Sreka gi wan fri di e tyari wi go na ini wan nyun grontapu
„Prakseri na wefi fu Lot.” — LUKAS 17:32.
1. Sortu historiya eksenpre fu na fri di Gado e gi e tyari kon na fesi na ini na studi fu wi fu tide, èn fa disi kan de fu na bun fu wi?
BAKA DI na apostru Petrus ben fruteri fu na tumusi moy fri di Yehovah ben tyari kon gi Noa nanga en osofamiri, dan a e kari ete wan historiya eksenpre. A ben poti prakseri na a tan na libi fu na regtfardiki Lot di Sodom nanga Gomora ben bron tron asisi, so leki wi e leysi na ini 2 Petrus 2:6-8. Den finifini tori tan na ini buku fu na bun fu wi (Rome sma 15:4) Efu wi e teki na ati san ben psa drape ini na tori fu na fri dati, dan dati kan yepi wi fu poti unu ini lin nanga a tan a libi èn go na ini Gado nyun grontapu.
Fa wi e du tapu na libifasi fu na grontapu
2. Sortu waka nanga libi na ini Sodom nanga Gomoro ben tyari a pori fu den kon fu na sey fu Gado?
2 Fu san-ede den ben pori den foto dati nanga den sma di ben libi na ini? Na apostru Petrus e taki taki den ben gi den srefi abra „na lusufasi fu libi” (2 Petrus 2:7). So leki na kobroyki fu na Griki wortu di poti abra nanga den wortu dati e sori, dan den sma fu Sodom nanga Gomora ben gi den srefi abra na ogri tapu wan fasi di ben kotoygi fu wan mankeri fu respeki sondro fu abi syen èn srefi sondro fu abi respeki, gi wet nanga makti. Yudas vers 7 e taki taki den ’ben du hurudu psa marki èn ben waka na baka skin gi tegennatuurlijk kobroyki’. Na bigi sondufasi fu a waka nanga libi fu den ben kon a krin di den man fu Sodom, „fu boy te go miti grani man, na heri pipel ben kon makandra leki wán man”, èn ben lontu na oso fu Lot èn ben aksi taki a ben musu gi den fisitiman abra na den man fu Sodom so taki den ben kan kowru den takru lostu fu den. Èn den ben bari takru wortu gi Lot fu di a ben kakafutu gi den pori lostu fu den. — Genesis 13:13; 19:4, 5, 9.
3. (a) Fa Lot nanga en osofamiri ben kon libi na ini so wan kontren leki Sodom? (b) Fa Lot ben du tapu na lusu fasi fu libi fu den sma fu Sodom?
3 Biginbigin Lot ben froysi go na a kontren krosibey fu Sodom fu di na okasi fu go a fesi na skinfasi ben de na ini na kontren dati. Bakaten a ben go libi na ini a foto srefi (Genesis 13:8-12; 14:12; 19:1). Ma a no ben agri nanga den fisti libi fu den man fu na foto, èn den man dati no ben si en leki wan fu den, kande fu di Lot nanga en osofamiri no ben abi prati na a sociaal libi fu den. So leki 2 Petrus 2:7, 8 e taki, ’dan na lusufasi fu libi fu den sma di ben kakafutu gi na wet ben kwinsi en hebi — bika na regtfardiki man dati fu san a ben si èn ben yere di a ben libi na den mindri, ben pina en regtfardiki sili dey fu dey fu den kruktudu fu den ede.’ Den omstandigheid dati ben de wan hebi tesi gi Lot fu di leki wan regtfardiki man a ben tegu gi so wan sortu libi.
4. (a) Na sortu fasi den toestand now de netso leki di fu na owru Sodom? (b) Fa wi e du now tapu den disiten pori omstandigheid efu wi de leki na regtfardiki Lot?
4 Na ini wi ten tu na moreel peil fu na libisma maatschappij kon de bun lagi. Na ini furu kondre moro nanga moro sma e du seks bifo den trow ofu dorosey fu na trowlibi. Srefi furu yongu sma na ini skoro go bun dipi kba ini na libifasi disi, èn den e spotu den sma di no e moksi den srefi na den. Howmow ofu tantaman sondro fu syen e taki na publiki taki den de dati èn den e hori optocht ini den strati fu bigi foto fu aksi taki sma erken den. Den kerkifesiman tu e teki prati ini disi. Officieel yu no abi furu kerki di e poti howmow nanga huruman leki preykiman. Ma te yu luku en bun, so leki nyunsu furutron sori, dan a no de muylek srefisrefi fu feni howmow, èn sutaman a mindri den kerkifesiman. Den froysi srefi son kerki tiriman go na tra foto èn den dwengi den fu libi srefi a wroko fu den fu seks schandaal ede. Den sma di lobi regtfardikifasi , no e feni den sortu hogri du disi bun; den ’e tegu fu san ogri’ (Rome sma 12:9). A e hati den srefisrefi te na libi nanga waka fu sma di e taki taki den e dini Gado e tyari syen kon tapu en nen èn e meki sma di no abi sabi fu sani dray baka nanga tegu gi ala relisi. — Rome sma 2:24.
5. Sortu aksi fu wi e kisi piki nanga a pori di Yehovah pori Sodom nanga Gomora?
5 Yari psa yari na situwâsi e kon moro ogri. Wan kba sa kon oyti na en? Iya, seyker! San Yehovah ben du nanga na owru Sodom nanga Gomora e meki sma si krin taki na en reti ten, a sa tyari strafu kon. A sa pori den ogri sma krinkrin , ma sa fri en loyaal dienstknekti.
Suma ofu san e kon fosi na ini wi libi?
6. (a) Sortu leri di e fiti srefisrefi de na ini na tori fu den yongu man di ben o trow nanga den umapikin fu Lot? (b) Fa na fasi fu den masra di ben o trow nanga den umapikin fu Lot ben de wan tesi gi den?
6 Soso den sma di e sori trutru taki den e gi den srefi na ini na dini fu Gado, sa tan a libi. Luku na ini na tori disi san Yehovah engel ben taygi Lot bifo Sodom nanga Gomora ben kisi pori. „Yu abi wan tra sma dyaso ete? Yu umapikin masra nanga yu manpikin nanga yu umapikin nanga ala den sma fu yu na ini na foto, tyari den komoto fu na presi disi! Bika wi e pori na presi disi.” Fu dati-ede Lot ben taki nanga den yonguman di ben o trow nanga en umapikin. A ben taki doronomo nanga den taki: „Opo! Komoto fu na presi disi, bika Yehovah e pori na foto!” Na matifasi fu den nanga na osofamiri fu Lot ben gi den wan spesrutu okasi fu kisi fri, ma den srefi ben musu du wan sani. Den ben musu gi wan buweysi di ben de fu si taki den gi yesi na Yehovah. Na presi fu dati, dan Lot ben de na ini den ay „leki wan sma di ben e meki spotu” (Genesis 19:12-14). Yu kan prakseri pikinso fa Lot umapikin ben firi den srefi di den ben kon sabi san ben psa. A ben de wan tesi gi a loyaliteit fu den na fesi fu Gado.
7, 8. (a) Fa Lot ben du di den engel ben taki tranga nanga en fu teki en osofamiri lon gwe, èn fu san-ede a fasi fa a ben du no ben de wan koni wan? (b) San ben de gi Lot nanga en osofamiri na moro prenspari sani fu kisi frulusu?
7 Na tra mmanten di dey ben broko, den engel ben go taki tranga nanga Lot. Den ben taki: „Opo! Teki yu wefi èn yu tu umapikin, di de dyaso, so taki den no figi yu puru ini na sondu fu na foto!” Ma „a ben tan draydray” (Genesis 19:15, 16). Fu san-ede? San ben tapu en? A ben de afersi fu gudu di a ben abi drape na ini Sodom — den sani yoysti di ben kori en biginbigin go drape? Efu a ben hori tranga na dati, dan a ben o pori gwe makandra nanga Sodom.
8 Fu sari-ati ede meki den engel ben grabu en nanga en osofamiriman na den anu èn ben tyari den gwe esi-esi dorosey fu na foto. Na den boyti fu a foto Yehovah engel ben komanderi: „Lon gwe fu yu sili ede! No luku na baka èn no tan tanapu pî na ini na heri distrikt! Lon go na a bergi kontren, so taki den no figi yu puru!” Toku ete Lot ben e draydray. Te fu kba, baka di den ben agri taki a ben mag go na wan presi di no ben de so fara, dan en nanga en osofamiri ben lon gwe (Genesis 19:17-22). Fu ben draydray moro fara no ben kan, gi yesi ben de tumusi prenspari.
9, 10. (a) Fu san-ede a no ben de nofo taki Lot uma ben de nanga en masra fu dyaranti taki a ben tan na libi? (b) Sortu tra tesi a ben wani taki moro fara gi Lot nanga den umapikin fu en di en wefi ben dede?
9 Ma den no ben kisi fri krinkrin ete di den ben hari komoto fu Sodom. Genesis 19:23-25 e fruteri wi: „Son ben opo kon tapu na kondre di Lot ben doro na Zoar. Ne Yehovah ben meki swarfu nanga faya fu Yehovah komoto fu heymel, fadon na tapu Sodom nanga Gomora. Na so a ben bigin fu dray den foto disi fu ondro go na tapu, iya na heri distrikt èn ala sma di ben libi na ini den foto èn den prani fu na gron.” Ma pe Lot uma ben de?
10 A ben lon gwe nanga en masra. Ma a ben agri krinkrin nanga san en masra ben e du? Noti e sori na no wan fasi taki a ben feni na hurudu fu Sodom bun. Ma a lobi fu en gi Gado ben de moro tranga leki a tay di a ben tay hori na en oso nanga den gudu di a ben abi drape? (Teki gersi Lukas 17:31, 32.) Ondro druk ben kon na krin san ben de na ini en ati. A de krin taki den ben de krosibey fu Zoar, kande so fara fu go na ini na foto, di nanga trangayesi a dray luku go na baka. Èn, so leki na tori fu beybri e taki, „a ben tron wan sowtu postu” (Genesis 19:26). Now Lot nanga en umapikin ben tanapu na fesi wan tra tesi tapu a loyaliteit fu den. Na tay di Lot ben tay hori na en trowpatna di dede ofu den firi fu den umapikin gi den mma di dede ben de moro tranga leki a lobi fu den gi Yehovah, di ben tyari na ranpu disi kon? Den ben sa tan gi yesi na Gado awinsi wan sma di den ben lobi srefisrefi ben sori taki a no de loyaal na en? Nanga ala frutrow ini Yehovah den no dray luku a baka.
11. San wi ben leri dya fu na fri di Yehovah e gi?
11 Iya, Yehovah sabi fu fri sma, di e gi den srefi na ini a dini fu Gado, puru fu tesi. A sabi fa fu fri heri osofamiri di de ini wánfasi na ini na soyfri anbegi; a sabi fa fu fri aparti sma tu. Te den lobi en trutru, dan a e sori taki a e hori den na ini prakseri ini a fasi fa a e handri nanga den. „A sabi heri bun fa [A] meki wi, e hori na prakseri taki wi de stòf” (Psalm 103:13, 14). Ma na fri fu en de soso gi den sma di de sma di e gi den srefi na ini a dini fu en, den sma di a gi di den e gi den srefi de trutru, den sma di a gi di den e gi yesi de wan sori fu loyaliteit.
Sani di seti na wan lobi fasi gi wan moro bigi fri
12. Sortu sani Yehovah e sreka na wan lobi fasi bifo a ben sa tyari fri kon di wi e angri so fu kisi?
12 Nanga san Yehovah ben du na ini den dey fu Noa nanga Lòt, dan a no ben puru ala ogri sma fu têgo. So leki na tekst e taki, dan disi ben dini soso leki wan eksenpre fu sani di e kon. Bifo den sani dati ben o psa, dan Yehovah ben abi furu moro sani na ini prakseri fu du fu na bun fu sma di lobi en. A ben o seni en Wan enkri kobore Manpikin Yeyses Krestes, kon na grontapu. Dyaso Yeyses ben o soyfri Gado nen fu syen fu di a ben o sori na sortu fu gi di a ben o gi en srefi na ini a dini fu Gado, di Adam leki wan volmaakti libisma ben musu èn ben kan fu sori Gado; ma Yeyses ben sa du dati na ondro moro muylek omstandigheid. Yeyses ben sa gi en volmaakti libisma libi abra leki wan srakti-ofrandi, so taki den bakapikin fu Adam di ben sori bribi, ben sa kan kisi san Adam ben lasi. Dan, Gado ben sa teki wan „pikin ipi” fu loyaal sma fu teki prati nanga Krestes na ini en heymel kownukondre èn „wan bigi ipi” ben sa tyari komoto fu ala nâsi fu de na fondamenti fu wan nyun libisma maatschappij (Lukas 12:32; Openbaring 7:9). Te dati ben kon tru, dan Gado ben sa tyari na moro bigi fri kon di den sani di ben psa ini na tori fu na Frudu èn na pori fu Sodom nanga Gomora ben de leki wan eksenpre.
Fu san-ede a de wan tranga fanowdu sani now fu handri nanga wan fasti bosroyti
13, 14. (a) San wi kan leri ini a tori taki Petrus ben kobroyki na pori fu den ogri sma na ini den dey fu Lot nanga Noa leki eksenpre?
13 Ondrosukuman fu Gado Wortu sabi taki Yehovah ben du na furu okasi sani fu fri en dienstknekti. Ma ini moro furu okasi na beybri no e taki: ’So leki a ben psa ini na ten dati, na so na denoya fu na Manpikin fu libisma sa de.’ Fu san-ede na apostel Petrus ondro na krakti fu santa yeye ben teki soso tu eksenpre nomo? San ben de so tra fasi na den sani di ben psa na ini den dey fu Lot nanga Noa?
14 Wan krin marki de fu feni na ini Yudas 7 pe wi e leysi taki „Sodom nanga Gomora nanga den foto di ben de a lontu . . . den poti gi wi leki wan warskow eksenpre fu di den ondrofeni na strafu fu têgo faya”. Iya, na pori fu den bigi sonduman na ini den foto dati ben de fu têgo, so leki dati sa de tu nanga na pori fu den ogriwan na a kba fu a disiten seti fu sani (Mateyus 25:46). A tori e sori so srefi go na a frudu fu Noa dey ini context di e handri fu têgo krutu (2 Petrus 2: 4, 5, 9-12; 3:5-7). Nanga na pori fu ogri sma ini den dey fu Lot nanga fu Noa Yehovah ben sori sobun taki a sa fri en futuboy fu di a sa pori den sma fu têgo di e du onregtfardikifasi. — 2 Tesalonika sma 1:6-10.
15. (a) Sortu tranga fanowdu warskow e gi na den sma di e du ogri wroko? (b) Fu san-ede ala sma di e horidoro na ini onregtfardikifasi, sa kisi a strafu di den frudini?
15 Na pori fu den ogri sma no e gi Yehovah prisiri, neleki fa a no e gi en dienstknekti prisiri. Nanga yepi fu en Kotoygi, Yehovah e gi sma deki-ati: „Dray baka, dray baka fu yu takru pasi, bika fu san-ede yu ben sa musu dede?” (Eseykièl 33:11). Ma te den sma no wani fu gi yesi na a lobi kari disi, ma wani go doro nanga den eygi libifasi pe den e prakseri den srefi nomo, dan Yehovah respeki gi en eygi santa nen nanga en lobi gi en loyaal dienstknekti di e ondrofeni syen fu na sey fu hogri sma, e aksi taki den kisi a reti strafu.
16. (a) Fu san-ede wi kan abi a frutrow taki na fri di taki na fesi de bun krosibey? (b) Fu san wi sa kon fri èn na ini san na fri sa tyari wi go?
16 A ten fu Gado fu tyari fri kon de bun krosibey! Na yeyefasi nanga den sani di e psa di Yeyses ben taki fu den na fesi taki den o psa leki na marki fu en denoya èn fu na bosroyti fu na seti fu sani de krin fu si. Den difrenti pisi fu na marki dati ben bigin sori den srefi fu na fosi tron moro leki 75 yari psa kba èn Yeyses ben taki taki na „geslakti disi” no ben sa psa kwetikweti bifo Gado ben tyari a strafu na tapu na hogri grontapu disi kon. Te Yehovah bepaal taki na Kownukondreboskopu preyki nofo kba na a heri grontapu pe sma e libi leki wan kotoygi gi ala nâsi, dan na kba fu na ogri grontapu disi sa kon èn nanga dati so srefi na fri sa kon gi sma di e gi den srefi na ini na dini fu Gado (Mateyus 24:3-34; Lukas 21:28-33). Fri fu san? Fu den tesi di den ben musu ondrofeni fu na sey fu den ogriwan, èn fu den omstandigheid di dey fu dey ben de wan fonten fu tergi gi den fu di den lobi regtfardikifasi. A sa de so srefi wan fri di sa tyari den go na ini wan nyun grontapu pe siki nanga dede sa de sani di sa de fu na ten di psa.
A yepi fu Gado nanga ini prakseri a kisi fu fri
17. (a) Sortu seryusu aksi wi musu aksi wi srefi? (b) Fa wi kan sori taki wi e meki „na frede fu Gado” pusu wi neleki Noa?
17 Na aksi di wi musu aksi wi srefi leki aparti sma de: „Mi de klari gi na du disi fu Gado?’ Efu wi e frutrow tapu wi srefi, efu wi eygi denki fu san de regtfardiki, dan wi no de klari. Ma efu neleki Noa wi e meki „a frede fu Gado” e pusu wi, dan nanga bribi wi e teki na tiri di Yehovah e gi, èn disi sa tyari na fri fu wi kon. — Hebrew sma 11:7.
18. Fu san-ede fu leri abi trutru respeki gi teyokrasiya makti de so wan prenspari pisi fu na sreka di wi e sreka wi srefi gi na fri di o tyari wi go na ini na nyun grontapu?
18 Te Psalm 91:1, 2 na wan tumusi moy fasi e taki fu den sma di ondrofeni na kibri di Yehovah e gi now, dan a e taki: „Ibriwan sma di e libi na ini na kibripresi fu na Moro Heywan sa sorgu gi sribipresi gi en srefi na ondro na skaduw srefi fu na Almaktiwan. Mi wani taygi Yehovah: ’Yu na mi kibripresi èn mi fortresi, mi Gado, di mi wani frutrow.’” Dyaso wan grupu sma de di Gado e kibri leki yongu fowru ondro krakti frey fu na mmafowru. Den abi ala frutrow na ini Yehovah. Den e erken taki en na a Moro Heywan, na Almaktiwan. Na bakapisi de taki den abi respeki gi teyokrasiya makti èn e saka den srefi na ondro dati, efu ppa ofu mma efu „na kotrow èn koni srafu” e sori na makti dati (Mateyus 24:45-47). Dati de so nanga ibriwan fu wi? Wi e leri neleki Noa, ’fu du ala sani san Yehovah e komanderi’ wi èn fu du den sani na en fasi? (Genesis 6:22). Efu dati de so, dan wi e teki na wan bun fasi na sreka di Yehovah e gi wi fu kisi fri èn fu kan go na ini en regtfardiki nyun grontapu.
19. (a) San na wi agersi ati, èn fu san-ede a de tumusi prenspari taki wi e poti prakseri na tapu? (Odo 4:23) (b) Fa wi kan nyanbun fu na eksenpre fu Lot te a e go fu fa wi e du nanga kori fu na grontapu?
19 Na sreka dati wani taki tu taki wi e poti prakseri tu na wi agersi ati. „Yehovah na a Ondrosukuman fu ati” (Odo 17:3). A e yepi wi fu frustan taki a no san wi sori taki wi de na dorosey e teri, ma moro furu na inisey sma, na ati e teri. Ala di wi no e gi wi srefi abra na ini bigi ogri ofu hurudu neleki na grontapu di lontu wi, toku wi musu de na ay fu den sani disi no kori wi ofu gi wi prisiri. Neleki Lot na so den sortu kruktudu sani disi, musu meki wi e firi taki den e pina wi. Den sma di no wani si ogri na ay, no sa suku fasi fu gi den srefi abra na dati; ma den sma di no e tegu gi den, kande sa hori den srefi fu no du den sani disi trutru, ala di na ini prakseri den e winsi sote taki den ben kan abi wan prati na den. „Ow unu di e lobi Yehovah, no wani si san takru na ay.” — Psalm 97:10.
20. (a) Na sortu fasi na beybri e warskow wi gi wan libifasi fu no lobi gudu? (b) Fa wi kan sabi efu den prenspari leri na ini a tori fu na lobi fu gudu meki rutu na ini wi ati?
20 Yehovah na wan lobi fasi no e leri wi wwan fu tan farawe fu wan waka nanga libi fu hurudu, ma so srefi fu tan farawe fu wan libifasi fu lobi gudu. ’De tevrede nanga nnyan, krosi nanga wan dak’, na ray fu en Wortu e taki (1 Timoteyus 6:8). Noa nanga en manpikin ben musu libi den oso na baka di den ben go na ini na ark. Lot nanga en osofamiri ben musu libi den oso nanga gudu tu fu kibri den libi. San na den sani di wi poti wi lobi a tapu? „Prakseri na wefi fu Lot” (Lukas 17:32). Yeyses ben gi na deki-ati: „Tan suku fosi na kownukondre nanga en regtfardikifasi” (Mateyus 6:33). Wi e du dati? Efu Yehovah regtfardiki markitiki de wi tyariman èn na meki bekenti fu na bun nyunsu fu a kownukondre e teki na fosi presi na ini wi libi, dan wi e teki fu tru na wan bun fasi na sreka di a e sreka en pipri fu kisi fri èn go na ini en nyun grontapu.
21. Fu san-ede nanga leti wi kan fruwakti taki Yehovah pramisi fu fri wi sa kon tru?
21 Gi den sma di e gi den srefi na ini a dini fu Gado èn di ben sa si na kontru fu na marki fu en denoya na ini Kownukondremakti, Yeyses ben taki: „Opo tanapu leti-opu èn opo yu ede go na tapu, bika yu frulusu e kon krosibey” (Lukas 21:28). Yu si na marki dati, ala di a e sori en srefi na ini ibri fini pisi? Abi dan frutrow taki a kon tru fu Yehovah pramisi fu kon fri de bun krosibey! Abi dorodoro na overtoygi taki ’Yehovah e sabi fu fri sma, di e gi den srefi na ini na dini fu Gado, puru fu tesi’. — 2 Petrus 2:9.
San yu leri?
◻ Fa wi musu du neleki Lot tapu a libifasi fu grontapu?
◻ Sortu tesi Lot nanga en osofamiri ben miti ete di den ben lon komoto fu Sodom?
◻ Fa den eksenpre di Petrus e kobroyki e poti krakti a tapu, taki a de tranga fanowdu now fu teki wan fasti bosroyti na a sey fu Yehovah?
◻ Sortu tumusi prenspari leri Yehovah e gi en pipri ala di a e sreka den fu kisi fri?
[Prenki na tapoe bladzijde 29]
Gado e kibri en pipri leki yongu fowru na ondro den krakti frey fu na mmafowru