A „njoen grontapoe seti” foe libisma de krosibei?
1. Fa a wani foe moro politiek fri ben sori ensrefi ini den jari di pasa?
INI A TEN DISI miljoenmiljoen sma de ondro katibo foe falsi relisi èn foeroe wani foe tan so. Na a srefi joeroe, moro nanga moro sma wani politiek fri. Den toemoesi aparti sani di ben pasa ini den wan toe jari di pasa na Owstoe Europa èn na tra presi, ben sori taki sma wani moro fri fasi foe tiri. Leki bakapisi, foeroe sma e taki, dati wan njoen pisi ten foe fri de krosibei. A presidenti foe Amerikankondre ben kari en „wan njoen grontapoe seti.” Ija, grontapoe tiriman na ala sei ben taki, dati a Kowroe Orlokoe èn a haswa foe kisi moro fetisani ben kon na wan kaba èn taki wan njoen pisi ten foe vrede ben opo ede kon gi a libisma famiri. — Teki gersi 1 Tesalonikasma 5:3.
2, 3. Sortoe kondisi e wroko teige troe fri?
2 Ma srefi efoe moeiti foe libisma ben sa abi leki bakapisi moro mendri fetisani èn moro fri fasi foe tiri, dan troe fri ben sa de foe troe? Nôno, foe di joe abi toemoesi ogri problema di de na ini ala kondre, so srefi na den demokrasia wan pe a nomroe foe den pôtiwan e gro èn miljoenmiljoen sma e feti foe hori densrefi na libi na ekonomia fasi. Wan raport foe Verenigde Nâsi e taki, dati ala di sabidensi e go a fesi èn dresi e kon moro boen, taki tokoe wan gemiddelde foe 40.000 pikin na a heri grontapoe e dede ibri dei foe angri ede noso foe siki di joe man kibri joesrefi gi, nanga jepi foe dresi. Wan koniman ini a tori disi ben taki: „Pôtifasi e kisi eigifasi di a sistema meki kon so èn di troetroe e tjari a dei foe tamara foe a libisma famiri, kon ini kefar.”
3 Boiti dati, moro sma leki ini wan ten e kisi foe doe nanga ogridoe di e kon takroe moro nanga moro. Na si di sma foe tra ras, tra politiek groepoe nanga tra relisi no wani si makandra na ai, e prati difrenti kondre pisipisi. Na ini son presi a situwâsi no de toemoesi trafasi leki a wan di den ben skrifi foe en a fesi na Sakaria 14:13, taki sma sa de „so broeja èn so frede taki ibriwan sma [sa] graboe a sma na en sei èn a sa opo en anoe teige en” (Today’s English Version). A gebroiki foe takroe tabaka, spoiti nanga poeiri èn siki di sma e kisi nanga jepi foe seks, de wan krawasi di e panja ensrefi esi-esi go na ala sei. Miljoenmiljoen sma abi AIDS (SIDA); na Amerkankondre wawan moro leki 120.000 sma dede kaba foe AIDS.
Katibo na sondoe èn dede
4, 5. Sortoe fasi foe katibo abi ala sma na ini en makti, awansi sortoe fri de toe ini a ten disi?
4 Ma srefi efoe no wan foe den takroe situwâsi disi ben de, dan tokoe sma no ben sa abi troe fri. Den alamala ben sa de ete ini katibo. San ede disi de so? Foe gi wan eksempel: Kon meki wi taki, dati wan ogri-ati tiriman ben o meki ibri sma na grontapoe kon tron wan srafoe èn ben o kiri den alamala? Foe taki en leti, dati na san pasa nanga a libisma famiri di wi fosi papa nanga mama ben meki oproeroe nanga Gado èn ben tron srafoe foe Didibri en tiri di e hori sma na ondro nanga tranga. — 2 Korentesma 4:4.
5 Di Gado ben meki libisma, a ben abi na prakseri foe den libi foe têgo na grontapoe ini volmaaktifasi na wan paradijs, so leki fa Genesis kapitel 1 nanga 2 e sori. Ma foe di wi fosi tata Adam ben meki oproeroe nanga Gado, wi alamala de ondro a dedestrafoe foe sensi a momenti di wi mama hori bere foe wi: „Nanga jepi foe wan libisma [Adam, a famiri edeman foe a libisma famiri] sondoe ben kon ini grontapoe èn dede nanga jepi foe sondoe, èn na so fasi dede ben panja go na ala libisma.” So leki fa bijbel taki, dan „dede tiri leki kownoe” (Romesma 5:12, 14). So boen awansi omeni fri wisrefi kan abi, wi alamala de ini katibo na sondoe nanga dede.
6. San ede pikinso go a fesi ben de ini a froewakti foe libi, sensi Psalm 90:10 ben skrifi?
6 Moro fara, a libi san wi abi now, skotoe srefisrefi. Srefi gi den wan di sani e waka boen gi den, a de soso wan toe tenti jari. Gi den wan di sani no e waka so boen gi den, a de soso foe wan toe jari noso moro mendri. Èn wan njoen ondrosoekoe e taki: „Sabidensi nanga dresi poesoe a libi froewakti foe libisma go na a natuurlijk skotoe foe en.” Disi de foe di a genetis sistema foe wi abi onvolmaaktifasi nanga dede di bow na ini en, leki wan bakapisi foe a sondoe foe Adam. Fa a de wan sari sani taki efoe wi e libi te wi tron 70 noso 80 jari, te wi moesoe kon moro koni èn man foe njanboen moro betre foe a libi, taki a skin foe wi e bigin go na baka èn te foe kaba wi e tron leki stòf! — Psalm 90:10.
7. San ede libisma noiti kan de a fonten foe den troe fri di wi wani èn abi fanowdoe?
7 Sortoe fasi foe libisma tiri kan kibri wi foe no tron wan srafoe foe sondoe nanga dede? No wán. No wan lanti-edeman, sabidensiman noso datra a no wan presi, kan fri wi foe den floekoe foe siki, owroedei nanga dede, èn no wan sma kan poeroe onseikerfasi, onregtfardikifasi, ogridoe, angri èn pôtifasi (Psalm 89:48). Awasi o boen libisma e meine en nanga trawan, den no man foe de a fonten foe den troe fri di wi wani èn abi fanowdoe. — Psalm 146:3.
Wan fowtoe gebroiki foe friwani
8, 9. San poti a libisma famiri ini a sari situwâsi di a de now?
8 A libisma famiri de ini a sari situwâsi disi, foe di Adam nanga Eva ben gebroiki a friwani foe den na wan fowtoe fasi. So leki fa The Jerusalem Bible e taki ini 1 Petrus 2:16: „Tjari joesrefi leki fri sma èn noiti no gebroiki joe fri leki wan pardon foe doe ogridoe.” A de krin, foe dati ede, taki Gado no ben abi na prakseri foe a fri foe libisma ben sa de sondro skotoe. A ben moesoe gebroiki na ini den skotoe di den wet foe Gado, di ben de regtfardiki èn ben sa wroko gi na boen foe ibriwan sma, ben skotoe en. Èn den skotoe dati ben abi nofo pasi foe gi foeroe persoonlijk fri foe wani sani, so taki a tiri foe Gado noiti ben o hori sma na ondro nanga tranga. — Deuteronomium 32:4.
9 Ma, wi fosi papa nanga mama ben froekisi foe taki gi densrefi san ben boen noso san ben fowtoe. Foe di foe espresi den ben komoto na ondro Gado tiri, a ben hari a jepi foe en poeroe na den (Genesis 3:17-19). Na so den ben kon onvolmaakti, san ben abi siki nanga dede leki bakapisi. Na presi foe de fri, libisma ben kon tron srafoe foe sondoe nanga dede. Den ben moesoe saka densrefi toe na ondro den winsi foe onvolmaakti èn foeroetron, ogri-ati libisma tiriman. — Deuteronomium 32:5.
10. Fa Jehovah handri afersi na wan lobifasi?
10 Gado gi libisma pasi foe proeberi disi ini ala fri, di den taki den abi, gi soso wan pisi ten di skotoe. A ben sabi taki den bakapisi ben sa sori sondro dededege, taki libisma tiri, di no ben na ondro Gado, no ben sa abi boen bakapisi. Foe di a friwani, te a gebroiki na wan joisti fasi, de so wan warti sani, dan Gado, ini a lobi foe en, ben gi pasi foe sani ben kan waka so foe wan sjatoe pisi ten, na presi foe hari a presenti foe friwani poeroe.
’Libisma no man taki fa foe poti en foetoe na pasi’
11. Fa historia ben horibaka gi a soifri fasi foe bijbel?
11 Den tori foe a historia ben sori a soifrifasi foe Jeremia kapitel 10, vers 23 èn 24, pe skrifi: „A no de na wan man di e koiri srefi foe taki fa foe poti en foetoe na pasi. Sori mi tapoe mi fowtoe, o Jehovah.” A historia so srefi ben sori a soifrifasi foe Preikiman 8:9, di e froeklari: „Libisma ben tiri abra trawan nanga takroe bakapisi gi en.” Fa disi de troe! Libisma famiri ben fadon foe a wan rampoe ini a trawan, nanga a grebi leki bakapisi gi alamala. Na apostel Paulus ben skrifi soifri foe a situwâsi di a ben taki, so leki fa skrifi na Romesma 8:22: „Wi sabi taki te nanga now a heri mekisani e soktoe makandra èn e njan pina makandra.” Ija, srefidensi foe den wet foe Gado ben de wan rampoe.
12. San wan toe grontapoe fonten e taki foe dorodoro fri?
12 A boekoe Inquisition and Liberty (Froefolgoe nanga froeloesoe) ben taki foe fri na a fasi disi: „Srefidensi, foe ensrefi, no abi foe de spesroetoe wan boen eigifasi: A no de wan sani foe meki bigi foe en sondro foe prakseri foe tra sani. A kan de, foe taki en leti, soso wan foe den moro lagi fasi foe prakseri joesrefi nomo . . . Libisma no de, èn no man doe moeiti srefi foe de, wan mekisani di abi srefidensi dorodoro, sondro taki a e doe wan don sani.” Èn kownoe pikin Filip foe Ingrisikondre ben taki wan leisi: „Foe njanboen dorodoro foe a fri foe abi sortoe winsi nanga lostoe toe, kan de wan sani di e hari sma srefisrefi, ma ondrofeni e leri ibri tron baka, taki fri sondro skotoe . . . èn foe handri sondro foe prakseri trawan na a moro seiker fasi foe pori a boenfasi foe a libi foe wan libimakandra, awansi o goedoe den de.”
Soema sabi en moro betre?
13, 14. Soema wawan kan gi troe fri na a libisma famiri?
13 Soema sabi moro betre fa wan oso moesoe orga — lobi papa nanga mama di abi frantiwortoe nanga ondrofeni noso jongoe pikin? A piki de krin. Na a srefi fasi, a Mekiman foe libisma, wi hemel Tata, sabi san de moro boen gi wi. A sabi fa libisma libimakandra moesoe orga èn tiri. A sabi fa a friwani moesoe seti foe tjari den kefarlek boen fri gi ala sma. Soso na almakti Gado, Jehovah, sabi fa foe poeroe a libisma famiri foe a katibo na ini san a de èn gi troe fri na ala sma. — Jesaja 48:17-19.
14 Ini en Wortoe na Romesma 8:21, Jehovah e gi a pramisi disi di e gi deki-ati: „Na mekisani srefi toe sa meki kon fri foe a katibo foe pori èn sa abi a glori fri foe den pikin foe Gado.” Ija, Gado e pramisi foe fri a libisma famiri dorodoro foe a sari situwâsi na ini san a de now. Na artikel di e kon now sa taki foe fa disi sa pasa.
Fa joe ben sa piki?
(Wi e loekoe sjatoe bladzijde 3 te nanga 8)
◻ San ede libisma abi so wan tranga firi foe fri?
◻ Na sortoe fasi libisma ben kon ini katibo ini heri a historia?
◻ San ede Jehovah ben gi pasi foe sma meki so langa wan fowtoe gebroiki foe a friwani?
◻ Soema wawan kan tjari troe fri gi a heri libisma famiri èn foe san ede?
[Prenki na tapoe bladzijde 7]
A langa di wan libisma libi langa, de pikinmoro a srefi leki a wan di skrifi foe en 3500 jari pasa na Psalm 90:10
[Sma di abi a reti foe a prenki]
Nanga a primisi foe na British Museum