Bun-ati​—Fa wi kan kon abi a fasi disi?

IBRIWAN fu wi wani taki trawan sabi wi leki wan bun sma. Ma a no makriki fu sori bun-ati na ini a ten disi. Furu sma ’no lobi san bun’ (2 Tim. 3:3). Den srefi wani taki san bun èn san no bun. Fu taki en leti, san Yehovah feni bun, den e si leki ogri èn san Yehovah e si leki ogri, den feni bun (Yes. 5:20). Wan tra sani di kan meki en muilek gi wi fu sori bun-ati, na taki wi na sondusma. Boiti dati, den sani di miti wi na ini a ten di pasa kan meki en muilek gi wi fu du san bun. A kan taki wi e firi leki Annea di e dini Yehovah furu yari langa. A e taki: „A muilek gi mi fu si misrefi leki wan bun sma.”

Toku wi alamala kan meki muiti fu kon abi bun-ati! Bun-ati na wan fasi di a santa yeye e meki sma kisi. A santa yeye tranga moro iniwan sani di kan meki en muilek gi wi fu kon abi a fasi disi. Sobun, awinsi wi abi sondu èn awinsi fa den sma na wi lontu de, toku wi kan tron bun-ati sma. Meki wi luku moro fini san a wani taki fu abi bun-ati. Wi o si tu fa wi kan sori a fasi disi moro bun.

SAN NA BUN-ATI?

Wan sma di abi bun-ati e prakseri bun sani, a e du san bun èn a no e du ogri. Wan bun-ati sma e luku fa a kan yepi trawan èn a e du bun sani gi den.

Kande yu si taki son sma lobi fu du bun gi famiriman nanga mati, ma dati no wani taki dati Yehovah e si den leki bun sma. A tru taki wi no man du bun ala ten fu di Bijbel e sori taki „nowan reti-ati sma no de na grontapu, di e du bun ala ten èn di no e sondu” (Preik. 7:20). Na apostel Paulus ben taki: „Mi sabi taki nowan bun sani de na ini mi” (Rom. 7:18). Fu dati ede na Yehovah musu leri wi fa wi kan sori a fasi disi.

„YEHOVAH E DU BUN”

Na Yehovah e taki san bun. Bijbel e taki fu Yehovah: „Yu na wan bun Gado èn yu e du bun tu. Leri mi den markitiki fu yu” (Ps. 119:68). Meki wi poti prakseri na tu sani di a tekst e taki fu a bun-ati fu Yehovah.

Yehovah na wan bun Gado. Ala ten Yehovah e du san bun, a no man du ogri. Luku san pasa di Yehovah taigi Moses: „Mi o meki ala mi glori pasa na yu fesi.” Yehovah sori Moses en glori, sosrefi a bunfasi fu en. Baka dati Moses yere wan sten e taki den wortu disi: „Yehovah, Yehovah, wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den du sondu. Ma a no sa puru a strafu fu den wan di meki fowtu. A no sa du dati kwetikweti” (Eks. 33:19; 34:6, 7). A tekst disi e sori wi krin taki Yehovah na wan Gado di bun dorodoro. Aladi Yesus ben de a moro bun sma di ben de na grontapu, toku a taki: „Nowan sma bun. A wan-enkri sma di bun, na Gado.”​—Luk. 18:19.

Yehovah e du bun. Ala sani di Yehovah meki, e sori taki a bun. „Yehovah e du bun gi ala libisani èn a e sori sari-ati gi ala sani di a meki” (Ps. 145:9). Yehovah e du bun gi ala sma. A gi den libi èn a e gi den san den abi fanowdu fu tan na libi (Tori 14:17). Yehovah e sori tu taki a abi bun-ati fu di a e gi wi pardon te wi meki wan fowtu. A psalm skrifiman taki: „Yehovah, yu na wan bun Gado èn yu de klariklari fu gi sma pardon” (Ps. 86:5). Wi kan de seiker taki „Yehovah no o kibri nowan bun sani gi den sma di e dini en nanga wan krin ati”.​—Ps. 84:11.

„LERI FU DU BUN”

Yehovah meki wi na so wan fasi, taki wi kan de leki en. Disi wani taki dati wi kan de bun sma tu èn wi kan du bun sani (Gen. 1:27). Toku Gado Wortu e gi wi deki-ati fu „leri fu du bun” (Yes. 1:17). Ma fa wi kan leri fu du bun? Meki wi luku dri sani di kan yepi wi.

A fosi sani na taki wi kan begi Gado fu gi wi en santa yeye. Disi kan yepi Kresten fu de sma di Gado e si leki bun sma (Gal. 5:22). Iya, a santa yeye fu Gado kan yepi wi fu lobi san bun èn fu tegu gi ogri (Rom. 12:9). Fu taki en leti, Bijbel e taki dati Yehovah e gi wi a krakti fu ’du bun èn fu taki san bun ala ten’.​—2 Tes. 2:16, 17.

A di fu tu sani na taki wi musu leisi Gado Wortu. Te wi e du dati, dan Yehovah kan yepi wi fu „du ala den bun sani” na ini en Wortu èn „fu du ibri bun wroko” (Odo 2:9; 2 Tim. 3:17). Te wi e leisi Bijbel èn te wi e denki dipi fu san wi e leisi, dan wi e kon sabi a wani fu Gado moro bun èn wi e kon sabi moro fu den bun sani di Gado du. Te wi e furu wi ati nanga den sani disi, dan den kan yepi wi bakaten.​—Luk. 6:45; Ef. 5:9.

A di fu dri sani di wi kan du, na fu ’teki na eksempre fu sma di e du san bun’ (3 Yoh. 11). Furu eksempre de na ini Bijbel fu sma di du san bun. A no de fu taki dati Yehovah nanga Yesus na den moro bun eksempre gi wi. Ma wi kan leri tu fu tra sma di du bun gi trawan. Tu fu den sma dati na Tabita nanga Barnabas (Tori 9:36; 11:22-24). Yu kan leri furu fu na eksempre fu den te yu e luku san Bijbel e taki fu den. Te yu e du dati, luku san den du fu yepi tra sma. Prakseri san yu kan du fu yepi son sma na ini yu famiri noso na ini a gemeente. Yu kan luku tu sortu blesi Tabita nanga Barnabas kisi fu di den du bun gi trawan. Te yu e teki na eksempre fu den, dan yu o kisi blesi tu.

Wi kan leri tu fu brada nanga sisa na ini a ten disi di e du bun. Prakseri fa den gemeente owruman di „lobi san bun” e wroko tranga. Wi no musu frigiti den sisa tu di de wan bun eksempre gi trawan na ini a fasi fa den e tyari densrefi èn den sani di den e taki. Na so den e „leri trawan bun sani” (Tit. 1:8; 2:3). Wan sisa di nen Roslyn e fruteri fu wan mati fu en: „A mati fu mi e du ala san a man fu yepi trawan na ini a gemeente èn fu gi den deki-ati. A e prakseri a situwâsi fu den èn furu tron a e gi den pikin kado noso a e yepi den na tra fasi. Mi e si en leki wan sma di bun trutru.”

Yehovah e gi en pipel deki-ati fu „suku san bun” (Amos 5:14). Te wi e du dati, dan wi o lobi den sani di Yehovah feni bun èn wi o wani du den tu.

Fu de bun sma, dan dati no wani taki dati wi musu du bigi sani gi trawan noso taki wi musu gi den diri kado. Luku wan eksempre. Efu wi prani wan bromki èn wi wani taki a gro, dan wi no musu kanti bun furu watra gi en wan leisi nomo, ma wi musu gi en pikinso watra ala dei. Na so a de tu taki te wi e du furu pikinpikin sani fu yepi sma, dan wi e sori taki wi na bun sma.

Bijbel e gi wi deki-ati fu „de klariklari” fu du bun (2 Tim. 2:21; Tit. 3:1). Te wi e poti prakseri na tra sma, dan wi o man si fa wi kan yepi den (Rom. 15:2). Kande wi kan gi den wan sani di den abi fanowdu èn di wi abi (Odo 3:27). Wi kan kari den kon na wi oso fu nyan wan sani noso fu gi makandra deki-ati. Efu wi sabi taki wan sma siki, dan wi kan seni wan karta gi en, wi kan go luku en noso wi kan bel en. Iya, furu okasi de fu taki ’bun sani di e gi sma deki-ati. Na so fasi den sma di e arki, kan yere sani di bun gi den’.​—Ef. 4:29.

Neleki Yehovah, wi e suku fu du bun gi ala sma. Dati meki wi no e desko nowan sma. Wan moi fasi fa wi kan du dati, na fu preiki a bun nyunsu fu a Kownukondre gi ala sma. Yesus taki dati wi musu suku fu du bun srefi gi den sma di no lobi wi (Luk. 6:27). Noiti a fowtu fu sori switifasi èn fu du bun gi trawan bika „nowan wèt e krutu den sani disi” (Gal. 5:22, 23). Te wi e du bun awinsi sma e du hati sani nanga wi noso awinsi wi abi problema, dan wi kan hari sma kon na ini a tru anbegi èn wi kan gi Gado glori.​—1 Petr. 3:16, 17.

WI E KISI BLESI TE WI E DU BUN

„A fasi fa bun sma e tyari densrefi o meki taki den kisi blesi” (Odo 14:14). San na wan tu blesi di wi kan kisi? Te wi e du bun gi trawan, dan a kan taki den o du bun gi wi tu (Odo 14:22). Ma awinsi trawan no e du bun gi wi, toku wi musu tan du bun fu di dati kan meki taki den e bigin denki tra fasi fu wi èn den kan libi moro bun nanga wi.​—Rom. 12:20.

Te wi e tapu fu du san ogri èn wi e du bun, dan dati e tyari wini gi wi tu. Luku na eksempre fu Nancy. A e taki: „Di mi ben yongu, mi no ben span nanga noti, mi ben libi wan hurulibi èn mi no ben abi lespeki gi sma. Ma di mi kon sabi san Gado feni bun èn mi bigin du san mi leri, dan mi kon de moro koloku. Now mi abi lespeki gi misrefi.”

A moro prenspari reide fu san ede wi e du bun, na taki wi wani prisiri Yehovah. Srefi te tra sma no e si san wi e du, Yehovah e si san wi e du. Ibri leisi te wi e du bun, Yehovah e si dati èn a sabi ibri bun sani di wi e prakseri (Ef. 6:7, 8). Fa a e blesi wi? „Yehovah lobi sma di e du bun” (Odo 12:2). Sobun, meki wi tan du muiti fu kon abi bun-ati. Yehovah pramisi wi taki „ala sma di e du bun o kisi glori, grani, nanga freide”.​—Rom. 2:10.