Jehovah en boen-ati di de pasa marki
„Fa joe boen-ati, di joe ben poti leki wan goedoe gi den di e frede joe de pasa marki!” — PSALM 31:19.
1, 2. (a) Sortoe bigi wroko Jehovah ben doe langa tan pasa kaba? (b) Fa Jehovah ben taki foe na bakapisi foe en wroko foe meki sani?
WAN ten ben de, di Gado ben bigin meki ’hemel leki en kownoestoeroe èn grontapoe leki en foetoebangi’ (Jesaja 66:1). Na wortoe foe Gado no e tjari kon a krin oten disi ben feni presi. A e froeteri nomo: „Ini a bigin Gado ben meki hemel nanga grontapoe” (Genesis 1:1). Na ini a pisiten di Gado ben meki sani, a ben meki miljoenmiljoen groepoe stari di joe no kan teri, èn foeroe foe den ben abi miljardmiljard stari na ini. Krosibei foe a lanki foe wan foe den groepoe stari dati wan krin stari ben de pe wan nomroe foe doengroe planeet nanga moen, di ben de moro pikin te joe ben sa teki den gersi nanga a stari dati, ben drai lontoe en. Wan foe den ben kon kisi a nen: Grontapoe. Grontapoe ben de notinoti, te joe teki en gersi nanga den bigi stari di e skèin. Tokoe a ben de a planeet disi di Jehovah ben abi na prakseri foe de en foetoebangi.
2 So boen Jehovah ben poti en krakti foe meki sani go na tapoe a planeet Grontapoe. „Na fosigeborewan foe ala mekisani” ben de na en sei leki wan Meester Wrokoman ala di a pikin, doengroe sani disi ben kon kenki ini na pisiten foe siksi langa meki-„dei”. A ben tron, foe taki en na wan agersi fasi, wan rostoepresi di fiti, gi den foetoe foe Gado (Kolose sma 1:15; Exodus 20:11; Odo 8:13). Dja Gado ben abi na prakseri foe poti wan njoen sortoe foe libi di abi froestan: libisma. Den ben poti na fosi libisma paar, di ben meki foe elementi di joe kan feni na ini gron, na ini wan moi kontren di gersi wan paradijs (Genesis 1:26, 27; 2:7, 8). So volmaakti, so moi na bakapisi ben de te foe kaba foe na kefarlek moi mekisani disi, taki bijbel e sori krin san ben de den firi foe Gado na a mamanten — na lasti pisi — foe na di foe siksi dei di a ben meki sani: ’Gado ben si ala san a ben meki èn loekoe! a ben de heri boen’. — Genesis 1:31.
Na boen-ati foe Gado
3. Sortoe aparti eigifasi foe Gado de foe si ini en mekisani?
3 Doesoendoesoen jari a baka, wan bakapikin foe na fosi libisma paar dati ben loekoe go a baka na a ten di Gado ben meki sani èn a ben skrifi: „Gado eigifasi di wi no kan si, de krin foe si foe sensi a meki foe grontapoe, foe di joe kan si den nanga jepi foe den sani di ben meki, srefi en têgo krakti nanga Gadofasi” (Rome sma 1:20). Ija, na boen di grontapoe nanga den mekisani na en tapoe ben boen dorodoro ben de foe troe wan toemoesi moi sori foe Gado eigifasi di joe no man si — èn Gado boen-ati, di de pasa marki, seiker no de na moro mendri prenspariwan. Fa a e fiti foe dati-ede, taki Gado ben meki bekènti taki ala sani di a ben meki ben boen! — Psalm 31:19.
4, 5. San na boen-ati?
4 Boen-ati na a di foe siksi pisi foe na froktoe foe Gado jeje, di na apostel Paulus e taki foe en na ini Galasia sma 5:22. Den studie di wi ben doe a fesi na ini a tijdschrift Na Waktitoren, ben taki foe den fosi feifi froktoe foe na jeje èn den ben sori o prenspari den froktoe disi de te sma e kweki wan lepi sma di den moesoe de ini krestenfasi.a Ma o prenspari a de, taki wi no e frigiti boen-ati! A fiti, taki wi poti wi prakseri now tapoe na eigifasi disi.
5 San na boen-ati? A de na eigifasi noso a situwâsi foe de boen. A de na boen di wan sma boen dorodoro na moreel sei, soifrifasi. A de foe dati-ede wan positief eigifasi di e de foe si ini a doe foe sani di boen èn di abi wini gi tra sma. Fa wi kan sori na toemoesi switi eigifasi disi? Moro foeroe foe di wi e waka baka Jehovah. Foe dati-ede, bifo wi e go taki moro fara foe fa wi leki aparti kresten kan sori boen-ati, meki wi go ondrosoekoe na boen-ati di wi lobi Gado, Jehovah, ben sori na ini a fasi fa a ben sorgoe gi a libisma famiri èn fa a ben handri nanga den.
Boen-ati kon a krin na ini sani di Gado meki
6. San ben boeweigi Jehovah foe meki tra sortoe foe libi di abi froestan?
6 San ben boeweigi wi hemel Tata ini a fosi presi foe prati a libi di a abi nanga libi mekisani di abi froestan? Na apostel Johanes e gi piki tapoe na aksi dati te a e taki: „Gado na lobi” (1 Johanes 4:8). Ija, lobi di no e soekoe wini gi ensrefi nomo ben boeweigi na bigi Fonten foe libi foe meki tra libisani èn a ben gi sonwan foe den wan hemel tanpe èn trawan a ben gi wan tanpe na grontapoe. A no de foe taki, dati wi sabi pikinso nomo foe hemel noso foe den hemel mekisani. Den na jeje — libisma ai no man si den — èn a tanpe foe den de ini a jeje kondre. Ma loekoe lontoe joe na a grontapoe tanpe di Jehovah ben gi en libisma pikin. Èn teki libisma srefi loekoe. Dan nanga joe eigi ai joe sa bigin si krakti boeweisi foe na boen-ati foe Gado.
7-9. Fa na boen-ati foe Gado de foe si ini a fasi fa a ben meki grontapoe èn den libisma na en tapoe?
7 Jehovah ben gi wi fosi papa nanga mama libi. Moro leki dati, a ben sorgoe taki libi de toemoesi switi, toemoesi prisiri. Ini a fosi presi a ben meki na tanpe foe den, grontapoe, taki a man drai lontoe, wan difrenti ini waran nanga kowroe èn wan loktoe ben de èn ala disi ben de joisti leki fa den ben moesoe de. A ben meki watra, stikstof èn zuurstof e boeweigi densrefi foe a wan go ini a trawan èn disi ben wroko volmaakti gi na boen èn na prisiri foe libisma. Na tapoe na gron foe grontapoe a ben poti doesoendoesoen sortoe bon, sonwan foe de leki njanjan gi libisma èn sonwan spesroetoe foe plisi na ai. A ben foeroe loktoe nanga fowroe di ben gi foeroe prisiri nanga den kloroe foe den èn nanga a singi foe den. A ben foeroe se nanga wan lo fisi èn na gron nanga foeroe sortoe meti, sonwan foe den ben de werdri meti èn sonwan joe ben kan poti na joe ondro. Fa a boen-ati disi na wan toemoesi apartiwan! Èn fa disi de wan boeweisi foe na boen-ati foe Gado! — Psalm 104:24.
8 Loekoe now na a fasi fa Gado ben meki libisma. En tapoesei-anoe, foetoe, èn anoe de joisti san de fanowdoe foe meki a hori en balansi èn foe boeweigi makriki. Na so fasi a kan feni, njanjan nanga tra sani di a abi fanowdoe gi ensrefi ini den sani di de pasa marki na a grontapoe lontoe en. Jehovah ben poti koendoekoendoe tapoe na tongo foe tesi, so taki njan nanga dringi no ben o feni presi neleki wan masjin foe kisi krakti — neleki te wan sma na ini a ten disi e poti wan stekker foe wan aparaat ini wan stòpkòntakti foe kan kisi stroom. Nôno, njan nanga dringi ben meki foe de wan prisiri sani, foe di den no e foeroe na bere wawan, ma den e meki joe kisi watramofo. Jehovah ben gi libisma jesi toe èn ben poti lontoe en wan lo switi babari foe prisiri den jesi dati. Fa a de wan prisiri foe arki na safri babari foe wan pikin kriki di e lon, na babari di wan doifi e meki, noso na lafoelafoe foe wan beibi! Ija, tangi foe na boen-ati foe Gado meki, awasi ala den takroe sani di ben pasa sensi Gado ben meki sani, tokoe a de te now ete wan prisiri foe de na libi!
9 Loekoe toe den tra pisi foe wi skin, so leki wi ai nanga noso. Fa joe abi someni difrenti moi kloroe di e plisi den ai foe wi! Èn fa a de wan prisiri sani foe smeri a safoe switi smeri foe wan bromki! A no de foe froewondroe taki na psalm singiman ben taigi Jehovah: „Mi sa prèise joe, foe di joe ben meki mi na wan toemoesi dangra èn froewondroe fasi. Den wroko foe joe de wan froewondroe sani”! — Psalm 139:14.
Na fadon di na libisma famiri fadon èn na froeloesoe foe en
10. Fa moro foeroe foe den libisma ben doe tapoe na boen-ati foe Gado, èn tokoe fa den e tan abi wini foe na boen-ati disi?
10 A sari taki baka wan pisiten den fosi papa nanga mama foe wi ben sori taki den no ben warderi ala den boen-ati di Gado sori den. Den ben sori disi, di den ben trangajesi den komando foe Jehovah èn ben pasa na wan enkri gebod di a ben poti gi den. Leki wan bakapisi foe disi, dan den nanga den pikin foe den ben kon sabi sari, pina nanga dede (Genesis 2:16, 17; 3:16-19; Romesma 5:12). Na ini den doesoendoesoen jari di pasa sensi na trangajesi dati, moro foeroe foe den libisma ben sori wan mi-no-ke fasi noso sori taki den no e warderi na boen-ati foe Gado. Ma ala di den sani disi de so, tokoe sma di de sondro tangi èn sma di de sondro warderi, e njanboen foe na boen-ati foe Gado. Na sortoe fasi? Na apostel Paulus ben tjari disi kon a krin gi den sma di ben libi na ini Listra na ini a Mindri Owstoe: ’[Gado] no ben misi foe gi kotoigi foe ensrefi foe di a ben doe boen, èn ben gi oenoe alen foe hemel èn ten pe njanjan e gro, èn a ben foeroe den ati foe oenoe nanga njanjan èn prisiri’. — Tori foe den Apostel 14:17.
11. Na sortoe fasi na boen-ati foe Gado e go moro fara leki foe sorgoe gi wan moi tanpe gi na libisma famiri?
11 Ma na boen-ati foe Gado no ben de wawan ini a gi di a ben tan gi den switi sani di e hori sma a libi èn di de na grontapoe pasa marki. Nôno, a ben go moro fara. Jehovah ben sori taki a ben de klari foe gi den pikin foe Adam pardon foe sondoe èn foe tan hori matifasi nanga getrow-wan a mindri a libisma famiri. Na sei disi foe na boen-ati foe Gado ben tjari kon na a prakseri foe Moses di Jehovah ben pramisi foe meki ’ala en boen-ati hori pasa na fesi foe [Moses]’. Ne Moses jere den wortoe: „Jehovah, Jehovah, wan Gado foe sari-atifasi nanga boen-atifasi, di no e kisi atibron esi èn di de nanga lobi boen-atifasi en waarheid pasa marki, di e kibri lobi boen-atifasi gi doesoendoesoen sma, èn di e gi pardon foe fowtoe nanga sondoe.” — Exodus 33:19; 34:6, 7.
12. Sortoe seti foe na Wet foe Moses ben sori na boen-ati foe Jehovah?
12 Na ini Moses ten, Jehovah ben poti wan wet sistema gi na njoen nâsi Israèl pe sma di no ben doe sondoe foe espresi ben kan kisi pardon foe sondoe foe wan pisiten nomo noso na wan agersi fasi. Nanga na Wetfroebontoe di ben kon nanga jepi foe Moses, den Israèl sma ben tron na spesroetoe nâsi foe Gado èn den ben leri foe tjari difrenti meti ofrandi gi Jehovah, èn dati ben sa tapoe den sondoe foe den èn den doe foe den di no de krin. Na so fasi, ala di den ben de onvolmaakti, Israèl sma di ben abi berow ben kan tan kon krosibei na Jehovah na wan fasi di a ben feni boen èn den ben sabi taki na anbegi foe den ben plisi en. Kownoe David, wan memre foe na nâsi dati di ben de na ondro a Wet, ben sori taki a ben sabi na boen-ati foe Gado ini a tori disi: „Den sondoe foe mi jongoe jari èn den doe foe mi oproeroefasi, o no prakseri den. Prakseri mi nanga joe lobi boen-ati fasi, foe joe boen-ati ede, o Jehovah.” — Psalm 25:7.
13. Fa Jehovah ben sorgoe gi wan fasi foe kisi pardon foe sondoe di ben de moro betre leki den meti-ofrandi?
13 Baka wan pisiten na boen-ati foe Jehovah ben boeweigi en foe sorgoe foe wan fasi foe kisi pardon foe sondoe di ben de moro betre èn di ben de foe ala ten. Disi ben de nanga jepi foe na ofrandi foe Jesus, di ben de wan bakapikin foe Kownoe David (Mateus 1:6-16; Lukas 3:23-31). Jesus no ben doe sondoe. Foe dati-ede, di a dede, a libi di a ben gi leki ofrandi ben abi bigi waarde, èn Gado ben teki dati leki wan loesoeprijs di ben kan gebroiki gi ala den sondoe pikin foe Adam. Na apostel Paulus ben skrifi: „Ala sma sondoe èn no e doro na glori foe Gado, èn a de leki wan fri presenti taki den froeklari den regtfardiki nanga jepi foe en no-froedini boen-ati, tapoe a gron foe a froeloesoe nanga na loesoeprijs [di] Krestes Jesus [pai]. Gado ben poti en leki zoen-ofrandi nanga jepi foe a bribi na ini en broedoe.” — Romesma 3:23-26.
14. Sortoe toemoesi moi howpoe libisma ben kisi nanga jepi foe na loesoe-ofrandi?
14 Bribi na ini a loesoe-ofrandi foe Jesus e doe foeroe gi kresten, krinkrin moro foeroe leki san den meti ofrandi dati na ondro na Wetfroebontoe ben doe gi den Israèlsma. A ben abi leki bakapisi taki den ben froeklari wan pikin nomroe foe kresten regtfardiki èn Gado jeje ben teki den foe tron den manpikin foe Gado. Na so fasi den ben tron den brada foe Jesus èn ben kisi na howpoe foe opobaka leki jeje mekisani foe abi prati nanga en na ini en hemel Kownoekondre (Lukas 22:29, 30; Romesma 8:14-17). Go prakseri disi pikinso taki Gado ben sa opo den sortoe hemel froewakti disi gi mekisani di e libi na tapoe a pikin planeet disi, grontapoe! Wan pikin groepoe di abi na howpoe disi de a libi ete. Ma gi miljoenmiljoen tra kresten, a poti foe bribi na ini a loesoeprijs e opo na pasi foe njanboen foe san Adam nanga Eva ben lasi — têgo libi na ini wan paradijs, wan grontapoe di gersi wan moi djari. Na Wetfroebontoe wawan no ben man sorgoe gi hemel noso grontapoe froewakti, ini a ten di ben o kon, gi den sma di ben hori densrefi na dati.
15. San de moro ini a boen njoensoe?
15 Fa a fiti taki den e kari na boskopoe foe den njoen seti di Gado ben poti nanga jepi foe Jesus Krestes, ’boen njoensoe’, foe di a e sori na boen-ati foe Gado (2 Timoteus 1:9, 10). Ini bijbel, den e kari na boen njoensoe sontron „na boen njoensoe foe na kownoekondre”. Na ini a ten disi a e sori go tapoe na waarheid, taki na Kownoekondre ben poti na ondro a tiri foe Jesus di ben opobaka (Mateus 24:14; Openbaring 11:15; 14:6, 7). Tokoe, na boen njoensoe wani taki moro. So leki fa Paulus wortoe gi Timoteus, di wi ben kari didjonsro, ben sori, dan na boen njoensoe wani taki toe na sabi di wi sabi taki Jesus ben tjari wan loesoe-ofrandi foe na boen foe wi. Sondro na srakti-ofrandi dati, dan a matifasi foe wi nanga Gado, a heri froeloesoe foe wi — dan wi no e taki ete foe na Kownoekondre foe Jesus èn den 144.000 priester èn kownoe di den ben teki foe grontapoe — no ben sa man. Fa na loesoeprijs e tjari na boen-ati foe Gado na wan toemoesi moi fasi kon a krin!
Na boen-ati foe Gado na ini a ten disi
16, 17. Fa Hosea 3:5 ben kon troe (a) ini 537 bifo G. T.? (b) ini 1919 G. T.?
16 Di na apostel Paulus ben loekoe go a fesi na ini „den lasti dei”, a ben warskow: ’Sma sa de . . . sondro lobi gi san boen’ (2 Timoteus 3:1-3). Srefi gewoon fasi foe sori boen-ati, so leki lobi foe gi sma sani èn switifasi gi den sma na joe sei, sma no ben sa warderi. Fa a profeititori foe Hosea 3:5, di e waran wi ati, e gi wi tranga foe dati-ede: „Den manpikin foe Israèl sa drai kon baka èn seiker sa soekoe Jehovah, na Gado foe den èn David, na kownoe foe den, èn seiker den sa kon beifibeifi na Jehovah èn na a boen-ati foe en, na ini a lasti pisi foe den dei.”
17 Na profeititori disi ben kon troe foe a fosi tron na ini 537 bifo G. T. di den djoe ben komoto foe katibo na ini Babilon èn ben drai go baka na a Pramisi Kondre. Na ini a ten disi, a kontroe foe en ben bigin na ini a jari 1919 di na fikapisi foe Israèl na jeje fasi ben komoto foe na organisâsi foe Satan èn na wan serjoesoefasi ben bigin soekoe Jehovah èn en boen-ati. Den ben kon si taki sensi 1914 „David, na kownoe foe den” ben e tiri ini hemel makti, ini a sma foe Jesus Krestes. Na ondro en hemel tiri, nanga faja den ben bigin bariwroko gi na boen njoensoe disi gi den nâsi. Na so den ben bigin doe na ordroe di skrifi na ini Mateus 24:14: „Na boen njoensoe disi foe na kownoekondre [di opo] sa preiki na a heri grontapoe pe libisma e libi leki wan kotoigi gi ala nâsi èn dan na kaba sa kon.”
18. Soema ben go wroko makandra nanga na fikapisi foe Israèl na jeje fasi ini a meki bekenti foe na boen njoensoe?
18 Na ini a ten disi, na „bigi ipi”, di na a srefi fasi e prèise na boen-ati foe Jehovah, ben go wroko makandra nanga na fikapisi foe den salfoewan (Openbaring 7:9). Now moro leki fo miljoen sma e taki san na sten foe na engel, di na apostel Johanes ben si ini wan fisjoen, e taki, ala di den e bariwroko gi ala nâsi: „Frede Gado èn gi en glori, foe di na joeroe foe a kroetoe foe na sei foe en doro kaba èn anbegi foe dati-ede En di ben meki hemel nanga grontapoe èn se èn den watra fonten.” — Openbaring 14:7.
19. Kari wan foe den moro bigi boeweisi foe na boen-ati foe Gado.
19 Wan foe den moro bigi boeweisi foe na boen-ati foe Gado de, taki a ben gi wi primisi foe de en kompe-wrokoman ini a wroko disi di e go na wan heimarki. Fa a de wan grani taki a ben froetrow wi „a glori boen njoensoe foe na kolokoe Gado”! (1 Timoteus 1:11) Te wi e preiki èn e leri disi na tra sma, dan wi e sori srefisrefi ini wi libi na prenspari froktoe dati foe Gado jeje, boen-ati. Wi abi so boen na fasi foe David, Gado foetoeboi foe owroeten, di ben taki: „Te den e taki foe joe boen-ati pasa marki, den sa taki nanga faja pasa marki, èn foe joe regtfardiki fasi, den sa opo wan prisiri babari.” — Psalm 145:7.
20. Foe sortoe tori di abi foe doe nanga boen-ati wi sa taki ini na artikel di e kon now?
20 Ma, abi prati ini na preiki foe na boen njoensoe na a wan enkri fasi foe sori boen-ati na ini wi libi? Kwetikweti! Wi e kisi na deki-ati foe tron ’sma di e waka baka Gado leki lobi pikin’ (Efeisesma 5:1). Na boen-ati foe Gado tjari kon a krin na difrenti fasi. Dati meki a boen-ati foe wi moesoe abi krakti toe tapoe foeroe pisi foe wi libi. Wan toe foe den wi sa go loekoe na ini na artikel di e kon now.
[Foetoewortoe]
a Den aparti froktoe foe na jeje na lobi, prisiri, vrede, langa pasensi, switifasi, boen-ati, bribi, safri-atifasi èn dwengi joesrefi.
Joe kan gi piki?
◻ Na sortoe fasi den sani di Gado meki e sori na boen-ati foe en?
◻ Sortoe seti Jehovah ben poti foe meki libisma di abi berow kisi pardon foe sondoe?
◻ Leki wan kontroe foe Hosea 3:5, dan oten na salfoe fikapisi ben kon na Jehovah èn na en boen-ati, èn san disi ben tjari kon?
◻ San na wan foe den moro bigi boeweisi foe a boen-ati foe Gado na ini a ten disi?
[Prenki na tapoe bladzijde 24]
Den sani di Gado meki e gi na boeweisi foe Gado boen-ati pasa marki
[Prenki na tapoe bladzijde 25]
Taki wi e kisi primisi foe abi prati na ini a preikiwroko na wan toemoesi moi boeweisi foe Gado boen-ati