi no e gi no wan trowmasra primisi foe de leki wan basi noso wan dictator.

Na bijbel e gi trowmasra na deki-ati foe hori den firi foe den trow-oema na prakseri te den e teki bosroiti di abi krakti tapoe den. (Teki gersi Genesis 21:9-14.) Ija, den Boekoe e gi wi alamala na tranga foe ’no soso foe persoonlijk belangstelling ede e hori ai tapoe wi eigi afersi wawan, ma so srefi foe persoonlijk belangstelling ede tapoe di foe trawan’ (Filipi sma 2:2-4). Pe bijbel gronprakseri no de ini a tori, dan wan kresten trowmasra foeroe tron sa gi pasi na a wani foe en trow-oema. Foe di a abi persoonlijk belangstelling gi en, meki a sa wani de seiker toe, taki a no abi frantiwortoe pasa marki. Foe eksempel a kan jepi en nanga osowroko, spesroetoe efoe a abi wan grontapoe wroko.

Na apostel Paulus ben skrifi: „Trowmasra moesoe lobi den trow-oema leki den eigi skin. Na sma di lobi en trow-oema lobi ensrefi, bika no wan sma oiti wan ten no ben wani si en eigi skin na ai, ma a e gi en njanjan èn e boboi en, so leki Krestes e doe toe nanga na gemeente” (Efeise sma 5:28, 29). Jesus Krestes e handri nanga den memre foe na gemeente na wan lobi fasi.

Na rai foe na apostel Petrus na wan moi sani toe foe loekoe: „Oenoe trowmasra, tan libi na a srefi fasi nanga [oen trow-oema] akroederi sabi, foe di oenoe e gi en grani leki wan moro swaki patoe, na oema sma fasi, foe di oenoe de so srefi erfgenaam nanga den foe na no-froedini boenfasi foe libi, so taki nowan sani hendri den begi foe oenoe” (1 Petrus 3:7). A no moesoe meki wan sma kisi ensrefi foe froestan taki wan sani kan hendri den begi foe wan trowmasra te a no e handri en trow-oema na wan lobi fasi? Ija, wan man moesoe handri nanga en trow-oema na wan lobi fasi foe Gado jere èn piki den begi foe en.

Foe poti Gado na a fosi presi so srefi abi krakti tapoe na matifasi foe wan papa nanga en pikin. A moesoe abi dipi broko-ede foe na tanboen foe den na jeje fasi. Tokoe ini wan prenspari ondrosoekoe foe Amerkankondre, soso afoe foe den man ben taki, taki „foe teki prati ini a studie foe bijbel noso groepoe takimakandra” ben de ’na moro prenspari sani ini na gro na jeje fasi foe na osofamiri foe den.’ Den trawan ben taki foe den sortoe sani leki foe „loekoe noso arki relisi programa na telefisi noso radio” noso ’foe prakseri foe san libi wani taki’.

Ma bijbel e taigi papa: „No tergi oen pikin, ma tan kweki den ini na tranga leri èn serjoesoe froemane foe Jehovah” (Efeise sma 6:4). A mindri Jehovah Kotoigi den e froewakti foe den papa foe den teki fesi ini na osofamiri anbegi. Foe di den e hori osofamiri bijbelstudie doronomo, e fisiti kresten konmakandra èn e miti den tra sani di bijbel e aksi, meki den sortoe man disi e poti Gado na a fosi presi ini na osofamiri libi.

Poti Gado na a fosi presi leki trow-oema

Efoe joe na wan trow-oema, joe kan poti Gado na a fosi presi foe di joe e horibaka gi joe trowmasra ini en ròl leki osofamiri edeman. Na bijbel e taki: „Oen trow-oema, saka na oen trowmasra ondro, so leki a e fiti ini Masra” (Kolose sma 3:18). Disi kan de toemoesi moeilek efoe wan man no lobi foe abi takimakandra noso no de fajafaja foe teki fesi ini osofamiri anbegi. Awansi fa no fa, foe tjari den fowtoe foe en doronomo kon a fesi, noso moro takroe ete, foe kakafoetoe gi en ben sa meki na druk ini a osofamiri kon soso moro hebi.

Odo 14:1 e taki: „Na troetroe koni oema bow en oso, ma na law-wan e broko en te na gron nanga en eigi anoe.” Wàn fasi fa wan troetroe koni trow-oema kan poti Gado na a fosi presi èn ’bow en oso’ na foe saka ensrefi na ondro en trowmasra (1 Korente sma 11:3). Nanga ’na wet foe lobi-boenfasi tapoe en tongo’ a e doe ala moeiti foe no soekoe fowtoe di no de fanowdoe na en trowmasra (Odo 31:26). A e wroko tranga toe foe meki den bosroiti foe en abi boen bakapisi.

Wan tra fasi fa wan trow-oema kan poti Gado na a fosi presi na foe de wan trow-oema di e wroko tranga. Efoe a moesoe doe grontapoe wroko, dan a no de foe taki, taki kande a no sa abi na ten noso na krakti di de fanowdoe foe ondrow en oso leki fa a e wani. Tokoe a kan feti a baka foe de leki na „bekwaam trow-oema” di na bijbel e taki foe en: „A e hori ai tapoe na fasi fa sani e waka ini en osofamiri, èn na brede foe lesifasi a no e njan.” — Odo 31:10, 27.

Moro leki ala tra sani, wan trow-oema moesoe hori na anbegi foe Gado na a fosi presi ini en libi. Foeroe sma di e fisiti wan Kownoekondrezaal foe Jehovah Kotoigi foe na fosi leisi, e taki fa den pikin e loekoe so moi èn krin. Na wroko foe wan trow-oema ini a tori disi, abi toemoesi foeroe waarde. Ma a moesoe wroko so srefi foe hori a jejefasi foe en nanga jepi foe begi, studie èn dienst gi Gado.

Poti Gado na a fosi presi leki jongoewan

Wan artikel na ini Adolescent Counselor e taki: „Pikin-nengre lobi foe kweki fasi èn denki di meki den e prei basi gi den papa nanga mama. . . . Foe di den gro ini wan libimakandra di e poti krakti a tapoe èn e gi glori na a gi foe wantewante satisfaksi na den lostoe èn a kon goedoe na skin fasi, meki den tini e kweki wan ’Mi wani en now’-fasi.” Efoe joe na wan jongoewan, dan na dati na joe fasi?

Kolose sma 3:20 e taki: „Oen pikin, gi jesi na oen papa nanga mama ini ala sani, bika disi de switi na Masra.” Wan jongoe sma di e si na sortoe foe gi jesi disi leki wan sani di Gado e aksi, sa wroko makandra nanga en papa nanga mama. Foe eksempel, a no sa wiswasi den na wan kibri fasi, foe di a abi demakandra nanga skoro mati di den no e feni boen; so srefi a no sa proeberi nanga triki foe abi krakti tapoe en papa noso en mama, foe doe en eigi wani (Odo 3:32). Na presi foe dati, iniwan jongoe sma di e poti Gado na a fosi presi ini en libi sa saka na ondro a lobi tiri foe papa nanga mama.

Hori Gado na a fosi presi!

Awansi sortoe presi wi abi ini a famiri banti, wi moesoe poti Gado na a fosi presi ini wi libi èn kweki wan krosibei matifasi nanga en. Joe nanga joe osofamiri e doe dati?

Ini den „lasti dei” disi, wi alamala abi foe doe nanga „moeilek ten” (1 Timoteus 3:1-5). Tokoe a kan, foe sani go boen na jeje fasi èn foe pasa libilibi na kaba foe na seti foe sani disi (Mateus 24:3-14). Foe di joe e handri akroederi soifri sabi foe na bijbel, meki joe nanga joe osofamiri kan abi na howpoe foe têgo libi na ini wan paradèis grontapoe (Lukas 23:43; Johanes 17:3; Openbaring 21:3, 4). Ija, dati kan de so efoe joe poti Gado na a fosi presi ini joe osofamiri libi.

[Foetoewortoe]

[Prenki na tapoe bladzijde 5]

Sma abi dipi warderi gi wan bekwaam trow-oema

[Prenki na tapoe bladzijde 7]

Na bijbel e gi trowmasra na deki-ati foe teki fesi ini na osofamiri anbegi