Lon a streilon nanga horidoro
„Meki, nanga horidoro, wi lon na streilon di de a wi fesi.” — HEBREWSMA 12:1.
1. (a) San den e poti a wi fesi te wi e gi wisrefi abra na Jehovah Gado? (b) Gi sortoe streilon wan kresten moesoe sreka ensrefi?
TE WI gi wisrefi abra na Jehovah nanga jepi foe Jesus Krestes, dan Gado e poti, foe taki en na wan agersifasi, wan streilon a wi fesi. Na a kaba foe a streilon, den sa gi wan prijs na ala den wan di doro a kaba na wan boen fasi. Sortoe prijs? Têgo libi! Foe wini a toemoesi moi prijs disi, na kresten lonman moesoe de srekasreka, no soso gi wan sjatoe, esi-esi lon, ma gi wan lon foe wan langa pasi. Foe dati-ede a sa abi horidoro fanowdoe. A sa moesoe horidoro ini a moeiti di e hori langa foe na streilon srefi èn a sa moesoe kakafoetoe so srefi gi den sani di sa hendri en ini a streilon.
2, 3. (a) San sa jepi wi foe lon na kresten streilon te na a kaba? (b) Fa prisiri ben jepi Jesus foe lon na streilon nanga horidoro?
2 San sa jepi wi foe lon so wan streilon te na a kaba? We, san ben jepi Jesus foe horidoro, ala di a ben de wan libisma na grontapoe? A ben kisi inisei krakti foe na eigifasi prisiri. Ini Hebrewsma 12:1-3 e tanapoe: „Foe dati-ede dan, foe di wi abi lontoe wi so wan bigi wolkoe foe kotoigi, meki wi poeroe a wi tapoe ibri hebi èn na sondoe di e kisi wi makriki èn meki wi tan horidoro foe lon a streilon di de na wi fesi, ala di wi e tan loekoe ala ten na a Prenspari Wrokoman èn a Man di e meki wi bribi kon boen dorodoro, Jesus. Foe na prisiri ede di ben de na en fesi, meki a ben horidoro ondro wan pina-oedoe, broko-ai gi sjen, èn ben go sidon na a reti-anoe foe na kownoestoeroe foe Gado. Ija, hori ai boen tapoe na sma di ben tan froedrage foe sondari so wan genstaki kontrari den eigi afersi foe den, so taki oenoe no kon weri èn lasi ati ini oen sili.”
3 Na ini Jesus heri poebliki diniwroko, a prisiri foe Jehovah meki a ben man foe tan lon a streilon. (Teki gersi Nehemia 8:10.) A prisiri foe en ben jepi en foe froedrage srefi wan sjen dede na a pina-oedoe, èn baka dati a ben ondrofeni a prisiri pasa marki foe opo komoto foe dede èn foe opo go na a reti-anoe sei foe en Tata èn foe sorgoe taki, komoto foe na presi dati, a wroko foe Gado doe dorodoro. Foe di a horidoro leki wan libisma na a sei foe Gado, meki a ben tan hori en reti tapoe têgo libi. Ija, so leki fa Lukas 21:19 e taki en: „Nanga horidoro foe oen sei oenoe sa kisi oen sili.”
4. Sortoe eksempel Jesus ben poti gi en kompe lonman, èn tapoe san wi moesoe hori wi prakseri?
4 Jesus Krestes ben gi a moro boen eksempel na en kompe lonman, èn na eksempel foe en e gi wi a seikerfasi taki wi toe kan de winiman (1 Petrus 2:21). San Jesus e aksi wi foe doe, wi kan doe. Neleki fa en ben horidoro, na so wi kan doe dati toe. Èn ala di, na wan stanfaste fasi, wi e tan waka doro na en baka, dan tokoe ete wi moesoe hori wi prakseri tapoe den reide di wi abi foe de nanga prisiri (Johanes 15:11, 20, 21). Prisiri sa gi wi a krakti foe horidoro ini a lon foe a streilon ini a dienst foe Jehovah, te leki wi sa kisi a glori prijs foe têgo libi. — Kolosesma 1:10, 11.
5. Fa wi kan de nanga prisiri èn kisi krakti gi na streilon di de a wi fesi?
5 Foe jepi wi foe horidoro ini a streilon, dan Jehovah e gi wi krakti di e pasa san de normaal. Te wi e kisi froefolgoe, dan a krakti dati èn a sabi di wi sabi foe san-ede wi abi a grani foe kisi froefolgoe, e tranga wi (2 Korentesma 4:7-9). Ala sani di wi e ondrofeni foe na belang foe gi grani na a nen foe Gado èn foe hori en soevereiniteit hei, na wan reide gi wan prisiri di no wan sma kan teki poeroe foe wi (Johanes 16:22). Disi e froeklari foe san-ede den apostel ben prisiri, baka di a djoe Sanhedrin ben gi komando foe fon den, foe di den ben gi kotoigi foe den froewondroe sani di Jehovah Gado ben doe ini a tori foe Jesus, „bika den ben teri den warti foe ben njan sjen foe en nen ede” (Tori foe den Apostel 5:41, 42). A prisiri foe den no ben kon foe na froefolgoe srefi, ma foe a dipi inisei satisfaksi foe a sabi di den ben sabi taki den ben plisi Jehovah nanga Jesus.
6, 7. Foe san-ede na kresten lonman kan abi prisiri, srefi ala di a abi bigi banawtoe, èn nanga sortoe bakapisi?
6 Wan tra krakti di e jepi wi ini wi libi na a howpoe di Gado poti a wi fesi. So leki fa Paulus e poti en: „Meki wi abi vrede nanga Gado nanga jepi foe wi Masra Jesus Krestes, di nanga en wi kisi pasi, nanga jepi foe bribi, foe go na a no-froedini boen-atifasi disi pe wi e tanapoe na ini now; èn meki wi prisiri, tapoe a fondamenti foe howpoe foe a glori foe Gado. Èn no dati wawan, ma meki wi prisiri toe ala di wi de ini banawtoe, foe di wi sabi taki banawtoe e meki horidoro kon, horidoro foe en sei wan toestand pe den e feni wi boen, a toestand pe den e feni wi boen foe en sei, howpoe, èn a howpoe no e meki wi kisi sjen.” — Romesma 5:1-5.
7 Banawtoe foe densrefi no de sani foe prisiri, ma tokoe den froktoe foe vrede di den e tjari baka dati kon de wan prisiri sani. Den froktoe disi na horidoro, wan toestand pe den e feni wi boen, howpoe, èn a kontroe foe a howpoe dati. A hori di wi e horidoro, sa meki a kon so fara taki Gado feni wi boen. Te Gado feni wi boen, dan nanga froetrow wi kan howpoe tapoe a kontroe foe den pramisi di a ben gi. Na howpoe disi e hori wi tapoe a joisti pasi èn e horibaka gi wi na ondro banawtoe te leki a howpoe kon troe. — 2 Korentesma 4:16-18.
Kolokoe den wan de di e horidoro!
8. Foe san-ede a pisiten disi foe wakti no de lasiten gi wi?
8 Ala di wi e wakti a ten di Gado poti foe prati den prijs gi den lonman, dan kenki de di wi e ondrofeni. Den kenki disi na jeje kenki di e meki wi kon moro boen ini a kaka di wi e kakafoetoe gi tesi nanga boen bakapisi, èn den e meki wi wini a boen-ati foe Gado. Den e boeweisi san wi de èn e gi wi na okasi foe sori densrefi boen eigifasi di den getrow-wan foe owroeten, spesroetoe wi Eksempel, Jesus Krestes, ben sori. Na disipel Jakobus e taki: „Loekoe en leki wan prisiri, mi brada, te difrenti tesi e miti oenoe, foe di oenoe sabi taki na bribi foe oenoe di pasa tesi e tjari horidoro kon. Ma meki na horidoro doe en wroko dorodoro, foe oenoe kan de volmaakti èn boen na ala fasi, no e mankeri noti” (Jakobus 1:2-4). Ija, wi kan froewakti foe kisi difrenti tesi, ma den disi sa jepi foe meki wi tan kweki den joisti eigifasi. Na so fasi wi e sori taki wi sa tan ini a streilon disi te leki wi wini a prijs, awansi sortoe hendri wi e miti.
9, 10. (a) Foe san-ede den sma di e horidoro na ondro tesi de kolokoe, èn fa wi moesoe doe te wi e tanapoe a fesi tesi? (b) Soema ben de den kolokoe sma foe owroeten, èn fa den kan teri wi a mindri den?
9 A no de foe froewondroe foe dati-ede, taki Jakobus ben taki: „Kolokoe na man de di e horidoro na ondro tesi, bika baka te den feni en boen, a sa kisi na kownoe-ati foe têgo libi, di Jehovah ben pramisi na den wan di e tan lobi en”! (Jakobus 1:12) Efoe wi kon tanapoe na fesi tesi, meki wi hori wisrefi na gronprakseri èn abi leki fetisani den eigifasi foe Gado di sa gi wi krakti foe pasa den tesi. — 2 Petrus 1:5-8.
10 Prakseri taki a fasi fa Gado e handri nanga wi no de njoen noso wan sani di wi no ben sabi ete. Nanga a getrow „wolkoe foe kotoigi” foe owroeten den ben handri na a srefi fasi te den ben boeweisi den getrowfasi na Gado (Hebrewsma 12:1). A feni di Gado ben feni den boen, skrifi na ini en Wortoe, èn wi e froeklari den alamala kolokoe foe di den ben horidoro na ondro tesi. Jakobus e taki: „Brada, teki leki wan model foe na pina foe ogri èn a sori foe pasensi den profeiti, di ben taki ini a nen foe Jehovah. Loekoe! Wi e froeklari den di horidoro, kolokoe. Oenoe jere foe na horidoro foe Job èn oenoe si fa Jehovah ben meki sani waka, taki Jehovah safoe srefisrefi ini lobi èn sari-ati” (Jakobus 5:10, 11). Den ben taki foe dati a fesi taki na ini den moeilek lasti dei disi, wan toe sma ben sa de foe si ini a grontapoe preigron, di ben sa dini Jehovah nanga soifri retifasi, neleki fa den profeiti dati ben doe na ini den jarihondro foe owroeten. Wi no de kolokoe taki wi de den sma di e doe disi? — Danièl 12:3; Openbaring 7:9.
Kisi krakti foe Jehovah en Wortoe di e gi deki-ati
11. Fa na Wortoe foe Gado kan jepi wi foe horidoro, èn foe san-ede wi no moesoe de leki den ston gron ini Jesus agersitori?
11 Paulus ben sori go na ete wan tra jepisani foe horidoro, di a ben taki dati „nanga jepi foe horidoro nanga pasensi, èn nanga jepi foe na deki-ati di wi e kisi foe den Boekoe, wi sa kan hori fasti na wi howpoe” (Romesma 15:4; The Twentieth Century New Testament). A waarheid, Gado Wortoe, moesoe kon kisi roetoe dipi na ini wi, so taki ala joeroe wan joisti piki kon foe wi. Wi no abi wini kwetikweti efoe wi de leki a ston gron di den taki foe en na ini Jesus agersitori foe a saiman: „Den disi na den sma di ben sai na tapoe den ston gron: so esi leki den jere na wortoe, den e teki en nanga prisiri. Tokoe den no abi roetoe na ini densrefi, ma den e tan foe wan pisiten; ma so esi leki den e kisi banawtoe noso froefolgoe foe na wortoe ede, den e naki foetoe fadon” (Markus 4:16, 17). A waarheid foe a Wortoe foe Gado no e kisi roetoe dipi na ini den sortoe sma disi; foe dati-ede na ini ten foe banawtoe, den no man foe meki gebroiki foe en leki a troe fonten foe krakti èn howpoe.
12. Fa wi no moesoe bidrigi wisrefi te wi e teki na boen njoensoe?
12 Ibriwan sma di e teki a boen njoensoe foe a Kownoekondre, no moesoe bidrigi ensrefi nanga san sa kon a baka. A e teki na en tapoe wan waka nanga libi di sa tjari banawtoe noso froefolgoe kon (2 Timoteus 3:12). Ma a moesoe teki en leki „prisiri” foe abi a grani foe ondrofeni difrenti sortoe tesi, foe di a e hori fasti na Gado Wortoe èn e taki foe en nanga trawan. — Jakobus 1:2, 3.
13. Fa èn foe san-ede Paulus ben prisiri foe den kresten na Tesalonika?
13 Na ini a fosi jarihondro, gensman na Tesalonika ben meki oproeroe foe a preiki di Paulus ben preiki. Di Paulus ben go na Berea, den froefolgoeman disi ben go na en baka, so taki den ben kan meki moro trobi kon. Gi den getrow-wan di ben tan na baka na Tesalonika, na apostel, di den ben froefolgoe, ben skrifi: „Wi de froeplekti foe taki Gado tangi gi oenoe ala ten, brada, so leki fa a fiti, foe di a bribi foe oenoe e gro na wan toemoesi aparti fasi èn na lobi foe ibriwan foe oenoe, gi makandra, sondro foe poeroe wan sma na ini, e kon moro bigi. Foe dati-ede meki wisrefi e prodo nanga oenoe na mindri den gemeente foe Gado, foe na horidoro èn bribi foe oenoe ede ini ala den froefolgoe èn banawtoe foe oenoe di oenoe e froedrage. Disi na wan boeweisi foe na regtfardiki kroetoe foe Gado, di e tjari oenoe go na a warti di den e feni oenoe warti gi na kownoekondre foe Gado, di oenoe e njan pina foe en toe” (2 Tesalonikasma 1:3-5). Ala di den ben njan pina foe na anoe foe feanti, tokoe den kresten foe Tesalonika ben gro na ini kresten eigifasi èn na ini nomroe. Fa dati ben man? Foe di den ben kisi krakti foe a Wortoe foe Jehovah di e gi deki-ati. Den ben gi jesi na den komando foe na Masra èn ben lon a streilon nanga horidoro. — 2 Tesalonikasma 2:13-17.
Foe na froeloesoe foe trawan
14. (a) Foe sortoe reide wi moesoe tan nanga prisiri ini na diniwroko, ala di wi de ini banawtoe? (b) Foe san wi e begi èn foe san-ede?
14 Ini a fosi presi, ini a belang foe a kisi di Gado moesoe kisi leti, meki wi e froedrage pina nanga froefolgoe na wan getrow fasi èn sondro foe kragi. Ma wan tra reide, pe wi no e soekoe wi eigi boen nomo, de ete, foe san-ede wi e saka wisrefi na ondro den sortoe sani disi: so taki wi kan gi den Kownoekondre njoensoe abra na trawan, so taki moro preikiman gi Gado Kownoekondre kan opo kon foe meki „wan ploebliki bekènti foe kisi froeloesoe” (Romesma 10:10). Den sma di e wroko na ini a diniwroko foe Gado moesoe begi, taki na Masra foe na kotiwroko e blesi a wroko foe den, foe di a e sorgoe gi moro Kownoekondre preikiman (Mateus 9:38). Paulus ben skrifi Timoteus: „Den sani di joe ben jere foe mi nanga jepi foe foeroe kotoigi, froetrow den sani disi na getrow sma, di, foe den sei, sa de bekwaam nofo foe gi leri na trawan. Teki leki wan toemoesi boen sroedati foe Krestes Jesus joe porsi na ini a pina foe ogri.” — 2 Timoteus 2:2, 3.
15. Foe san-ede wi moesoe waka leki sroedati èn tjalensiman „ini den prei”?
15 Wan sroedati e poti ensrefi aparti foe a libi foe wan borgroe di no de wan sroedati èn di no abi someni skotoe. Na a srefi fasi wi no moesoe moksi wisrefi nanga den afersi foe den sma di no de na ini a legre foe Masra ma di de, foe taki en leti, na a sei foe a gensman. Foe dati-ede Paulus ben skrifi Timoteus moro fara: „No wan man di e dini leki sroedati, e moksi ensrefi na ini bisnis-afersi foe na libi, so taki a kan kisi a boen-ati foe den sma di teki en leki sroedati. A tapoe foe dati, wan sma, srefi te a e strei na ini wan prei, no e kisi a kownoe-ati efoe a no strei akroederi den lin” (2 Timoteus 2:4, 5). Ini a doe di den e doe moeiti foe wini ini a streilon foe kisi a „kownoe-ati foe libi”, dan den lonman moesoe oefen foe dwengi densrefi èn tan farawe foe hebi di den no kan gebroiki èn sani di de a den pasi. Na a fasi disi den kan poti den prakseri na tapoe a tjari foe a boen njoensoe foe froeloesoe gi trawan. — Jakobus 1:12; teki gersi 1 Korentesma 9:24, 25.
16. San sma no kan tai, èn foe na boen foe soema wi e horidoro?
16 Foe di wi lobi Gado èn den sma di gersi skapoe èn di e soekoe foe feni en, meki nanga prisiri wi e froedrage foeroe, so taki wi kan miti trawan nanga a boen njoensoe foe froeloesoe. Feanti kan tai wi foe no preiki a Wortoe foe Gado. Ma sma no man tai a Wortoe foe Gado èn foe taki foe en, so taki trawan kisi froeloesoe, sma no kan poti na keti. Paulus ben froeteri Timoteus foe san-ede a ben de klari foe ondrofeni tesi: „Prakseri taki Jesus Krestes ben opo baka foe dede èn ben de foe na siri foe David, akroederi na boen njoensoe di mi e preiki, di mi moesoe njanpina foe en te doro strafoe-oso-boei srefi leki wan ogriman. Ma tokoe na wortoe foe Gado no tai. Foe dati-ede mi e go doro foe froedrage ala sani foe na boen foe den wan di den ben teki so taki densrefi toe kan kisi na froeloesoe di de ini wánfasi nanga Jesus Krestes, makandra nanga têgo glori” (2 Timoteus 2:8-10). Na ini a ten disi wi no abi soso a pikin fikapisi foe den sma di den feni boen foe kisi na hemel Kownoekondre na prakseri, ma so srefi a bigi ipi tra skapoe foe a Boen Herder, Jesus Krestes, a bigi ipi di e kisi na grontapoe paradijs na ondro Krestes Kownoekondre. — Openbaring 7:9-17.
17. Foe san-ede wi no moesoe tapoe nanga na streilon, èn san sa de a bakapisi efoe wi e tan ini a streilon te na a kaba?
17 Efoe wi de sma di no e horidoro, dan wi no sa man jepi wisrefi noso iniwan tra sma foe kisi froeloesoe. Foe di wi e horidoro na ini a kresten streilon, awansi sortoe hendri wi e miti toe, wi e sorgoe taki wi e tan ini lin foe kisi a prijs èn wi kan jepi trawan langalanga foe kisi froeloesoe, ala di wi de wan boen eksempel foe krakti gi trawan. Awansi sortoe howpoe wi abi toe, efoe a de now foe hemel noso foe grontapoe, na fasi foe Paulus foe „feti a baka a marki foe kisi a prijs” na wan toemoesi boen eksempel foe waka na en baka. — Filipisma 3:14, 15.
Go doro na wan stanfaste fasi ini a streilon
18. Foe wini na prijs e anga foe san, ma foe san wi moesoe tan farawe foe hori bro te na a kaba?
18 Foe tjari wi kresten waka nanga libi kon na wan fiktori kaba, so taki Jehovah kisi reti èn foe wini na prijs di a poti gi wi foe kisi, e anga foe a go doro di wi e go doro na wan stanfaste fasi ini na heri streilon. Foe dati-ede, wi no o man foe hori bro te na a kaba, efoe wi e lai wisrefi nanga sani di no e dini na afersi foe regtfardikifasi. Srefi te wi poeroe den sortoe sani disi, dan tokoe den sani di de fanowdoe de boen hebi ete, so taki wi sa abi ala krakti fanowdoe di wi kan tjari kon na wan. Foe dati-ede Paulus e gi na rai: „Meki wi poeroe toe ibri hebi a wi tapoe èn na sondoe di e kisi wi makriki, èn meki wi tan horidoro foe lon na streilon di ben poti na wi fesi” (Hebrewsma 12:1). Neleki Jesus wi no moesoe poti toemoesi foeroe krakti tapoe den pina di wi moesoe tjari, ma wi moesoe si den leki wan pikin prijs di wi moesoe pai gi na prisiri paiman di de foe kisi. — Teki gersi Romesma 8:18.
19. (a) Sortoe froetrow Paulus ben sori krosibei foe na kaba foe en libi? (b) Foe di wi e kon krosibei foe na streilon foe horidoro, dan sortoe froetrow wi moesoe abi ini a tori foe na pramisi paiman?
19 Krosibei foe na kaba foe en libi Paulus ben man taki: „Mi ben feti na toemoesi boen feti, mi ben waka na libipasi te na a kaba, mi ben hori a bribi. Bigin foe now, den poti na wan sei gi mi a kownoe-ati foe regtfardikifasi” (2 Timoteus 4:7, 8). Wi de ini a streilon disi foe horidoro, foe kisi a prijs foe têgo libi. Efoe a horidoro foe wi e kon moro mendri soso foe di a streilon de pikinso moro langa leki san wi ben froewakti di wi ben bigin nanga en, dan wi sa fadon te wi de krosibei foe kisi a pramisi paiman. No meki fowtoe. Degedege no de taki a paiman de drape.
20. San moesoe de wi fasti bosroiti te leki na kaba foe na streilon doro?
20 So boen meki den ai foe wi no kon weri foe wakti foe a bigi banawtoe bigin, di e tjari pori kon fosi na tapoe Babilon na Bigiwan èn baka dati na tapoe a tra pisi foe na organisâsi foe Didibri (2 Petrus 3:11, 12). Nanga ala den krin marki lontoe wi, meki ini bribi wi tan loekoe go na fesi. Meki wi sreka wisrefi gi na hori di wi moesoe horidoro, èn meki wi go doro nanga deki-ati ini na streilon di Jehovah Gado poti a wi fesi, te leki wi doro na kaba èn wini na prijs di e gi prisiri, foe na poti regtfardiki foe Jehovah nen nanga jepi foe Jesus Krestes.
Fa joe ben sa piki?
◻ Gi sortoe streilon wan kresten moesoe de srekasreka?
◻ Foe san-ede prisiri de so prenspari foe lon a streilon?
◻ Foe sortoe prenspari reide wi moesoe tan ini a diniwroko awansi moeilek ten e miti wi?
◻ Foe san-ede wi no moesoe tapoe nanga a streilon di Gado ben poti a wi fesi?
[Prenki na tapoe bladzijde 13]
Kresten moesoe horidoro neleki den de ini wan streilon foe wan langa pasi
[Prenki na tapoe bladzijde 15]
Te lonman wani foe kisi na „kownoe-ati foe libi”, dan den moesoe oefen foe man dwengi densrefi