Gebroiki joe kresten fri na wan koni fasi

„De leki fri sma èn gebroiki tokoe a fri foe oenoe . . . leki srafoe foe Gado.” — 1 PETRUS 2:16.

1. Sortoe fri Adam ben lasi, èn sortoe fri Jehovah sa gi a libisma famiri baka?

DI WI fosi papa nanga mama ben sondoe ini a djari foe Eden, den ben lasi gi den pikin foe den wan glori famiri goedoe — a fri foe sondoe èn pori. Leki wan bakapisi foe dati, wi alamala ben gebore leki srafoe foe kroektoedoe èn dede. Ma kolokoe taki Jehovah abi na prakseri foe gi getrow libisma wan toemoesi moi fri baka. Ini a ten disi opregti sma e wakti nanga span froewakti tapoe „a tjari kon na krin foe den manpikin foe Gado”, èn leki bakapisi foe dati den „sa kon fri foe a katibo foe pori èn abi a glori fri foe den pikin foe Gado.” — Romesma 8:19-21.

’Salfoe foe go preiki’

2, 3. (a) Soema na „den manpikin foe Gado”? (b) Foe sortoe toemoesi moi posisi den e njanboen èn sortoe frantiwortoe dati e tjari?

² Soema na den „manpikin [disi] foe Gado”? Den na Jesus brada di salfoe nanga jeje, èn di sa de tiriman nanga en ini a hemel Kownoekondre. Den fosiwan foe den ben kon sori densrefi ini a fosi jarihondro G.T. Den ben teki a waarheid di e froeloesoe sma, èn di Jesus ben leri sma, èn foe sensi a Pinksterfesa foe 33 G.T. den ben abi prati na den glori grani di Petrus ben taki foe den di a ben skrifi gi den: „Oenoe na ’wan geslakti di teki poeroe na mindri trawan, wan kownoe-priesterwroko, wan santa nâsi, wan pipel di de wan spesroetoe goedoe.’” — 1 Petrus 2:9a; Johanes 8:32.

³ Foe de a spesroetoe goedoe foe Gado — fa disi na wan toemoesi moi blesi! Èn a disiten fikapisi foe den salfoe manpikin foe Gado e njanboen foe a srefi blesi posisi na Gado. Ma nanga so wan hei grani, frantiwortoe e kon. Petrus ben poti prakseri tapoe wan foe den frantiwortoe disi di a ben go doro foe taki: „’Oenoe moesoe meki den toemoesi moi sani bekènti’ foe a sma di ben kari oenoe komoto na doengroe kon na ini a wondroe leti foe en.” — 1 Petrus 2:9b.

4. Fa salfoe kresten ben doe a frantiwortoe di e kon nanga a kresten fri foe den?

⁴ Den salfoe kresten ben doe a frantiwortoe disi foe meki den boen sani foe Gado bekènti na alasei? Ija. Di Jesaja ben taki na profeitifasi foe den salfoewan foe sensi 1919, a ben taki: „A jeje foe a Soeverein Masra Jehovah de a mi tapoe, foe di Jehovah ben salfoe mi foe froeteri boen njoensoe na den safri-atisma. A ben seni mi foe dresi den wan di ati ben broko, foe bari fri gi den wan di den ben teki leki strafoeman èn na opo bradi foe den ai srefi foe den strafoeman; foe bari wroko foe a jari foe boen wani foe a sei foe Jehovah èn a dei foe teki refensi foe a sei foe wi Gado” (Jesaja 61:1, 2). Ini a ten disi, a salfoe fikapisi, di e waka baka na eksempel foe Jesus, di a tekst disi e fiti na a fosi presi, e meki faja a boen njoensoe foe fri bekènti na trawan. — Mateus 4:23-25; Lukas 4:14-21.

5, 6. (a) San ben de a bakapisi foe na fajafaja preiki foe den salfoe kresten? (b) Foe sortoe grani èn frantiwortoe den sma foe a bigi ipi e njanboen?

⁵ Leki wan bakapisi foe a fajafaja preiki foe den, wan bigi ipi tra skapoe, ben kon de foe si na a grontapoe preigron ini den lasti dei disi. Den ben komoto na ala nâsi foe moksi densrefi nanga den salfoewan ini a dini foe Jehovah, èn a waarheid meki den disi kon fri toe (Sakaria 8:23; Johanes 10:16). Neleki Abraham den froeklari den regtfardiki tapoe a fondamenti foe bribi èn den kon de ini wan krosibei matifasi nanga Jehovah Gado. Èn neleki Rakab, a froeklari di den froeklari den regtfardiki, e meki den sa kan pasa libilibi — ini a kefal foe den, pasa Armagedon libilibi (Jakobus 2:23-25; Openbaring 16:14, 16). Ma den sortoe hei grani disi e gi den a frantiwortoe toe foe froeteri trawan foe a glori foe Gado. Dati ede meki Johanes ben si den e prèise Jehovah na poebliki, „e bari nanga wan tranga sten, èn e taki: ’Froeloesoe wi abi foe taki tangi na wi Gado, di sidon tapoe a kownoestoeroe èn na a Pikin Skapoe.’” — Openbaring 7:9, 10, 14.

⁶ A jari di pasa, a bigi ipi, di e teri now moro leki fo miljoen sma, makandra nanga wan pikin pisi di tan abra foe den salfoe kresten, ben gebroiki pikin moro wan miljard joeroe na a meki bekènti foe den boen sani foe Jehovah. Disi ben de a moro boen fasi foe gebroiki a fri foe den na jeje fasi.

„Gi a kownoe grani”

7, 8. Sortoe frantiwortoe di abi foe doe nanga grontapoe tirimakti kresten fri e gi, èn ini a tori disi, foe sortoe fowtoe fasi wi moesoe tan farawe?

⁷ A kresten fri foe wi e gi wi tra frantiwortoe. Petrus e poti krakti na tapoe wan toe foe den te a e skrifi: „Gi ala sortoe foe sma grani, abi lobi gi a heri gemeenschap foe brada, frede Gado, gi a kownoe grani” (1 Petrus 2:17). San den wortoe „gi a kownoe grani” wani taki?

⁸ „A kownoe” e agersi grontapoe tiriman. Ini a ten disi, wan jeje foe no abi lespeki gi tirimakti ben kon de foe si ini grontapoe, èn disi kan abi krakti makriki tapoe kresten. Wan kresten kan aksi ensrefi, foe san ede a moesoe gi „a kownoe grani”, foe di „heri grontapoe e didon ini a makti foe na ogriwan” (1 Johanes 5:19). Nanga den wortoe disi ini prakseri, a kan firi fri foe no gi jesi na wet di a feni taki a no fiti en en èn kan poeroe ensrefi foe no pai belasting sondro taki den kisi en. Ma disi ben sa de kontrari a krin komando foe Jesus foe „pai keisri baka . . . san na foe keisri.” A ben sa de, foe taki en leti, ’gebroiki a fri foe en leki wan djakti foe porifasi.’ — Mateus 22:21; 1 Petrus 2:16.

9. San na toe boen reide foe gi jesi na grontapoe tirimakti?

⁹ Kresten de froeplekti foe gi tirimakti grani èn foe saka densrefi na en ondro — srefi efoe disi de na wan fasi di e anga foe tra sani (Tori foe den Apostel 5:29). Foe san ede? Ini 1 Petrus 2:14, Petrus e poti krakti tapoe dri reide te a e taki, dati Gado „seni [granman] foe gi ogrisma strafoe, ma foe prèise den di e doe boen sani.” A frede foe kisi strafoe e gi nofo reide foe gi tirimakti jesi. Fa a ben sa de wan sjen gi wan Kotoigi foe Jehovah foe den ben gi en wan boetoe noso ben poti en a strafoe-oso, foe di a naki sma na wan ogrifasi, foefoeroe, noso doe wan tra ogri! Prakseri nomo fa son sma ben sa prisiri foe panja so wan sani na poebliki! Na a tra sei, te wi e kweki wan boen nen leki borgroe di e gi jesi, dan wi e kisi prèise foe regtfardiki tiriman. Kande wi sa kisi moro fri foe go doe a wroko foe wi foe preiki a boen njoensoe. Moro fara, ’foe di wi e doe boen, wi e tapoe a soso takitaki foe onreidelek sma’ (1 Petrus 2:15b). Disi na wan di foe toe reide foe gi tirimakti jesi. — Romesma 13:3.

10. San na a moro tranga reide foe gi jesi na grontapoe hei tirimakti?

¹⁰ Ma wan moro bigi reide de. Den tirimakti de, foe di Jehovah gi pasi foe disi. So leki fa Petrus e taki, dan Jehovah „seni” den politiek tiriman èn na „a wani foe Gado” taki kresten e tan saka densrefi na den ondro (1 Petrus 2:15a). Na a srefi fasi, na apostel Paulus e taki: „Gado ben poti den tirimakti di de ini den posisi foe den di e anga foe tra sani.” Foe dati ede a konsensi foe wi di wi kisi foe bijbel leri, e boeweigi wi foe gi den tirimakti jesi. Efoe wi e weigri foe saka wisrefi na den ondro, dan wi „poti wisrefi kontrari a seti foe Gado” (Romesma 13:1, 2, 5). Soema na mindri wi sa wani foe poti wisrefi nanga wi fri wani kontrari a seti foe Gado? Fa dati ben sa de wan fowtoe gebroiki foe kresten fri!

’Abi lobi gi den brada’

11, 12. (a) Sortoe frantiwortoe di abi foe doe nanga kompe bribiman e kon nanga a kresten fri foe wi? (b) Soema spesroetoe e froedini wi lobi prakseri èn foe san ede?

¹¹ Petrus ben taki toe taki wan kresten moesoe „abi lobi gi a heri gemeenschap foe brada” (1 Petrus 2:17). Disi na wan tra frantiwortoe di e kon nanga kresten fri. Moro foeroe foe wi de foe wan gemeente. A no de foe taki, dati wi alamala de foe wan internationaal gemeenschap noso organisâsi foe brada. Sori lobi gi den disi na wan koni fasi foe gebroiki a fri foe wi. — Johanes 15:12, 13.

¹² Na apostel Paulus ben poti wan groepoe kresten aparti di spesroetoe e froedini a lobi foe wi. A ben taki: „Gi jesi na den di e teki fesi na oenoe mindri èn saka oensrefi bikasi den e loekoe oen sili leki sma di moesoe gi frantiwortoe, so taki den kan doe disi nanga prisiri èn no nanga soktoe, bika disi ben sa doe joe ogri” (Hebrewsma 13:17). Den disi di e teki fesi ini a gemeente na den owroeman. A troe, taki den man disi no de volmaakti. Ma tokoe, den gi den a posisi disi ondro a tiri foe a Tiri Skin. Den e teki fesi nanga na eksempel di den e gi èn foe di den e prakseri trawan èn den gi den a wroko foe tan loekoe den sili foe wi. Fa disi na wan hebi wroko di den kisi (Hebrewsma 13:7). Kolokoe taki, moro foeroe gemeente abi wan boen jeje foe wani wroko makandra, èn a de wan prisiri gi owroeman foe wroko nanga den. A moro moeilek te sma no wani foe wroko makandra. Na owroeman e tan doe a wroko foe en, ma so leki fa Paulus e taki, dan a e doe disi nanga „soktoe”. Foe troe, wi no wani meki den owroeman soktoe! Wi wani taki den moesoe kisi prisiri ini a wroko foe den, so taki den kan bow wi.

13. San na wan toe fasi fa wi kan wroko makandra nanga den owroeman?

¹³ San na wan toe fasi di wi kan wroko makandra nanga den owroeman? Wan fasi na foe jepi nanga na ondrow èn a krin foe a Kownoekondre zaal. Wan tra fasi na foe wroko makandra ini a wroko foe fisiti den sikiwan èn foe jepi den malengriwan. Boiti dati, wi kan doe moeiti foe tan tranga na jeje fasi, so taki wi no e tron wan hebi. Wan prenspari kontren foe wroko makandra, na foe hori a gemeente krin na moreel fasi èn na jeje fasi, nanga a fasi fa wi e tjari wisrefi èn foe di wi e go froeteri den foe den kefal foe serjoesoe sondoe di sma e tjari kon na ondro wi prakseri.

14. Fa wi moesoe fiti wisrefi na den strafoe di den owroeman e gi sma?

¹⁴ Sontron, foe hori a gemeente krin, owroeman abi foe sluit wan sma uit di doe ogri èn di no abi berow (1 Korentesma 5:1-5). Disi e kibri a gemeente. A kan jepi a sma di doe ogri toe. Nofo tron, so wan strafoe ben jepi foe tjari a sondoeman kon baka na en froestan. Ma san efoe a sma di sluit uit na wan krosibei mati noso wan famiri? Kon meki wi taki, dati a sma na wi papa noso mama noso manpikin noso oemapikin. Dan tokoe wi e lespeki a sani di den owroeman doe? A de troe, taki disi kan de wan moeilek sani. Ma fa a ben sa de wan fowtoe gebroiki foe a fri foe wi foe tjari a bosroiti foe den owroeman ini degedege èn foe tan abi demakandra na jeje fasi nanga wan sma di ben sori taki a de wan pori krakti ini a gemeente! (2 Johanes 10, 11). A heri pipel foe Jehovah moesoe kisi prèise foe a fasi fa den e wroko makandra ini den sortoe afersi disi. Leki wan bakapisi foe dati, na organisâsi foe Jehovah e tan krin èn soifri ini a grontapoe disi di no krin. — Jakobus 1:27.

15. Efoe wan sma e doe wan serjoesoe sondoe, dan san a moesoe doe wantewante?

¹⁵ San efoe wi doe wan serjoesoe sondoe? Kownoe David ben taki foe den sma di Jehovah feni boen: „Soema mag kren a bergi foe Jehovah, èn soema mag opo tanapoe ini en santa presi? Ibriwan sma di anoe no abi fowtoe èn di krin na ati, di no ben tjari Mi ati go na soso sani di no abi warti èn di no ben sweri na wan bidrigi fasi” (Psalm 24:3, 4). Efoe foe wan noso tra reide wi no de moro langa so, taki ’wi anoe no abi fowtoe èn wi krin na ati’, dan wi moesoe handri esi-esi. A têgo libi foe wi de ini kefar.

16, 17. Foe san ede wan sma di fowtoe foe di a doe serjoesoe sondoe no moesoe proeberi foe loesoe na afersi en wawan?

¹⁶ Son sma ben kisi a firi foe kibri serjoesoe sondoe, kande foe di den e prakseri: ’Mi ben froeteri Jehovah kaba èn mi ben abi berow. So boen foe san ede mi sa meki den owroeman kon na ini a tori?’ A sma di doe ogri ben e sjen kande noso frede foe san den owroeman ben kan doe. Ma a moesoe memre taki ala di Jehovah wawan kan krin wi foe sondoe, A ben meki den owroeman ini a fosi presi de frantiwortoe foe a soifrifasi foe a gemeente (Psalm 51:2). Den de drape foe meki sma kon betre, foe „tjari den santawan kon tanapoe reti baka” (Efeisesma 4:12). Foe no go na den te wi abi jepi na jeje fasi fanowdoe, de neleki te wi no e go na datra te wi e siki.

¹⁷ Sonwan di ben proeberi foe seti afersi densrefi ben kon si taki moen noso jari a baka, a konsensi foe den ben e fon den hebi ete. Moro takroe srefi, trawan di ben kibri wan serjoesoe fowtoe ben fadon na sondoe foe wan di foe toe èn srefi wan di foe dri tron. Te na afersi e kon te foe kaba ondro a prakseri foe den owroeman, a de wan kefal foe ogri di doe omeni tron baka. Omoro boen a de foe waka baka a rai foe Jakobus! A ben skrifi: „Wan sma de na oenoe mindri di e siki? Meki a kari den owroeman foe na gemeente kon na en, èn meki den begi gi en, ala di den e lobi oli gi en ini a nen foe Jehovah” (Jakobus 5:14). Go na den owroeman, ala di ten de ete foe kon betre. Efoe wi e wakti toemoesi langa, dan a kan taki wi no e firi moro taki wi e libi wan sondoe libi. — Preikiman 3:3; Jesaja 32:1, 2.

Fa wi e sori a dorosei èn ontspanning

18, 19. Foe san ede wan priester ben taki boen foe Jehovah Kotoigi?

¹⁸ Feifi jari pasa kaba, dan wan lomsoe priester na Italiakondre ben taki moi wortoe foe den Kotoigi foe Jehovah na ini wan tijdschrift foe a kerki.a A ben taki: „Foe mi sei, mi lobi den Kotoigi foe Jehovah; mi e erken disi eerlijk. . . . Den wan di mi sabi, abi maniri di de sondro flaka, den e taki nanga switi sten . . . [èn] nanga foeroe overtoigi. Oten wi sa kon froestan taki a de fanowdoe foe pristeri a waarheid na wan boen fasi? Taki den wan di e meki a waarheid bekènti, no moesoe de nanga toe ati, no moesoe tingi, no moesoe de morsoe, no moesoe de doti?”

¹⁹ So leki fa den wortoe disi e sori, dan boiti tra sani, a fasi fa den Kotoigi ben weri krosi èn ben pristeri densrefi ben naki na ati foe a priester. A de krin taki den sma di a ben miti ben arki a rai di „a getrow èn koni srafoe” ben gi ini den jari di pasa (Mateus 24:45). Bijbel e taki, dati krosi gi wan oema moesoe ’de fatsoenlijk èn joisti’ (1 Timoteus 2:9). Ini a ten disi pe sma e lagi densrefi moro nanga moro, a rai dati de fanowdoe gi man-nengre toe. A no de wan logis sani taki sma di e teki presi gi a Kownoekondre foe Gado moesoe pristeri densrefi na wan boen fasi na sma na dorosei?

20. Foe san ede wan kresten moesoe loekoe boen ala ten san a e weri?

²⁰ Sonwan e agri kande taki na konmakandra èn ini velddienst, den moesoe loekoe boen fa den e weri krosi, ma den e prakseri kande taki den bijbel gronprakseri no e fiti na tra ten. Ma, wan momenti de, taki wi e tapoe foe de sma di e teki presi gi a Kownoekondre foe Gado? A troe, omstandigheid kan de tra fasi. Efoe wi e jepi foe bow wan Kownoekondre zaal, wi sa weri tra fasi leki te wi e go na wan konmakandra na a srefi Kownoekondre zaal dati. Te wi de ini wi fri ten, wi sa weri fri ten modo kande. Ma awansi oten trawan e si oenoe, a krosi foe wi moesoe de fatsoenlijk èn joisti ala ten.

21, 22. Fa wi ben kisi kibri gi ontspanning di no boen, èn na sortoe fasi wi moesoe si a rai foe den sortoe afersi disi?

²¹ Wan tra kontren di kisi foeroe prakseri, na a tori foe ontspanning. Libisma — spesroetoe jongoe sma — abi ontspanning fanowdoe. A no de wan sondoe noso lasi ten foe poti ontspanning gi na osofamiri tapoe schema. Srefi Jesus ben kari den disipel foe en foe „rostoe wan pikinso” (Markus 6:31). Ma loekoe boen taki ontspanning no e opo a doro foe go doti joe na jeje fasi. Wi e libi ini wan grontapoe pe ontspanning e poti prakseri srefisrefi tapoe seks hoeroedoe, tranga ogridoe, sani di e gi groskin, nanga afkodrei (2 Timoteus 3:3; Openbaring 22:15). A getrow èn koni srafoe e hori den sortoe kefar disi na ai èn doronomo den e warskow wi gi den sortoe sani disi. Joe e prakseri taki den sani disi di den e memre wi, e pori a fri foe joe? Noso joe de grantangi taki na organisâsi foe Jehovah e broko en ede nofo nanga joe, foe di den e poti joe prakseri doronomo na den sortoe kefar disi? — Psalm 19:7; 119:95.

²² No frigiti noiti taki ala di a fri foe wi e komoto na Jehovah, wi abi na frantiwortoe foe na fasi fa wi e gebroiki en. Efoe wi poti boen rai na wan sei èn e teki fowtoe bosroiti, wi no man gi wan tra sma fowtoe foe disi. Na apostel Paulus e taki: „Na so ibriwan foe wi sa gi frantiwortoe foe ensrefi na Gado” — Romesma 14:12; Hebrewsma 4:13.

Froewakti a fri foe den pikin foe Gado

23. (a) Foe sortoe blesi ini a tori foe fri wi e njanboen now? (b) Na tapoe sortoe blesi wi e wakti nanga foeroe froewakti?

²³ Foe troe wi na wan blesi pipel. Wi de fri foe falsi relisi èn kroektoe bribi. Tangi foe a froeloesoe-ofrandi, wi kan kon na Jehovah nanga wan krin konsensi, fri na wan jeje fasi foe katibo na sondoe èn dede. Èn heri esi „a tjari kon na krin foe den Manpikin foe Gado” sa kon. Na Armagedon, dan libisma sa kon sabi Jesus brada, ini a hemel glori foe den, leki den sma di o pori den feanti foe Jehovah (Romesma 8:19; 2 Tesalonikasma 1:6-8; Openbaring 2:26, 27). Baka dati, sma sa kon sabi den manpikin disi foe Gado leki kanari gi blesi di e lon foe a kownoestoeroe foe Gado go na a libisma famiri (Openbaring 22:1-5). Te foe kaba, a tjari kon na krin disi foe den manpikin foe Gado sa abi leki bakapisi na blesi foe a getrow libisma famiri nanga a glori fri foe den pikin foe Gado. Joe e angri foe a ten dati kon? Dan gebroiki joe kresten fri na wan koni fasi. De srafoe foe Gado now, èn joe sa njanboen foe a froewondroe fri dati foe ala ten!

[Foetoewortoe]

Overzichtfaki

◻ Fa den salfoewan èn den tra skapoe ben gi Jehovah glori?

◻ Foe san ede kresten moesoe gi grani na grontapoe tirimakti?

◻ Na sortoe fasi wan kresten kan wroko makandra nanga owroeman?

◻ Foe san ede Jehovah Kotoigi de so aparti foe foeroe sma ini grontapoe, ini a tori foe weri krosi?

◻ Foe san wi moesoe tan farawe te a e go foe ontspanning?

[Prenki na tapoe bladzijde 14]

Den owroeman e froedini spesroetoe a lobi èn wroko makandra foe wi

[Prenki na tapoe bladzijde 15]

A krosi foe wan kresten moesoe de fatsoenlijk, joisti èn a moesoe fiti gi na okasi