A blesi foe Jehovah e meki joe goedoe
„A blesi foe Jehovah — na dati e meki joe goedoe èn a no e poti sari na tapoe.” — ODO 10:22.
1-3. Sortoe sani ini a tori foe goedoe na skin fasi ala sma moesoe erken, ala di foeroe sma e broko den ede nanga sani na skin fasi?
SON sma noiti e tapoe foe taki foe moni — noso foe a mankeri di den e mankeri moni. A de wan sari gi den sma dati, taki ini den jari di pasa den ben abi foeroe sani di den ben moesoe taki makandra foe en. Ini 1992 srefi a goedoe Westsei pisi foe grontapoe, ben ondrofeni wan go na baka na monisei èn driktoro so boen leki den wrokoman, boiti den tiriman, ben kon feni densrefi sondro wroko. Foeroe sma ben aksi densrefi efoe oiti den ben sa si wan ten baka pe ala sani e tan go boen.
2 A fowtoe foe broko wi ede nanga a boen foe wi na skin fasi? Nôno, na wan seiker marki a de soso wan natuurlijk sani. Na a srefi ten wan fondamenti waarheid de, di wi moesoe erken ini a tori foe goedoe. Te foe kaba, ala sani na skin fasi e kon foe a Mekiman. En na „a troe Gado, Jehovah, . . . a Sma di e bradi grontapoe nanga den sani di de na en tapoe, a Sma di e gi bro na ala den sma na en tapoe èn jeje na den sma di e waka na tapoe”. — Jesaja 42:5.
3 Ala di Jehovah no e taki na fesi soema o goedoe èn soema o pôti, wi alamala de frantiwortoe foe a fasi fa wi e gebroiki awansi sortoe pisi wi abi foe „grontapoe èn ala den sani di a e meki”. Efoe wi e gebroiki a goedoe foe wi foe prei basi na trawan tapoe, Jehovah sa aksi wi frantiwortoe. Èn iniwan sma di e wroko tranga gi goedoe na presi gi Jehovah, sa kon si taki „a sma di e froetrow tapoe den goedoe foe en — ensrefi sa fadon” (Odo 11:28; Mateus 6:24; 1 Timoteus 6:9). Boen na skin fasi di no e go makandra nanga wan ati di e gi jesi na Jehovah te foe kaba no abi warti. — Preikiman 2:3-11, 18, 19; Lukas 16:9.
A moro prenspari boen
4. Foe san ede a go boen foe sani na jeje fasi moro boen leki na abi foe foeroe sani na skin fasi?
4 Boiti boen na skin fasi, bijbel e taki foe boen na jeje fasi. Disi de krinkrin a moro betre wan (Mateus 6:19-21). Boen na jeje fasi e tjari wan matifasi nanga Jehovah di e gi satisfaksi èn di kan tan foe têgo (Preikiman 7:12). Boiti dati, foetoeboi foe Gado di goedoe na jeje fasi, no e lasi blesi na skin fasi di gesontoe. Ini a njoen grontapoe, goedoe na jeje fasi sa de makandra nanga goedoe na skin fasi. Getrow sma sa njanboen foe a djaranti na skin fasi di den no e kisi nanga jepi foe a strei di sma e strei na wan bita-fasi noso na òfer di den òfer gesontoe nanga kolokoe, so leki fa a e pasa so foeroe ini a ten disi (Psalm 72:16; Odo 10:28; Jesaja 25:6-8). Den sa kon si taki na ala fasi „a blesi foe Jehovah . . . e meki joe goedoe èn a no e poti sari na tapoe”. — Odo 10:22.
5. Sortoe pramisi Jesus ben gi ini a tori foe sani na skin fasi?
5 Srefi den sma ini a ten disi di e warderi sani na jeje fasi, e firi wan seiker korostoe te disi abi foe doe nanga sani na skin fasi. A troe, taki den e wroko foe pai den paiman foe den èn foe gi njanjan na den osofamiri. Noso wan toe foe den kande sa lasi srefi a wroko foe den ini ten pe sani e go na baka na ekonomia sei. Ma den no e meki den sortoe broko-ede disi moro den. Na presi foe dati, den e bribi a pramisi foe Jesus di a ben taki: „No broko joe ede noiti èn no taki: ’San wi sa njan?’ noso: ’San wi sa dringi?’ noso: ’San wi sa weri?’ . . . Bika oen hemel Tata sabi taki oenoe abi ala den sani disi fanowdoe. Tan soekoe, foe dati ede, a kownoekondre nanga En regtfardikifasi fosi èn ala den tra sani disi oenoe sa kisi na tapoe.” — Mateus 6:31-33.
Goedoe na jeje fasi ini a ten disi
6, 7. (a) Taki foe wan toe tori foe a go di sani e go boen na jeje fasi gi a pipel foe Gado. (b) Sortoe profeititori e kon troe ini a ten disi èn sortoe aksi disi e tjari kon now?
6 Foe dati ede, a pipel foe Jehovah ben teki a bosroiti foe poti a Kownoekondre fosi ini den libi èn fa den ben kisi blesi! Den e njanboen foe foeroe boen bakapisi ini a wroko foe den foe meki disipel (Jesaja 60:22). Den e kisi leri foe Jehovah, ala di den e njanboen foe wan heri ipi boen sani na jeje fasi di e kon sondro foe stòp nanga jepi foe „a getrow èn koni srafoe” (Mateus 24:45-47; Jesaja 54:13). Moro fara, a jeje foe Jehovah de na den tapoe èn e meki den tron wan internationaal bradafasi di foeroe nanga prisiri. — Psalm 133:1; Markus 10:29, 30.
7 Disi na troetroe taki sani e go boen na jeje fasi, wan sani di sma no man bai nanga moni. Disi na wan heri boen kontroe foe a pramisi foe Jehovah: „’Tjari ala den di foe tin pisi kon na ini a maksin, so taki njanjan kan kon na ini mi oso; èn grantangi tesi mi nanga dati’, na so Jehovah foe den legre ben taki, ’efoe mi no sa opo den sroisi foe hemel gi oenoe èn kanti troetroe wan blesi na oenoe tapoe te leki sani no sa mankeri moro’” (Maleaki 3:10). Wi ini a ten disi ben si fa a pramisi disi ben kon troe. Ma foe san ede Jehovah, a Fonten foe ala goedoe, e aksi den foetoeboi foe en foe tjari wan di foe tin pisi kon na ini? Soema e njanboen foe a di foe tin pisi? Foe piki tapoe den aksi disi, go loekoe foe san ede Jehovah ben taki den wortoe disi nanga jepi foe Maleaki ini a di foe feifi jarihondro bifo G.T.
Di foe tin pisi nanga ofrandi
8. Foe san boen na skin fasi foe Israèl ben anga, so leki a Wet froebontoe ben taki?
8 Ini a ten foe Maleaki sani no ben waka boen nanga a pipel foe Gado. Foe san ede? Foe wan pisi a ben abi foe doe nanga den ofrandi èn den di foe tin pisi. Ini a ten dati, Israèl ben de ondro a Wetfroebontoe foe Moses. Di Jehovah ben meki a froebontoe dati, a ben pramisi taki efoe Israèl ben sa hori a pisi foe den, a ben sa blesi den na jeje fasi èn na skin fasi. Foe taki en leti, foe ben meki sani go boen nanga Israèl ben sa anga foe a getrowfasi foe den. — Deuteronomium 28:1-19.
9. Foe san ede Jehovah ben aksi Israèl foe pai di foe tin pisi èn foe tjari ofrandi, ini den dei foe Israèl foe owroeten?
9 Wan pisi foe a froeplekti foe Israèl ondro a Wet ben de foe tjari ofrandi go na a tempel èn foe pai den di foe tin pisi. Foe sonwan den ben bron a heri ofrandi na tapoe na altari foe Jehovah, ala di tra ofrandi ben moesoe prati na mindri den priester èn denwan di ben pristeri na ofrandi, nanga spesroetoe pisi di ben moesoe òfer gi Jehovah (Levitikus 1:3-9; 7:1-15). Ini a tori foe den di foe tin pisi, Moses ben taigi den Israèlsma: „Ibri di foe tin pisi foe a gron, foe a siri foe a gron èn a froktoe foe a bon, na foe Jehovah. A de wan santa sani gi Jehovah” (Levitikus 27:30). Den ben gi a di foe tin pisi na den Leifi wrokoman na a tabernakel èn baka ten na a tempel. Foe den sei, den Leifisma di no ben de priester ben gi wan di foe tin pisi foe san den ben kisi, na den priester foe Aron (Numeri 18:21-29). Foe san ede Jehovah ben aksi foe Israèl pai den di foe tin pisi? Na a fosi presi, so taki den ben kan sori a warderi foe den gi a boen-ati foe Jehovah, na wan fasi di ben kon krin na fesi. Èn na a di foe toe presi, so taki den ben kan gi bijdrage foe sorgoe den Leifisma, di na so fasi ben man poti ala den prakseri na tapoe den froeplekti foe den, so srefi na tapoe a leri di den ben moesoe leri sma a Wet (2 Kroniki 17:7-9). Na a fasi disi den ben horibaka toe gi a troe anbegi èn ala sma ben abi wini foe dati.
10. San ben pasa di Israèl no ben tjari den di foe tin pisi nanga ofrandi?
10 Ala di den Leifisma baka ten ben gebroiki di foe tin pisi nanga ofrandi, den ben de troetroe presenti gi Jehovah èn den ben moesoe de boen srefisrefi, den ben moesoe abi waarde gi en (Levitikus 22:21-25). San ben pasa te den Israèlsma no ben tjari den di foe tin pisi foe den noso te den ben tjari ofrandi di no ben abi foeroe waarde? A Wet no ben taki foe wan strafoe, ma takroe bakapisi ben de. Jehovah no ben gi den blesi foe en èn den Leifisma, di no ben abi horibaka na skin fasi, ben libi a tempel wroko foe den, so taki den ben man go sorgoe gi densrefi. Na so fasi, heri Israèl ben pina.
„Poti oen ati na tapoe den pasi foe oenoe”
11, 12. (a) San ben de a bakapisi te Israèl no ben e hori a Wet? (b) Sortoe wroko Jehovah ben gi Israèl di a ben tjari den kon baka foe Babilon?
11 Na ini a heri historia foe Israèl, wan toe sma ben de boen eksempel ini a proeberi di den ben proeberi foe hori a Wet, so srefi a pai foe den di foe tin pisi (2 Kroniki 31:2-16). Ma a moro bigi pisi foe a nâsi no ben e doe dati. Ibri tron baka den ben broko a froebontoe nanga Jehovah, te leki te foe kaba a ben gi pasi foe trawan wini den èn ini 607 bifo G.T. den ben tjari den go poti leki strafoeman na Babilon. — 2 Kroniki 36:15-21.
12 Dati ben de tranga leri, ma baka 70 jari Jehovah ben meki a pipel foe en go baka na a kondre foe den. Foeroe foe den paradijs profeititori na ini Jesaja ben moesoe kisi den fosi kontroe baka di den ben drai go baka (Jesaja 35:1, 2; 52:1-9; 65:17-19). Tokoe a moro prenspari reide foe san ede Jehovah ben tjari a pipel foe en kon baka, no ben de foe bow wan grontapoe paradijs, ma foe bow a tempel baka èn poti a troe anbegi baka (Esra 1:2, 3). Efoe Israèl ben gi jesi na Jehovah, dan wini na skin fasi ben sa kon foe dati èn a blesi foe Jehovah ben sa meki den kon goedoe na jeje fasi so boen leki na skin fasi. Ini akroederi nanga dati, so esi leki den djoe ben doro a mamakondre foe den na ini 537 bifo G.T., den ben bow wan altari na Jerusalem èn ben bigin wroko na a tempel. Ma den ben ondrofeni hebi gens èn den ben tapoe nanga dati (Esra 4:1-4, 23). Leki wan bakapisi foe dati, Israèl no ben njanboen foe a blesi foe Jehovah.
13, 14. (a) San ben kon baka di Israèl no ben bow a tempel baka? (b) Fa a tempel ben bow baka, te foe kaba, ma foe sortoe fowtoe moro foe a sei foe Israèl, den e skrifi?
13 Ini a jari 520 bifo G.T., Jehovah ben meki den profeiti Hagai nanga Sakaria kon foe gi deki-ati na Israèl foe drai go doe a wroko foe bow a tempel. Hagai ben sori taki a nâsi ben pina foe problema na skin fasi èn ben taki, dati disi ben de foe di den ben misi foe abi faja gi na oso foe Jehovah. A ben taki: „Disi na san Jehovah foe den legre taki: ’Poti oen ati na tapoe den pasi foe oenoe. Oenoe ben sai foeroe siri, ma oenoe e tjari pikinso kon na ini. Oenoe e njan, ma disi no e gi satisfaksi. Oenoe e dringi, ma oenoe no e doro a marki foe kon droengoe. Oenoe e weri krosi, ma sondro foe wan sma e kon waran; èn a sma di e joeroe ensrefi na wan tra sma e joeroe ensrefi na wan tra sma gi wan saka di abi olo.’ Disi na san Jehovah foe den legre ben taki: ’Poti oen ati na tapoe den pasi foe oenoe. Go na a bergi èn oenoe moesoe tjari oedoe kon na ini. Èn bow na oso, so taki mi kan prisiri na ini èn mi sa kisi glori.’” — Hagai 1:5-8.
14 Foe di den Israèlsma ben kisi deki-ati foe Hagai nanga Sakaria, den ben poti den ati na tapoe den pasi foe den èn den ben bow a tempel. Ma, so wan 60 jari baka dati, Nehemia ben fisiti Jerusalem èn ben kon si taki agen Israèl no ben e doe a Wet foe Jehovah. A ben poti disi reti. Ma di a ben fisiti Israèl wan di foe toe tron, a ben kon si taki sani ben go na baka agen. A ben skrifi: „Mi ben kon si taki srefi den porsi foe den Leifisma den no ben gi den, so taki den Leifisma nanga den singiman, di ben doe a wroko ben gowe libi a wroko, go na den eigi gron” (Nehemia 13:10). A problema disi ben poti reti èn „heri Juda, foe den sei, ben tjari a di foe tin pisi foe a karoe èn foe a njoen win èn foe na oli kon na ini den maksin.” — Nehemia 13:12.
Ròs Jehovah
15, 16. Gi sortoe fowtoe Jehovah ben piri-ai gi Israèl nanga jepi foe Maleaki?
15 Kande a profeititori di Maleaki ben taki, ben de ini a srefi pisi ten dati èn a profeiti e froeteri wi moro foe a fasi fa Israèl no ben de getrow. A e skrifi den wortoe foe Jehovah gi Israèl: „’Efoe mi na wan tata, pe a grani foe mi de dan? Èn efoe mi na wan toemoesi boen masra, pe a frede gi mi de dan?’ Jehovah foe den legre ben taigi oenoe, o priester di e wisiwasi a nen foe mi.” San ben fowtoe? Jehovah e froeklari: „Te oenoe e pristeri wan breni meti foe òfer [oenoe e taki]: ’A no de wan sani di takroe.’ Èn te oenoe e pristeri wan lan meti noso wan siki wan [oenoe e taki]: ’A no de wan sani di takroe’.” — Maleaki 1:6-8.
16 Na a fasi disi, pe sma kan si a tori na den fesi, Maleaki e sori taki ala di den Israèlsma ben tjari ofrandi kon na ini, a takroe kwaliteit foe den ofrandi disi, ben sori taki den no abi lespeki srefisrefi. Maleaki ben skrifi toe: „’Sensi den dei foe den afo foe oenoe, oenoe drifi komoto na den gebod foe mi èn oenoe no ben ondrow den. Drai kon baka na mi, èn mi sa drai kon baka na oenoe’, na so Jehovah foe den legre taki.” Den Israèlsma ben aksi densrefi san na a soifri sani di den ben moesoe doe, so boen den ben aksi: „Na sortoe fasi wi sa drai kon baka?” Jehovah ben piki: „Wan sma foe grontapoe sa ròs Gado? Ma oenoe e ròs mi.” Fa Israèl ben kan ròs Jehovah, a Fonten foe ala goedoe? Jehovah ben piki: „Ini den di foe tin pisi èn ini den bijdrage” (Maleaki 3:7, 8). Ija, foe di Israèl ben misi foe tjari den di foe tin pisi èn den ofrandi foe den, kon na ini den ben ròs Jehovah!
17. Sortoe marki den di foe tin pisi nanga ofrandi ben abi na ini Israèl èn sortoe pramisi Jehovah e doe ini a tori foe a di foe tin pisi?
17 A historia background disi e sori a prensparifasi foe den di foe tin pisi nanga ofrandi na Israèl. Den ben de wan sori foe a warderi di a giman foe en sei ben abi. Èn a ben jepi den foe horibaka gi a troe anbegi na a sei foe goedoe na skin fasi. Na so fasi Jehovah ben go doro foe gi Israèl deki-ati: „Tjari ala den di foe tin pisi kon na ini a maksin”. Di Jehovah ben sori san ben sa de a bakapisi efoe den ben doe disi, a ben pramisi: „Mi sa kanti wan blesi na oenoe tapoe te leki sani no sa mankeri moro” (Maleaki 3:10). A blesi foe Jehovah ben sa meki den kon goedoe.
Kisi kroetoe foe „a Troe Masra”
18. (a) Gi a kon foe soema Jehovah ben warskow? (b) Soema ben de ini a tori, di wan kon ben de na a tempel èn san ben de a bakapisi gi Israèl?
18 Jehovah ben warskow toe nanga jepi foe Maleaki taki a ben sa kon kroetoe a pipel foe en. „Loekoe! Mi e seni mi boskopoeman èn a moesoe meki wan pasi na mi fesi. Èn wantronso a [troe] Masra, di oenoe e soekoe èn a boskopoeman foe a froebontoe di oenoe abi prisiri nanga en, sa kon na en tempel. Loekoe! A sa kon seiker” (Maleaki 3:1). Oten a pramisi kon na a tempel ben feni presi? Na Mateus 11:10, Jesus ben teki a profeititori foe Maleaki taki, di ben taki foe wan boskopoeman di ben sa sreka a pasi èn Jesus ben meki a kon fiti tapoe Johanes a Dopoeman (Maleaki 4:5; Mateus 11:14). So boen ini 29 G.T. a ten foe koti kroetoe ben doro! Soema ben de a di foe toe boskopoeman, a boskopoeman foe a froebontoe di ben sa go makandra nanga Jehovah, „a troe Masra”, na a tempel? Jesus srefi èn na toe okasi a ben kon na a tempel na Jerusalem èn na wan dramatis fasi a ben krin en, foe di a ben trowe ala den sma di ben kenki moni èn di no ben de eerlijk, go na doro (Markus 11:15-17; Johanes 2:14-17). Ini a tori foe a ten foe koti kroetoe disi foe a fosi jarihondro, Jehovah ben aksi na profeitis fasi: „Soema sa froedrage a dei foe a kon foe en èn soema sa tan tanapoe te a sori ensrefi?” (Maleaki 3:2). Foe taki en leti, dan Israèl no ben tan tanapoe. Den ben ondrosoekoe Israèl èn den no ben feni den boen èn ini 33 G.T. Jehovah ben trowe den leki a nâsi di a ben teki. — Mateus 23:37-39.
19. Na sortoe fasi wan fikapisi ben drai go baka na Jehovah ini a fosi jarihondro èn sortoe blesi den ben kisi?
19 Ma Maleaki ben skrifi toe: „[Jehovah] moesoe sidon leki wan man di e soifri èn krin solfroe èn a moesoe krin den manpikin foe Leifi; èn a moesoe soifri den leki gowtoe èn leki solfroe èn seiker den sa tron gi Jehovah, sma di e pristeri wan ofrandi ini regtfardikifasi” (Maleaki 3:3). Ini akroederi nanga disi, ala di Jehovah ben trowe moro foeroe foe den sma di ben e taki, dati den ben dini En ini a fosi jarihondro, dan sonwan ben meki kon krin èn ben kon na Jehovah, èn ben e pristeri en ofrandi di a ben kan teki. Soema ben de dati? Den sma di ben arki Jesus, a boskopoeman foe a froebontoe. Na a Pinksterfesa foe 33 G.T., 120 foe den sma disi di ben doe wan sani, ben kon makandra ini wan tapoesei kamra na Jerusalem. Foe di den ben kisi krakti foe a santa jeje, den ben bigin pristeri wan presenti foe regtfardikifasi èn esi-esi a nomroe foe den bigin gro. Heri esi, den ben panja na a heri Romen Tiri (Tori foe den Apostel 2:41; 4:4; 5:14). So boen wan fikapisi ben drai go baka na Jehovah. — Maleaki 3:7.
20. Di Jerusalem nanga a tempel ben kisi pori, dan san ben pasa nanga a njoen Israèl foe Gado?
20 A fikapisi disi foe Israèl, di ben kon kisi na ini toe den heidensma di den ben enter, foe taki en so, na tapoe wan tompoe foe Israèl, ben de wan njoen „Israèl foe Gado”, wan nâsi, di ben abi kresten na ini, di ben salfoe nanga santa jeje (Galasiasma 6:16; Romesma 11:17). Ini 70 G.T., wan „dei . . . di ben bron leki wan onfoe” ben kon na tapoe Israèl na skin fasi, di Romen legre ben pori Jerusalem nanga a tempel foe en (Maleaki 4:1; Lukas 19:41-44). San ben pasa nanga Gado en Israèl na jeje fasi? Jehovah ben sori „den sari-ati, neleki wan man e sori sari-ati gi en manpikin di e dini en” (Maleaki 3:17). A salfoe kresten gemeente ben gi jesi na a warskow di Jesus ben taki na profeitisfasi (Mateus 24:15, 16). Den ben tan na libi èn a blesi foe Jehovah ben tan meki den goedoe na jeje fasi.
21. Sortoe aksi e tan abra ete di abi foe doe nanga Maleaki 3:1 nanga 10?
21 Fa disi na wan meki kon regtfardiki foe Jehovah nen! Ma fa Maleaki 3:1 e kon troe ini a ten disi? Èn san kresten moesoe doe na tapoe a deki-ati na Maleaki 3:10 foe tjari ala den di foe tin pisi kon na ini a maksin? Wi sa taki foe disi ini na artikel di e kon now.
Joe kan froeklari disi?
◻ Soema de, te foe kaba, a Fonten foe ala goedoe?
◻ Foe san ede a go boen foe sani na jeje fasi moro boen leki goedoe na skin fasi?
◻ Sortoe marki den di foe tin pisi nanga ofrandi ben abi na Israèl?
◻ Oten Jehovah, „a troe Masra” ben kon na a tempel foe kroetoe Israèl èn nanga sortoe bakapisi?
◻ Soema ben drai go baka na Jehovah, baka di a ben kon na en tempel ini a fosi jarihondro G.T.?
[Prenki na tapoe bladzijde 10]
A boskopoeman foe a froebontoe, Jesus, di ben teki presi gi Jehovah, ben kon na a tempel foe koti kroetoe ini a fosi jarihondro G.T.