Lot wefi drai luku na baka

LOT nanga en osofamiri ben libi makandra nanga Abraham na a kondre Kanan. Wan dei Abraham ben taigi Lot: ’Dyaso nofo gron no de gi ala den meti fu wi. A moro bun fu wi go libi aparti. Efu yu e go na a wan sei, dan mi e go na a tra sei.’

Lot ben luku a kondre lontu. A ben si wan heri moi kontren, di ben abi watra nanga bun furu fatu grasi gi den meti fu en. Disi ben de a Yordandistrikt. Fu dati ede Lot ben froisi nanga en osofamiri nanga en meti go drape. Te fu kaba, den ben go libi na a foto Sodom.

Den sma fu Sodom ben ogri srefisrefi. Disi ben trobi Lot, bika a ben de wan bun sma. Disi ben trobi Gado tu. Te fu kaba, dan Gado ben seni tu engel fu warskow Lot, taki fu na ogridu ede fu Sodom nanga a krosibei foto Gomora, meki a ben o go pori den foto disi.

Den engel ben taigi Lot: ’Du esi! Teki yu wefi nanga yu tu umapikin èn lon komoto fu dya!’ Fu di den ben draidrai pikinso, meki den engel ben teki den na den anu, tyari den go na dorosei fu a foto. Ne wan fu den engel ben taki: ’Lon fu yu libi ede! No drai luku na baka. Lon go na den pikin bergi, so taki yu no lasi yu libi.’

Lot nanga en umapikin ben gi yesi, den ben lon gowe libi Sodom. Den no ben tan tanapu nowan yuruten, den no ben drai luku na baka. Ma a wefi fu Lot ben trangayesi. Baka di den ben gowe libi Sodom wan moi pisi kaba, a wefi fu Lot ben tan tanapu, a ben drai luku na baka. Ne a ben tron wan sowtu postu. Yu e si en na tapu a prenki?

Wi e kisi wan bun leri fu disi, taki Gado e frulusu den sma di e gi en yesi, ma den sma di e trangayesi en sa lasi den libi.