A tjari kon na wan foe den anbegiman
NA APOSTEL Johanes ben kisi wan fisioen foe sani di ben o pasa, di ben o seki grontapoe, èn di ben o feni presi „ini a dei foe Masra”. A ben si na hemel Masra Jesus Krestes e rèi go na wan regtfardiki orlokoe, di den ben agersi nanga wan weti man-asi — „foe go wini èn foe klari a wini foe en”. Na fosi sani di a e doe na foe trowe na gran feanti foe Gado, Satan, komoto foe den hemel kon na a kontren foe a grontapoe disi. Satan e piki tapoe dati foe di a e trobi a libisma famiri leki noiti na fesi nanga kiri, angriten, èn siki, di den agersi asi-tjariman nanga den asi foe den— wan redi, blaka, èn geri kloroe asi e agersi (Openbaring 1:10; 6:1-8; 12:9-12). Den heloe disi ben broko foe na fosi tron ini a jari 1914 èn den kon moro hebi sensi a ten dati. Ete wan sjatoe pisiten, dan den sa doro den heimarki nanga san Jesus ben taki foe en leki „wan bigi banawtoe so leki noiti ben feni presi foe sensi a bigin foe grontapoe te leki now, nôno, èn no sa feni presi moro toe”.— Mateus 24:3-8, 21.
Fa a sa go nanga den anbegiman foe Jehovah ini a ten dati? Openbaring kapitel 7 vers 1 te nanga 10, e taki foe den engel makti „di e hori” den winti foe pori „tranga”, te leki den tjari den anbegiman disi kon na wan. Na ini a pisiten foe sensi 1914, den tjari den lasti wan di de na grontapoe ete foe na Israèl na jejefasi, di e teri 144.000, kon na wan. Èn dan „loekoe! wan bigi ipi, di no wan sma ben kan teri, komoto foe ala nâsi èn lo èn sma èn tongo”. Na bigi ipi disi now kaba e teri miljoenmiljoen. Den ben e tanapoe bifo a kownoestoeroe foe Gado, èn den ben feni den boen, foe di den sori bribi ini a ofrandi broedoe foe Jesus, di sma ben slakti leki wan pikin skapoe sondro fowtoe. „Èn den e tan bari nanga wan tranga sten, taki: ’Froeloesoe wi de tangi na wi Gado, di sidon na a kownoe stoeroe èn na a Pikin Skapoe.’” Den fajafaja anbegiman disi e tan taki „Kon!” na trawan ete, di foe den sei sma e tjari kon na wan foe den kisi froeloesoe pasa „a bigi banawtoe”.—Openbaring 7:14-17; 22:17.
„Na a heri grontapoe”
Foe den anbegiman disi di e anbegi nanga den heri ati, wi kan taki: „Na babari foe den ben go na a heri grontapoe, èn den wortoe foe den di den ben taki, te na den moro farawe oekoe foe grontapoe pe sma e libi” (Romesma 10:18). A tranga wroko foe den ben blesi nanga bakapisi di e hari sma prakseri. Leki Eksempel:
Meksikow e seni raport now foe 335.965 fajafaja anbegiman foe Jehovah, wan gro foe wán hondrodoesoen ini soso dri jari! Foe san ede a nomroe foe den kon so bigi? Na tori di e kon now sa jepi joe kande foe froestan dati. Wan jonkoe man di nen Awrelio ben de na kostroe ini wan Lomsoe kerki. Ibri leisi te Jehovah Kotoigi ben kon na ini a dorpoe dati, a ben naki den kerki gengen foe iniwan sma lasi ati foe arki den. Baka wan pisiten a ben bai wan Lomsoe Biblia de Jerusalèn èn ben bigin foe leisi en, ma a no ben froestan san a ben leisi na ini. Dan wan dei a ben si wan mati foe en, di ben abi wan eksemplaar foe a Njoen Grontapoe Vertaling [Spanjoro Tongo] na ondro en anoe. Awrelio ben kosi en mati èn ben taigi en taki a bijbel dati falsi, èn a ben teki en go na en eigi oso foe sori en na „troetroe” bijbel. A mati foe en ben taki: „Leisi Exodus 20”, èn baka dati a ben gowe.
Bigin nanga kapitel 1, a kostroe ben leisi Exodus te leki a ben doro kapitel 20 vers 4 nanga 5. A ben skreki srefisrefi foe kon si san en Lomsoe bijbel ben taki foe stonpopki. Baka a mis a tra sonde, a ben sori a priester den tekst di e go foe stonpopki. Na a bigin a priester ben taki dati foe en sei na soso respeki a ben respeki den stonpopki; a no ben anbegi den. Di a si taki disi no ben satisferi Awrelio, a priester ben gi en nen taki a ben studeri nanga Jehovah Kotoigi. Awrelio ben taki dati disi no ben de so, ma a ben taki moro fara: „Now mi sa doe dati!”
A tra leisi di den Kotoigi ben kon na a dorpoe, Awrelio ben go na den èn ben bigin foe studeri bijbel nanga den. A no ben go wroko ini kerki moro èn ini dri moen den ben feni en boen foe abi prati na a poebliki diniwroko nanga Jehovah Kotoigi. Na fosi oso di a ben fisiti ben de di foe a priester, di no ben man bribi en ai di a ben si a fositen kostroe leki wan Kownoekondre preikiman. A priester ben wani tapoe skreki gi en foe di a taki dati den ben o go trowe en na dorosei foe a kerki, ma Awrelio ben taigi en taki, dati disi no ben sa de fanowdoe bika a ben gowe libi a kerki kaba. Na deki-ati fasi disi fa a ben tjari ensrefi, ben gi foeroe sma foe a dorpoe di ben studeri kaba nanga Jehovah Kotoigi, deki-ati. Awrelio nanga 21 trawan foe a dorpoe disi ben teki dopoe tapoe na tra distrikt kongres. A gro ini a kontren disi e go so gaw, dati soso wán owroeman ben de foe doe den aksi gi sma di wani dopoe, nanga a groepoe disi.
„Na babari foe den ben go na doro”
Nowan sma kan lon komoto foe a kownoekondre preikiwroko. Wan lomsoe foe Italiakondre ben mandi te ibri leisi Jehovah Kotoigi ben naki na en doro. So di a wrokopresi foe en ben seni en go na Singapoer, a ben denki dati now te foe kaba den no ben man froeferi en moro. Ma a ben froewondroe srefisrefi taki den kotoigi ben drape toe. Foe dati ede a ben bai toe kefarlek èn takroe-ati dagoe foe beti den tra kotoigi, di ben o kon. Di toe Kotoigi ben naki na en doro den dagoe ben djompo kon na dorosei. Foe di den ben frede srefisrefi, meki den oema ben lon gi den libi, ibriwan foe den ben go na difrenti sei foe a oekoe pe toe strati ben miti. Di wan foe den dagoe ben doro na wan foe den sisa, dan na ini en broeja a ben graboe toe brochure na ini en tas èn ben poesoe dati go na ini a opo mofo foe a dagoe. Di a ben doe disi, a dagoe ben tapoe foe lon na en baka, a ben drai baka èn ben lon safrisafri go na oso.
A tra wiki den sèm toe kotoigi dati ben tjari wan gobaka na wan oso abrasei foe na strati. A man di ben abi den dagoe ben de na ini en bromki djari, èn sondro foe den froewakti dati, a ben taigi den oema odi èn ben kari den kon na ini en oso. A ben froeteri den taki noiti ete a ben taki nanga Jehovah Kotoigi noso ben leisi wan foe den boekoe foe den. Ma a ben froewondroe foe feni den brochure na ini a mofo foe wan foe den dagoe foe en. A neti dati a ben leisi den brochure èn den ben naki en ati troetroe. Ala di a ben de lomsoe en heri libi kaba, a ben taki dati a ben wani foe studeri bijbel nanga Jehovah Kotoigi.
Foe di a wrokopresi ben meki a man go baka na Italiakondre, dan sani ben seti foe Jehovah Kotoigi ben o studeri drape nanga en. Di en nanga en wefi ben bigin foe fisiti den konmakandra, dan a priester foe a kontren drape ben bigin foe tapoe skreki gi den. Di wan sma ben poti faja gi na bromki djari foe den, a man nanga en wefi ben broko ala banti di den ben abi nanga a kerki. A man disi e taki now: „Mi ben gi kotoigi na foeroe foe den memre foe mi famiri, bika mi wani taki den moesoe sabi taki Jehovah na a wan enkri troe Gado.”
„Te na den moro farawe oekoe foe grontapoe pe sma e libi”
Wan tra ondrofenitori di komoto foe wan foe den moro farawe oekoe foe grontapoe e sori fa sma e warderi a kownoekondre boskopoe èn fa a e jepi foe den kenki den libi. Ala di wan sisa na ini Australia ben fisiti wan lès gi oema di abi bere, a ben miti wan oema di ben abi foeroe takroe gwenti, èn di ben weigri srefi foe tapoe nanga smoko ini a ten di a ben abi bere. A sisa ben broko-ede nanga a fasi dati foe na oema. A ben kon de so taki den ben kisi den beibi foe den na a srefi ten en tapoe a srefi afdeling na ati-oso, èn so den ben abi wan okasi foe taki. A ben kon a krin taki a oema ben kisi foeroe problema na ini den jongoejari foe en, èn now en trowlibi pikinmoro ben de foe broko. Baka di a sisa ben komoto na ini ati-oso, a ben meki kontakti nanga a oema èn ben bigin wan bijbelstudie nanga en, ala di a ben e gebroiki a boekoe Bow wan kolokoe osofamiri-libi.
A masra foe a oema ben e begi Gado foe feni a troe relisi, ma a ben poti a kondisi na en begi: „So langa a no de Jehovah Kotoigi!” Ma di a ben kon sabi taki en wefi ben e studeri nanga den Kotoigi, a ben bigin foe poti aksi èn den ben kari en foe teki prati na a studie. A ben doe disi, èn ini wan sjatoe pisiten a ben bigin foe fisiti den gemeente konmakandra. Now, masra nanga wefi teki dopoe, èn a de krin taki a trowlibi foe den ben go na fesi srefisrefi.
Oso-bijbelstudie di abi den gron tapoe den sortoe boekoe dati, ben abi na tjari kon na wan foe foeroe njoen anbegiman leki bakapisi. Ini kondre pe den Kotoigi foe Jehovah ben abi foe doe nanga refo, borgroe orlokoe, noso a tapoe di lanti ben tapoe a wroko, oso-bijbelstudie wroko ben kon moro foeroe. Na ini Angola den ben feti wan borgroe feti gi foeroe jari, èn den Kotoigi ben njan pina foe foeroe froefolgoe nanga moeilekhèit. Froekoefroekoe ini a jari di pasa, dan den raport e sori dati, gemiddeld ibri preikiman ben e hori pikinmoro dri oso-bijbelstudie, ma den preikiman ben abi pikinso bijbel boekoe nomo. Opziener di e rèis ben fisiti wan pikin groepoe ibri dei, e seti velddienst gi deiten èn konmakandra ibri netiten! Fa den ben prisiri di den feantifasi ben kon na wan kaba èn den ben kisi 42 ton bijbel poeblikâsi, di den ben abi tranga fanowdoe, komoto foe Zuid-Afrika! Seiker, a lobi foe den brada dati sa ‘kon foeroe moro nanga moro ete nanga soifri sabi èn wan dorodoro koni foe man si sani krin’, so leki fa den man ‘kon sabi now den moro prenspari sani’ (Filipisma 1:9, 10). Fa disi de wan sani di e gi deki-ati na den wan di abi nofo bijbelstudie jepisani foe gebroiki, èn foe feni doronomo wini foe den sani di Jehovah e sreka na wan boen-ati fasi gi wi! — 1 Timoteus 4:15, 16.
A kolokoefiri foe den getrow anbegiman disi e memre wi na den wortoe foe Jesus di a ben taki ini a Bergi Preiki: „Kolokoe den sma de di sabi taki den abi jeje fanowdoe, bika a kownoekondre foe hemel na foe den. . . . Kolokoe den sma de di e kisi froefolgoe foe regtfardikifasi ede, bika a kownoekondre foe hemel na foe den. . . . Prisiri èn djompo foe di joe breiti, bika oen paiman bigi na ini den hemel” (Mateus 5:3-12). Fa den tjari foeroe kon na wan kaba na Angola!
Na ini tra pisi foe grontapoe, den e safoe noso e poeroe den skotoe di den ben poti na a wroko foe Jehovah Kotoigi. Jesus ben taki foe dati na ini en dei: „Ija, a kotiwroko bigi, ma pikinso wrokoman nomo de” (Mateus 9:37). Fa disi de troe na ini a ten disi! A fanowdoe gi moro wrokoman no e kaba. Wi breiti taki na anbegi foe wi abi foe doe nanga a tjari kon na wan ini a ten foe koti. No wan moro bigi prisiri de foe feni na grontapoe tide, leki wi dienst gi Jehovah Gado, na ini san wi e gi wisrefi abra èn di abi foeroe boen bakapisi.
Ma san e boeweigi den anbegiman foe Jehovah foe sori so wan prisiri nanga faja foe wroko? Wi sa si.