Jehovah no e froedini foe kisi pori nen
„Neleki fa wan papa e sori sari-ati gi en manpikin, na so Jehovah ben sori sari-ati gi den wan di e frede en. Bikasi ensrefi sabi heri boen fa den ben meki wi, e hori na prakseri taki wi na doti.” — PSALM 103:13, 14.
1, 2. Soema Abraham ben de, èn fa a ben doe kon taki en bradapikin Lot ben go libi na ini a ogri foto Sodom?
JEHOVAH no de frantiwortoe foe den problema di wi e kisi leki wan bakapisi foe den fowtoe di wi e meki. Nanga disi ini prakseri, loekoe san ben pasa so wan 3900 jari na fesi. Sani ben waka boen srefisrefi gi a mati foe Gado, Abraham (Abram) nanga en bradapikin Lot (Jakobus 2:23). Te joe loekoe en boen, dan den goedoe èn den meti foe den ben kon de so foeroe, taki ’a pisi gron no ben gi den pasi foe tan libi na makandra’. Boiti dati, trobi ben kon a mindri den herder foe den toe man (Genesis 13:5-7). San den ben kan doe ini na afersi disi?
2 Foe koti a trobi, Abraham ben gi leki idea foe den ben go libi aparti, èn a ben meki Lot teki fosi a pisi di a ben wani. Ala di Abraham ben de a moro owroewan èn a ben sa de wan joisti sani gi en bradapikin Lot foe meki Abraham teki a moro betre kontren, tokoe Lot ben teki a moro boen kontren — a heri distrikt foe a lagi kontren foe Jordanliba di ben abi foeroe watra. Fa sani ben sori na dorosei, ben bedrigi sma, bikasi krosibei foe drape den foto Sodom nanga Gomora ben de, di ben fadon gowe dipi na hoeroedoe sei. Te foe kaba, Lot nanga en osofamiri ben froisi go libi ini Sodom, èn disi ben poti den ini kefar na jejefasi. Moro fara, den ben tjari den gowe leki strafoeman, na a ten di kownoe Kedorlaomer nanga den patna foe en ben wini a tiriman foe Sodom. Abraham nanga den man foe en ben fri den, ma Lot nanga en osofamiri ben drai go baka na Sodom. — Genesis 13:8-13; 14:4-16.
3, 4. San ben pasa nanga Lot nanga sma foe en osofamiri, di Gado ben pori Sodom nanga Gomora?
3 Foe a pori seks libi èn na go na baka na moreelfasi foe Sodom nanga Gomora, meki Jehovah ben bosroiti foe wai den foto dati poeroe. Na wan sari-ati fasi Jehovah ben seni toe engel di ben tjari Lot, en wefi èn den toe oemapikin foe den, komoto na ini Sodom. Den no ben mag drai loekoe na baka, ma Lot wefi ben doe so, kande foe di a ben angri foe den sani na skinfasi di a ben libi na baka. Na a momenti dati, a ben tron wan sowtoe postoe. — Genesis 19:1-26.
4 Fa Lot nanga den oemapikin foe en ben teki foeroe lasi! Den oemapikin ben moesoe libi den man di den ben o trow nanga den, na baka. Lot ben de now sondro en wefi nanga den goedoe foe en na skinfasi. Te joe loekoe en boen, a ben kon pôti te foe kaba, so taki a ben go libi ini wan bergi-olo nanga den oemapikin foe en (Genesis 19:30-38). San ben sori so boen na en, ben tron joisti a tra sei foe a tori. Ala di a ben de krin taki, a ben meki wan toe serjoesoe fowtoe, tokoe bakaten den ben kari en „regtfardiki Lot” (2 Petrus 2:7, 8). Èn foe troe, Jehovah Gado no ben froedini pori nen foe den fowtoe di Lot ben meki.
„Fowtoe — Soema kan sabi den?”
5. Fa David ben denki foe fowtoe nanga prefoeroefasi?
5 Foe di wi de onvolmaakti èn abi sondoe, meki wi alamala e meki fowtoe (Romesma 5:12; Jakobus 3:2). Neleki Lot, san wi e si na dorosei kan kori wi èn kan meki wi meki fowtoe te wi e kroetoe sani. So boen, a psalm singiman David ben e begi tranga: „Fowtoe — soema kan sabi den? Froeklari taki mi de sondro fowtoe na kibri sondoe. Hori joe dienstknekti foe no doe prefoeroe sani; no meki den basi mi. Na a kefal dati mi sa de boen dorodoro èn mi sa de sondro fowtoe na foeroe pasa foe a wet” (Psalm 19:12, 13). David ben sabi taki a ben kan doe sondoe di a no ben sabi srefi taki a ben doe den. Foe dati ede, a ben aksi foe kisi pardon foe den pasa di a ben pasa a wet, san ben kibri srefi gi en. Te a ben meki wan bigi fowtoe foe di en onvolmaakti skin ben troesoe en foe teki wan kroektoe pasi, dan a ben angri sote taki Jehovah ben jepi en. A ben wani taki Gado ben moesoe hori en foe no doe prefoeroe sani. David no ben wani taki prefoeroe fasi ben tron a moro prenspari eigifasi foe en. Na presi foe dati, a ben wani de boen dorodoro ini na anbegi foe Jehovah Gado.
6. Sortoe trowstoe wi kan kisi foe Psalm 103:10-14?
6 Leki disiten dienstknekti foe Jehovah di gi densrefi abra na en, wi toe de onvolmaakti èn dati ede e meki fowtoe. Neleki Lot foe eksempel, na so a kan, taki wi teki wan fowtoe bosroiti ini a tori foe a presi pe wi o go libi. Kande wi e meki wan okasi pasa gowe foe meki wi santa dienst gi Gado kon moro bigi. Ala di Jehovah e si den fowtoe dati, tokoe a sabi denwan di taki wi abi wan ati di lobi regtfardikifasi. Srefi efoe wi sondoe hebi, ma wi abi berow, dan Jehovah seti sani foe gi pardon nanga jepi èn e tan si oenoe leki sma di lobi Gado. „A no doe srefi nanga wi ini akroederi nanga wi sondoe; èn a no tjari kon abra wi san wi froedini ini akroederi nanga den ogridoe foe wi”, David ben froeklari. „Bikasi so leki fa den hemel moro hei leki grontapoe, na so en lobi boen-ati de moro hei gi den wan di e frede en. So fara leki fa son-opo de foe son-dongo, na so farawe a poti den fowtoe foe wi gowe. Neleki fa wan papa e sori sari-ati gi en manpikin, na so Jehovah ben sori sari-ati gi denwan di e frede en. Bikasi ensrefi sabi heri boen fa den ben meki wi, e hori na prakseri taki wi na doti” (Psalm 103:10-14). Wi sari-ati hemel Tata, kan meki a kan dati wi kon boen baka foe den fowtoe foe wi noso gi wi wan tra okasi foe meki wi santa dienst gi en kon moro bigi, foe a kisi prèise.
A fowtoe foe gi Gado pori nen
7. Foe san ede wi e ondrofeni ogri?
7 Te sani no e waka boen, dan a de wan libisma gwenti foe gi wan sma noso wan sani na pori nen foe san pasa. Son sma e gi Gado pori nen srefi. Ma Jehovah no e tjari den sortoe problema disi kon na sma tapoe. A e doe boen sani, no sani di e doe sma ogri. We, „a e meki en son opo kon tapoe den ogri sma nanga den boen sma èn a e meki alen kon tapoe den regtfardiki sma nanga den onregtfardiki sma”! (Mateus 5:45). Wan foe den moro prenspari reide foe san ede wi e ondrofeni ogri na foe di wi e libi ini wan grontapoe di e wroko nanga gridi gronprakseri èn di e didon ini a makti foe Satan Didibri. — 1 Johanes 5:19.
8. San Adam ben doe, di sani no ben waka boen gi en?
8 Foe gi Jehovah pori-nen foe den problema di den fowtoe di wi e meki e tjari kon na wi tapoe, na wan don èn kefarlek sani. Efoe wi e doe dati, dan a kan meki srefi, taki wi lasi wi eigi libi. A fosi man, Adam, ben moesoe gi Gado tangi foe ala den boen sani di a ben kisi. Ija, Adam ben moesoe de tangi na Jehovah srefisrefi foe a libi srefi èn foe den blesi di a ben njanboen foe den ini wan tanpresi di ben de leki wan moi djari, a djari foe Eden (Genesis 2:7-9). San Adam ben doe di sani no ben waka boen foe di a ben trangajesi Jehovah èn ben njan foe a froktoe di a no ben mag njan foe en? Adam ben kragi na Jehovah: „Na oema di joe ben gi foe de nanga mi, na en ben gi mi foe a froktoe foe a bon èn foe dati ede mi njan” (Genesis 2:15-17; 3:1-12). Foe troe, wi no moesoe gi Jehovah pori nen, so leki fa Adam ben doe.
9. (a) Efoe wi e ondrofeni problema foe di wi ben doe dondon sani, dan pe wi kan feni trowstoe? (b) So leki fa Odo 19:3 e taki, dan san son sma e doe te den tjari moeilekhèit kon a den tapoe?
9 Efoe wi e ondrofeni problema foe di wi e doe dondon sani, dan wi kan kisi trowstoe foe a sabi taki Jehovah e froestan den swaki sei foe wi moro betre leki wisrefi e froestan den, èn a sa fri wi foe na moeilek situwâsi di wi de na ini efoe wi e gi wisrefi krinkrin ini na anbegi foe en wawan. Wi moesoe warderi na jepi di wi e kisi foe Gado, noiti gi Gado pori nen foe den moeilek situwâsi nanga moeilekhèit di wi e tjari kon na wisrefi tapoe. Ini a tori disi wan koni odo e taki: „Na a donfasi foe wan grontapoe sma, di e broeja en pasi èn so en ati e kon bron nanga Jehovah srefi” (Odo 19:3). Wan tra fasi foe taki en, de so: „Son sma e broko densrefi nanga den eigi dondon sani di den e doe èn te foe kaba den e gi MASRA pori nen” (Today’s English Version). Ete wan tra vertaling e taki: „A donfasi foe wan man e broeja den afersi foe en èn a e go na hei teige Jehovah”. — Byington.
10. Fa a donfasi foe Adam ben tjari ’broeja kon na tapoe a pasi foe en’?
10 Ini akroederi nanga a gronprakseri foe na Odo disi, dan Adam ben handri na wan gridifasi, èn a don denki foe en ’ben broeja en pasi’. En ati ben drai komoto na Jehovah Gado, èn a ben bigin foe waka en eigi gridi srefidensi pasi. We, Adam ben tron so wan sma di no ben abi tangi srefisrefi, taki a ben gi na Mekiman foe en pori nen èn nanga dati a ben meki ensrefi tron wan feanti foe a Moro Heiwan! A sondoe foe Adam ben pori en eigi pasi nanga di foe en osofamiri. Wan boen warskow wi e kisi ini disi! Den sma di abi na gwenti foe gi Jehovah pori nen foe situwâsi di den no winsi foe abi, ben sa kan aksi densrefi: Mi e gi Gado tangi foe den boen sani di mi e njanboen foe den? Mi de tangi taki mi abi libi leki wan foe den mekisani foe en? A no ben kan de so, taki den fowtoe di misrefi meki ben tjari problema kon na mi tapoe? Mi e froedini foe kisi a boen-ati foe Jehovah noso en jepi, foe di mi e waka baka a tiri foe en, so leki fa a skrifi na ini en Wortoe, Bijbel, di skrifi nanga jepi foe en santa jeje?
Wan kefar, srefi gi den dienstknekti foe Gado
11. Ini a tori foe Gado, ini san den fosi jarihondro djoe kerki fesiman ben fowtoe?
11 Den djoe kerki fesiman foe a fosi jarihondro G.T., ben taki dati den ben e dini Gado, ma den ben poti en wortoe foe waarheid na wan sei èn ben bow tapoe den eigi fasi fa den ben froestan sani (Mateus 15:8, 9). Foe di Jesus Krestes ben tjari den kroektoe fasi foe denki kon a krin, meki den ben kiri en. Bakaten den ben sori taki den ati ben bron srefisrefi nanga den disipel foe en (Tori foe den Apostel 7:54-60). A pasi foe den man dati ben broeja sote, taki den ati ben kon bron srefi nanga Jehovah. — Teki gersi Tori foe den Apostel 5:34, 38, 39.
12. Sortoe eksempel e sori taki srefi son sma di de nanga a kresten gemeente, e proeberi foe gi Gado pori nen foe den problema foe den?
12 Srefi son sma ini a kresten gemeente kweki kefarlek fasi foe denki, ala di den e proeberi foe taki dati Gado de frantiwortoe foe den moeilekhèit di den ben kisi. Foe eksempel, owroeman ini wan seiker gemeente, ben feni en fanowdoe foe gi wan jongoe oema di ben trow, switi ma krakti bijbel rai foe no e abi demakandra nanga wan man foe grontapoe. Na wan foe den takimakandra, a ben gi Gado pori nen foe di a no e jepi en foe kakafoetoe gi a tesi di en doronomo demakandra nanga a man ben tjari kon na en tapoe. Te joe loekoe en boen, dan a ben taki dati en ati ben bron nanga Gado! Taki-go-taki-kon nanga jepi foe bijbel èn den moeiti di den brada ben doe ibri tron baka foe jepi en, ben de foe soso, èn wan hoeroedoe libifasi bakaten ben meki taki den ben sluit en uit foe na kresten gemeente.
13. Foe san ede wi moesoe tan farawe foe wan jejefasi foe lobi kragi?
13 Wan jeje di lobi foe kragi, kan meki taki wan sma e gi Jehovah pori nen. ”Gadolowsoe sma” di ben boro kon ini na fosi jarihondro gemeente, ben abi wan takroe jeje foe a sortoe dati, èn dati ben go makandra nanga tra sortoe foe pori denki na jeje fasi. So leki fa a disipel Judas ben taki, dan den man disi ben „kenki a no-froedini boen-ati foe wi Gado kon tron wan pardon foe loesoe fasi foe libi èn den e sori taki den no de getrow na wi Eiginari èn Masra, Jesus Krestes”. Judas ben taki toe: „Den sma disi na sma di e knoroe èn e kragi foe den libi” (Judas 3, 4, 16). Loyaal dienstknekti foe Jehovah sa doe koni foe begi, taki den abi wan jeje di e warderi sani, no wan fasi foe e kragi nomo di te foe kaba ben sa kan meki den ati kon bita te leki den doro a marki taki den lasi bribi ini Gado èn tjari a matifasi foe den nanga en kon ini kefar.
14. Fa wan sma kan doe, efoe wan kompe kresten ben afrontoe en, ma foe san ede disi no ben sa de a joisti fasi foe doe?
14 Kande joe e denki taki disi no sa man pasa nanga joe. Tokoe, sani di no e waka boen leki wan bakapisi foe den fowtoe foe wi noso di foe tra sma, kan meki te foe kaba taki wi gi Gado pori nen. Foe eksempel, wan sma ben kan firi taki san wan kompe bribiman taki noso doe ben afrontoe en. A sma di den afrontoe — kande wan sma di dini Jehovah loyaal foeroe jari langa — kande ben sa kan taki: ’Efoe a sma dati de ini a gemeente, mi no sa fisiti den konmakandra.’ Wan sma ben sa kan kon de so broeja taki a e taki ini en ati: ’Efoe den sortoe sani disi e go doro, dan mi no wani de wan pisi foe a gemeente.’ Ma wan krestensma moesoe abi na denki dati? Efoe wan tra onvolmaakti sma afrontoe joe, foe san ede joe ati e bron èn joe e mandi tapoe wan heri gemeente foe sma di Gado e feni boen èn di e dini en na wan loyaal fasi? Foe san ede wan sma di gi ensrefi abra na Jehovah moesoe stòp foe doe a wani foe Gado èn na so fasi kisi atibron nanga Gado? O koni a de foe meki wan sma noso wantoe situwâsi pori a boen matifasi foe wan sma nanga Jehovah? A no de foe taki, dati a ben sa de wan don sani èn wan sondoe sani foe stòp anbegi Jehovah Gado foe sortoe reide toe. — Jakobus 4:17.
15, 16. Sortoe fowtoe Diotrefes ben meki, ma fa Gajus ben tjari ensrefi?
15 Kon wi taki, dati joe ben de ini na srefi gemeente leki a lobi kresten Gajus. A ben e „doe wan getrow wroko” foe di a ben sori taki a ben lobi foe teki kompe anbegiman na oso — èn so srefi freimde sma toe! Ma, na so leki fa a ben sori, ini a srefi gemeente dati, a man Diotrefes ben de di ben abi heimemre. A no ben wani teki noti foe Johanes nanga respeki, wan foe den apostel foe Jesus Krestes. Te joe loekoe en boen, dan Diotrefes ben taki nanga ogri wortoe foe Johanes. Na apostel ben taki: „Èn no tevrede nanga dati ete, dan [Diotrefes] ensrefi no e teki den brada nanga respeki, èn den sma di wani teki den a e proeberi foe tapoe den èn foe trowe den dorosei foe a gemeente. — 3 Johanes 1, 5-10.
16 Te Johanes ben sa kon na a gemeente, dan a ben abi na prakseri foe memre den sani di Diotrefes ben doe. Ini a pisi ten dati, fa Gajus nanga tra kresten ini a gemeente dati, di ben lobi foe teki sma na oso, ben doe? No wan sani ini bijbel e sori, taki wan foe den ben taki: ’So langa Diotrefes de ini a gemeente, dan mi no wani de wan pisi foe en. Oenoe no o si mi na den konmakandra.’ Sondro degedege, Gajus nanga trawan di ben de leki en, ben tan tanapoe kànkan. Den no ben meki noti tapoe den foe doe a wani foe Gado èn a de seiker taki den no ben atibron nanga Jehovah. Nôno, foe troe, den no ben broko kindi gi den koni triki foe Satan Didibri, di ben sa prisiri efoe den no ben tan getrow na Jehovah èn ben gi Gado pori nen. — Efeisesma 6:10-18.
No atibron noiti nanga Jehovah!
17. Fa wi moesoe doe efoe wan sma noso wan situwâsi e afrontoe wi noso no e plisi wi?
17 Srefi efoe wan sma noso wan situwâsi ini wan gemeente no e plisi wan dienstknekti foe Gado noso e afrontoe en, dan a wan di e naki foetoe ben sa broeja troetroe en eigi pasi efoe a ben tapoe foe abi demakandra nanga Jehovah pipel. A sma dati no ben sa gebroiki a koni di a abi foe si sani krin na wan joisti fasi (Hebrewsma 5:14). So boen, teki na fasti bosroiti foe waka miti ala problema leki wan sma di e kibri en soifri retifasi. Tan de loyaal na Jehovah Gado, Jesus Krestes èn na kresten gemeente (Hebrewsma 10:24, 25). A waarheid, di e tjari go na têgo libi, no de foe feni a no wan tra presi.
18. Ala di a no alaten wi e froestan na fasi fa Gado e doe sani, foe san wi kan de seiker foe a sei foe Jehovah Gado?
18 Hori na prakseri toe, taki Jehovah noiti e tesi sma nanga ogri sani (Jakobus 1:13). Gado, di de troetroe ini persoon lobi, e doe boen, spesroetoe gi den wan di lobi en (1 Johanes 4:8). Ala di, a no alaten, wi e froestan den fasi fa Gado e handri, tokoe wi kan abi na overtoigi taki Jehovah Gado noiti sa misi foe doe san na a moro boen sani gi en dienstknekti. So leki fa Petrus ben taki: „Saka joesrefi, foe dati ede, ondro na makti anoe foe Gado, so taki a kan hei joe te a de so fara; ala di joe e trowe ala joe broko-ede na en tapoe, bikasi a e sorgoe gi joe” (1 Petrus 5:6, 7). Ija, Jehovah e sorgoe troetroe gi en pipel. — Psalm 94:14.
19, 20. Fa wi moesoe handri, srefi efoe den problema foe wi e gi wi brokoskin sontron?
19 Foe dati ede, no meki wan sani noso wan sma meki joe naki foetoe. Neleki fa a psalm singiman ben taki en so moi: „Vrede pasa marki de foe den di lobi [Jehovah Gado] wet, èn gi den, nowan ston foe naki foetoe no de” (Psalm 119:165). Wi alamala e ondrofeni problema, èn disi kan meki wi kon de nanga brokoskin pikinso èn lasi-ati sontron. Ma, no meki bitafasi noiti gro ini joe ati, spesroetoe teige Jehovah (Odo 4:23). Nanga jepi foe Jehovah èn tapoe gron foe bijbel, doe wan sani nanga den problema di joe kan loesoe èn froedrage den wan di e tan go doro. — Mateus 18:15-17; Efeisesma 4:26, 27.
20 Noiti no meki den firi foe joe tjari joe go so fara, taki joe doe dondon sani èn na so fasi e meki joe pasi kon broeja. Taki èn handri na wan fasi di sa prisiri Gado ati (Odo 27:11). Kari Jehovah ini faja begi, ala di joe sabi taki a e broko ede troetroe nanga joe leki wan foe en dienstknekti èn taki a sa gi joe na froestan di de fanowdoe foe tan nanga en pipel tapoe na pasi foe libi (Odo 3:5, 6). Ma, boiti dati, no atibron nanga Jehovah. Te sani no e waka boen, tan hori na prakseri taki Jehovah no froedini foe kisi pori nen.
Fa joe ben sa piki?
◻ Sortoe fowtoe Lot ben meki, ma fa Gado ben si en?
◻ Fa David ben denki foe fowtoe nanga prefoeroefasi?
◻ Te sani no e go boen, foe san ede wi no moesoe gi Gado pori nen?
◻ San sa jepi wi foe wi no atibron nanga Jehovah?
[Prenki na tapoe bladzijde 24]
Di a ben prati nanga Abraham, Lot no ben teki wan boen bosroiti ini na afersi foe a presi pe a ben go libi