Plisi Jehovah foe di joe e sori boen-atifasi
„San Jehovah e aksi baka foe joe leki foe doe san de geregteghèit èn foe lobi boen-atifasi èn foe waka bescheiden nanga joe Gado?” — MIKA 6:8.
1. Foe san-ede a no moesoe froewondroe wi taki Jehovah e froewakti taki en pipel e sori boen-atifasi?
JEHOVAH e froewakti taki en pipel e sori boen-atifasi. Disi no moesoe froewondroe wi. Gado srefi de boen gi ala sma, srefi gi ogri sma di no abi tangi. Ini a tori disi Jesus Krestes ben froeteri en disipel: „Tan lobi den feanti foe joe èn doe boen èn leni sondro rente, sondro foe howpoe foe kisi wan sani baka, èn joe paiman sa bigi, èn joe sa de manpikin foe na Moro Heiwan, foe di a de boen gi den sma di no abi tangi èn den gadolowsoe sma. Tan foe kon de nanga sari-ati, neleki fa joe Tata de nanga sari-ati.” — Lukas 6:35, 36.
2. Sortoe aksi ini a tori foe boen-atifasi e froedini foe wi loekoe den?
2 Neleki fa Mika 6:8 e froeklari, dan denwan di e waka nanga Gado moesoe ’lobi boen-atifasi’. A de krin taki a e plisi Jehovah te en dienstknekti lobi boen-atifasi èn e sori disi na wan fasi di komoto foe den ati. Ma san na boen-atifasi? Sortoe winimarki a e tjari kon te sma e sori boen-atifasi? Èn fa sma kan sori na eigifasi disi?
San na boen-atifasi
3. Fa joe ben sa froeklari boen-atifasi?
3 Boen-atifasi na a eigifasi foe abi wan fajafaja belangstelling gi tra sma. Sma e sori en nanga doe di e jepi sma èn nanga switi wortoe. A wani taki foe doe boen na presi foe doe wan sani di kan doe sma ogri. Wan boen sma abi switifasi, safoefasi, firi gi tra sma èn boen maniri. A abi wan jejefasi pe a lobi gi tra sma èn a e hori den na prakseri. Èn boen-atifasi na wan pisi foe na sani foe san na agersi krosi foe ibri troe kresten meki, bika Paulus ben gi na tranga: „Weri gi joesrefi den safoe lobi foe sari-atifasi, boen-atifasi, sakafasi foe jeje, safri-atifasi èn langa-pasensi.” — Kolose sma 3:12.
4. Fa Jehovah teki fesi ini a sori foe boen-atifasi gi na libisma famiri?
4 Jehovah e teki fesi ini a sori foe boen-atifasi. Neleki fa apostel Paulus ben taki, a ben de, ’di na boen-atifasi èn na lobi gi libisma foe na sei foe wi Froeloesoeman, Gado, ben kon de foe si’, taki ’akroederi en sari-ati a ben froeloesoe wi nanga jepi foe na wasi di ben tjari wi kon na libi èn nanga a meki di santa jeje ben meki wi kon njoen’ (Titus 3:4, 5). Gado e krin, noso e ’wasi’, salfoe kresten ini na broedoe foe Jesus, foe di a e gebroiki na paiman foe na froeloesoe-ofrandi foe Krestes foe na boen foe den. Gado e meki den kon njoen toe nanga jepi foe santa jeje, „wan njoen mekisani” leki manpikin foe Gado di kon gebore njoen nanga santa jeje (2 Korente sma 5:17). A no de foe taki, dati na boen-atifasi foe Gado èn en lobi gi libisma so srefi de gi wan „bigi ipi” na a heri grontapoe, di ’wasi den krosi foe den èn meki den kon weti ini a broedoe foe na Pikin Skapoe’ (Openbaring 7:9, 14; 1 Johanes 2:1, 2). Moro fara, salfoewan èn na bigi ipi, di abi na howpoe foe libi na grontapoe, alamala de ondro na ’safoe’ tjatjari foe Jesus. — Mateus 11:30.
5. Foe san-ede wi moesoe froewakti taki denwan di Gado jeje e tjari den, e sori boen-atifasi èn switifasi gi trawan?
5 Boen-atifasi de so srefi wan pisi foe den froktoe foe Gado santa jeje, ofoe wroko krakti. Paulus ben taki: „Na froktoe foe na jeje na lobi, prisiri, vrede, langa-pasensi, switifasi, boen-ati, bribi, safri-atifasi, dwengi joesrefi. No wan wet de kontrari den sortoe sani disi” (Galasia sma 5:22, 23). So boen san wi moesoe froewakti foe denwan di Gado jeje e tjari den? Seiker den sa sori boen-atifasi gi tra sma.
6. Na sortoe fasi boen-atifasi nanga switifasi moesoe boeweigi owroeman en tra kresten foe handri?
6 Sma kan sori boen-atifasi tapoe foeroe fasi. Wi e sori boen-atifasi te wi abi sari-ati. Foe eksempel, kresten owroeman de nanga switifasi te den e sori sari-ati na wan sma di doe ogri èn di abi berow èn e soekoe foe jepi en na jeje fasi. Na eigifasi boen-atifasi di komoto foe Gado e meki opziener abi pasensi, hori tra sma na prakseri, firi sari èn abi safoefasi. A e boeweigi den foe ’handri na ipi na wan safoe fasi’ (Tori foe den Apostel 20:28, 29). Foe taki en leti, dan na froktoe foe na jeje, boen-ati, moesoe meki ala kresten abi sari-ati, abi pasensi, hori tra sma na prakseri, firi sari, abi switifasi èn de klariklari foe teki sma na den oso.
Kibri joesrefi gi fowtoe switifasi
7. Foe san-ede joe ben sa taki dati fowtoe switifasi na swakifasi?
7 Son sma e si switifasi leki swakifasi. Den e prakseri taki wan sma moesoe de nanga tranga-ati, srefi de grofoe son leisi, so taki en krakti sa wroko tapoe den firi foe tra sma. Ma sma ben taki nanga reti, taki ’de grofoe na a fasi fa wan swaki sma e doe leki a tranga’. Foe taki en leti, dan troetroe krakti de fanowdoe foe de boen èn foe abi switifasi troetroe èn foe kibri joesrefi gi fowtoe switifasi. Na switifasi di de wan froktoe foe Gado jeje no de wan swakifasi di e skeki ensrefi ini a tori foe fowtoe fasi foe tjari joesrefi. Na presi foe dati, fowtoe switifasi na wan swakifasi di e meki wan sma tapoe ai gi takroedoe.
8. (a) Ini a tori foe den manpikin foe en, dan fa Eli ben sori taki a ben slap? (b) Foe san-ede owroeman moesoe loekoe boen foe den no broko kindi gi fowtoe switifasi?
8 Eli na heipriester foe Israèl ben de slap foe strafoe den manpikin foe en, Hofni nanga Pinehas, di ben doe dienst leki priester na ini a tabernakel. Foe di den no ben de tevrede nanga na pisi foe wan ofrandi di den ben abi reti na tapoe akroederi na wet, dan den ben meki wan dinari aksi lala meti foe wan sma di ben tjari òfer, bifosi na fatoe foe na ofrandi ben tron smoko na tapoe na altari. Den manpikin foe Eli ben doe so srefi hoeroedoe nanga den oema di ben e dini na a doro foe na tabernakel. Na presi foe poeroe Hofni nanga Pinehas foe den wroko, Eli ben froemane den soso na wan swaki fasi, so taki a ben gi moro grani na den manpikin foe en leki na Gado (1 Samuèl 2:12-29). A no de foe froewondroe taki ’wortoe foe Jehovah no ben de foeroe foe jere ini den dei dati’! (1 Samuèl 3:1) So boen kresten owroeman no moesoe broko kindi gi falsi taki-go-taki-kon noso gi a sori foe fowtoe switifasi di ben kan tjari na jejefasi foe wan gemeente kon ini kefar. Troe switifasi no breni gi takroe wortoe nanga doe di e pasa den markitiki foe Gado.
9. (a) Sortoe fasi foe denki kan jepi wi foe kibri wisrefi foe broko kindi gi fowtoe switifasi? (b) Fa Jesus ben sori krakti ini a handri di a ben handri nanga kerki sma di fadon komoto na bribi?
9 Efoe wi wani kibri wisrefi gi a sori foe fowtoe switifasi, dan wi moesoe begi foe Gado jepi wi foe kisi so wan krakti so leki fa ben kon a krin ini den wortoe foe na psalm skrifiman: „Komoto na mi fesi, oen ogri sma, meki mi kan hori den gebod foe mi Gado” (Psalm 119:115). Wi moesoe waka toe baka na eksempel foe Jesus Krestes, di noiti ben meki a fowtoe foe sori fowtoe switifasi. Foe taki en leti, dan Jesus ben de troetroe switifasi ini persoon. Foe eksempel, ’a ben firi sari gi den sma, bikasi den ben piri den boeba poeroe èn ben jagi den go-kon leki skapoe sondro herder’. Foe dati-ede meki opregti sma ben firi fri foe go taki nanga Jesus, èn den ben tjari srefi den jongoe pikin foe den go na en. Èn prakseri na switifasi nanga firi foe sari di a ben sori di ’a ben brasa den pikin èn ben bigin blesi den’! (Mateus 9:36; Markus 10:13-16) Ala di Jesus ben abi switifasi, tokoe a ben hori krakti na san ben de reti ini den ai foe en hemel Tata. Jesus no ben tapoe ai noiti gi takroedoe; a ben abi na Gado-gi krakti foe kroetoe den hoigri kerki fesiman. Na ini Mateus 23:13-26 foeroe tron baka a ben taki den wortoe: „Heloe foe oenoe, oen sabiman foe Boekoe nanga Fariseiman, oen hoigri sma!” Ibri leisi Jesus ben gi wan reide foe na kroetoe foe Gado.
Boen-atifasi abi foe doe nanga lobi
10. Fa den disipel foe Jesus e sori boen-atifasi èn lobi gi kompe bribiman?
10 Ini a tori foe den bakaman foe en, Jesus ben taki: „Nanga disi ala sma sa sabi taki oenoe de mi disipel, efoe oenoe abi lobi gi makandra” (Johanes 13:35). Èn san na wan pisi foe na lobi di e meki sma kon sabi Jesus troe disipel? Paulus ben taki: „Lobi abi langa-pasensi èn switifasi” (1 Korente sma 13:4). Foe abi langa-pasensi nanga switifasi wani taki foe froedrage den onvolmaaktifasi nanga fowtoe foe tra sma, neleki fa Jehovah e doe dati (Psalm 103:10-14; Rome sma 2:4; 2 Petrus 3:9, 15). Kresten lobi èn boen-atifasi so srefi de foe si te kompe kresten e miti nanga pina na wan presi a grontapoe. Ala di kresten di e libi na wan tra presi e doe wan sani tapoe dati nanga moro leki „lobi foe libisma”, dan den e sori brada lobi foe di den e gi sani na skinfasi foe jepi den sortoe anbegiman disi foe Jehovah. — Tori foe den Apostel 28:2.
11. San na lobi boen-atifasi akroederi den Boekoe?
11 Boen-atifasi abi foe doe nanga lobi ini den wortoe „lobi boen-atifasi”, di e gebroiki foeroe tron na ini den Boekoe. Disi na boen-atifasi di e komoto foe loyaal lobi. Na Hebrew wortoe di ben tjari kon abra leki „lobi boen-atifasi” (cheʹsedh) wani taki moro leki safoe notisi. A de boen-atifasi di na wan lobi fasi e tai ensrefi na wan sani te leki a doro na marki foe en ini a tori dati. Na lobi boen-atifasi foe Jehovah, noso loyaal lobi, de foe si na difrenti fasi. Foe eksempel, a de foe si ini den doe foe en foe fri èn kibri sma. — Psalm 6:4; 40:11; 143:12.
12. Foe san den dienstknekti foe Jehovah kan de seiker te den e begi foe kisi jepi noso fri?
12 So boen a no de foe froewondroe taki na lobi boen-atifasi foe Jehovah e hari sma kon na en! (Jeremia 31:3) Te den kotrow dienstknekti foe Gado abi fri noso jepi fanowdoe, dan den sabi taki en lobi boen-atifasi na foe troe loyaal lobi, di no sa libi den. Foe dati-ede den kan begi ini bribi, neleki na psalm skrifiman di ben taki: „Foe mi sei, tapoe joe lobi boen-atifasi mi froetrow; meki mi ati breiti ini joe froeloesoe” (Psalm 13:5). Foe di na lobi foe Gado de loyaal, meki den dienstknekti foe en no e froetrow foe soso tapoe en lobi boen-atifasi. Te den e begi foe kisi jepi ofoe fri, dan den abi na seikerfasi disi: „Jehovah no sa trowe en pipel, èn a no sa gowe libi den sma di de foe en.” — Psalm 94:14.
Paiman di e kon foe boen-atifasi
13, 14. Foe san-ede wan sma di abi boen-atifasi nanga switifasi abi loyaal mati?
13 Foe di den dienstknekti foe Jehovah e waka baka en meki den ’e sori lobi boen-atifasi nanga sari-ati gi makandra’ (Sakaria 7:9; Efeise sma 5:1). „A sani ini grontapoe sma di sma e angri foe en na en lobi boen-atifasi”, èn a sma di e sori na eigifasi disi, e kisi foeroe pai (Odo 19:22). San na wan toe foe den disi?
14 Boen-atifasi e meki wi sabi san fiti foe taki èn foe doe ini wan situwâsi [a e meki wi abi takt] èn na so fasi e jepi wi foe tan abi boen matifasi nanga trawan. Wan sma di abi takt e taki èn e doe sani, noso e handri moeilek situwâsi na wan fasi pe a e hori tra sma na prakseri èn no e ati den firi. Ala di sma e poti wan „ogri-ati sma” a wan sei, ’wan man foe lobi boen-atifasi e handri nanga en eigi sili tapoe wan fasi di e pai’ (Odo 11:17). Sma e tan farawe foe ogri-ati sma, ma wan sma di e sori lobi boen-atifasi na den e hari den kon. Foe dati-ede meki wan sma di abi boen-atifasi nanga switifasi abi loyaal mati. — Odo 18:24.
15. Sortoe bakapisi boen-atifasi nanga switifasi kan abi ini wan osofamiri di prati na a sei foe relisi?
15 Wan kresten oema di abi wan trowpatna di no de na bribi kan hari en kon na Gado waarheid nanga so wan eigifasi leki boen-atifasi. Bifo a ben leri na waarheid èn ben weri „na njoen sma, di ben meki akroederi na wani foe Gado ini troe regtfardikifasi èn loyaalfasi”, a no ben abi switifasi kande, kande a ben soekoe trobi srefi (Efeise sma 4:24). Efoe en masra ben sabi bepaalde odo, dan a ben sa kan agri taki ’den trobi foe wan oema de leki wan leki daki di e jagi wan sma gowe’ èn ’a moro betre foe tan ini wan sabana kondre leki nanga wan oema di e soekoe trobi èn na sei dati mandimandi’ (Odo 19:13; 21:19). Ma now na krin fasi foe tjari ensrefi èn a dipi respeki foe na kresten oema, makandra nanga den sortoe eigifasi leki boen-atifasi èn switifasi, kan jepi kande foe wini en trowpatna gi a troe bribi (1 Petrus 3:1, 2). Ija, disi kan de wán paiman gi en boen-atifasi.
16. Fa wi kan kisi winimarki foe boen-atifasi èn switifasi di sma e sori wi?
16 Boen-atifasi di sma e sori wi kan abi winimarki gi wi, foe di a e meki wi firi moro sari gi sma èn e meki wi gi sma pardon moro. Foe eksempel, efoe wi ben sa abi jepi fanowdoe na jeje fasi èn den ben handri nanga wi na wan switi èn safoe fasi, dan disi no ben sa meki wi abi na firi foe doe so toe nanga tra sma? We, sma kan froewakti switi èn safoe fasi foe handri foe man di bekwaam na jejefasi, bika Paulus ben skrifi: „Brada, srefi efoe wan sma doe wan fowtoe bifo a kisi ensrefi, dan oenoe di abi jeje eigifasi, e proeberi foe meki so wan sma kon boen baka ini wan jeje foe safri-atifasi, ala di ibriwan foe oenoe e poti ai tapoe ensrefi, foe tesi no moesoe miti oenoe toe” (Galasia sma 6:1). Brada di den poti leki owroeman, e taki na wan safri-ati fasi èn switi fasi te den e proeberi foe jepi kompe bribiman di meki fowtoe. Ma awasi wi ben kisi na sortoe switi jepi disi noso no ben kisi en, san Gado e froewakti foe ala denwan di e dini en? Ala kresten moesoe sori switifasi gi trawan èn moesoe gi jesi na a rai foe Paulus: „Sori switifasi gi makandra, nanga safoe sari-ati, gi makandra pardon fri, so leki Gado so srefi e gi oenoe pardon fri nanga jepi foe Krestes” (Efeise sma 4:32). A e taki foe ensrefi taki efoe wan sma ben gi wi pardon, noso den ben jepi wi na wan switi fasi foe komoto ini wan moeilekhèit na jeje fasi, dan disi ben sa moesoe meki na man di wi man foe gi sma pardon, noso foe firi sari gi sma, èn foe sori boen-atifasi, gro.
Warderi a no-froedini boen-atifasi foe Gado
17. Foe di wi de sondari sensi di wi ben gebore, dan foe sortoe boen-atifasi wi moesoe de spesroetoe tangi?
17 Foe di wi alamala ben gebore leki sondari di froedini foe dede, dan tokoe wan boen-atifasi de di wi alamala moesoe de spesroetoe grantangi foe dati. Dati na a no-froedini boen-atifasi foe Jehovah Gado. Foe sondari kon fri foe na kroetoe foe dede èn foe den froeklari den regtfardiki de wan boen-atifasi di den no froedini kwetikweti. Paulus, di ben taki foe na no-froedini boen-atifasi foe Gado 90 leisi na ini en 14 brifi di skrifi nanga jepi foe santa jeje, ben taigi kresten na ini a Rome foe owroeten: „Ala sma sondoe èn no e doro na glori foe Gado, èn a de leki wan fri presenti taki nanga en no-froedini boen-atifasi den e froeklari den regtfardiki nanga jepi foe na froeloesoe nanga na loesoeprèis di Krestes Jesus ben pai” (Rome sma 3:23, 24). Fa wi moesoe warderi na no-froedini boen-atifasi di Jehovah Gado ben sori!
18, 19. Fa wi kan kibri wisrefi foe misi na marki foe na no-froedini boen-atifasi foe Gado?
18 Efoe wi no sori warderi, wi ben sa kan misi na marki foe na no-froedini boen-atifasi foe Gado. Ini a tori disi Paulus ben taki: „Wi de foe dati-ede boskopoeman ini a presi foe Krestes, neleki Gado ben begi oenoe tranga nanga jepi foe wi. Leki sma di e teki presi gi Krestes wi e begi: ’Kon boen baka nanga Gado.’ Na sma di no ben sabi sondoe, a ben meki a de sondoe gi wi, so taki nanga jepi foe en wi ben kan tron na regtfardikifasi foe Gado. Foe di wi e wroko makandra nanga en, wi e begi oenoe toe foe no teki na no-froedini boen-atifasi foe Gado èn misi en marki. Bika a e taki [na ini Jesaja 49:8, Septuaginta]: ’Ini wan ten foe foe teki sma, mi ben jere joe, èn ini wan dei foe froeloesoe, mi ben jepi joe.’ Loekoe! Now spesroetoe na a ten foe teki sma. Loekoe! Now na a dei foe froeloesoe. Na no wan enkri fasi wi e gi reide foe sma naki foetoe, so taki sma no kan feni fowtoe na wi diniwroko, ma na ibri fasi wi e rikomanderi wisrefi leki Gado dinari” (2 Korente sma 5:20–6:4). San Paulus ben abi ini prakseri?
19 Salfoe kresten de ’hei’ boskopoeman di e teki presi gi Krestes, èn na bigi ipi de en ’gewoon’ boskopoeman. Makandra den e gi sma tranga foe kon boen baka nanga Gado foe den kisi froeloesoe. Paulus no ben wani taki wan sma ben sa kisi na no-froedini boen-atifasi foe Jehovah Gado nanga jepi foe Jesus Krestes èn misi na marki foe en. Dati ben kan pasa efoe wi ben misi foe doe na wroko di na no-froedini boen-atifasi dati ben meki wi kon boen gi dati. Te wi abi wan boen matifasi nanga Gado leki denwan di kon boen baka nanga en, dan wi no sa kisi en no-froedini boen-atifasi foe soso efoe wi e doe ’na diniwroko foe na verzoening, namkoe taki Gado nanga jepi foe Krestes ben e verzoen wan grontapoe nanga ensrefi’ (2 Korente sma 5:18, 19). Wi sa sori na moro bigi boen-atifasi gi trawan so srefi foe di wi jepi den foe kon boen baka nanga Gado.
20. San wi sa loekoe na ini a tra artikel?
20 Den dienstknekti foe Jehovah e gebroiki na ten èn den sani foe den di den abi ini doe foe switifasi te den e soekoe foe jepi sma na jeje fasi nanga jepi foe na kresten diniwroko. Ma san wi kan leri foe eksempel na ini a bijbel pe switifasi èn boen-atifasi ben de a wroko? Meki wi loekoe wan toe foe disi na ini a tra artikel èn so srefi tra fasi foe plisi Jehovah foe di wi e sori boen-atifasi.
Fa joe ben sa piki?
◻ San na boen-atifasi?
◻ Fa wi kan kibri wisrefi foe broko kindi gi fowtoe switifasi?
◻ Foe san-ede na pipel foe Jehovah kan froetrow tapoe en lobi boen-atifasi?
◻ San na wan toe foe den paiman foe boen-atifasi nanga switifasi?
◻ Foe di wi e doe san, meki wi no sa misi na marki foe na no-froedini boen-atifasi foe Gado?
[Prenki na tapoe bladzijde 23]
Boen-atifasi e meki kresten owroeman abi switifasi, de nanga pasensi, hori tra sma na prakseri èn firi sari
[Prenki na tapoe bladzijde 25]
Na boen-atifasi foe wan kresten oema kan jepi foe wini en trowpatna gi a troe bribi
[Prenki na tapoe bladzijde 27]
Wi kan sori trawan na moro bigi boen-atifasi foe di wi e jepi den foe kon boen baka nanga Gado