Joe e memre disi ete?

Joe ben feni taki den uitgave foe Na Waktitoren foe den moen di pasa, ben abi praktis waarde gi joe? Foe san ede dan joe no e loekoe san joe man memre ete nanga jepi foe san e kon now:

▫ San ben de a moro prenspari sani di Jesus ben abi na prakseri nanga a dresi di a ben dresi sma? Disi ben de leki wan prenki, foe gi na bigi ipi sma di gersi skapoe a deki-ati ini a ten disi, taki sma di pasa Armagedon libilibi sa meki kon betre no langa baka Armagedon (Jesaja 33:24; 35:5, 6) — 1/12, bladzijde 25.

▫ Foe san ede a de fanowdoe foe den memre wi doronomo: „Horidoro ini begi”? (Romesma 12:12) A kwinsi èn den frantiwortoe foe a libi kan de so hebi a wi tapoe, taki wi kan frigiti foe begi. Noso problema kan de so foeroe èn meki wi tapoe foe de nanga prisiri ini a Kownoekondre howpoe èn srefi kan meki wi tapoe foe begi. So boen wi abi jepisani fanowdoe foe memre wi èn di e gi wi deki-ati foe begi èn foe kon srefi moro krosibei foe Jehovah. — 1/12, page 27.

▫ Fa falsi profeiti ini a ten disi de neleki den wan ini den dei foe Jeremia? Ini a ten disi falsi profeiti e taki, dati den e taki gi Gado, ma den e foefoeroe den wortoe foe Gado, foe di den e leri sma sani di e poeroe a prakseri foe den foe san bijbel taki troetroe. Disi de spesroetoe troe ini a tori foe a leri foe a Kownoekondre (Jeremia 23:30) — 1/2, bladzijde 4.

▫ San a wani taki te wan sma e dopoe na a nen foe a santa jeje? Disi wani taki, dati a sma di e dopoe e teki a bosroiti foe wroko makandra nanga a jeje, èn no sa doe noti di o hendri a wroko di a jeje e wroko na mindri Jehovah pipel. Foe dati ede a sma dati moesoe wroko makandra nanga a getrow èn koni srafoe èn nanga a seti di wi abi foe den owroeman ini a gemeente (Hebrewsma 13:7, 17; 1 Petrus 5:1-4) — 1/2, bladzijde 20.