Aksi foe leisiman

Wi moesoe froestan foe Job 1:8 taki ini a pisiten di Job ben libi, dati en ben de a wan enkri libisma di ben de getrow na Jehovah?

Nôno. A prakseri dati no e feni en reti na Job 1:8, di e taki:

„Ne Jehovah ben taigi Satan: ’Joe ben poti joe ati tapoe mi foetoeboi Job, dati no wan sma de na grontapoe leki en, wan man sondro flaka èn opregti, di e frede Gado èn e tan farawe foe ogri?’” Gado ben taki foe a tori na a srefi fasi, di skrifi na Job 2:3, di a ben aksi Satan: „Joe ben poti joe ati tapoe mi foetoeboi Job, taki no wan sma de na grontapoe leki en, wan man sondro flaka èn opregti, di e frede Gado èn e tan farawe foe ogri?”

A boekoe Job srefi e sori taki Job no ben de na wan enkri libisma di ben e libi, di Gado ben teki leki getrow. Foe bigin nanga kapitri 32 wi e leisi foe Elihu. Ala di a ben de wan moro jongoe man, Elihu ben poti a fowtoefasi fa Job ben denki, reti èn a ben prèise a troe Gado. — Job 32:6–33:6, 31-33; 35:1–36:2.

So boen, den wortoe foe Gado, dati ’no wan sma de na grontapoe leki Job’, moesoe wani taki, dati leki wan man foe opregtifasi Job ben de wan toemoesi aparti sma. Kande Job ben libi ini a pisiten di de na mindri a dede foe Josef na Egipti èn a bigin foe a dienst foe Moses leki profeiti foe Gado. Ini a pisiten dati wan bigi nomroe Israèlsma ben libi na Egipti. Reide no de foe denki taki no wan foe den ben de getrow èn taki Gado no ben feni den boen; sondro degedege foeroe sma ben de di ben froetrow ini Jehovah (Exodus 2:1-10; Hebrewsma 11:23). Tokoe no wan foe den ben abi wan prenspari ròl, so leki Josef ben abi dati, èn den anbegiman dati no ben de toemoesi aparti toe ini a tori foe troe anbegi, so leki Moses ben sa de di a ben tjari a nâsi Israèl komoto na Egipti.

Ma na wan tra presi wan man ben libi di ben abi wan toemoesi aparti soifri retifasi. „Wan ten a ben de so taki joe ben abi wan man na a kondre Us di ben nen Job; èn a man dati ben sori foe de sondro flaka èn opregti, èn a ben frede Gado èn a ben tan farawe foe ogri.” — Job 1:1.

So boen Jehovah ben kan taki foe Job leki wan man di sma ai e fadon wantron na en tapoe èn a de wan toemoesi aparti eksempel foe bribi èn a gi foe ensrefi. Na a srefi fasi, di den bijbel skrifiman Esekièl nanga Jakobus ben loekoe sani baka, den ben teki Job poeroe na mindri trawan leki wan model foe regtfardikifasi èn horidoro. — Esekièl 14:14; Jakobus 5:11.