Kweki na froktoe foe dwengi joesrefi
„Na froktoe foe na jeje na lobi, prisiri, vrede, langa-pasensi, switifasi, boen-ati, bribi, safri-ati, dwengi joesrefi. No wan wet e tapoe den sortoe sani disi.” — GALASIASMA 5:22, 23.
1. Soema ben gi wi den moro boen eksempel foe a dwengi di sma moesoe dwengi densrefi, èn sortoe tekst e sori disi?
JEHOVAH GADO nanga Jesus Krestes ben gi wi den moro boen eksempel foe a dwengi di sma moesoe dwengi densrefi. Jehovah ben tan dwengi ensrefi foe sensi di libisma ben trangajesi na ini a djari foe Eden. (Teki gersi Jesaja 42:14.) Wi e leisi neigi tron na ini den Hebrew Boekoe taki a „e teki langa foe kisi atibron” (Exodus 34:6). Dati e aksi foe a dwengi ensrefi. Èn na Manpikin foe Gado seiker ben dwengi ensrefi foeroe, bikasi „te sma ben kosi en, a no ben go kosi baka” (1 Petrus 2:23). Tokoe, Jesus ben kan aksi en hemel Tata foe kisi na jepi foe „moro leki twarfoe legioen engel.” — Mateus 26:53.
2. Sortoe boen eksempel wi abi, na ini den Boekoe, foe a dwengi di onvolmaakti libisma ben dwengi densrefi?
2 Wi abi so srefi wan toe toemoesi boen eksempel na ini den Boekoe foe a dwengi di onvolmaakti libisma ben dwengi densrefi. Foe eksempel, Josef, wan manpikin foe na famiri-edeman Jakob, ben sori na eigifasi disi na a ten di wan aparti sani ben pasa ini en libi. Fa Josef ben dwengi ensrefi, di na wefi foe Potifar ben proeberi foe kori en! (Genesis 39:7-9) Joe abi so srefi na toemoesi boen eksempel foe den fo Hebrew jonkoewan di ben dwengi densrefi foe di den ben weigri foe njan den switisani foe na kownoe foe Babylon bikasi na Wet foe Moses ben tapoe den sani dati. — Danièl 1:8-17.
3. Soema sma sabi foe na boen fasi ede fa den e tjari densrefi, èn sortoe froeklari e sori disi?
3 Gi njoen-modoten eksempel foe sma di e dwengi densrefi, wi kan sori tapoe den Kotoigi foe Jehovah leki wan groepoe. Den e froedini na prèise di na New Catholic Encyclopedia ben gi den — taki den de „wan foe den groepoe na grontapoe di e tjari densrefi na a moro boen fasi.” Wan meester na wan universiteit na ini den Filippijnen ben taki dati „den Kotoigi e doe soifri san den e leri foe den Boekoe.” Wan njoensoeman foe Polen ben skrifi foe a kongres foe den Kotoigi na ini Warsaw, ini 1989: „55.000 sma no ben smoko no wán sigaret dri dei langa! . . . Na demonstrâsi disi foe na kefarlek hori di sma ben hori densrefi na regel, ben naki mi ati nanga froewondroe moksi nanga respeki.”
Frede Gado èn no wani si ogri na ai
4. San na wan foe den moro bigi jepisani foe dwengi wisrefi?
4 Wan foe den moro bigi jepisani ini a kweki foe a dwengi di wi moesoe dwengi wisrefi na a frede foe Gado, na gesontoe frede foe no doe noti di no e plisi wi lobi hemel Tata. O prenspari na respeki frede foe Gado moesoe de gi wi, wi kan si ini disi taki den Boekoe e taki foeroe tron foe en. Na a momenti di Abraham ben o òfer en manpikin Isak, Gado ben taki: „No langa joe anoe fasi na boi èn no doe en noti, bikasi now mi sabi taki joe e frede Gado, èn joe no kibri joe manpikin gi mi, na wan enkriwan di joe abi” (Genesis 22:12). Sondro tweifri den firi ben span srefisrefi na a ten dati, so boen a ben moesoe aksi foe Abraham foe dwengi ensrefi kefarlek foeroe foe go abra foe doe san Gado ben komanderi, srefi so fara taki a opo en nefi go na loktoe foe kiri en lobi manpikin Isak. Ija, na frede foe Gado sa jepi wi foe dwengi wisrefi.
5. Sortoe ròl a no wani foe si ogri na ai e prei ini a dwengi foe wisrefi?
5 Wan sani di abi foeroe foe doe nanga na frede foe Jehovah na foe no wani si ogri na ai. Wi e leisi na ini Odo 8:13: „Na frede foe Jehovah wani taki foe no wani si ogri na ai.” Foe en sei baka, dan a wani di wi no wani si ogri na ai e jepi wi so srefi foe dwengi wisrefi. Foeroe tron baka, den Boekoe e froeteri wi foe no wani si ogri na ai — ija, foe tegoe foe ogri (Psalm 97:10; Amos 5:14, 15; Romesma 12:9). Foeroe tron ogri de so switi, de so wan tesi, e hari wi so, taki eenvoudig wi moesoe foe no wani si en na ai foe kan tranga wisrefi gi en. A no wani si na ai disi foe ogri abi leki bakapisi taki wi e tranga wi fasti bosroiti foe dwengi wisrefi èn na so fasi e dini leki wan kibri gi wi.
Dwengi joesrefi, na pasi foe koni
6. Foe san-ede a de na pasi foe koni foe dwengi den gridi lostoe foe wi nanga jepi foe a dwengi foe wisrefi?
6 Wan tra bigi jepisani foe wi dwengi wisrefi na foe warderi na koni foe sori na eigifasi disi. Jehovah e aksi wi foe dwengi wisrefi foe wi eigi boen. (Teki gersi Jesaja 48:17, 18.) Na Wortoe foe en abi foeroe rai di e sori o koni a de foe basi den gridi lostoe foe wi nanga jepi foe a dwengi di wi e dwengi wisrefi. Wi no man lon komoto so maar gi den wet foe Gado di no e kenki. En Wortoe e froeteri wi: „San wan sma e sai, na dati a sa koti toe; bikasi efoe wan sma e sai nanga en skin na prakseri, a sa koti pori foe en skin, ma na sma di e sai nanga na jeje na prakseri, sa koti têgo libi foe na jeje” (Galasiasma 6:7, 8). Wan boen moi eksempel na di foe njan nanga dringi. Foeroe siki e kon foe di sma e njan noso e dringi toemoesi foeroe. Ala den sortoe gi disi di wan sma e gi ensrefi abra na a soekoe foe en eigi boen nomo, e meki a sma lasi na respeki foe ensrefi. Moro leki dati, wan sma no kan gi ensrefi abra na a soekoe foe en eigi boen nomo sondro foe pori en matifasi toe nanga trawan. Na sani di de moro serjoesoe foe ala sani, na taki a misi di wi e misi foe dwengi wisrefi e pori wi matifasi nanga wi hemel Tata.
7. San na wan prenspari thema foe na boekoe Odo, èn sortoe bijbel tekst e sori disi?
7 Foe dati-ede, wi moesoe tan e taigi wisrefi taki a soekoe foe wi eigi boen nomo no e tjari wi go na no wan presi. Wan aparti thema foe na boekoe foe Odo, di e poti krakti tapoe a hori di wi moesoe hori wisrefi na regel, na taki a soekoe foe wi eigi boen nomo eenvoudig no e pai èn taki a de wan koni sani foe dwengi wisrefi (Odo 14:29; 16:32). Èn loekoe taki foeroe moro de ini a hori di wi e hori wisrefi na regel leki soso foe e wai pasi gi ogri. A hori di wi moesoe hori wisrefi na regel, noso a dwengi di wi moesoe dwengi wisrefi, de fanowdoe toe foe doe san reti, san kan de moeilek, foe di disi de kontrari den sondoe lostoe foe wi.
8. Sortoe ondrofenitori e poti krakti a tapoe na koni foe dwengi wisrefi?
8 Wan eksempel di e sori fa a de wan koni sani foe dwengi joesrefi de na tori foe wan Kotoigi foe Jehovah di ben tanapoe ini wan rèi na wan bank, di wan man ben poesoe go tanapoe na en fesi. Ala di na Kotoigi ben mandi pikinso, tokoe a ben dwengi ensrefi. Na srefi dei dati a ben moesoe go na wan seiker ingenieur foe kisi wan handtekening gi wan toe Kownoekondrezaal plan. Èn soema ben de na ingenieur disi so leki ben kon na krin? We, na srefi man di ben poesoe go tanapoe na en fesi na a bank! Na ingenieur no ben sori wawan taki a abi switifasi troetroe ma so srefi a ben meki na Kotoigi pai moro mendri leki wan di foe tin pisi foe na moni di a ben gwenti foe teki. O kolokoe na Kotoigi ben de taki a fesi na a dei dati a ben dwengi ensrefi, èn no ben meki en ati teki faja!
9. San na a pasi foe koni te wi e miti nanga kosikosi ini wi diniwroko?
9 Foeroe tron baka, wi e miti nanga kosikosi te wi e go doro foe doro foe preiki na boen njoensoe foe Gado Kownoekondre noso e tanapoe tapoe wan oekoe foe strati èn e proeberi foe wiki na belangstelling gi wi boskopoe na sma, di e waka pasa. San na a pasi foe koni? Na koni wortoe disi taki na ini Odo 15:1: „Wan safri piki e drai atibron poeroe.” Nanga tra wortoe, wi moesoe dwengi wisrefi. Èn a no den Kotoigi foe Jehovah wawan ben feni taki disi de so ma tra sma toe. Sma di e doe datrawroko, moro nanga moro kon froestan na waarde di a dwengi foe wisrefi abi foe dresi sma.
Lobi di no e soekoe en eigi boen nomo e jepi
10, 11. Foe san-ede lobi na wan troetroe jepi foe wi dwengi wisrefi?
10 Na fasi fa Paulus ben tjari lobi kon a krin na ini 1 Korentesma 13:4-8, e sori taki na krakti foe en kan jepi wi foe dwengi wisrefi. „Lobi abi langa-pasensi”. Foe abi langa-pasensi e aksi foe wi dwengi wisrefi. „Lobi no e djaroesoe, lobi no e soekoe foe prodo, a no e meki ensrefi bigi.” Na eigifasi lobi e jepi wi foe basi den prakseri nanga firi foe wi, foe dwengi iniwan firi foe e djaroesoe, foe prodo, noso foe meki joesrefi bigi. Lobi e boeweigi wi foe de abra sei foe disi èn e meki wi abi sakafasi, sakafasi foe jeje, neleki fa Jesus ben abi dati. — Mateus 11:28-30.
11 Paulus e taki moro fara taki lobi „no e tjari ensrefi na wan fasi di no fiti”. A e aksi toe foe dwengi wisrefi foe wi handri ala ten na wan fasi di fiti. Na eigifasi lobi e meki wi tan farawe foe gridifasi, foe ’soekoe wi eigi wini wawan.’ Lobi „no e kisi atibron.” Fa a de makriki foe kisi atibron foe san tra sma e taki noso e doe! Ma lobi sa jepi wi foe dwengi wisrefi èn foe no taki noso doe sani di ben sa kan ati wi baka ten. Lobi „no e memre ogri foe trawan.” Na libisma fasi e firi foe hori sma na bere noso foe hori sma na ati. Ma lobi sa jepi wi foe meki den sortoe prakseri disi komoto foe na ede foe wi. Lobi „no abi prisiri nanga kroektoedoe.” A e aksi foe wi dwengi wisrefi foe wi no prisiri wisrefi ini san de kroektoe, so leki seksboekoe noso wan lo lagi telefisi programa. Lobi so srefi „e froedrage ala sani” èn „e horidoro ini ala sani.” A e aksi foe wi dwengi wisrefi foe froedrage sani, foe wi horidoro ini sani di e tesi wi noso di de wan hebi gi wi èn foe no meki den sani disi meki wi lasi-ati, noso foe meki wi teki refensi na a srefi fasi, noso meki wi firi foe stòp dini Jehovah.
12. San na wán fasi foe sori taki wi warderi ala den sani di Jehovah Gado nanga Jesus Krestes ben doe gi wi?
12 Efoe wi lobi wi hemel Tata troetroe èn e warderi den toemoesi moi eigifasi foe en nanga ala den sani di a doe gi wi, dan wi sa wani foe plisi en foe di wi e dwengi wisrefi ala ten. So srefi, efoe wi lobi wi Masra èn Meester, Jesus Krestes, troetroe èn e warderi ala den sani di a ben doe gi wi, dan wi sa gi jesi na a komando foe en ’foe teki wi pina-oedoe èn tan waka na en baka’ (Markus 8:34). Dati e aksi seiker taki wi moesoe dwengi wisrefi. Lobi gi wi kresten brada nanga sisa sa kibri wi foe ati den firi, foe di wi e go na wan pasi foe soekoe wi eigi boen.
Bribi nanga sakafasi leki jepiman
13. Foe san-ede bribi kan jepi wi foe dwengi wisrefi?
13 Wan tra bigi jepi foe wi dwengi wisrefi, na bribi ini Gado nanga den pramisi foe en. Bribi sa jepi wi foe froetrow tapoe Jehovah èn wakti tapoe na joisti ten foe en foe poti afersi reti. Na apostel Paulus e sori tapoe na srefi penti te a e taki na ini Romesma 12:19: „No teki refensi joesrefi, oen lobiwan, . . . bika Boekoe taki: ’Foe teki refensi, na wan sani foe mi; mi sa pai, Jehovah e taki.’” Sakafasi kan jepi wi toe ini a tori disi. Efoe wi abi sakafasi, wi no sa naki foetoe esi-esi, foe di wi denki taki wan sma doe wi ogri noso foe di troetroe wan sma doe wi ogri. Wi no sa teki na reti na ini wi eigi anoe, sondro foe denki moro fara, foe taki en so, ma sa dwengi wisrefi èn sa wani foe wakti tapoe Jehovah. — Teki gersi Psalm 37:1, 8.
14. Sortoe ondrofenitori e sori taki srefi den wan di e misi foe dwengi densrefi foeroe tron, kan leri foe doe dati?
14 Taki wi kan leri foe dwengi wisrefi ben tjari kon a krin ini wan ondrofenitori di abi foe doe nanga wan man di ben de wan faja-atiman. We, a ben de nanga so wan faja-ati taki di sma ben kari skowtoe kon foe di en nanga en papa ben meki bigi babari, a ben naki dri skowtoe flaw bifo trawan ben moro en! Ma baka ten a ben miti nanga Jehovah Kotoigi èn ben leri foe dwengi ensrefi, wan foe den froktoe foe Gado jeje (Galasia sma 5:22, 23). Now, 30 jari a baka, a man disi e dini Jehovah kotrow ete.
Dwengi joesrefi ini na osofamiri
15, 16. (a) San sa jepi wan trowmasra foe dwengi ensrefi? (b) Spesroetoe ini sortoe situwâsi a de fanowdoe foe sma dwengi densrefi, èn sortoe ondrofenitori e sori disi? (c) Foe san-ede wan wefi moesoe dwengi ensrefi?
15 A de seiker fanowdoe foe sma dwengi densrefi ini na osofamiri. Foe wan masra lobi en wefi leki fa a lobi ensrefi e aksi foe a dwengi den prakseri, wortoe nanga doe foe en srefisrefi (Efeisesma 5:28, 29). Ija, masra moesoe dwengi densrefi foe den gi jesi na den wortoe foe na apostel Petrus na ini 1 Petrus 3:7: „Oen man, tan libi na en akroederi sabi.” Spesroetoe te en wefi no de na bribi, dan na masra di de na bribi sa moesoe dwengi ensrefi.
16 Foe eksempel: Joe ben abi wan owroeman di ben abi wan wefi di ben e knoroeknoroe srefisrefi èn di no ben de na bribi. Tokoe a ben dwengi ensrefi èn disi ben tjari so foeroe winimarki gi en taki na datra foe en ben taigi en: „John, a moesoe de so, taki foe joesrefi joe de wan troetroe pasensi man noso taki joe abi wan krakti relisi.” Wi abi troetroe wan krakti relisi, bikasi „Gado no ben gi wi wan jejefasi foe frede, ma foe krakti èn foe lobi èn gesontoe froestan”, san e meki taki wi man foe dwengi wisrefi (2 Timoteus 1:7). Boiti dati, dan foe a sei foe wan wefi a e aksi foe a dwengi ensrefi foe kan saka ensrefi, spesroetoe te en masra no de na bribi. — 1 Petrus 3:1-4.
17. Foe san-ede a de prenspari foe sma dwengi densrefi ini na matifasi a mindri papa nanga mama èn den pikin?
17 A de fanowdoe toe foe sma dwengi densrefi ini na matifasi a mindri papa nanga mama èn den pikin. Foe abi pikin di e dwengi densrefi, dan ini na fosi presi den papa nanga mama moesoe gi wan boen eksempel. Èn te a de fanowdoe foe gi den pikin strafoe na wan noso tra fasi, dan ala ten den moesoe doe disi nanga bedarifasi èn ini lobi, wan sani di e aksi troetroe foe den dwengi densrefi (Efeisesma 6:4; Kolosesma 3:21). Na a tra sei, efoe den pikin wani sori taki den lobi den papa nanga mama troetroe, dan a e aksi foe den gi jesi na den, èn foe gi jesi seiker e aksi foe dwengi densrefi. — Efeisesma 6:1-3; teki gersi 1 Johanes 5:3.
Meki gebroiki foe na jepi di Gado e gi
18-20. Sortoe dri sani na jejefasi wi moesoe gebroiki foe wi kweki den eigifasi di sa jepi wi foe dwengi wisrefi?
18 Foe gro ini frede foe Gado, ini lobi di no e soekoe en eigi boen nomo, ini bribi, ini a no wani si na ai foe san de ogri èn ini a dwengi foe wisrefi, wi moesoe gebroiki ala jepi di Jehovah Gado gi. Meki wi loekoe dri jeje seti di kan jepi wi foe dwengi wisrefi. Ini na fosi presi joe abi na warti grani foe begi. Noiti wi wani foe abi en toemoesi druk foe begi. Ija, wi moesoe wani foe „begi sondro foe kaba”, foe „horidoro ini begi” (1 Tesalonikasma 5:17; Romesma 12:12). Meki wi meki a kweki foe a dwengi foe wisrefi tron wan afersi foe begi. Ma te wi e misi foe dwengi wisrefi, dan meki na wan berowfasi wi begi wi hemel Tata foe kisi pardon.
19 Wan di foe toe kontren foe kisi jepi foe sori a dwengi di wi moesoe dwengi wisrefi, na foe kisi na jepi di e kon foe a gi di wi moesoe gi wisrefi njanjan nanga a Wortoe foe Gado èn den lektuur di e meki wi man foe froestan èn handri akroederi den Boekoe. A de toemoesi makriki foe libi na pisi disi foe wi santa dienst a wan sei! Wi moesoe dwengi wisrefi èn tan froeteri wisrefi taki wan moro prenspari sani foe leisi no de leki na bijbel èn den sani di „na kotrow èn koni srafoe” gi, èn dati meki wi moesoe poti disi na a fosi presi (Mateus 24:45-47). Sma ben taki nanga leti dati noiti libi de disi nanga dati, ma disi noso dati. Wi na troetroe man nanga oema di abi jejefasi? Efoe wi sabi wi jeje fanowdoe, wi sa sori a dwengi di wi e dwengi wisrefi, san de fanowdoe foe kiri na telefisi èn foe sreka wisrefi gi den konmakandra foe wi noso leisi Na Waktitoren di ben kon djonsro de nanga post.
20 Na a di foe dri presi joe abi na afersi foe a sori foe joisti respeki gi wi gemeente konmakandra nanga den moro bigi konmakandra nanga kongres. Ala den sortoe konmakandra disi de troetroe wan sani di de wan moesoe gi wi? Wi e kon srekasreka foe teki prati èn e doe disi te wi e kisi na okasi? Foe so fara leki wi e sori respeki gi wi konmakandra, na so fara wi sa kisi krakti ini wi fasti bosroiti foe dwengi wisrefi ini ala situwâsi.
21. San na wan toe foe den pai di wi kan njanboen foe den foe di wi e kweki na froktoe foe na jeje foe dwengi wisrefi?
21 Sortoe pai wi kan froewakti foe kisi, foe di wi e proeberi tranga foe dwengi wisrefi ala ten? Wan sani de, taki noiti wi sa koti den bita froktoe foe a soekoe di sma e soekoe den eigi boen nomo. Wi sa abi respeki gi wisrefi èn wan krin konsensi. Wi sa kibri wisrefi gi someni problema èn wi sa tan tapoe na pasi foe libi. Moro fara, wi sa man foe doe na moro boen sani di sma kan doe gi trawan. Na tapoe foe ala den sani disi, wi sa e gi jesi na Odo 27:11: „Sori taki joe koni, mi manpikin, èn prisiri mi ati, so taki mi kan gi wan piki na en di e kosi mi.” Èn dati na a moro bigi pai di wi ben kan kisi — na grani foe prisiri na ati foe wi lobi hemel Tata, Jehovah!
Joe e memre?
◻ Fa frede foe Gado e jepi wi foe dwengi wisrefi?
◻ Foe san-ede lobi e jepi wi foe dwengi wisrefi?
◻ Fa dwengi wisrefi e jepi ini den matifasi ini na osofamiri?
◻ Sortoe seti wi moesoe gebroiki boen efoe wi wani foe kweki a dwengi di wi moesoe dwengi wisrefi?
[Prenki na tapoe bladzijde 24]
Josef ben dwengi ensrefi di a ben miti nanga tesi
[Prenki na tapoe bladzijde 26]
Foe gi wan pikin strafoe na wan bedarifasi èn ini lobi, e aksi foe joe dwengi joesrefi troetroe