Kresneti — Foe san-ede a pôpi so na Japan?

BRIBI ini Papa Kresneti roetoe dipi ini den pikin foe a Boedist-Sjinto kondre Japan. Ini 1989 Japansi pikin ben skrifi 160.000 brifi gi Santa World na ini Sweden. No wan tra kondre ben seni moro brifi go leki Japan. Den ben skrifi den brifi nanga a howpoe taki a winsi foe den ati kon troe, efoe a de now wan „Graphic Computer” preisani foe 18.000 yen ($136, U.S.) noso wan 12.500 yen ($95, U.S.) video prei di joe kan tjari na anoe.

Foe meki mofo nanga wan boi tapoe Kresneti, wani taki wan spesroetoe sani gi jongoe Japansi oemapikin. „So leki fa wan ondrosoekoe na mindri jongoe oemapikin ben sori”, Mainichi Daily News e skrifi, „dan 38 procent foe den ben taki, dati den ben meki plan gi Kresneti wan moen a fesi.” Den jonkoeman abi tra kibri prakseri, te den wani de nanga den oema-freiri tapoe Kresneti. „Wan boen prakseri de foe begi safri makandra nanga joe oema-freiri”, wan tijdschrift gi jonkoeman ben gi leki rai. „Doe en na wan pôpi presi. Esi-esi oenoe sa kisi wan moro krosibei demakandra.”

Japansi trowmasra e howpoe toe taki den kan aksi tangitangi foe kisi pikinso towfroe krakti nanga a Kresneti gwenti foe den, foe bai wan „koekoe di den sma ben poti moi sani gi en” te den komoto a wroko èn de na pasi foe go na oso. Foe di den e prei na ròl foe Papa Kresneti dan dati moesoe teki presi foe a loekoe di den no ben loekoe den osofamiri, den tra dei foe a jari.

Ija, Kresneti kon kisi roetoe na den Japansisma di no de kresten. Te joe e loekoe en boen, dan 78 procent foe den sma di difrenti supermarket-wenkri ben hori wan aksi-takimakandra nanga den, ben taki, dati den e doe wan spesroetoe sani tapoe Kresneti. Na nomroe foe den bigi srefisrefi na wan kondre pe soso 1 procent foe na pipel e taki, dati den de ini a kresten bribi. Ala di den e boeweri foe de Boedistsma noso Sjintowistsma, den e firi densrefi heri boen te den e njanboen foe na „Kresten” feistidei. Na ini a kalender a barinen Sjinto Ise Shrine, e poti 25 december, leki „a gebortedei foe Krestes, makandra nanga Japansi fesa. Ma situwâsi pe no-kresten e go dipi ini a meki foe prisiri na Kresneti ten, e meki na aksi kon:

Gi soema na Kresneti fesa de?

Webster’s Ninth New Collegiate Dictionary e taki foe Kresneti leki „wan kresten fesa tapoe 25 december . . . pe sma e memre na geborte foe Krestes.” Sma ben si a dei disi leki wan ten gi „krestensma” foe „tron wán ini den firi foe den foe prisiri, tapoe a gebortedei foe Krestes.”

Den sma di e hori Kresneti leki wan soifri kerkifesa kan feni taki den sma, di e meki a dei dati kon tron wan grontapoe dei nanga a meki foe prisiri èn a gi foe presenti, e froeferi èn srefi e wisiwasi Gado. Wan Amerkan di e libi na Japan ben skrifi: „Na Japan wi abi na moro heimarki ini a kefarlek bigi handel jeje: no ini Krestes”. „Ini den ai foe sma di e libi na Westsei foe grontapoe”, wan tra sma ben skrifi foe na Japansi Kresneti, „a no de na krakoen [di no de foe feni so makriki tapoe den Japansi wowojo] di wi e misi, ma na moro prenspariwan foe den spesrèi, a jeje foe Kresneti.”

San dan, na a jeje foe Kresneti? A de a firi di e anga na wan kerkidienst nanga en kresneti singi, hulstbon (wan bon di e tan groen doronomo) èn kandra, di foeroe sma e gebroiki gi na wan enkri leisi ini wan jari di den e go na kerki foe go begi? Noso a de a lobi, na boen firi, èn a gi foe kado di e boeweigi foeroe sma foe lobi foe gi sma sani? A de a rostoe di de na den fetilin, ala di sroedati e njanboen foe wan toe dei foe „vrede na grontapoe”?

A de wan froewondroe sani, taki na Kresneti jeje nofotron e misi foe tjari vrede srefi na ososei. So leki fa wan ondrosoekoe ini 1987 na ini Ingrisikondre ben sori, dan sma ben froewakti taki ini 70 procent foe den Ingrisi oso ’trobi ben o kon ini na osofamiri’ na Kresneti ten a jari dati. Feti foe moni ben sa de a moro prenspari reide. Dringi sopi pasa marki èn a doe di wan sma no doe en prati ini na osofamiri, e abi feti toe leki bakapisi.

„Mi e aksi misrefi, efoe wi no e misi wan sani ini a tori foe san kresneti wani taki troetroe”, wan sma foe Westsei di e libi na Japan ben skrifi èn di no so langa pasa ben fisiti en kondre na Kresneti ten. „Mi e firi na srefi firi ibri 25 december, foe go baka na a owroeten fasi foe kresneti foe langa ten pasa — na hèiden doe pe den ben hori a fesa foe na drai foe a son ini kowroeten, foe di den ben anbegi bon èn den ben hori boen bigi fesa na wan jajofasi. Te now ete wi abi ala den heiden pranpran — mistletoe, hulstbon, pinabon èn so moro fara — ma na a wan noso tra fasi Kresneti noiti moro ben de a srefi sensi den kresten ben foefoeroe en èn meki a tron wan kerkifesa.”

Sondro degedege, Kresneti na wan heiden feistidei. Den fositen kresten no ben hori en „bika den ben si na hori foe na frijari foe iniwan sma leki wan heiden gwenti”, na so The World Book Encyclopedia e taki. Den heiden fesa foe Saturnalia èn Njoen Jari de na fonten foe a meki foe prisiri èn a gi foe kado na makandra.

Efoe Kresneti de morofoeroe wan heiden sani, opregti kresten moesoe poti na aksi: Kresneti e fiti gi kresten? Meki wi si san bijbel e taki foe na hori foe na gebortedei foe Krestes.

[Faki na tapoe bladzijde 4]

Na roetoe foe Kresneti fesa

Ala di den joisti tori ben lasi gowe ini a doengroe foe owroeten, sani de di e sori taki na a ten foe 336 G.T., Romen kerki ben hori wan sortoe fasi foe Kresneti. „Na dei foe Kresneti ben poti foe espresi tapoe 25 december”, The New Encyclopædia Britannica e froeklari, „foe poesoe na bigi fesa foe na songado go na baka.” Dati ben de di heiden ben gi densrefi abra na a hori foe boen bigi fesa na wan jajofasi na a ten foe den fesa foe na Romen Saturnalia nanga a Keltis èn Doisri fesa foe a drai foe a son ini kowroeten. The New Caxton Encyclopedia e taki, dati „kerki ben graboe na okasi foe meki den fesa disi tron krestenfesa.”