Tanapoe kánkan gi a fri di Gado gi!
„Gi so wan fri Krestes ben meki wi kon fri. Tanapoe kánkan dati ede èn no meki den poti wan tjatjari foe katibo baka na joe tapoe.” — GALASIASMA 5:1.
1, 2. Fa a fri di Gado gi ben lasi?
JEHOVAH pipel fri. Ma den no e soekoe foe no de moro na ondro Gado, bikasi dati sa wani taki katibo na Satan. Den e boboi a krosibei matifasi di den abi nanga Jehovah èn den e prisiri ini a fri di a e gi den.
2 A fosi papa nanga mama foe wi, Adam nanga Eva, ben lasi a fri di Gado ben gi foe di den ben sondoe en ben tron srafoe foe sondoe, dede nanga Didibri (Genesis 3:1-19; Romesma 5:12). We, Satan poti heri grontapoe tapoe a sondoe pasi foe pori! Ma den wan di e tanapoe kánkan gi a fri di Gado e gi, e waka tapoe a pasi foe têgo libi. — Mateus 7:13, 14; 1 Johanes 5:19.
Fri foe katibo
3. Sortoe howpoe Gado ben gi sma ini Eden?
3 Jehovah ben abi a prakseri dati libisma di e respeki en nen, ben sa de fri foe katibo na Satan, sondoe nanga dede. Gado ben poti a howpoe dati na den fesi di a ben froeteri a sneki di Satan ben gebroiki ini Eden: „Mi sa poti feantifasi na mindri joe nanga na oema èn na mindri joe siri èn en siri. En sa masi joe na joe ede èn joe sa masi en na en bakafoetoe” (Genesis 3:14, 15). Jesus Krestes, a Siri foe Jehovah hemel organisâsi, ben njan pina foe wan bakafoetoe di ben masi di a ben dede na a postoe, ma na so wan fasi Gado ben gi wan loesoe ofrandi foe fri den libisma, di ben bribi, foe sondoe nanga dede (Mateus 20:28; Johanes 3:16). Heri esi, Jesus sa masi na ede foe Satan, a fosi Sneki. — Openbaring 12:9.
4. Foe sortoe fri Abraham ben njanboen, èn san Jehovah ben pramisi en?
4 So wan 2000 jari baka di Jehovah ben gi a pramisi ini Eden, „Jehovah en mati„ Abraham, ben gi jesi na Gado foe di a ben libi a foto Ur foe go na wan tra presi (Jakobus 2:23; Hebrewsma 11:8). A ben kisi dan a fri di Gado ben gi èn no ben libi moro langa leki wan srafoe foe Satan grontapoe foe falsi relisi, kroektoe politiek fasi nanga gridi bisnisfasi. Gado ben pramisi, boiti a profeititori ini Eden, dati ala famiri nanga nâsi ben o blesi densrefi nanga jepi foe Abraham nanga en Siri (Genesis 12:3; 22:17, 18). Abraham ben fri foe kragi bikasi ‘a ben bribi ini Jehovah, di ben si dati leki regtfardikifasi gi en’ (Genesis 15:6). Tide, wan krosibei matifasi nanga Jehovah, na a srefi fasi e tjari fri di Gado gi, foe kragi nanga katibo foe a grontapoe di e didon ini a makti foe Satan.
Wan simbôlis drama di e hori sma prakseri
5. Nanga sortoe situwâsi a gebortoe foe Isâk ben abi foe doe?
5 Foe Abraham ben kan abi wan siri, meki Sara, en wefi di no ben man kisi pikin, ben gi en na oemafoetoeboi foe en, Hagar, na Abraham foe meki wan pikin nanga en. Nanga jepi foe en Abraham ben meki Ismaèl, ma Gado no ben teki en leki a pramisi Siri. Na presi foe dati, di Abraham ben abi 100 jari èn Sara 90 jari, Jehovah ben gi den na okasi foe meki wan manpikin, di ben nen Isak. Di Ismaèl ben e spotoe Isak, den ben seni Hagar nanga en manpikin gowe. Nanga disi a manpikin di Abraham ben abi nanga a fri oema, Sara, ben tan a baka leki a wan enkri troe siri. Neleki Abraham, Isak ben poti bribi èn ben njanboen foe a fri di Gado ben gi. — Genesis 16:1-16; 21:1-21; 25:5-11.
6, 7. Foe san falsi leriman ben overtoigi wan toe kresten ini Galasia, ma san Paulus ben tjari kon a krin?
6 Den sani disi ben prenki toemoesi prenspari sani na fesi, gi sma di lobi a fri di Gado e gi. Disi ben de foe si ini a brifi di na apostel Paulus ben skrifi den gemeente ini Galasia ini 50 te 52 G.T. Ini a ten dati a tiri skin ben bosroiti dati besnijdenis no ben de fanowdoe gi kresten. Ma falsi leriman ben meki sonwan foe den Galasiasma prakseri dati a ben de wan prenspari marki foe a kresten bribi.
7 Paulus ben taigi den Galasiasma: „Den e froeklari wan sma regtfardiki te a e bribi ini Krestes, no nanga wroko foe a Wet foe Moses” (1:1–3:14). A Wet no ben meki a pramisi, di ben abi foe doe nanga na Abrahamitis froebontoe, tron noti, ma a ben meki fowtoe kon a doro èn ben dini leki wan leriman di e tjari wi go na Krestes (3:15-25). Nanga a dede foe en, Jesus ben froeloesoe den wan di ben de ondro Wet, èn ben gi den na okasi foe tron manpikin foe Gado. Ma, foe drai go baka na a seti foe memre den dei, moen, fasti ten nanga jari ben sa wani taki foe go baka na ini katibo (4:1-20). Foe dati ede Paulus ben skrifi:
8, 9. (a) Tjari sjatoe kon a krin ini joe eigi wortoe, san Paulus ben taki na Galasiasma 4:21-26. (b) Soema noso san Abraham nanga Sara ben prenki ini a simbôlis drama disi èn soema ben de a pramisi Siri?
8 „Taigi mi, oenoe di wani tanapoe ondro a wet: Oenoe no e jere a Wet? Foe eksempel, den skrifi dati Abraham ben kisi toe manpikin, wàn [Ismaèl] na a oemafoetoeboi [Hagar] èn wàn [Isak] na a fri oema [Sara]; ma a wan foe na oemafoetoeboi ben gebore te joe loekoe en boen na a fasi foe a skin, a trawan na a fri oema nanga jepi foe wan pramisi. Den sani disi de leki wan simbôlis drama, bika den toe oema disi wani taki toe froebontoe, a wan [a Wet froebontoe] di komoto foe a bergi Sina-i [pe Gado ben sroto a froebontoe dati nanga den Israèlsma], di e meki pikin foe de ini katibo, èn dati na Hagar. [A tra froebontoe ben de a wan di Jehovah ben meki nanga Abraham di ben abi foe doe nanga en Siri.] A Hagar disi now wani taki Sina-i, wan bergi ini Arabië, èn a e kroederi nanga a Jerusalem foe now, bika a de ini katibo nanga den pikin foe en [bakapikin foe Abraham, Isak nanga Jakob]. Ma a Jerusalem di de na tapoesei, fri, èn dati na wi mama.” — Galasiasma 4:21-26.
9 Ini a simbôlis drama disi, Abraham ben de wan prenki foe Jehovah. „A fri oema”, Sara, ben agersi Gado en „oema”, noso santa universeel organisâsi. A ben meki Krestes, a Siri foe a simbôlis oema dati èn foe a Moro Bigi Abraham (Galasiasma 3:16). Foe sori sma a pasi foe kon fri foe anbegi di no krin, sondoe, nanga Satan, dan Jesus ben leri sma a waarheid èn a ben poeroe a bere foe falsi relisi kon a doro, ma Jerusalem nanga den pikin foe en ben tan ini relisi katibo bika den ben weigri foe teki en (Mateus 23:37, 38). Den djoe bakaman foe Jesus ben kon fri foe a Wet, di ben tjari a katibo foe den na onvolmaaktifasi, sondoe nanga dede kon a krin. Ala sma fri troetroe, di teki Jesus leki na Wan di a „wefi” foe Gado ben meki, foe de a Mesiaans Kownoe èn a Froeloesoeman di e ‘meki fri bekènti na den wan di de ini doengroe-oso’! — Jesaja 61:1, 2; Lukas 4:18, 19.
Tan farawe foe wan tjatjari foe katibo
10, 11. Foe sortoe tjatjari foe katibo Krestes ben fri den bakaman foe en, èn nanga san dati e kroederi ini a ten disi?
10 Paulus ben taigi den wan di de a siri foe Abraham makandra nanga Krestes, di de a Moro Bigi Isak: „A Jerusalem di de na tapoesei, fri èn dati na wi mama. . . . Wi . . . , brada, na pikin di de foe a pramisi, neleki Isak. Ma neleki fa ini a ten dati a wan di ben gebore na a fasi foe a skin [Ismaèl], ben go froefolgoe en di ben gebore na a fasi foe na jeje [Isak], na so a de now toe. . ..Wi a no pikin foe wan oemafoetoeboi, ma foe na fri oema. Gi so wan fri [foe a Wet], Krestes ben meki wi kon fri. Tanapoe kánkan dati ede èn no meki den poti wan tjatjari foe katibo baka na joe tapoe.” — Galasiasma 4:26–5:1.
11 Iniwan foe den bakaman foe Jesus ben o tai densrefi na ini wan tjatjari foe katibo efoe den ben saka densrefi ondro a Wet. Falsi relisi na wan tjatjari foe katibo ini a ten disi, èn krestenhèit e agersi Jerusalem foe owroeten nanga en pikin. Ma den wan di kisi salfoe na pikin foe Jerusalem foe tapoesei, a fri hemel organisâsi foe Gado. Den nanga kompe bribiman di abi wan grontapoe howpoe, no de wan pisi foe a grontapoe disi èn den no de ini katibo na Satan (Johanes 14:30; 15:19; 17:14, 16). Foe di wi kon fri nanga jepi foe waarheid èn nanga jepi foe Jesus en ofrandi dede, dan meki wi tanapoe kánkan gi na fri di Gado gi wi.
Teki wan fasti bosroiti gi a fri di Gado e gi
12. Sortoe fasi foe doe bribiman e teki èn foe san wi sa taki now?
12 Miljoenmiljoen sma, e njanboen now foe troe fri leki Jehovah Kotoigi. Den e hori bijbelstudie nanga miljoenmiljoen tra sma, foeroe foe den abi „na joisti jejefasi gi a têgo libi.” Te den e tron bribiman, den sa teki wan bosroiti gi a fri di Gado e gi, foe di den e teki dopoe (Tori foe den Apostel 13:48; 18:8). Ma san na den stap di sma moesoe teki, bifosi a kresten dopoe?
13. San sabi abi foe doe nanga dopoe?
13 Bifosi wan sma e dopoe, a moesoe kisi èn handri akroederi soifri sabi foe den Boekoe (Efeisesma 4:13). Na so Jesus ben froeteri den bakaman foe en: „Go. . .èn meki disipel foe sma foe ala den nâsi, e dopoe den ini a nen foe a Tata èn foe a Manpikin èn foe a santa jeje èn leri den foe doe ala den sani di mi ben komanderi joe.” — Mateus 28:19, 20.
14. Sortoe sabi joe moesoe abi foe den dopoe joe ini a nen foe a Tata, a Manpikin èn a santa jeje?
14 Foe dopoe ini a nen foe a Tata, wani taki foe erken Jehovah en posisi nanga makti leki Gado, Mekiman, nanga Universeel Soeverein (Genesis 17:1; 2 Kownoe 19:15; Openbaring 4:11). Foe kisi dopoe ini a nen foe a Manpikin, e aksi foe joe erken Krestes en posisi nanga makti leki wan hei jeje mekisani, a Mesian Kownoe, èn a wan nanga jepi foe soema Gado ben gi „wan srefi loesoepaiman” (1 Timoteus 2:5, 6; Danièl 7:13, 14; Filipisma 2:9-11). Wan sma di e dopoe ini nen foe a santa jeje, e kon si dati a de Gado en wroko krakti di Jehovah ben gebroiki foe meki sani èn foe ben e wroko tapoe den skrifiman foe Bijbel, èn na tra fasi (Genesis 1:2; 2 Petrus 1:21). A no de foe taki, dati wi kan leri foeroe moro foe Gado, Krestes nanga a santa jeje.
15. Foe san ede wan sma moesoe sori bribi bifo den dopoe en?
15 Bifo wan sma o dopoe, a moesoe abi bribi di gron tapoe soifri sabi. ’Sondro bribi a no man, taki wi e plisi [Jehovah] boen’ (Hebrewsma 11:6). Wan sma di e poti bribi na Gado, Krestes èn a prakseri foe Gado, sa wani foe tron wan Kotoigi foe Jehovah, foe libi akroederi Gado Wortoe èn abi wan toemoesi boen prati na a preiki foe a boen njoensoe. A sa taki foe a glori foe a kownoefasi foe Jehovah.—Psalm 145:10-13; Mateus 24:14.
16. San na berow, èn san a abi foe doe nanga a dopoe foe wan kresten?
16 Berow na wan tra sani di den e aksi bifo wan sma kan dopoe. Foe abi berow wani taki „foe kenki foe prakseri ini a tori foe san wan sma ben (noso ben e denki foe) doe, noso foe tjari ensrefi, tapoe gron foe firi sari noso wan no-satisfaksi firi”, noso foe „firi sari, konsensi fonfon noso, gi joesrefi fowtoe foe san joe doe noso foe san joe ben moesoe doe ma no ben doe”. Den djoe ini a fosi jari hondro ben moesoe abi berow foe den sondoe foe den di den ben doe kontrari Jesus Krestes (Tori foe den Apostel 3:11-26). Son bribiman ini Korente ben abi berow foe hoeroedoe, afkodrei, soetadoe, tantaman wroko, foefoeroe, gridifasi, droengoefasi, afrontoe nanga kwinsi. Leki bakapisi den ben „wasi kon krin” ini a broedoe foe Jesus, den ben „santa” den leki den wan di den poti aparti gi Jehovah en dienst, èn den ben „froeklari den regtfardiki” ini a nen foe Jesus Krestes èn nanga a jeje foe Gado (1 Korentesma 6:9-11). So boen, abi berow na wan stap foe kisi wan boen konsensi èn foe kisi a fri di Gado e gi foe sondoe firi di e trobi joe. — 1 Petrus 3:21.
17. San a kenki di wan sma moesoe kenki en libi wani taki, èn san disi e aksi foe a sma di e seti sani foe teki dopoe?
17 Sma moesoe kenki den libi toe bifo den kan kisi dopoe leki wan Kotoigi foe Jehovah. A kenki di wan sma di abi berow e kenki en libi, e feni presi baka te a poti en fowtoe fasi foe libi na wan sei èn e bosroiti foe doe san boen. Hebrew nanga Griki werkwortoe di abi foe doe nanga „a kenki di wan sma e kenki en libi” wani taki „tapoe foe go doro, handri na wan tra fasi noso drai kon baka”. Te wi e gebroiki en na wan boen jeje fasi, dan a e sori go tapoe wan drai komoto foe wan fowtoe pasi go na Gado (1 Kownoe 8:33, 34). A kenki di wan sma e kenki en libi e aksi foe ’wroko di e fiti berow’, dati wi e doe san Gado e komanderi, poti falsi relisi na wan sei, èn poti wi ati steifisteifi tapoe Jehovah foe kan dini en wawan (Tori foe den Apostel 26:20; Deuteronomium 30:2, 8, 10; 1 Samuèl 7:3). Disi e aksi foe „wan njoen ati èn wan njoen jeje”, foe denki trafasi èn foe abi wan tra jejefasi nanga marki ini libi (Esekièl 18:31). A njoen sma di e kisi leki bakapisi, e poti eigifasi di e fiti Gado na a presi foe gadolowsoe eigifasi (Kolosesma 3:5-14). Ija, troetroe berow e meki dati wan sma ,o handri na wan tra fasi.’ — Tori foe den Apostel 3:19.
18. Foe san ede wi moesoe gi wi srefi abra na Gado ini begi, èn san na a prensparifasi foe a stap disi di joe e teki?
18 Gi joesrefi abra na Gado ini begi moesoe pasa bifo joe teki dopoe. (Teki gersi Lukas 3:21, 22.) Gi joesrefi abra wani taki foe poti wan sani aparti gi wan santa marki. So prenspari a stap disi de, dati wi moesoe tjari wi bosroiti kon a krin na Gado ini begi, foe anbegi en wawan èn dini en foe têgo (Deuteronomium 5:8, 9; 1 Kroniki 29:10-13). A no de foe taki dati, wi no gi wisrefi abra na wan wroko ma na Gado ensrefi. Den ben tjari a penti dati krinkrin kon na fesi, na a beri foe a fosi presidenti foe a Waktitoren genootschap, Charles Taze Russell. Na a okasi dati ini 1916, a sekretarsi-penningmeester foe a genootschap, W. E. Van Amburgh, ben taki: „A bigi wroko disi na a heri grontapoe a no a wroko foe wán sma. A bigi toemoesi foe dati. Na Gado en wroko èn a no e kenki. Gado ben gebroiki foeroe foetoeboi ini a ten di pasa èn sondro tweifri A sa gebroiki foeroe moro ini a ten di e kon. Wi no gi wisrefi abra na wan libisma noso na a wroko foe wan libisma, ma foe doe a wani foe Gado, so leki fa En sa tjari en kon a krin gi wi nanga jepi foe En Wortoe èn en tiri di e si sani na fesi. Te now ete Gado abi a tiri ini en anoe.” Ma san moro wan sma moesoe doe ini a tori foe a gi di a e gi ensrefi abra na Gado?
19. (a) Fa sma e boeweisi na poebliki dati den gi densrefi abra na Jehovah? (b) San a doekroen go na ondro watra e simbôliser?
19 Te wan sma e dopoe, a e sori na poebliki taki a e gi ensrefi abra na Jehovah. Dopoe na wan simbôl di e sori dati a sma di den e doekroen go na ondro watra ben gi ensrefi na Jehovah Gado nanga jepi foe Jesus Krestes, sondro foe poti wan kondisi na dati. (Teki gersi Mateus 16:24.) Te den e beri wan dopoe kandidaat ondro watra èn e opo en komoto na ini a watra, na wan agersi fasi a e dede foe en fosi waka nanga libi èn e kisi wan opobaka gi wan njoen fasi foe libi, foe doe now a wani foe Gado nanga en heri ati. (Teki gersi Romesma 6:4-6.) Di Jesus ben teki dopoe, a ben pristeri ensrefi nanga en heri ati na en hemel Tata (Mateus 3:13-17). Èn doronomo den Boekoe e sori dati bribiman, di den e feni boen, e kisi dopoe (Tori foe den Apostel 8:13; 16:27-34; 18:8). Foe tron wan Kotoigi foe Jehovah ini a ten disi, dan wan sma moesoe de wan bribiman di troetroe e sori bribi èn e kisi dopoe. — Teki gersi Tori foe den Apostel 8:26-39.
Tanapoe Fasti!
20. Sortoe eksempel ini bijbel e sori dati wi sa kisi blesi te wi e teki wan fasti bosroiti foe hori wisrefi na a fri di Gado e gi leki dopoe kotoigi foe Jehovah?
20 Efoe joe teki wan fasti bosroiti gi a fri di Gado gi foe di joe e tron wan dopoe kotoigi foe Jehovah, a sa blesi joe neleki fa a ben doe dati nanga den foetoeboi foe en ini den ten di pasa. Foe eksempel, Jehovah ben blesi na owroe Abraham nanga Sara nanga wan manpikin, Isak, di ben frede Gado. Nanga jepi foe bribi a profeiti Moses ben froekisi foe den handri nanga en na a srefi takroe fasi leki fa den ben doe nanga a pipel foe Jehovah, „na presi foe njanboen foe sondoe gi wan sjatoe pisi ten nomo, bika a ben si a sjen foe [de wan fositen prenki foe] a Krestes [noso a Salfoewan foe Gado] leki wan moro bigi goedoe leki den goedoe foe Egipti” (Hebrewsma 11:24-26). Moses ben abi a grani taki Jehovah ben gebroiki en foe tjari den Israèlsma gowe foe a katibo a ini Egipti. Moro fara, foe di a ben dini Gado na wan getrowfasi, a sa kisi wan opobaka èn a sa dini leki wan foe den ’granman na a heri grontapoe’ ondro a Moro Bigi Moses, Jesus Krestes. — Psalm 45:16; Deuteronomium 18:17-19.
21. Sortoe eksempel di e gi deki ati den e gi foe oema, foe owroe ten, di ben arki Gado?
21 Ini a ten disi kresten di gi densrefi abra kan feni tranga te den e go loekoe tori foe den oema di troetroe ben kon fri èn ben kisi prisiri. Na mindri den joe ben abi a Moabiti-oema Rut, di ben ondrofeni broko ati foe de wan weduwe, èn a prisiri foe a fri di Gado ben gi foe falsi relisi. A ben drai baka gi a pipel foe en nanga den gado foe en, èn ben tan nanga Naomi, en masra mama, di ben tron wan weduwe. „Pe joe e go, na drape mi sa go,” Rut ben taki, „èn pe joe e sribi, na drape mi sa sribi. Joe pipel sa de mi pipel èn joe Gado sa e mi Gado” (Rut 1:16). Leki na wefi foe Boaz, Rut ben tron a mama foe David granpapa, Obed (Rut 4:13-17). Ija, Jehovah ben gi na sakafasi oema disi di no ben de wan Israèlsma, na „volmaakti pai” foe di a ben gi en na okasi foe tron wan afo foe Jesus a Mesias! (Rut 2:12) Fa Rut sa prisiri te a kisi wan opobaka èn e kon kisi foe jere dati en ben kisi so wan grani! Baka te den kisi wan opobaka dan so wan sortoe prisiri sondro degedege sa foeroe na ati foe na fosi ten hoeroe Rakab, di ben kon fri foe hoeroedoefasi nanga falsi anbegi, so boen leki Batseiba di ben meki fowtoe ma ben abi berow, bika den so srefi sa kon sabi dati Jehovah ben gi den pasi foe tron afo foe Jesus Krestes. — Mateus 1:1-6, 16.
22. Foe san wi sa taki ini a artikel di e kon?
22 Wi ben kan go so doronomo foe e loekoe den sma di ben kisi a fri di Gado e gi. Foe eksempel, ini a nomroe foe den joe abi so srefi den man nanga oema di ben abi bribi, di den kari na ini Hebrewsma kapitel 11. Den ben ondrofeni banawtoe èn sma ben handri den na wan takroefasi, „èn grontapoe no ben warti den”. Poti na a nomroe foe den, den loyaal fosi jarihondro bakaman foe Krestes èn trawan di tan getrow sensi a ten dati èn so srefi den miljoenmiljoen sma di e dini Jehovah now leki en Kotoigi. So leki fa wi sa si, dan efoe joe teki wan fasti bosroiti nanga den gi na fri di Gado e gi, dan joe abi foeroe reide foe prisiri.
Fa joe ben sa piki?
◻ Sortoe howpoe Gado ben gi di a fri di en ben gi ben lasi?
◻ Foe sortoe „tjatjari foe katibo” Krestes froeloesoe en bakaman?
◻ Sortoe stap wan sma di warti taki den dopoe en, leki wan Kotoigi foe Jehovah, moesoe doe na fesi?
◻ Sortoe eksempel ini Boekoe e sori taki wi sa kisi blesi te wi e teki wan fasti bosroiti foe horibaka gi a fri di Gado e gi?
[Prenki na tapoe bladzijde 26]
Joe sabi sortoe bosroiti wan sma moesoe teki èn doe bifo a o dopoe leki wan foe Jehovah Kotoigi?