Jesus libi nanga diniwroko

Na a reti anoe foe Gado

A KANTI kon foe a santa jeje na a Pinksterfesa na wan boeweisi taki Jesus doro baka na hemel. A fisjoen di na apostel Stefanus e kisi sjatoe baka dati, e boeweisi toe taki Jesus doro drape. Leti bifo den e ston Stefanus kiri, foe di a gi kotoigi na wan getrowfasi, a e bari taki: „Loekoe! Mi e si hemel di e opo èn a Manpikin foe libisma e tanapoe na a reti anoe foe Gado.”

Ala di Jesus de na a reti anoe foe Gado, a e wakti a komando foe en Tata: „Go poti sma na joe ondro na mindri foe den feanti foe joe.” Ma san Jesus e doe ini a ten dati, te leki a sa opo doe wan sani kontrari den feanti foe en? A e tiri noso e de masra foe den salfoe disipel foe en, foe di a e tjari den ini a preikiwroko foe den èn e sreka den foe tron kompe-kownoe makandra nanga en ini a Kownoekondre foe en Tata, baka na opobaka foe den.

Jesus e teki foe eksempel Saulus (di sma ben kon sabi baka ten moro boen leki Paulus, a Romen nen foe en) a mindri trawan, foe meki a teki fesi ini a wroko foe a meki foe disipel na tra kondre. Ala di Saulus de fajafaja gi a Wet foe Gado, tokoe den djoe kerki tiriman kori en. Leki wan bakapisi foe disi, Saulus no wawan e feni a kiri di den kiri Stefanus boen, ma a e go toe na Damaskus nanga a primisi di a kisi foe a heipriester Kajafas, foe tjari ala bakaman foe Jesus den mansma so boen leki den oemasma di a e feni drape kon baka na Jerusalem foe sroto den. Ma te Saulus de a pasi, wan tranga faja e koti lontoe en èn a e fadon na gron.

„Saulus, Saulus, foe san ede joe e froefolgoe mi?”, wan sten e aksi, foe wan fonten di sma no kan si. „Soema na joe, Masra?”, Saulus e aksi.

„Mi na Jesus, a sma di joe e froefolgoe”, a piki de.

Jesus e froeteri Saulus, di kon breni foe a froewondroe faja, foe go na Damaskus èn foe wakti drape tapoe bodoi. Dan Jesus e sori ensrefi ini wan fisjoen na Ananias, wan foe den disipel foe en. Jesus e froeteri Ananias sani di abi foe doe nanga Saulus: „A man disi na wan patoe di mi ben froekisi foe tjari mi nen na den nâsi èn so srefi na den kownoe èn den manpikin foe Israèl”.

Ija, nanga a jepi foe Jesus Saulus (di sma sabi now leki Paulus) èn tra evangelie preikiman abi kefarlek foeroe boen bakapisi ini a wroko foe den foe preiki èn foe gi leri. So wan 25 jari na baka di Jesus sori ensrefi na en na a pasi foe go na Damaskus, dan Paulus e skrifi taki ’den e preiki a boen njoensoe na ini heri a mekisani di de na ondro hemel’.

Baka di foeroe jari moro pasa, Jesus e gi en lobi apostel Johanes wan lo fisjoen. Nanga jepi foe den fisjoen disi, di Johanes e skrifi ini a bijbelboekoe Openbaring, a e de na libi foe si, foe taki en so, fa Jesus drai go baka ini Kownoekondre makti. Johanes taki, dati den tjari en, „na ondro krakti foe santa jeje”, go na ini „a dei foe Masra”. San na a „dei” disi?

Wan finifini studie foe den bijbel profeititori, so srefi Jesus en eigi profeititori foe den lasti dei, e sori taki „a dei foe Masra” ben bigin na ini a jari 1914 di meki historia, ija, na ini a geslakti disi! Na ini 1914 Jesus drai kon baka so boen, sondro foe sma si en, sondro poebliki pranpran, ala di soso en getrow foetoeboi ben sabi taki a drai kon baka. Ini a jari dati Jehovah ben gi Jesus a komando foe go poti sma na en ondro a mindri foe den feanti foe joe!

Jesus e gi jesi na a komando foe en Tata, èn ben krin hemel poeroe Satan nanga en ogri jeje, foe di a trowe den kon na grontapoe. Baka di Johanes ben si taki disi pasa na ini wan fisjoen, a e jere wan sten na hemel di e meki bekènti: „Now a froeloesoe nanga a krakti nanga a kownoekondre foe wi Gado nanga a makti foe a Krestes foe en kon!” Ija, ini 1914 Krestes ben bigin e tiri leki Kownoe!

Fa disi na boen njoensoe gi den anbegiman foe Jehovah na hemel! Den e kisi a deki-ati: „Foe dati-ede oenoe moesoe prisiri oenoe hemel èn oenoe di e libi drape.” Ma fa na situwâsi de gi den sma di e libi na grontapoe? „Heloe foe grontapoe èn a se”, a sten na hemel e taki moro fara, „bika Didibri saka kon na oenoe, èn a abi bigi atibron, foe di a sabi taki a abi soso wan sjatoe pisiten.”

Wi de now ini a sjatoe pisi ten dati. Now den e prati sma foe go na a njoen grontapoe foe Gado noso foe kisi pori. A waarheid de, taki joe e bepaal joe eigi tamara now, nanga a fasi fa joe e doe tapoe a boen njoensoe foe Gado kownoekondre, di den e preiki foe en na a heri grontapoe na ondro a tiri foe Krestes.

Te a pratiwroko foe sma kon na wan kaba, dan Jesus Krestes sa dini leki A Sma di e teki Gado presi foe krin grontapoe foe Satan heri seti foe sani èn ala den sma di e horibaka gi dati. Jesus sa poeroe ala gadolowsoefasi ini na orlokoe di bijbel e kari Har–Magedon, noso Armagedon. Baka dati, Jesus, di baka Jehovah Gado srefi de a moro bigi Sma na ini a universum, sa graboe Satan nanga en ogri jeje èn a sa tai den doesoen jari ini wan „dipi peti”, dati wani taki, wan toestand foe inaktiviteit di joe kan teki gersi nanga dede. Tori foe den Apostel 7:55-60; 8:1-3; 9:1-19; 16:6-10; Psalm 110:1, 2; Hebrewsma 10:12, 13; 1 Petrus 3:22; Lukas 22:28-30; Kolosesma 1:13, 23; Openbaring 1:1, 10; 12:7-12; 16:14-16; 20:1-3; Mateus 24:14; 25:31-33.

◆ Pe Jesus de baka di a opo go na hemel, èn san a e wakti?

◆ Tapoe soema Jesus e tiri baka di a opo go na hemel, èn fa a tiri foe en de foe si?

◆ Oten na „dei foe Masra” bigin, èn san ben pasa na a bigin foe na dei dati?

◆ Sortoe prati wroko di e pasa ini a ten disi abi krakti tapoe ibri wan foe wi, èn tapoe sortoe fondamenti a pratiwroko e pasa?

◆ San sa kon a baka, te a prati wroko kon na wan kaba?