Jesus libi nanga diniwroko

Jesus e kaba ala a wroko foe en

FA A sa de wan reide foe e prisiri te a Fetiman-Kownoe Jesus Krestes poeroe Satan èn en onregtfardiki grontapoe! A doesoen jari tiri foe vrede foe Jesus e bigin te foe kaba!

Ondro a tiri foe Jesus nanga en kompe kownoe, den sma di pasa Armagedon libilibi, sa krin den broko pisi di tan abra foe a regtfardiki feti dati. A de krin, taki den sma foe grontapoe di sa tan na libi, sa kisi pikin toe foe wan pisiten, èn den disi sa abi prati ini a switi wroko foe meki grontapoe tron wan toemoesi moi djari di gersi wan park.

Baka wan pisiten Jesus sa tjari miljoenmiljoen sma di joe no kan teri, kon foe den grebi foe njanboen foe a toemoesi moi Paradijs. A sa doe disi leki wan kontroe foe en eigi pramisi: „A joeroe e kon pe ala sma di de na ini den memregrebi sa . . . kon a doro.”

Wan foe den sma di sa de a mindri den wan di Jesus sa opobaka, de a fositen ogriman di ben dede sei Jesus na a pina-oedoe. Joe e memre taki Jesus ben pramisi en: „Foe troe mi e taigi joe tide, joe sa de nanga mi ini a Paradijs.” Nôno, a man dati no sa go na hemel foe tiri leki kownoe nanga Jesus, èn Jesus no sa tron wan libisma baka èn libi nanga en na ini a Paradijs na grontapoe. Na presi foe dati, Jesus sa de nanga a fositen ogriman na a fasi disi taki a sa gi en wan opobaka foe libi na ini a Paradijs èn sa sorgoe taki a sa kisi den fanowdoe foe en na skin fasi èn na jeje fasi, so leki den e prenki disi tapoe a bladzijde disi.

Prakseri foe disi nomo! Na ondro a lobi sorgoe foe Jesus, a heri libisma famiri — den sma di pasa Armagedon libilibi, den pikin foe den, èn den miljardmiljard sma di sa opobaka foe dede èn di gi en jesi — sa gro kon doro a libisma volmaaktifasi. Jehovah sa tan na jeje fasi nanga a libisma famiri, nanga jepi foe en kownoe Manpikin, Jesus Krestes. „Èn”, so leki Johanes ben jere a sten foe hemel e taki, „a sa figi poeroe ala watra-ai na den ai foe den, èn dede no sa de moro, srefi sari noso barikrei noso pen no sa de moro”. No wan sma na grontapoe sa pina noso de siki.

Na a kaba foe Jesus doesoen jari tiri, a situwâsi sa de neleki fa Gado ben abi biginbigin na prakseri di a ben taigi a fosi libisma paar, Adam nanga Eva, foe kon foeroe èn foe foeroe grontapoe. Ija, grontapoe sa kon foeroe nanga wan regtfardiki geslakti foe volmaakti libisma. Disi sa de so foe di ala sma sa kisi den winimarki foe Jesus loesoe ofrandi. Dede di ben kon foe di Adam sondoe, no sa de moro!

Na so fasi Jesus sa kaba ala sani di Jehovah ben aksi en foe doe. Foe dati-ede a sa gi a Kownoekondre èn a libisma famiri, di kon volmaakti, abra na en Tata, na a kaba foe a doesoen jari. Gado sa loesoe Satan nanga en ogri jeje foe a dipi peti foe inaktiviteit di joe kan teki gersi nanga dede. Nanga sortoe reide?

We, na a kaba foe den doesoen jari, moro foeroe foe den sma di sa libi na ini a Paradijs sa de sma di opobaka foe dede èn di a bribi foe den noiti kisi tesi. Fosi den ben dede, den no ben sabi den pramisi foe Gado èn foe dati-ede no ben kan sori bribi na ini en. Baka dati, baka di den kisi opobaka foe dede èn ben kisi leri foe bijbel waarheid, a ben de makriki gi den foe dini Gado na ini a Paradijs, sondro wán gens. Ma te Satan ben sa kisi na okasi foe proeberi foe hori den foe dini Gado, den ben sa tan loyaal na ondro tesi? Foe kisi piki tapoe na aksi disi, den sa loesoe Satan.

Ini na openbaring di ben gi na Johanes, den e tjari kon a krin taki baka a doesoen jari tiri foe Jesus, Satan sa abi boen bakapisi foe drai wan nomroe foe sma di wi no sabi omeni ete, foe no dini Gado. Ma dan, te a lasti tesi kon na wan kaba, Satan nanga den ogri jeje foe en, èn ala den sma di a ben kori sa kisi pori foe têgo. Na a tra sei, den sma di ben kisi tesi dorodoro èn di tan loyaal, sa tan libi foe njanboen foe den blesi foe a hemel Tata foe den foe ala ten.

A de krin, taki Jesus ben abi, èn sa tan abi, wan prenspari ròl ini a doe foe Gado glori prakseri. Fa wi kan njanboen foe wan moi tamara, leki wan bakapisi foe ala san a e doe leki Gado bigi hemel Kownoe! Tokoe, wi no kan frigiti ala den sani di a ben doe di a ben de wan libisma.

Jesus ben de klariklari foe kon na grontapoe foe leri wi foe en Tata. Boiti dati, a ben sori na ini en libi den warti eigifasi foe Gado. Wi ati e boeweigi wi, te wi e prakseri a toemoesi bigi deki-ati foe en èn en manfasi, en toemoesi bigi koni, en toemoesi boen bekwaamfasi leki leriman, a wroko foe en leki edeman di a e doe sondro foe frede, èn a safoe sari-atifasi foe en èn a froestan di a e froestan sani boen. Te wi e memre fa a ben njan hebi pina pasa marki di a ben sorgoe foe a loesoe-ofrandi, a wan enkri seti di man gi wi libi, dan foetroe a ati foe wi e foeroe nanga warderi gi en!

Foe troe, fa wi ben kon leri sabi wan aparti libisma ini a studie disi foe a libi foe Jesus! A bigi foe en de krin foe si èn a e waran wi ati. A e boeweigi wi foe taki den wortoe foe a Romen granman Pontius Pilatus: „Loekoe! A libisma!”

Te wi e teki a seti foe en loesoe-ofrandi, dan a hebi foe sondoe nanga dede di wi kisi foe Adam, kan poeroe foe wi, èn Jesus sa kan tron wi „Têgo Tata”. Ala sma di wani kisi têgo libi no moesoe teki sabi wawan foe Gado ma so srefi foe en Manpikin, Jesus Krestes. Wi howpoe taki a leisi di joe e leisi èn e studeri den tori disi, foe Jesus libi nanga diniwroko, di ben kon na wan baka a trawan, sa jepi joe foe kisi so wan sabi di e gi libi! 1 Johanes 2:17; 1:7; Johanes 5:28, 29; 3:16; 17:3; 19:5; Lukas 23:43; Genesis 1:28; 1 Korentesma 15:24-28; Openbaring 20:1-3, 6-10; 21:3, 4; Jesaja 9:6.

◆ Sortoe kolokoe grani den sma di pasa Armagedon libilibi èn den pikin foe den, sa kisi?

◆ Soema, boiti den sma di pasa Armagedon libilibi èn den pikin foe den, sa njanboen foe a paradijs èn na sortoe fasi Jesus sa de nanga den?

◆ San sa de a situwâsi na a kaba foe den doesoen jari, èn san Jesus sa doe dan?

◆ Foe san-ede den sa loesoe Satan foe a peti di no abi gron, èn san sa pasa te foe kaba nanga en èn nanga ala den sma di e waka na en baka?

◆ Fa Jesus kan tron wi „Têgo Tata”?