Sori switifasi ala ten

„NA A switifasi di den Kresten brada nanga sisa sori gi mi, naki mi ati”, na so Lisa ben taki.a A ben e taki fu a sani di hari en kon na a waarheid. Na so a ben de tu nanga Anne di ben taki: „Na a bigin, a no den sani di den Kotoigi ben e leri mi hari mi kon na a waarheid, ma na a switifasi di den ben sori gi mi.” Now, ala den tu sisa disi lobi leisi Bijbel èn den lobi denki dipi fu den sani di den e leisi. Ma na a switifasi di den brada nanga sisa ben sori gi den ben abi furu krakti na den tapu.

Fa wi kan sori switifasi gi trawan? Wi o taki fu tu fasi fa wi kan du dati: nanga den sani di wi e taki èn den sani di wi e du. Baka dati wi o luku gi suma wi musu sori switifasi.

TAKI NA WAN SWITI FASI

A koni wefi di Odo kapitel 31 e taki fu en, abi „a wèt fu bun-ati” na tapu en tongo (Odo 31:26). Disi wani taki dati a wefi disi e taki na wan switi fasi. A e luku bun san a e taki èn fa a e taki. A bun tu te masra nanga papa e taki na wan switi fasi. Furu papa nanga mama sabi heri bun taki te den e taigi den pikin fu den hati sani, dan a sani dati no bun gi den pikin. Efu papa nanga mama e taki grofu nanga den pikin fu den èn den no e hori den firi fu den na prakseri, dan den pikin no o wani arki den. Dati meki te papa nanga mama e taki na wan switi fasi, dan a o moro makriki gi den pikin fu den fu gi yesi na den.

Ma awinsi yu no abi pikin, toku yu kan leri fu taki na wan switi fasi. A fosi pisi fu Odo 31:26, e sori fa wi kan du dati. Drape skrifi: „Te a e opo en mofo, a e taki nanga koni.” Disi wani taki dati wi musu luku bun san wi e taki èn fa wi e taki. A bun te wi e aksi wisrefi: ’A sani di mi o taki o meki sma kisi atibron, noso a o meki den firi moro bun?’ (Odo 15:1) Iya, a de wan koni sani fu denki fosi wi taki wan sani.

Wan tra odo e taki: „Sma de di e taki sani sondro fu denki, neleki na dyuku den e dyuku trawan nanga wan feti-owru” (Odo 12:18). Te wi e prakseri bun fa den sani di wi e taki èn fa a fasi fa wi e taki abi krakti tapu trawan, dan dati o yepi wi fu no taki sani sondro fu denki. Iya, te wi e du muiti fu sori switifasi, dan a no o pasa so makelek taki wi e taki grofu, noso taki wi e taki sani di e hati trawan (Ef. 4:31, 32). Wi no o denki takru fu trawan èn wi no o taki sani tu di no e gi trawan deki-ati. Na presi fu dati wi o taki na wan switi fasi èn wi o taki sani di e meki trawan firi bun. Na dati wi e leri fu Yehovah te wi e luku fa a ben gi en futuboi Elia deki-ati di a ben frede. Na engel di ben e taki gi Yehovah ben taki nanga „wan tiri, safri sten” (1 Kow. 19:12). Ma efu wi wani sori switifasi gi trawan, dan dati no wani taki nomo dati wi musu taki na wan switi fasi. Wi musu du sani tu fu yepi trawan. Fa wi kan du dati?

TE WI E SORI SWITIFASI GI TRAWAN DAN DATI E GI DEN DEKI-ATI

Wi e teki na eksempre fu Yehovah te wi e taki na wan switi fasi èn te wi e du bun gi trawan (Ef. 4:32; 5:1, 2). Lisa, di wi ben taki fu en kaba, e fruteri fa den Kotoigi sori switifasi gi en. A e taki: „Di wi osofamiri ben musu froisi wantewante, dan tu trowpaar na ini a gemeente teki vrij fu wroko fu yepi wi froisi. Na a ten dati mi no ben e studeri Bijbel srefi ete!” Ma den bun sani di den Kotoigi du gi Lisa, meki taki a bigin studeri Bijbel.

Anne, di kari na a bigin fu na artikel, ben e warderi a bunfasi tu di den Kotoigi ben sori gi en. A e taki: „A fasi fa grontapusma ben e libi nanga mi, meki taki mi no ben e frutrow sma moro.” A e taki moro fara: „Di mi miti den Kotoigi, dan mi no ben e frutrow den tu. Mi ben aksi misrefi: ’San den wani nanga mi?’ Ma fu di a sisa di ben e studeri Bijbel nanga mi ben e sori switifasi gi mi, meki mi bigin frutrow en.” Fa a sani disi yepi Lisa? A e taki: „Bakaten, mi bigin poti moro prakseri na den sani di mi ben e leri.”

A moi fu si taki den sani di sma na ini a gemeente ben du fu yepi Lisa nanga Anne, naki den ati trutru. Na a sani dati meki taki den ben wani kon sabi a waarheid. A switifasi di a gemeente sori gi den, yepi den fu bigin frutrow Yehovah nanga en pipel.

SORI SWITIFASI NELEKI GADO

Gi son sma a kan makelek fu taki na wan switi fasi èn fu lafu switi nanga trawan, fu di na so den kweki. A moi te sma man du den sortu sani dati. Ma efu wi e du den sani dati soso fu di wi kweki so noso fu di wi de so, dan a no abi fu de so ete taki wi e sori switifasi neleki Gado.​—Luku Tori fu den apostel 28:2.

Trutru switifasi na wan fu den fasi di a yeye fu Gado e meki sma kon kisi (Gal. 5:22, 23). Disi wani taki dati wi musu meki a santa yeye fu Gado abi krakti tapu a denki fu wi èn tapu den sani di wi e du. Na so wi o man de leki Yehovah nanga Yesus. Èn neleki Yesus, wi e broko wi ede trutru nanga trawan. A lobi di wi abi gi Yehovah èn gi tra sma, e meki taki wi wani sori switifasi gi trawan. Disi o meki taki te wi e sori switifasi, dan wi o du dati nanga wi heri ati èn Gado o feni wi bun.

GI SUMA WI MUSU SORI SWITIFASI?

Kande a makelek gi wi fu sori switifasi gi den sma di du bun gi wi noso gi den sma di wi sabi (2 Sam. 2:6). Wan fasi fa wi kan du dati, na fu taigi den tangi (Kol. 3:15). Ma fa a de te wi feni taki wan sma no e frudini en taki wi sori switifasi gi en?

Prakseri a sani disi: Nowan sma man sori switifasi leki Yehovah èn a Wortu fu en e leri wi fu san ede a prenspari fu sori a fasi disi. Den Kresten Griki buku fu Bijbel e taki furu leisi fu a switifasi di Gado e sori. Fa Yehovah e sori switifasi gi wi?

Prakseri den milyunmilyun sma di Yehovah sori switifasi gi. A gi den san den abi fanowdu fu man tan na libi (Mat. 5:45). Fu taki en leti, fosi libisma kon sabi Yehovah, a ben sori switifasi kaba gi den (Ef. 2:4, 5, 8). Fu eksempre, a gi a moro bun sani di a ben abi, en wan-enkri Manpikin, fu frulusu ala libisma. Na apostel Paulus ben skrifi taki Yehovah sorgu gi a lusu-paiman èn na so a „sori wi bun-ati pasa marki” (Ef. 1:7). Boiti dati, aladi wi e sondu èn wi e du sani di e meki Yehovah firi sari, toku a e tan gi wi leri èn a e tiri wi. Den rai nanga den wortu fu en de leki „alen di e fadon safri” (Deut. 32:2). Noiti wi o man pai Yehovah baka gi a switifasi di a e sori gi wi. Èn wi sabi taki efu Yehovah no ben sori switifasi gi wi, dan wi no ben o abi wan howpu.​—Luku 1 Petrus 1:13.

A no de fu taki dati a switifasi di Yehovah e sori gi wi e gi wi deki-ati èn a e meki taki wi e kon lobi en. Dati meki wi no musu sori switifasi gi spesrutu sma nomo, ma wi musu du muiti fu de leki Yehovah èn fu sori switifasi ala ten (1 Tes. 5:15). Te wi e kon abi a gwenti fu sori switifasi gi trawan, dan wi o de leki wan faya di e waran sma tapu wan kowru dei. Wi o de wan trowstu gi den famiriman fu wi, gi den brada nanga sisa fu wi, den sma na wi wrokope, den pikin na skoro èn gi den birtisma fu wi.

Prakseri den sma na ini yu famiri noso na ini a gemeente di o kisi wini fu a switifasi di yu e sori gi den. Kande wan sma na ini yu gemeente abi yepi fanowdu fu sorgu gi en oso noso gi en dyari. Noso kande den abi wan sma fanowdu fu go na wenkri gi den ala wiki. Boiti dati, te yu e miti wan sma na ini a preikiwroko di abi yepi fanowdu, dan yu denki taki yu kan du wan sani fu yepi en?

Meki a de so taki wi e taki èn du sani na wan switi fasi neleki Yehovah.