„Meki leki froktoe ibri sortoe foe boen-ati”
„Na froktoe foe na leti abi ibri sortoe foe boen-ati na ini en.” — EFEISESMA 5:9.
1, 2. Sortoe toe groepoe ben de sensi owroeten, èn fa a situwâsi foe den kenki foe makandra ini a ten disi?
BAKA na oproeroe na ini Eden, so wan siksi doesoen jari pasa kaba, èn wan tron moro baka na froedoe ini den dei foe Noa, dan na libisma famiri ben kon prati ini toe groepoe noso organisâsi. A wán ben abi sma di ben doe moeiti foe dini Jehovah, a trawan ben abi sma di ben e waka baka Satan. Den toe organisâsi disi de te now ete? Ija, foe troe! Na profeiti Jesaja ben taki foe den toe groepoe disi èn ben taki a fesi foe na situwasi foe den na ini a ten foe wi: „Loekoe! doengroe srefi sa tapoe grontapoe, èn deki doengroe den nationaal groepoe; ma a tapoe joe Jehovah sa go skèin èn a tapoe joe en glori sa de foe si.” — Jesaja 60:1, 2.
2 Ija, na difrenti a mindri den toe organisâsi disi bigi neleki a difrenti a mindri doengroe nanga leti. Èn neleki fa wan leti di e skèin sa hari wan sma kon di ben lasi na ini doengroe, na so Jehovah leti di e skèin ini a doengroe grontapoe disi ben hari miljoenmiljoen opregti-ati sma kon na a organisâsi foe Gado. Jesaja e go moro fara foe taki: „Nâsi [den tra skapoe] sa go foe troe na joe leti, èn kownoe [salfoe erfgenaam foe na kownoekondre] na a brenki foe na leti di joe e skèin.” — Jesaja 60:3.
3. Na sortoe fasi kresten e sori na glori foe Jehovah?
3 Fa Jehovah pipel e sori a glori foe Jehovah? Wán penti de, taki den e preiki a boen njoensoe foe a hemel Kownoekondre di Gado ben poti (Markus 13:10). Ma a tapoe foe dati, den e waka baka Jehovah, na moro prenspari eksempel foe boen-ati, èn nanga a fasi fa den e libi, den e hari safri-ati sma kon na a leti (Efeisesma 5:1). Paulus ben taki: „Wan dei oenoe ben de doengroe, ma now oenoe de leti ini Masra. Tan waka leki pikin foe leti.” A ben go moro fara: „Na froktoe foe na leti abi ibri sortoe foe boen-ati èn regtfardikifasi èn waarheid na ini en. Tan ondrosoekoe san e plisi Masra; èn no abi moro langa prati nanga [den] na den wroko sondro froktoe di de foe na doengroe” (Efeisesma 5:8-11). San Paulus ben wani taki nanga „ibri sortoe foe boen-ati”?
4. San na boen-ati, èn fa disi de foe si ini wan kresten?
4 Neleki fa na artikel a fesi ben sori wi, dan boen-ati na a eigifasi noso situwâsi foe de boen dorodoro na moreel sei, soifrifasi. Jesus ben taki, dati Jehovah wawan de boen dorodoro (Markus 10:18). Ma tokoe wan kresten kan waka baka Jehovah foe di a e kweki boen-ati leki wan froktoe foe na jeje (Galasiasma 5:22). Vine’s Expository Dictionary of Old and New Testament Words e taki foe a·ga·thosʹ, na Griki wortoe gi „boen”: „[A] e froeteri foe na sani di abi wini leki bakapisi, a de di wan sani de boen ini fa a de noso ini en fasi”. Wan kresten di e kweki boen-ati, foe dati-ede sa de boen èn sa doe boen. (Teki gersi Deuteronomium 12:28.) A sa tan farawe toe foe sani di no de ini akroederi nanga boen-ati, „den wroko sondro froktoe di de foe na doengroe.” Den difrenti fasi fa wan kresten kan sori boen-ati ini a fasi fa a e tjari ensrefi na den ’sortoe foe boen-ati’ di Paulus ben taki foe den. San na wan toe foe den?
„Tan doe boen”
5. San na wán sortoe foe boen-ati, èn foe san-ede wan kresten moesoe kweki en?
5 Paulus ben sori go na wan foe den ini en brifi gi den Romesma. Di a ben taki foe na saka di wan sma moesoe saka ensrefi na ondro „den hei tirimakti”, a ben taki: „Joe no wani frede na tirimakti? Tan doe san boen, èn joe sa kisi prèise foe en.” Na „boen” di a e sori go a tapoe na a gi jesi di wan sma e gi jesi na den wet èn den seti foe den grontapoe tirimakti. Foe san-ede wan kresten moesoe saka ensrefi na den ondro? Na foe no kisi problema, di no de fanowdoe nanga den tirimakti èn e teki na so fasi a tjans foe kisi strafoe èn — moro prenspari ete — so taki a kan kibri wan krin konsensi a fesi Gado (Romesma 13:1-7). Ala di wan kresten e hori ensrefi ini a fosi presi foe gi jesi na Jehovah, dan tokoe a e ’gi grani na a kownoe’, èn a no e opo ensrefi kontrari makti di Jehovah Gado e gi pasi foe de (1 Petrus 2:13-17). Na a fasi disi, kresten de boen birtisma, boen borgroe èn boen eksempel.
Hori trawan a prakseri
6. (a) San na wan tra fasi foe boen-ati? (b) Soema bijbel e kari leki sma di e froedini foe hori den na prakseri?
6 A boen-ati foe Jehovah de foe si ini a gi foe „alen foe hemel èn ten pe foeroe froktoe e meki” na ala sma di e libi na grontapoe.” Disi abi leki bakapisi ’na abi foe njanjan pasa marki nanga toemoesi foeroe prisiri’ èn disi e sori taki Gado troetroe e hori sma a prakseri (Tori foe den Apostel 14:17). Wi kan waka na en baka ini disi, foe di wi e sori taki wi e hori trawan na prakseri na ini pikin ofoe bigi sani. Soema spesroetoe wi moesoe hori na prakseri? Paulus e sori go spesroetoe tapoe den owroeman, „den di e wroko tranga na oenoe mindri èn di abi na tiri tapoe oenoe na ini Masra èn e froemane oenoe.” A e gi kresten tranga foe gi den „moro leki bigi lespeki ini lobi foe den wroko ede” (1 Tesalonikasma 5:12, 13). Fa wi kan doe disi? Foe di wi e wroko dorodoro makandra nanga den — foe eksempel, foe di wi e teki prati na ini den wroko di moesoe doe na ini a Kownoekondrezaal. Ala di wi moesoe firi fri ala ten foe go na den owroeman foe kisi jepi te disi de fanowdoe, tokoe wi no moesoe aksi den sani di no de reidelek. Na presi foe dati, wi moesoe proeberi na sortoe fasi wi man foe meki na lai foe den skapoeman disi di e wroko tranga, kon moro lekti, foe di foeroe foe den abi osofamiri frantiwortoe na sei a wroko foe den ini a gemeente.
7. Na sortoe fasi wi kan sori taki wi e hori den owroe sma na prakseri?
7 Den owroewan e froedini foe wi hori den na prakseri toe. Wan spesroetoe gebod foe na Wet foe Moses ben de: „Oenoe moesoe opo tanapoe gi na weti wiwiri, èn oenoe moesoe sori taki oenoe e hori na sma foe wan owroe man na prakseri èn oenoe moesoe abi frede gi na Gado foe oenoe. Mi na Jehovah” (Levitikus 19:32). Fa wi kan sori taki wi e hori trawan na prakseri? Jongoewan kan pristeri densrefi foe jepi den owroewan nanga a bai foe sani na wenkri noso nanga tra pikin wroko. Den owroeman kan hori ai a tapoe foe si efoe wan owroe sma abi jepi fanowdoe foe kon na den konmakandra. Na den kongres, den jongoe sma di krakti na skin sa loekoe boen foe no e poesoe owroe sma, di no e waka so esi moro taki pikin moro den kan fadon foe di sondro foe abi pasensi den jongoewan disi e proeberi foe pasa èn den sa de nanga pasensi te wan owroe sma no de so esi moro foe go sidon noso foe teki en njanjan.
8. Fa wi kan sori taki wi e hori wan tra groepoe na prakseri di den e kari na ini bijbel foe na afersi dati?
8 Na psalm singiman ben taki foe wan tra groepoe di abi wi prakseri fanowdoe: „Kolokoe ibriwan sma de di e sori taki a e hori na mendriwan na prakseri” (Psalm 41:1). A kan de makriki foe hori wan sma na prakseri di abi biginen noso di de wan goedoeman, ma fa a de nanga na mendriwan noso na pôtiwan? Na bijbel skrifiman Jakobus ben taki, dati a hori di wi e hori den sma disi na prakseri na a srefi fasi, na wan tesi gi wi regtfardikifasi èn kresten lobi. Meki a de so, taki wi e pasa na tesi disi, foe di wi e poti prakseri na ala sma awasi san na den omstandigheid foe den. — Filipisma 2:3, 4; Jakobus 2:2-4, 8, 9.
„Tan kon de nanga sari-ati”
9, 10. Foe san-ede kresten moesoe de nanga sari-atifasi, èn fa wi kan sori na sortoe foe boen-ati disi?
9 Wan tra sortoe foe boen-ati wi e si ini wan toe foe den agersitori foe Jesus. Ini wan foe den, Jesus ben froeteri foe wan Samariaman di ben kon na wan man di den ben ròs, ben fon en ogri, èn ben libi en didon a tapoe na pasi. Wan Leifisma èn wan priester ben waka pasa na man di ben kisi mankeri, èn den ben weigri foe jepi en. Ma na Samariaman ben stòp èn ben jepi en, èn ben doe moro leki san wan sma ben sa kan froewakti. Den e kari na tori foeroetron na agersitori foe na Boen Samariaman. Sortoe boen-ati na Samariaman ben sori? Sari-ati. Di Jesus ben aksi na arkiman foe en foe taki soema ben sori taki a de a naaste foe na man di ben kisi mankeri, a ben gi na joisti piki: „Na sma di ben handri na wan sari-atifasi nanga en.” — Lukas 10:37.
10 Kresten di abi sari-atifasi e waka baka Jehovah, di Moses ben taigi den Israèlsma foe en: „Jehovah oen Gado na wan sari-ati Gado. A no sa gowe libi oenoe noso tjari pori kon tapoe oenoe noso frigiti na froebontoe foe oen fositen tata di nanga wan sweri a ben meki nanga den” (Deuteronomium 4:31). Jesus ben sori fa na sari-ati foe Gado moesoe abi krakti na wi tapoe: „Tan kisi sari-ati, neleki fa joe Tata de nanga sari-ati” (Lukas 6:36). Fa wi kan sori sari-ati? Neleki fa na agersitori foe Jesus ben sori, dan wán fasi na foe de klariklari foe jepi wi kompe libisma, srefi efoe disi e tjari kefar noso moeilekhèit kon. Wan boen sma no sa tapoe en ai gi na pina di en brada e njan, efoe a de ini a posisi foe doe wan sani na dati. — Jakobus 2:15, 16.
11, 12. So leki fa na agersitori foe Jesus foe den srafoe e sori, dan san sari-ati wani taki, èn fa wi kan sori disi ini a ten disi?
11 Wan tra agersitori foe Jesus ben sori taki sari-ati boen-ati, wani taki toe foe de klariklari foe gi trawan pardon. A ben froeteri foe wan srafoe di ben moesoe pai en meester tindoesoen talenti. Foe di a no ben man pai en meester baka, meki na srafoe begi foe sori en sari-ati, èn a meester foe en nanga switifasi ben taigi en taki a no abi na bigi paiman foe 60.000.000 dinari moro. Ma na srafoe gowe èn ben miti wan tra srafoe di ben moesoe pai en soso wán hondro dinari. Na srafoe di ben kisi pardon, sondro foe abi sari-ati ben trowe na man di ben moesoe pai en go na ini doengroe-oso, te leki a ben kan pai en baka. A de krin, taki na srafoe di no ben abi sari-ati no ben de wan boen man, èn di na meester ben jere san ben pasa, a kari en foe kon gi frantiwortoe. — Mateus 18:23-25.
12 Wi de ini wan srefi sortoe situwâsi leki di foe na srafoe di ben kisi pardon. Jehovah ben gi wi pardon foe wan bigi paiman foe sondoe di wi abi na wi tapoe, tapoe a fondamenti foe na ofrandi foe Jesus. Dan seiker wi moesoe de klari foe gi trawan pardon. Jesus ben taki, dati wi moesoe de klari foe gi pardon „te seibitenti na seibi tron”, sondro foe poti skotoe (Mateus 5:7; 6:12, 14, 15; 18:21, 22). Foe dati-ede meki wan kresten di abi sari-ati no sa hori wan trawan na ati. Sani no sa tan ati en noso taki a sa weigri foe taki nanga wan kompe kresten foe di wan sani e trobi en ete. So wan mankeri foe sari-ati no de wan marki foe kresten boen-ati.
Lobi foe gi sma sani èn foe teki den na oso
13. San boen-ati wani taki moro fara?
13 Wan sma kan sori boen-ati toe, foe di a lobi foe gi sma sani èn a lobi foe teki sma na oso. Na wan okasi wan jonkoeman ben kon na Jesus foe aksi en rai. A ben taki: „Leriman, sortoe boen mi moesoe doe, foe kisi têgo libi?” Jesus taigi en taki a ben moesoe hori den gebod foe Gado doronomo. Ija, gi jesi na den gebod foe Jehovah de wan fasi foe boen-ati. Na jonkoeman ben prakseri taki a ben e doe disi kaba so boen leki a ben man. A de krin, taki a ben gersi wan boen sma kaba ini den ai foe den birti sma foe en, ma tokoe en ben firi taki a ben mankeri wan sani. Jesus taigi en so boen: „Efoe joe wani de volmaakti, go seri den sani foe joe èn gi den na den pôtiwan èn joe sa abi wan goedoe na ini hemel èn kon, tron mi bakaman” (Mateus 19:16-22). Na jonkoeman waka gowe nanga sari. A ben goedoe toemoesi. Efoe a ben gi jesi na a rai foe Jesus, a ben sa sori taki a no ben lobi goedoe. Èn a ben sa doe wan boen sani di e sori taki troetroe a lobi gi sani, sondro foe prakseri ensrefi nomo.
14. Sortoe boen rai Jehovah nanga Jesus ben gi ini a tori foe lobi gi sma sani?
14 Jehovah ben gi den Israèlsma tranga foe lobi foe gi sma sani. Leki eksempel wi e leisi: „Oenoe moesoe gi en [na sma na oen sei di kon pôti] wan sani, awansi fa no fa, èn oen ati no moesoe de nanga gridi te oenoe e gi en, bika Jehovah, oen Gado, sa blesi oenoe foe disi na ini ala oen wroko èn ala san oenoe e doe” (Deuteronomium 15:10; Odo 11:25). Jesus Krestes srefi ben gi sma tranga foe lobi gi sma sani: „Oefen joesrefi foe gi sma sani, èn sma sa gi joe sani. Den sa kanti kon tapoe joe bowtoe wan toemoesi boen marki, di den stampoe, di seki èn di foeroe pasamarki” (Lukas 6:38). Boiti dati, Jesus srefi ben lobi foe gi sma sani srefisrefi. Na wán okasi, a ben poti ten na wan sei foe rostoe pikinso. Den ipi sma ben kon sabi pe a ben de èn den kon na en. Nanga a fasi foe lobi foe gi, meki Jesus ben frigiti taki a ben wani rostoe èn a ben gi en ten foe na boen foe den ipi sma. Baka ten, a ben sori na wan aparti fasi taki a lobi foe teki sma na oso di a ben gi wan bigi ipi sma njanjan. — Markus 6:30-44.
15. Fa den disipel foe Jesus ben gi wan moi eksempel foe sori taki den lobi foe gi sma sani?
15 Foe di den ben de getrow na a rai foe Jehovah nanga di foe Jesus, meki foeroe foe Jesus disipel ben sori na wan aparti fasi taki den lobi foe gi sma sani èn teki sma na oso. Ini den fosi dei foe na kresten gemeente, wan bigi nomroe foe den sma di ben kon foe njan na Pinksterfesa na ini 33 G. T., ben jere na preiki foe den apostel èn ben tron bribiman. Foe di den ben tan drape, baka di na fesa kaba, so taki den ben kan leri moro, meki den no ben abi foeroe njansani moro. Foe dati-ede, meki bribiman foe na presi dati ben seri den goedoe foe den èn ben gi na moni foe ondrow den njoen brada foe den, so taki den disi ben kan kon moro tranga ini bribi. Foetroe disi ben sori taki den lobi foe gi sma sani! — Tori foe den Apostel 4:32-35; loekoe toe Tori foe den Apostel 16:15; Romesma 15:26.
16. Kari wan toe fasi fa wi kan sori taki wi lobi teki sma na oso èn lobi foe gi den sani?
16 Na ini a ten disi, wi kan si wan srefi sortoe kresten fasi foe lobi gi sani te kresten e gi ten èn moni na a gemeente foe den èn na a preikiwroko na a heri grontapoe. A e kon de krin foe si, te den e kon foe jepi den brada di e njanpina foe natuur-rampoe noso orlokoe. A de foe si te den e sorgoe gi na kringopziener na den fisiti di a e tjari doronomo. Noso te, na wan fasi foe lobi gi sma sani, den e gi „boi di no abi papa moro” (èn oemapikin di no abi papa moro wan kari foe teki prati na ontspanning èn osofamiri bijbelstudie makandra nanga tra kresten osofamiri, dan disi toe na wan sori taki den lobi foe teki sma na oso, wan sori foe kresten boen-ati. — Psalm 68:5.
Froeteri na waarheid
17. Foe san-ede a de wan tjalensi foe taki foe na waarheid ini a ten disi?
17 Di Paulus ben skrifi foe na froktoe foe na leti, a ben tai boen-ati na regtfardikifasi èn waarheid, èn a ben sa de boen foe taki, dati foe taki waarheid na wan tra sortoe boen-ati. Boen sma no e froeteri lei. Ma tokoe a de wan spesroetoe tjalensi foe froeteri na waarheid na ini a ten disi, pe lei panja so foeroe. Foeroe sma e lei te den moesoe skrifi den belasting papira foe den. Wrokoman e lei foe na wroko di den e doe. Na wan lei fasi studenti e foefoeroe ai loekoe ini den lès nanga eksâme foe den. Bisnisman e lei te den e meki kroederi. Pikin e lei foe kibri densrefi gi strafoe. Ogri-ati gongosaman e pori na boen nen foe trawan na wan lei fasi.
18. Fa Jehovah e si leiman?
18 Lei na wan tegoe sani gi Jehovah. A mindri den ’seibi sani’ di a no wani si na ai, joe abi „wan falsi tongo” èn „wan falsi kotoigi di e tan meki lei” (Odo 6:16-19). „Ala leiman” den e kari leki groepoe makandra nanga fredeman, kiriman, èn hoeroeman, di no sa abi wan presi na ini Gado njoen grontapoe (Openbaring 21:8). Moro fara, na odo e froeteri oenoe: „A sma di e waka na ini en opregtifasi e frede Jehovah, ma a sma di de kroektoe ini en pasi e wisiwasi En” (Odo 14:2). Wan leiman de kroektoe ini en pasi. Foe dati-ede, wan leiman e sori krin taki a e wisiwasi Jehovah. Fa disi na wan takroe prakseri! Meki a de so, taki wi e froeteri ala ten na waarheid, srefi efoe disi e meki wi kisi tranga leri noso e meki wi lasi na moni sei (Odo 16:6; Efeisesma 4:25). Den sma di e froeteri na waarheid, e waka baka Jehovah, „na Gado foe waarheid.” — Psalm 31:5.
Kweki boen-ati
19. San wi e si sontron ini grontapoe, san e gi na Mekiman grani?
19 Disi na soso wan toe foe den ’sortoe’ foe boen-ati di wan kresten moesoe kweki. A de troe taki sma ini grontapoe e sori boen-ati te na wan seiker marki. Sonwan foe den lobi foe teki sma na oso, foe eksempel, èn trawan de nanga sari-ati. Ija, san ben meki na agersitori foe na Boen Samariaman so aparti, ben de taki Jesus ben taki foe wan sma di no ben de wan djoe, di ben sori sari-ati, ala di owroeman foe na djoe gemeente no ben doe dati. A de foe troe wan grani gi a Mekiman foe libisma, taki den sortoe doe disi e kon a doro ete foe ensrefi na ini wan toe libisma, srefi baka siksi doesoen jari foe onvolmaaktifasi.
20, 21. (a) Foe san-ede a boen-ati foe wan kresten de tra fasi leki iniwan sortoe boen-ati di wi kan si ini sma foe grontapoe? (b) Fa wan kresten kan kweki boen-ati, èn foe san-ede wi moesoe de fajafaja foe doe so toe?
20 Tokoe, boen-ati de gi kresten moro leki soso wan boen eigifasi di wan sma abi kande noso no abi. A de wan eigifasi di den moesoe kweki ini ala den pisi foe en, foe di den moesoe de sma di e waka baka Gado. Fa disi kan? Bijbel e froeteri wi taki wi kan leri boen-ati. „Leri mi boen-ati”, na psalm singiman ben begi Gado. Fa? A ben go moro fara: „Foe di mi poti bribi na ini den gebod foe joe.” A ben taki moro fara: „Joe boen èn e doe boen. Leri mi den regelmenti foe joe.” — Psalm 119:66, 68.
21 Ija, efoe wi e leri den gebod foe Jehovah èn e gi jesi na den, wi sa kweki boen-ati. Prakseri ala ten taki boen-ati na wan froktoe foe na jeje. Efoe wi e soekoe na jeje foe Jehovah nanga jepi foe begi, demakandra nanga wi brada, èn bijbelstudie, dan seiker wi sa kisi jepi foe kweki na eigifasi disi. Boiti dati, boen-ati abi foeroe krakti. A kan wini ogri srefi (Romesma 12:21). Fa a de prenspari foe dati-ede, taki wi e doe boen na ala sma, spesroetoe na den kresten brada foe wi (Galasiasma 6:10). Efoe wi e doe disi, wi sa de a mindri den sma di e njanboen foe „na glori nanga na grani nanga vrede” di den e pramisi na „ibriwan sma di e doe san de boen.” — Romesma 2:6-11.
Joe kan piki disi?
◻ Fa wi kan tan doe boen ini a tori foe den hei tirimakti?
◻ Soema nanga soema e froedini foe wi hori den na prakseri?
◻ Na sortoe fasi sari-ati e kon a krin?
◻ Sortoe doe foe lobi foe gi sma sani èn lobi foe teki sma na oso de leki wan marki foe sabi kresten ini a ten disi?
◻ Fa wi kan kweki boen-ati?
[Prenki na tapoe bladzijde 29]
Foe hori trawan na prakseri na wan foe den fasi foe boen-ati
[Prenki na tapoe bladzijde 32]
Leki na Bigi Leriman, Jesus ben lobi foe gi ensrefi na sma