Krestes no ben wani si kroektoedoe na ai — Joe toe?
„Joe ben lobi regtfardikifasi èn joe no ben wani si kroektoedoe na ai. Foe dati ede meki Gado, joe Gado, ben salfoe joe nanga na oli foe toemoesi bigi prisiri moro leki den patna foe joe.” — HEBREWSMA 1:9.
1. Sortoe sani moro de fanowdoe gi ala troe foetoeboi foe Jehovah Gado, boiti a lobi gi regtfardikifasi?
DEN troe foetoeboi foe Jehovah lobi en nanga den heri ati, sili, froestan èn krakti (Markus 12:30). Den wani foe meki na ati foe Jehovah prisiri, foe di den e kibri den soifri retifasi (Odo 27:11). Foe doe dati, den no moesoe lobi regtfardikifasi wawan, ma den no moesoe wani si kroektoedoe na ai toe. Na Eksempel foe den, Jesus Krestes, ben doe dati foe troe. Foe en den ben taki: „Joe ben lobi regtfardikifasi èn joe no ben wani si kroektoedoe na ai.” — Hebrewsma 1:9.
2. San kroektoedoe wani taki so srefi?
2 San na kroektoedoe? Dati na sondoe, so leki apostel Johanes ben sori di a ben skrifi: „Ibriwan di e doe sondoe, e doe kroektoedoe toe, èn foe dati ede sondoe na kroektoedoe” (1 Johanes 3:4). Wan sma di kroektoe „no e meki wet skotoe en noso dwengi en” (Webster’s Ninth New Collegiate Dictionary). Kroektoedoe wani taki so srefi ala sani di takroe, ogri, immoreel, pori èn no de eerlijk. Te wi e loekoe grontapoe, dan disi e sori wi taki ini a ten disi kroektoedoe e panja ensrefi esi-esi na ala sei leki noiti na fesi. Degedege no de taki wi e libi ini den „moeilek ten” di na apostel Paulus ben taki na fesi foe dati na 2 Timoteus 3:1-5. Nanga ala a kroektoedoe disi na prakseri, o boen a de taki wi kisi na ordroe foe no wani si takroedoe na ai! Den ben froeteri wi foe eksempel: „O, oenoe di lobi Jehovah, oenoe no moesoe wani si san takroe na ai san” (Psalm 97:10). So srefi wi e leisi: „Oenoe no moesoe wani si san takroe na ai, èn moesoe lobi san boen.” — Amos 5:15.
Dri fasi foe no wani si wan sani na ai
3-5. Na sortoe dri fasi den wortoe „no wani si na ai” e gebroiki ini Gado Wortoe?
3 San no wani si na ai wani taki? Ini a Wortoe foe Gado „no wani si na ai” e gebroiki na dri aparti fasi. Joe abi a fasi foe no wani si wan sani na ai, foe di ogri-ati e boeweigi en èn di e soekoe foe doe a sma noso a sani di a abi na prakseri, ogri. Kresten moesoe tan farawe foe a fasi disi foe no wani si wan sani na ai. A ben de a fasi, di ben meki Kain kiri en regtfardiki brada Abel (1 Johanes 3:12). Disi na a fasi toe foe no wani si wan sani na ai, di den kerki fesiman ben abi gi Jesus Krestes. — Mateus 26:3, 4.
4 Moro fara, den e gebroiki den wortoe „no wani si na ai” ini den Boekoe na a fasi foe lobi moro mendri. Jesus ben taki foe eksempel: „Efoe wan sma e kon na mi èn a no de so taki a no wani si en papa nanga mama nanga oema nanga den pikin nanga den brada nanga den sisa, ija, nanga srefi en eigi sili na ai, dan a no man de mi disipel” (Lukas 14:26). A de krin, taki Jesus ben abi nomo na prakseri foe lobi den moro mendri leki wi lobi en. Jakob ’no ben wani si Lea na ai’, ma, te joe loekoe fini, a ben lobi en moro mendri leki a ben lobi Rakèl. — Genesis 29:30, 31.
5 Dan joe abi san den wortoe „no wani si na ai” wani taki, di wi abi spesroetoe belangstelling gi en djaso. A abi a prakseri foe abi so wan dipi firi foe no lobi wan sani noso foe abi tranga tegoe foe wan sma noso wan sani, taki wi e tan farawe foe abi awansi san srefi foe doe nanga so wan sma noso sani. Na Psalm 139 den e taki foe disi leki „no wani si wan sani na ai kwetikweti.” Drape David ben taki: „A no de so taki mi no wani si den sma na ai di no wani si joe na ai srefisrefi, O Jehovah, èn mi no e foega foe den di opo densrefi kontrari joe? Foe troe, mi no man si den na ai kwetikweti. Gi mi den kon tron troetroe feanti.” — Psalm 139:21, 22.
Foe san ede wi no moesoe wani si kroektoedoe na ai
6, 7. (a) Foe san ede, wi no moesoe wani si kroektoedoe na ai? (b) San na wan di foe toe krakti reide foe no wani si kroektoedoe na ai?
6 Foe san ede wi no moesoe wani si kroektoedoe na ai? Wan reide de, so taki wi kan abi lespeki gi wisrefi èn wan boen konsensi. Soso na a fasi disi wi kan abi wan boen matifasi nanga wi regtfardiki, lobi Tata na hemel, Jehovah. David ben gi wan toemoesi boen eksempel ini a tori disi, so leki wi kan si disi te wi e leisi Psalm 26. A ben taki foe eksempel: „Mi no ben wani si a gemeente foe ogridoeman na ai, èn nanga na ogriwan mi no e sidon” (Psalm 26:5). A lobi foe wi gi Gado èn gi regtfardikifasi moesoe boeweigi wi foe abi regtfardiki atibron — ija, no wani si sani na ai — ala sani di kroektoe ini na ai foe Gado, so srefi den kroektoe fasi foe handri foe den wan di no e gi jesi na Jehovah èn no wani si En na ai. Moro fara, wi no moesoe wani si kroektoedoe na ai foe na sjen di a e tjari kon tapoe Gado nen.
7 Wan tra reide foe san ede a pipel foe Jehovah no moesoe wani si kroektoedoe na ai, na taki a de toemoesi kefarlek èn ogri. Sai nanga a skin na prakseri, san wani taki foe sai kroektoedoe, sa abi sortoe bakapisi? Paulus ben warskow: „No kori oensrefi: Gado no e meki sma meki spotoe nanga en. Bika san wan sma e sai, na dati a sa koti toe; bikasi a sma di e sai nanga en skin na prakseri, sa koti porifasi foe en skin, ma a sma di e sai nanga a jeje na prakseri, sa koti têgo libi foe a jeje” (Galasiasma 6:7, 8). So boen, kwetikweti wi no moesoe wani abi wan sani foe doe nanga kroektoedoe. Foe troe, wi no moesoe wani si ala kroektoedoe na ai foe a boen foe wisrefi èn wan boen konsensi.
Den sma di no wani si kroektoedoe na ai
8. Soema ben gi a moro prenspari eksempel foe a si di sma no wani foe si kroektoedoe na ai, so leki sortoe tekst e sori?
8 Foe di Gado no wani si kroektoedoe na ai, meki a gi ala en mekisani di abi froestan a moro prenspari eksempel. En ati e bron na wan regtfardikifasi nanga kroektoedoe, èn a Wortoe foe en e taki: „Siksi sani de di Jehovah no wani si na ai; ija, seibi de di de wan tegoe sani gi en sili: heimemre ai, wan leitongo, èn anoe di e trowe broedoe foe sma di no doe noti, wan ati di e meki ogri plan, foetoe di e hasti foe lon go na ogridoe, wan falsi kotoigi di e meki lei èn ibriwan sma di e meki trobi kon na mindri brada.” Wi e leisi toe: „A frede gi Jehovah wani taki foe no wani si ogri na ai. Foe hei misrefi moro èn bigimemre èn a takroe pasi èn a fowtoe mofo mi no ben wani si na ai” (Odo 6:16-19; 8:13). Boiti dati den e froeteri wi: „Mi Jehovah, mi lobi gerègtighèit; mi no wani si a ròs di den e ròs makandra nanga onregtfardikifasi na ai.” — Jesaja 61:8.
9, 10. Fa Jesus ben sori taki a no ben wani si kroektoedoe na ai?
9 Jesus Krestes ben waka baka en Tata ini a si di a no ben wani si kroektoedoe na ai. Foe dati ede wi e leisi: „Joe ben lobi regtfardikifasi èn kroektoedoe joe no ben wani si na ai. Foe dati ede meki Gado, joe Gado, ben salfoe joe nanga na oli foe toemoesi bigi prisiri moro leki den patna foe joe” (Hebrewsma 1:9). Jesus ben gi wi wan eksempel foe a fasi disi foe no wani si wan sani na ai. A ben sori taki a no ben wani si kroektoedoe na ai, foe di a ben poeroe a bere kon na doro foe den sma di ben doe disi foe espresi — den falsi kerki fesiman. Ibri tron baka, a ben poeroe den bere kon a doro leki hoigriman (Mateus, kapitel 23). Na wan tra okasi Jesus ben taigi den: „Oenoe komoto na oen tata Didibri èn oenoe wani doe den lostoe foe oen tata” (Johanes 8:44). Jesus ben sori taki a no ben wani si kroektoedoe na ai srefi so fara, taki a ben gebroiki krakti na skin fasi, na toe okasi pe a ben krin a tempel foe den gridi kerki hoigriman. — Mateus 21:12, 13; Johanes 2:13-17.
10 Jesus ben sori toe taki a no ben wani si kroektoedoe èn sondoe na ai, foe di a ben tan troetroe fri foe kroektoedoe èn sondoe. Foe dati ede a ben kan aksi den gensman foe en nanga reti: „Soema foe oenoe kan sori mi taki a troe taki mi doe sondoe?” (Johanes 8:46) Jesus ben de „loyaal, sondro fowtoe, sondro flaka, aparti foe sondari” (Hebrewsma 7:26). Foe sori taki, disi de so, Petrus ben skrifi taki Jesus „no ben doe sondoe, èn so srefi toe bidrigi no ben de foe feni ini en mofo.” — 1 Petrus 2:22.
11. Sortoe eksempel foe bijbel wi abi foe onvolmaakti libisma di no ben wani si kroektoedoe na ai?
11 Ma Jesus ben de wan volmaakti man. Wi abi eksempel foe bijbel foe onvolmaakti libisma di troetroe no ben wani si kroektoedoe na ai? Ija, wi abi dati! Foe eksempel, Moses èn den kompe Leifisma foe en, ben sori taki den no ben wani si na anbegi foe kroektoe gado na ai srefisrefi, foe di den ben kiri so wan 3.000 sma di ben anbegi kroektoe gado tapoe a komando foe Jehovah (Exodus 32:27, 28). Pinehas ben sori taki a no ben wani si kroektoedoe na ai kwetikweti di a ben kiri toe soetaman nanga wan lansri. — Numeri 25:7, 8.
Sori taki wi no wani si kroektoedoe na ai
12. (a) Fa wi kan sori taki wi no wani si kroektoedoe na ai? (b) San na wan toe praktis fasi foe tan farawe foe kroektoedoe prakseri?
12 Foe kon doro na a ten foe wi, dan fa wi kan sori taki wi no wani si kroektoedoe na ai? Foe di wi e dwengi den prakseri, den wortoe, èn den doe foe wi. Wi moesoe kweki a gwenti foe denki foe sani di e bow wi, te a prakseri foe wi no poti tapoe wan spesroetoe wroko. Efoe a de so, taki wi de na ai te wi e didon na bedi te neti, dan kande wi abi a firi foe go denki foe wan toe kroektoe sani, so leki foe denki doronomo foe sani di e hati wi noso gi wisrefi abra foe prakseri seks afersi di no man kon troe. Noiti no gi den sortoe sani disi pasi, ma kisi a gwenti foe e tan denki sani di e tjari wini kon. Foe eksempel, proeberi foe hori tekst na ede, den neigi sani di e gi kolokoe, èn den neigi froktoe foe a jeje (Matteus 5:3-12; Galasiasma 5:22, 23). Joe kan kari den nen foe den 12 apostel? Joe sabi den Tin Komando? San na den seibi gemeente di den e kari na Openbaring? Foe hori den Kownoekondre singi na ede e jepi toe foe tan denki foe sani di troe, di de foe serjoesoe belang, di de regtfardiki, di de krin, di de switi, di sma e taki boen foe den, di de wan boen maniri, èn di de foe prèise. — Filipisma 4:8.
13. Sortoe fasi foe taki wi no sa wani si na ai te wi no wani si kroektoedoe na ai?
13 Moro fara, wi e sori taki wi no wani si kroektoedoe na ai, foe di wi e tan farawe foe ala doti taki. Foeroe grontapoe sma e abi prisiri foe froeteri èn arki fisti lafoetori, ma kresten no moesoe abi a firi foe arki den srefi. Na presi foe dati, wi moesoe waka gowe èn tan farawe foe teki prati na awansi sortoe takimakandra toe, di e soengoe go na den sortoe lagi marki dati. Efoe wi no man waka gowe, dan nanga a fasi fa wi fesi tan, wi kan sori awansi fa no fa, taki wi no wani si so wan fasi foe taki na ai. Wi moesoe poti prakseri tapoe a toemoesi boen rai disi: „No meki no wan pori wortoe komoto na joe mofo, ma ibri wortoe di boen foe bow tra sma pe a de fanowdoe, so taki nanga dati den arkiman kan kisi wan sani di boen” (Efeisesma 4:29). Wi no moesoe doti wisrefi foe di wi e taki sani di no krin noso foe di wi e arki dati.
14. Sortoe kibri a no wani si na ai foe kroektoedoe sa gi ini a tori foe bisnis tori nanga wroko?
14 A wani di wi no wani si kroektoedoe na ai moesoe de toe gi ala sondoe doe. Foe no wani si kroektoedoe na ai sa jepi wi foe tan farawe foe a trapoe foe go wan skeki ini a tori disi. Opregti kresten no e libi wan sondoe libi. (Teki gersi 1 Johanes 5:18.) Foe eksempel, wi no moesoe wani si bisnis gwenti, di no leti na ai. Ini a ten disi den ben poti foeroe Jehovah Kotoigi na ondro druk foe doe sani di no leti gi a basi foe den, ma den ben weigri foe doe dati. Kresten ben de klariklari srefi foe lasi a wroko foe den na presi foe doe wan sani di de kontrari a konsensi foe den di den oefen nanga jepi foe bijbel. Boiti dati, wi wani foe sori toe taki wi no wani si kroektoedoe na ai, foe di wi no e pasa den wet foe a verkeer èn foe di wi no e bidrigi te wi moesoe pai belasting noso edemoni di moesoe pai te wi e tjari sani kon na ini a kondre. — Tori foe den Apostel 23:1; Hebrewsma 13:18.
No wani si seks dotifasi na ai
15. Sortoe toemoesi boen marki a tranga firi foe seks, nanga san Gado meki libisma, abi?
15 Leki kresten, wi no moesoe wani si spesroetoe ala dotifasi, di abi foe doe nanga seks afersi, na ai. Foe di Gado ben meki a libisma famiri nanga tranga firi foe abi seks, a ben doe dati foe toe toemoesi boen marki. A meki a de seiker taki a heri libisma ras no ben sa dede gowe, èn a ben sorgoe toe gi wan toemoesi lobi seti foe sma kisi kolokoe. Srefi sma di pôti, di no man leisi, noso di no abi sani na a wan noso tra fasi, kan feni foeroe kolokoe ini a demakandra foe a trowlibi. Ma Jehovah ben poti skotoe di sma no ben moesoe pasa foe kan njanboen foe a demakandra disi. Sma moesoe lespeki den skotoe disi di Gado poti. — Genesis 2:24; Hebrewsma 13:4.
16. San moesoe de a fasi fa wi e handri nanga doti seks ontspanning nanga doe?
16 Efoe wi no wani si kroektoedoe na ai, dan na wan serjoesoe fasi wi moesoe tan farawe foe ala doti seks doe èn foe ontspanning di abi hoeroedoe na ini. Wi sa tan farawe foe dati ede foe ala boekoe, tijdschrift nanga koranti di sma e degedege foe den na moreelsei. So srefi, efoe wi no wani si kroektoedoe na ai, wi no sa loekoe no wan doti pristeri di ai kan si efoe na telefisi a de foe si noso na ini kino, noso na a podium foe a komediprei-oso. Efoe wi e feni taki wan programa abi hoeroedoe na ini, dan sani moesoe boeweigi wi foe kiri a telefisi wantewante noso wi moesoe abi na deki-ati foe gowe libi a komediprei-oso. Na a srefi fasi, te wi no wani si kroektoedoe na ai, dan a sa kibri wi gi ala pokoe di den wortoe na ini noso na esi-esifasi fa a pokoe e naki, e wiki lobifiri. Wi no sa soekoe sabi foe hoeroedoe afersi, ma wi sa de ’leki beibi ini a tori foe takroedoe, ma tokoe bigisma ini a krakti foe wi denki. — 1 Korentesma 14:20.
17. Sortoe rai Kolosesma 3:5 ben gi di kan jepi wi foe tan krin na moreelfasi?
17 Wi e kisi a rai di e fiti heri boen: „Kiri foe dati ede, den memre foe joe skin di de na grontapoe ini a tori foe hoeroedoe, dotifasi, sekslostoe” (Kolosesma 3:5). Degedege no de, taki krakti markitiki de fanowdoe foe wi sei efoe wi sa abi na fasti bosroiti foe tan krin na moreel fasi. Ini a tori foe a Griki wortoe di den e vertaal nanga „kiri” na Kolosesma 3:5, The Expositor’s Bible Commentary e taki: „A e kari kon na prakseri taki wi no moesoe dwengi soso noso basi fowtoe doe nanga fasi foe doe. Wi moesoe figi den poeroe, poeroe na owroe fasi foe libi krinkrin. ’Kiri en krinkrin’ e tjari kande a krakti foe en kon na fesi. . . . San a werkwortoe èn a krakti foe a werkwortoe vorm wani taki e sori tapoe wan krakti doe, di e tjari pen kon, leki wan bakapisi foe wan eigi fasti bosroiti.” Wi moesoe tan, foe dati ede, farawe foe seksboekoe nanga seks kino, neleki disi na wan kefarlek siki, di e siki sma èn e kiri den, bika dati na san a de na moreel fasi èn na jeje fasi. Krestes ben sori wan srefi sortoe denki di a ben taki, dati wi moesoe poeroe wan anoe, wan foetoe noso srefi wan ai efoe a e meki wi naki foetoe fadon. — Markus 9:43-48.
No wani si falsi relisi na ai èn a fadon di sma e fadon komoto na bribi
18. Fa wi kan sori taki wi no wani si relisi kroektoedoe na ai?
18 Dan, so srefi, neleki fa Jesus ben sori taki a no ben wani si kroektoedoe na ai foe di a ben poeroe a bere foe den hoigri kerki fesiman kon na doro, na so toe Jehovah Kotoigi e sori taki den no wani si ala hoigri kerki kroektoedoe na ai. Fa? Foe di den e prati bijbel boekoe di e poeroe kon na krin san Babilon a Bigiwan de troetroe, wan relisi hoeroe. Efoe wi no wani si kroektoe kerki hoigrifasi na ai troetroe, dan sondro degedege wi sa poeroe a bere foe Babilon a Bigiwan, a grontapoe tirimakti foe falsi relisi, kon na doro. Wi sa doe disi gi a boen foe opregti sma di a ben breni èn di a ben hori na ini katibo na jeje fasi. Na a marki taki troetroe wi no wani si a kroektoedoe foe Babilon a Bigiwan na ai, na a marki dati wi sa de fajafaja foe abi wan prati na ala den pisi foe a Kownoekondre diniwroko. — Mateus 15:1-3, 7-9; Titus 2:13, 14; Openbaring 18:1-5.
19. Fa wi moesoe si a fadon di sma e fadon komoto na bribi, èn foe san ede?
19 A froeplekti foe no wani si kroektoedoe na ai de toe gi ala wroko foe sma di fadon komoto na bribi. A fasi fa wi de nanga sma di fadon komoto na bribi moesoe de leki di foe David di ben meki bekènti: „A no de so taki mi no wani si den sma na ai di no wani si joe na ai srefisrefi, O Jehovah, èn mi no e foega foe den di opo densrefi kontrari joe? Foe troe, mi no man si den na ai kwetikweti. Gi mi den kon tron troetroe feanti” (Psalm 139:21, 22). Disiten sma di fadon komoto na bribi, ben teki a sei foe „a sma foe kroektoedoe”, den kerki fesiman foe a krestenhèit (2 Tesalonikasma 2:3). Leki loyaal Kotoigi foe Jehovah, foe dati ede wi no e doe asrefi leki den. Foe di wi de onvolmaakti, dan makriki wi kan kroetoe den brada foe wi ini wi ati. Leki aparti sma, den wan foe „a getrow èn koni srafoe” na onvolmaakti libisma (Mateus 24:45-47). Ma a groepoe disi de getrow èn koni. Sma di fadon komoto na bribi e meki wan fowtoe gebroiki foe fowtoe noso san gersi fowtoe di brada, di e teki fesi ben meki, foe kan meki den eigi belang go a fesi. A kibri di wi kan kibri wisrefi e didon na a tan di wi e tan farawe foe bariwroko di abi foe doe nanga a fadon komoto na bribi, neleki a de, vergif, san foe taki en leti, a de toe. — Romesma 16:17, 18.
20, 21. Fa wi kan kari den reide, wan baka trawan sjatoe, foe wani si kroektoedoe na ai?
20 Wi ben si taki grontapoe foeroe nanga kroektoedoe, di de a srefi leki sondoe. A no nofo taki wi lobi regtfardikifasi; wi no moesoe wani si kroektoedoe na ai toe. Sonwan foe den sma di den ben sluit uit foe a kresten gemeente, ben denki kande taki den ben lobi regtfardikifasi, ma a si di den no ben wani si kroektoedoe na ai no ben nofo. Wi si toe foe san ede wi no moesoe wani si kroektoedoe na ai. Wi no kan abi wan boen konsensi èn lespeki gi wisrefi efoe a no de so taki wi no wani si kroektoedoe na ai. Moro fara a de so, taki kroektoedoe wani taki, dati wi no de loyaal na Jehovah Gado. Èn kroektoedoe e meki wi koti toemoesi bita froktoe — pina, pori, nanga dede.
21 Wi ben si toe fa wi e sori taki wi no wani si kroektoedoe na ai. Wi e doe disi foe di kwetikweti wi no abi noti foe doe nanga wan fasi foe no de eerlijk, seks hoeroedoe, noso a fadon di sma e fadon komoto na bribi. Foe di wi wani foe abi wan prati na ini a regtfardiki foe Jehovah en nen èn e angri foe meki en ati prisiri, wi no moesoe lobi regtfardikifasi wawan, èn tan wroko ini a dienst foe en, ma wi no moesoe wani si kroektoedoe na ai toe, neleki fa wi Tiriman nanga Sma di e gi komando, Jesus Krestes ben doe.
Fa joe ben sa piki?
◻ Fa den Boekoe e gebroiki den wortoe „no wani si na ai”?
◻ San na wan toe boen reide gi wi foe no wani si kroektoedoe na ai?
◻ Sortoe toemoesi boen eksempel wi abi foe den wan di no wani si kroektoedoe na ai?
◻ Fa wi kan sori a wani di wi no wani si kroektoedoe na ai?
[Prenki na tapoe bladzijde 23]
Jesus ben krin a tempel, foe di a no ben wani si kroektoedoe na ai
[Prenki na tapoe bladzijde 24]
Efoe wi no wani si kroektoedoe na ai, dan wi sa tan farawe foe seks ontspanning di abi hoeroedoe na ini