Horidoro na ini a streilon
„Meki wi horidoro te wi e lon a streilon di wi musu lon ete.”—HEBR. 12:1.
1, 2. Nanga san na apostel Paulus agersi a libi fu wan Kresten?
NA FURU presi sma e lon maraton noso langa streilon ibri yari. Sonwan fu den na heri bun lonman èn den e lon fu wini a streilon. Ma moro furu fu den lonman sabi taki den no o wini a streilon. Den breiti kaba te den man lon te na a kaba.
2 Bijbel e agersi a libi fu wan Kresten nanga wan streilon tu. Na apostel Paulus taki fu a tori disi na ini a fosi brifi di a skrifi gi den Kresten brada nanga sisa fu en na ini owruten Korente. A ben skrifi: „Unu no sabi taki ala den sma di e teki prati na wan streilon e lon, ma na wán nomo e wini? Lon na so wan fasi taki unu kan wini.”—1 Kor. 9:24.
3. San Paulus ben wani sori di a taki dati na wán sma nomo e wini a streilon?
3 Paulus ben taki dati na wán sma nomo e wini wan streilon. Ma disi wani taki dati na wán Kresten nomo e wini a streilon fu libi èn taki den trawan e lon fu soso? Nôno. Nanga na agersitori disi Paulus ben wani sori fu san ede den sma ben e lon streilon. Den Kresten na Korente ben sabi taki ala lonman ben wani wini aladi na wán nomo ben kan wini. Dati meki ala lonman ben e oefen hebi èn den ben e lon so tranga leki den man. Alamala ben e du bun furu muiti fu wini. Na so Paulus ben wani sori den tra Kresten taki den ben musu du bun furu muiti fu lon a streilon fu libi te na a kaba. Ala Kresten di e du disi kan wini èn kisi têgo libi.
4. San wi musu sabi fu a streilon di Kresten e lon?
4 Den wortu disi e gi wi deki-ati, ma den e meki wi denki seryusu tu fu a fasi fa wi e lon a streilon fu libi. Fu san ede? Fu di a sani di wi kan wini, awinsi dati na libi na hemel noso libi na ini wan paradijs na grontapu, bun moro ala tra sani. A streilon langa èn a hebi. Furu sani de di kan meki en muilek gi wi, di kan puru wi prakseri èn di kan meki wi tapu nanga a streilon (Mat. 7:13, 14). A de wan sari sani taki son sma e lon moro safri now, trawan tapu fu lon èn trawan fadon na ini a streilon. Sortu trapu nanga problema wi kan miti na ini a streilon fu libi? Fa yu kan wai pasi gi den? San yu kan du fu lon te na a kaba, so taki yu wini a streilon?
Wi musu horidoro fu kan wini
5. San Paulus ben wani sori den Kresten di a skrifi Hebrewsma 12:1?
5 Di Paulus skrifi wan brifi gi den Hebrew Kresten na Yerusalem nanga Yudea, a taki baka fu sma di e lon streilon. (Leisi Hebrewsma 12:1.) A sori fu san ede Kresten musu lon a streilon fu den èn san den musu du fu lon te na a kaba. Meki wi luku fosi fu san ede Paulus skrifi a brifi disi gi den Hebrewsma èn san a ben wani den fu du. Baka dati wi o luku san wi kan leri fu den sani di a skrifi gi den.
6. San den kerki fesiman ben wani taki den Kresten ben musu du?
6 Den fosi-yarihondro Kresten, spesrutu den wan fu Yerusalem nanga Yudea, ben e kisi furu tesi nanga problema. A ben muilek gi den trutru, fu di den Dyu kerki fesiman ben e dwengi sma fu gi yesi na den. Sowan dritenti yari na fesi den meki sma bribi taki Yesus Krestes ben opo ensrefi teige a tirimakti èn taki a ben de wan ogri man di ben musu kisi dedestrafu. Den kerki fesiman disi ben meki sma kiri Yesus èn now den ben wani tapu den sma di ben e preiki fu en. Na ini a buku Tori fu den apostel wi kan leisi san pasa syatu baka a Pinksterfesa na ini a yari 33. Furu leisi den kerki fesiman disi du ogri nanga den Kresten, fu di den ben wani tapu den fu preiki. Sobun, a libi ben muilek srefisrefi gi den Kresten di ben e tai hori na Gado.—Tori. 4:1-3; 5:17, 18; 6:8-12; 7:59; 8:1, 3.
7. San na wan tra sani di ben meki taki a ten fu den Kresten ben muilek?
7 Wan tra sani di ben meki taki a ten fu den Kresten dati ben muilek, na taki a pori fu Yerusalem ben de krosibei. Yesus ben taigi den taki a Dyu pipel di ben drai baka gi Gado, ben o kisi pori. A ben taigi den bakaman fu en tu san ben o pasa syatu fosi a kaba èn a ben taigi den finifini san den ben musu du fu tan na libi. (Leisi Lukas 21:20-22.) San den ben musu du dan? Yesus warskow den: „Luku bun taki noiti unu nyan pasa marki, taki unu no dringi tumusi furu, noso taki unu no broko un ede nanga na aladei libi, so taki un ati kon hebi. Noso a dei dati o kon na unu tapu wantronso, sondro taki unu fruwakti dati.”—Luk. 21:34.
8. San ben kan meki taki son Kresten ben e lon moro safri noso ben tapu fu lon?
8 Di Paulus skrifi a brifi disi gi den Hebrewsma, sowan 30 yari ben pasa kaba di Yesus gi a warskow dati. San ben pasa nanga den Kresten dati na ini den 30 yari di ben pasa? Fu di den ben abi problema, noso fu di den ben e broko den ede fu kisi den sani di den ben abi fanowdu na ini na aladei libi, meki sonwan fu den no ben leri sabi Yehovah moro bun èn den no ben de bun mati fu en moro (Hebr. 5:11-14). Soleki fa a sori, dan trawan ben e denki taki a ben o moro makriki efu den ben e libi leki den tra Dyu na den lontu. Kande den ben e denki taki disi no fowtu, fu di den Dyu dati no ben gowe libi Gado krinkrin èn den ben e du furu fu den sani ete di skrifi na ini a Wèt fu Moses. Boiti dati yu ben abi sma na ini den gemeente di ben e dwengi trawan fu hori a Wèt fu Moses nanga den Dyu gwenti ete. Son Kresten ben bribi den èn trawan ben e arki den, fu di den ben frede den. San Paulus ben kan taki fu gi den deki-ati fu tan libi leki Kresten èn fu lon a streilon te na a kaba?
9, 10. (a) Sortu deki-ati Paulus gi na a kaba fu Hebrewsma kapitel 10? (b) Fu san ede Paulus skrifi fu den sani di den kotoigi na ini owruten du fu di den ben abi bribi?
9 Yehovah ben meki Paulus skrifi a brifi disi fu gi den Hebrew Kresten deki-ati. Na ini kapitel 10 Paulus sori taki a Wèt na soso „wan skaduw fu den bun sani di musu kon ete” èn a sori krin o prenspari a frulusu-ofrandi fu Krestes de. Na a kaba fu a kapitel dati Paulus gi den a deki-ati disi: „A de fanowdu taki unu horidoro, so taki baka te unu du a wani fu Gado, unu kan kisi san a ben pramisi unu. Ete ’wan syatu pisi ten’, dan ’a sma di e kon, o doro. A no o draidrai.’”—Hebr. 10:1, 36, 37.
10 Na ini Hebrewsma kapitel 11 pe Paulus e sori krin san na trutru bribi na ini Gado. Fu sori disi, a taki fu mansma nanga umasma na ini owruten di ben abi wan tranga bribi. Na fu soso a taki fu dati? Kwetikweti. Na apostel ben frustan taki den tra anbegiman ben musu sabi taki wan sma di abi bribi musu abi deki-ati tu èn a musu man horidoro. Den moi eksempre fu den owruten futuboi fu Yehovah di ben e tai hori na en, ben o gi den Hebrew Kresten deki-ati fu horidoro te den ben e kisi tesi nanga problema. Fu dati ede, baka di Paulus taki fu ala den sani di den futuboi disi du fu di den ben abi bribi, a taki: „Efu someni kotoigi de na wi lontu neleki wan bigi wolku, dan meki wi puru ala hebi na wi tapu tu èn sosrefi a sondu di kan kisi wi makriki. Meki wi horidoro te wi e lon a streilon di wi musu lon ete.”—Hebr. 12:1.
’Kotoigi di de neleki wan bigi wolku’
11. Te wi e prakseri den ’kotoigi di de na wi lontu neleki wan bigi wolku’, dan sortu krakti dati musu abi na wi tapu?
11 Paulus ben taki dati den futuboi fu Yehovah di ben e libi fosi a ten fu den Kresten, na ’kotoigi di de na wi lontu neleki wan bigi wolku’. Den tan dini Yehovah teleki den dede èn disi e sori taki Kresten man tan dini Yehovah awinsi den de na ini situwâsi di muilek srefisrefi. Den „kotoigi” disi de leki lonman di kaba lon a streilon fu den. Na eksempre fu den ben o gi trawan deki-ati fu lon go doro te na a kaba. Efu wi de na ini wan streilon èn wi sabi taki den bun lonman e luku wi èn e gi wi deki-ati fu lon go doro, dan wi o du ala muiti fu lon te na a kaba, a no so? Na so den Hebrew Kresten ben musu si den owruten futuboi fu Yehovah. Na eksempre fu den futuboi dati ben o gi den deki-ati èn a ben o memre den taki den man horidoro na ini a streilon èn taki den man lon te na a kaba. Wi srefi man du dati tu.
12. San wi kan leri fu den sma di Paulus kari leki eksempre?
12 Den sma di sori bribi èn di Paulus taki fu den, ben de na ini den srefi sortu situwâsi leki wi. Fu eksempre, Noa ben e libi na a ten di Yehovah ben o pori grontapu nanga wan frudu. Wi e libi krosibei fu a kaba fu a grontapu disi. Yehovah ben aksi Abraham nanga Sara fu gowe libi den mamakondre. A ben pramisi den taki a ben o meki den bakapikin fu den tron wan pipel di ben o dini en èn den ben e wakti teleki a ben o meki a pramisi dati kon tru. Yehovah e aksi wi fu no teri wisrefi moro èn fu libi gi en. A pramisi wi taki efu wi du dati, a o de wi mati èn a o blesi wi. Di Moses ben e go na a Pramisi Kondre, a ben musu waka na ini wan bigi sabana pe furu ogri ben kan miti en. Fu man go na a nyun grontapu di Gado pramisi, wi musu libi na ini wan grontapu pe furu ogri kan miti wi. A bun èn a prenspari srefisrefi fu poti prakseri na den sani di pasa nanga den sma disi, den bun sani di den du noso den fowtu di den meki, èn den bun fasi nanga den swakifasi fu den.—Rom. 15:4; 1 Kor. 10:11.
San yepi den fu lon a streilon te na a kaba?
13. Fu san ede a no ben makriki gi Noa fu horidoro èn san yepi en fu du ala san Yehovah aksi en?
13 San yepi den futuboi fu Yehovah fu horidoro èn fu lon a streilon te na a kaba? Luku san Paulus taki fu Noa. (Leisi Hebrewsma 11:7.) A ’bigi frudu di ben o kon na heri grontapu fu pori ala libisani di abi libikrakti’ ben de wan sani di Noa „no ben si ete” (Gen. 6:17). A ben de wan aparti sani di no ben pasa noiti ete. Ma Noa no ben denki taki so wan sani no ben man pasa. Fu san ede? A ben bribi taki Yehovah ben o du iniwan sani di a taki. Noa no ben denki taki den sani di Yehovah aksi muilek tumusi fu du. A du ala san Yehovah taigi en. Bijbel e taki dati „a du leti so” (Gen. 6:22). Prakseri ala den sani di Noa ben musu du. A ben musu bow na ark, a ben musu tyari den meti kon na wán, a ben musu lai nyanyan gi libisma nanga meti, a ben musu preiki fu warskow den sma, èn a ben musu yepi en osofamiri fu tan abi wan tranga bribi na ini Yehovah. Sobun, a no ben de wan pikin sani fu du „leti so”. Ma a bribi nanga a horidoro di Noa ben abi meki taki en nanga en osofamiri tan na libi èn den kisi blesi.
14. Fu san ede a no ben makriki gi Abraham nanga Sara fu horidoro èn san wi kan leri fu den?
14 Baka dati Paulus taki fu Abraham nanga Sara di de tu na ini a grupu fu ’kotoigi di de na wi lontu neleki wan bigi wolku’. Den heri libi kenki di Gado taigi den fu gowe libi den oso na Ur. Den no ben sabi san ben o pasa nanga den. Ma a bribi fu den ben tranga èn den ben e gi yesi awinsi a no ben makriki gi den. Bijbel e kari Abraham a „tata fu ala sma di e bribi”, fu di a ben de klariklari fu gi yesi na Yehovah ala ten, awinsi dati no ben makriki gi en (Rom. 4:11). Fu di den Hebrew Kresten ben sabi fu a libi fu Abraham nanga en osofamiri, meki Paulus taki fu wan tu sani nomo di Abraham du fu di a ben abi bribi. Den sani disi ben nofo fu sori o tranga a bribi fu Abraham ben de. Paulus taki fu den sma disi: „Ala den sma disi [sosrefi Abraham nanga en osofamiri] dede sondro fu lasi den bribi, aladi den no si fa den pramisi disi kon tru, ma den ben si den fu farawe kaba èn den ben prisiri nanga dati. Den ben e fruteri ala sma taki den ben de trakondre sma èn taki den ben kon libi wan pisi ten nomo na ini a kondre” (Hebr. 11:13). A de krin taki den ben man horidoro na ini a streilon, fu di den ben e bribi na ini Gado èn fu di den ben de en mati.
15. Fu san ede Moses bosroiti fu libi wan tra sortu libi?
15 Moses na wan tra futuboi fu Yehovah di de na ini a grupu fu ’kotoigi di de na wi lontu neleki wan bigi wolku’. A ben gudu èn a ben abi biginen, ma toku a „bosroiti fu nyan pina makandra nanga a pipel fu Gado”. Fu san ede a du dati? Paulus taki: „A ben poti ala en prakseri na a pai di a ben o kisi. . . . A horidoro neleki a ben e si a sma di wi no man si nanga wi ai.” (Leisi Hebrewsma 11:24-27.) Moses ben sabi taki wan moro bun sani de leki fu „nyan bun fu sondu fu wan pisi ten nomo”. A bribi fu en na ini Gado èn na ini den pramisi fu en ben tranga so te, taki a ben man sori furu deki-ati èn a ben man horidoro. Dati meki a du furu muiti fu tyari den Israelsma komoto na Egepte go na a Pramisi Kondre.
16. Fu san ede Moses no lasi-ati di a no ben kan go na ini a Pramisi Kondre?
16 Neleki Abraham, Moses dede fosi a pramisi fu Gado kon tru. Syatu fosi den Israelsma go na ini a Pramisi Kondre, Gado taigi Moses: „Fu farawe yu o si a kondre di mi gi den Israelsma, ma yu no o go na ini.” Wan leisi Moses nanga Aron ati bron srefisrefi nanga den sma di ben opo densrefi teige Gado. Dati meki den ’no ben du san Gado taigi den fu du di den Israelsma ben de na den watra fu Meriba’ (Deut. 32:51, 52). A sani disi ben meki Moses lasi-ati, noso a ben kon abi bita-ati? Nôno. A blesi a pipel èn a tapu nanga den wortu disi: „Ai Israel, un de so koloku! Suma de leki unu? Unu na wan pipel di e kisi frulusu fu Yehovah. A de leki wan skelt di e kibri unu. En na wan bigi feti-owru gi unu.”—Deut. 33:29.
San wi e leri
17, 18. (a) San wi kan leri fu a grupu fu ’kotoigi di de na wi lontu neleki wan bigi wolku’? (b) San wi o luku na ini a tra artikel?
17 Now di wi poti prakseri na a libi fu wan tu sma fu a grupu fu ’kotoigi di de na wi lontu neleki wan bigi wolku’, wi e si krin taki wi musu abi wan tranga bribi na ini Gado èn den pramisi fu en, efu wi wani lon a streilon te na a kaba (Hebr. 11:6). A bribi disi musu abi krakti tapu a heri libi fu wi. Tra fasi leki den sma di no abi bribi, den futuboi fu Yehovah sabi taki wan moro bun ten e kon. Wi man si „a sma di wi no man si nanga wi ai”, èn dati meki wi man horidoro na ini a streilon.—2 Kor. 5:7.
18 A Kresten streilon no makriki. Toku wi man lon a streilon te na a kaba. Na ini a tra artikel wi o luku sortu tra sani kan yepi wi fu du dati.
Yu kan tyari disi kon na krin?
• Fu san ede Paulus skrifi fu den sani di den kotoigi na ini owruten du fu di den ben abi bribi?
• Te wi e prakseri a grupu fu ’kotoigi di de na wi lontu neleki wan bigi wolku’, dan fa dati e gi wi deki-ati fu horidoro na ini a streilon?
• San yu leri fu kotoigi soleki Noa, Abraham, Sara, nanga Moses?
[Prenki na tapu bladzijde 19]
Abraham nanga Sara ben de klariklari fu gowe libi a switi libi na ini Ur