„Tjari ala den di foe tin pisi kon na ini a maksin”
„Grantangi tesi mi nanga dati, . . . efoe mi no sa opo den sroisi foe hemel gi oenoe.” — MALEAKI 3:10.
1. (a) Sortoe kari Jehovah ben gi a pipel foe en ini a di foe feifi jarihondro bifo G.T.? (b) San ben de a bakapisi foe a kon di Jehovah ben kon na a tempel foe kroetoe sani, ini a fosi jarihondro G.T.?
INI a di foe feifi jarihondro bifo G.T., den Israèlsma no ben de getrow na Jehovah. Den no ben gi den di foe tin pisi èn den ben tjari meti di no ben de so boen, go na a tempel leki ofrandi. Ma tokoe Jehovah ben pramisi taki efoe den ben sa tjari ala den di foe tin pisi kon na ini a maksin, a ben sa kanti wan blesi na den tapoe te leki sani no sa mankeri moro (Maleaki 3:8-10). So wan 500 jari bakaten, Jehovah, gi soema Jesus ben teki presi leki En boskopoeman foe a froebontoe, ben kon na a tempel na Jerusalem foe kroetoe sani (Maleaki 3:1). Israèl leki wan nâsi, den no ben feni taki a boen nofo, ma den sma di ben drai go baka na Jehovah ben kisi foeroe blesi (Maleaki 3:7). Den ben salfoe den foe tron Jehovah en jeje manpikin, wan njoen mekisani, „na Israèl foe Gado.” — Galasiasma 6:16; Romesma 3:25, 26.
2. Oten Maleaki 3:1-10 ben sa abi wan di foe toe kontroe èn foe doe san, wi kisi wan kari ini a tori disi?
2 Pikinmoro 1900 jari baka disi, ini 1914, den ben poti Jesus na tapoe a kownoestoeroe leki Kownoe foe Gado en hemel Kownoekondre èn den wortoe na Maleaki 3:1-10, di ben taki nanga jepi foe Gado jeje, ben de foe kisi wan di foe toe kontroe. Ini a tori foe a span sani disi di ben pasa, kresten ini a ten disi e kisi wan kari foe tjari ala den di foe tin pisi kon na ini a maksin. Efoe wi e doe disi, dan wi toe sa njanboen foe blesi te leki sani no sa mankeri moro.
3. Soema ben de a boskopoeman di ben sreka a pasi na Jehovah fesi (a) ini a fosi jarihondro? (b) bifo a fosi grontapoefeti?
3 Foe a sei foe a kon foe en na a tempel, Jehovah ben taki: „Loekoe! Mi e seni mi boskopoeman èn a moesoe meki wan pasi na mi fesi” (Maleaki 3:1). Leki wan kontroe foe disi na a fosi jarihondro, Johanes a Dopoeman ben kon na Israèl èn ben e preiki berow foe sondoe (Markus 1:2, 3). Wan wroko foe sreka sani ben de di ben abi foe doe nanga a di foe toe kon foe Jehovah na a tempel foe en? Ija. Ini den tintenti jari bifo a fosi grontapoe feti, den Bijbel ondrosoekoeman ben kon de foe si na a preigron foe grontapoe, den ben e leri sma soifri bijbel leri èn ben tjari lei, di no e gi Gado grani, kon na krin, so leki a Driwanfasi nanga den leri foe a hèlfaja. Den ben warskow toe foe a kaba, di ben o kon, foe a ten foe den heiden ini 1914. Foeroe sma ben doe wan sani na tapoe san den tjariman disi foe a leti foe waarheid, ben taki. — Psalm 43:3; Mateus 5:14, 16.
4. Sortoe aksi ben moesoe kisi piki ini a dei foe Masra?
4 A jari 1914 ben bigin san bijbel e kari „a dei foe Masra” (Openbaring 1:10). Toemoesi prenspari sani ben o feni presi na a dei dati, so srefi a sabi di sma ben o kon sabi „a getrow èn koni srafoe” nanga a poti di den ben o poti a wan dati „na tapoe ala den sani [foe a Masra]” (Mateus 24:45-47). Na a ten dati ini 1914, doesoendoesoen kerki ben taki, dati den ben de kresten. Sortoe groepoe a Masra, Jesus Krestes, ben sa erken leki en getrow èn koni srafoe? Na aksi dati ben moesoe kisi piki te Jehovah ben kon na a tempel.
Kon na a tempel na jeje fasi
5, 6. (a) Na sortoe tempel Jehovah ben kon foe kroetoe sani? (b) Sortoe kroetoe a krestenhèit ben kisi foe Jehovah?
5 Ma na sortoe tempel a ben kon? A krin taki a no ben kon na wan troetroe tempel na Jerusalem. A lastiwan foe den tempel dati ben kisi pori na ini 70 G.T. Ma Jehovah abi wan moro bigi tempel, di a tempel na Jerusalem ben de wan prenki foe en na fesi. Paulus ben taki foe a moro bigi tempel disi èn ben sori o bigi a de troetroe, nanga wan santa presi na hemel èn wan inisei djari dja na grontapoe (Hebrewsma 9:11, 12, 24; 10:19, 20). A de na a bigi tempel disi na jeje fasi pe Jehovah ben kon foe doe a kroetoewroko. — Teki gersi Openbaring 11:1; 15:8.
6 Oten disi ben pasa? Akroederi den krin boeweisi di wi abi, dan disi ben de ini 1918.a San ben de a bakapisi? Foe a sei foe a krestenhèit, Jehovah ben si wan organisâsi di den anoe foe en ben dropoe foe broedoe, wan kroektoe relisi sistema di ben gi ensrefi leki hoeroe-oema na a grontapoe disi, a ben bondroe kon na wán nanga den goedoewan èn ben kwinsi den pôtiwan, ala di a ben leri sma heiden leri na presi foe doe a soifri anbegi (Jakobus 1:27; 4:4). Nanga jepi foe Maleaki, Jehovah ben warskow: „Mi sa tron wan esi-esi kotoigi kontrari den towfroeman èn kontrari den soetaman èn kontrari den di e sweri falsi èn kontrari den di e handri na wan bidrigifasi nanga a paiman foe den wrokoman, nanga [den] weduwe èn nanga [den] boi di de sondro papa” (Maleaki 3:5). A krestenhèit ben doe ala den sani disi èn moro ogri srefi. Na a ten foe 1919 sma ben kan si krin taki Jehovah ben kroetoe en foe kisi pori makandra nanga a tra pisi foe Babilon a Bigiwan, a grontapoe orga di falsi relisi meki. Sensi a ten dati, a kari ben go na reti-ati sma: „Komoto na en mindri, mi pipel.” — Openbaring 18:1, 4.
7. Soema Jesus ben erken leki en getrow èn koni srafoe?
7 Soema, foe dati ede, ben de a getrow èn koni srafoe? Ini a fosi jarihondro, a ben bigin nanga wan pikin groepoe di ben doe wan sani na tapoe a kotoigi wroko foe Johanes a Dopoeman èn na tapoe di foe Jesus, a boskopoeman foe a froebontoe. Ini a jarihondro foe wi a ben de den wantoe doesoendoesoen di ben doe wan sani na tapoe a wroko foe sreka sani, di den Bijbel ondrosoekoeman ben doe ini den jari bifo a Fosi Grontapoefeti. Denwan disi ben horidoro na ondro bita tesi na a ten foe a fosi grontapoefeti, ma den ben sori taki na ati foe den ben de nanga Jehovah.
Wan wroko foe krin sani
8, 9. Na sortoe fasi a getrow èn koni srafoe ben abi krin fanowdoe ini 1918 èn sortoe pramisi Jehovah ben doe ini a tori disi?
8 Ma, a ben de fanowdoe foe den ben krin a groepoe disi srefi. Sonwan, di ben tai densrefi na den, ben sori taki den de feanti foe a bribi èn den ben moesoe poeroe den (Filipisma 3:18). Trawan no ben de klariklari foe teki den frantiwortoe di ben abi foe doe nanga a dini foe Jehovah, na tapoe den skowroe èn den ben drifi gowe (Hebrewsma 2:1). Boiti dati, wroko foe Babilon ben tan di den ben moesoe poeroe. So srefi ini a wroko foe den foe orga sani, a getrow èn koni srafoe ben moesoe meki kon krin. Den ben moesoe leri èn teki wan joisti posisi foe tan neutraal ini a grontapoe disi. Èn foe di grontapoe ben kon kroektoe moro nanga moro, den ben moesoe feti tranga foe hori a fasi foe no de krin na moreel sei èn na jeje sei, na dorosei foe a gemeente. — Teki gersi Judas 3, 4.
9 Ija, a ben de fanowdoe foe krin den, ma na wan lobifasi Jehovah ben pramisi ini a tori foe Jesus di ben poti tapoe kownoestoeroe: „A moesoe sidon leki wan sma di e soifri èn e krin solfroe èn a moesoe krin den manpikin foe Leifi; èn a moesoe soifri den leki gowtoe èn leki solfroe èn seiker den sa tron gi Jehovah sma di e pristeri wan presenti ofrandi ini regtfardikifasi” (Maleaki 3:3). Foe bigin nanga 1918, dan Jehovah ben meki a pramisi foe en kon troe nanga jepi foe en boskopoeman foe a froebontoe èn a ben krin a pipel foe en.
10. Sortoe ofrandi a pipel foe Gado ben tjari èn sortoe kari Jehovah ben gi den?
10 Den salfoe brada foe Krestes nanga a bigi ipi di baka ten ben go makandra nanga den ini a dienst foe Jehovah den alamala ben abi wini foe a handri di Jehovah ben handri leki wan sma di e soifri èn e krin solfroe (Openbaring 7:9, 14, 15). Leki wan organisâsi den ben kon, èn e kon ete, èn e pristeri wan presenti ofrandi ini regtfardikifasi. Èn na ofrandi foe den na „wan prisiri sani gi Jehovah neleki ini den dei di pasa langa ten kaba èn leki den jari foe owroeten” (Maleaki 3:4). A ben de den sma disi di Jehovah ben kari kon na profeiti fasi: „’Tjari ala den di foe tin pisi kon na ini a maksin, so taki njanjan kan kon na ini mi oso; èn grantangi, tesi mi nanga dati’, Jehovah foe den legre taki, ’efoe mi no sa opo den sroisi foe hemel gi oenoe èn kanti troetroe wan blesi na oenoe tapoe te leki sani no sa mankeri moro.’” — Maleaki 3:10.
Ofrandi nanga den di foe tin pisi
11. Foe san ede ofrandi, so leki di foe a Wet sistema foe Moses, no de fanowdoe moro langa?
11 Ini den dei foe Maleaki, a pipel foe Gado ben tjari troetroe ofrandi kon na ini èn den di foe tin pisi, so leki karoe, froktoe nanga meti. Srefi ini den dei foe Jesus, getrow Israèlsma ben tjari troetroe ofrandi na a tempel. Ma baka a dede foe Jesus, ala den sani dati kenki. A Wet ben poeroe na pasi, so srefi den komando foe pristeri spesroetoe ofrandi èn den di foe tin pisi na skin fasi (Efeisesma 2:15). Jesus ben meki a profeiti fasi foe den ofrandi na ondro a Wet, kon troe (Efeisesma 5:2; Hebrewsma 10:1, 2, 10). Na sortoe fasi, so boen, kresten kan tjari ofrandi èn den di foe tin pisi kon na ini?
12. Sortoe ofrandi nanga òfer na jeje fasi kresten e tjari?
12 Gi den, ofrandi na sani na jeje sei foe wan toemoesi aparti fasi. (Teki gersi Filipisma 2:17; 2 Timoteus 4:6.) Foe eksempel, Paulus ben taki foe a preikiwroko leki wan ofrandi di a ben taki: „Meki ala ten wi tjari nanga jepi foe en wan srakti ofrandi foe prèise gi Gado, namkoe, den froktoe foe den mofoboeba, di e meki en nen bekènti na poebliki.” A ben sori go tapoe wan tra sortoe ofrandi na jeje fasi, di a ben gi tranga: „No frigiti foe doe boen èn foe prati sani nanga trawan, foe di densrefi ofrandi dati e plisi Gado srefisrefi” (Hebrewsma 13:15, 16). Te papa nanga mama e gi den pikin foe den deki-ati foe go ini a pionierwroko, sma kan taki, dati den e òfer den na Jehovah, neleki fa Jefta ben òfer na oemapikin foe en leki „wan bron ofrandi” gi Gado, di ben meki a wini. — Kroetoebakra 11:30, 31, 39.
13. Foe san ede den no e aksi kresten foe gi wan troetroe di foe tin pisi foe a moni di den e wroko?
13 Ma san de foe taki foe den di foe tin pisi? Kresten de froeplekti foe poti wan di foe tin pisi foe a moni di den e wroko na wan sei èn gi dati na a organisâsi foe Jehovah, so leki fa den e doe na son kerki foe a krestenhèit? Nôno, dati den no e aksi. No wan bijbeltekst de, di e taki foe so wan seti gi kresten. Di Paulus ben tjari bijdrage kon na wan gi den sma na Judea, di ben de na nowtoe, a no ben kari wan spesroetoe pisi di sma ben moesoe gi. Na presi foe dati, a ben taki: „Meki ibriwan sma doe so leki a bosroiti ini en ati, no sondro prisiri noso ondro dwengi, bika Gado lobi wan sma di e gi nanga prisiri” (2 Korentesma 9:7). Te Paulus e taki foe denwan di e doe spesroetoe diniwroko, a e sori taki ala di sonwan ben kisi horibaka na wan joisti fasi nanga jepi foe friwani bijdrage, a ben de srekasreka foe wroko èn sorgoe gi ensrefi (Tori foe den Apostel 18:3, 4; 1 Korentesma 9:13-15). Den no ben gi wan di foe tin pisi foe a marki disi.
14. (a) Foe san ede a tjari di wi e tjari wan di foe tin pisi kon na ini, no e prenki taki wi e gi ala san wi abi na Jehovah? (b) San a di foe tin pisi e prenki?
14 A krin taki, gi kresten a di foe tin pisi e agersi noso e prenki wan sani. Foe di a de wan di foe tin pisi èn nofotron bijbel e agersi a nomroe tin nanga wan sani na grontapoe di no e mankeri noti, a di foe tin pisi e agersi a gi di wi moesoe gi ala san wi abi na Jehovah? Nôno. Te wi e gi wisrefi abra na Jehovah èn e simboliseer disi nanga a dopoe nanga watra, dan dati na te wi e gi ala san wi abi na en. Sensi a ten foe a gi di wi gi wisrefi abra, wi no abi noti san no de kaba foe Jehovah. Ma Jehovah e gi aparti sma pasi foe prati san na foe den. So boen den di foe tin pisi e prenki a porsi foe san na foe wi, di wi e tjari gi Jehovah, noso e gebroiki en ini a dienst foe Jehovah, leki wan marki foe wi lobi gi en èn foe na erken di wi e erken taki wi na foe en. A disi ten di foe tin pisi no abi foe de soso wan di foe tin pisi. Ini son kefal a sa de moro mendri. Ini tra kefal a sa de moro. Ibri sma e tjari san na ati foe en taigi en foe tjari èn san den omstandigheid foe en e gi pasi foe doe.
15, 16. San de na ini a di foe tin pisi foe wi na jeje fasi?
15 San de toe na ini a di foe tin pisi disi na jejefasi? Ini a fosi presi, wi e gi Jehovah foe wi ten èn wi krakti. A ten di wi e gi foe de na den konmakandra, foe go na den kringkonmakandra nanga kongres, ini a velddienst, ala disi na wan sani di wi e gi na Jehovah — wan pisi foe wi di foe tin pisi. A ten nanga a krakti di wi e gi foe go fisiti den sikiwan èn e jepi trawan — agen, den sani disi na pisi foe wi di foe tin pisi. A jepi di wi e jepi nanga a bow foe Kownoekondre zaal èn a teki di wi e teki prati ini a wroko foe ondrow èn krin a zaal, na wan pisi toe.
16 A di foe tin pisi foe wi abi na ini toe wi moni bijdrage. Nanga a gro di na organisâsi foe Jehovah ben gro kefarlek ini den jari di pasa, froeplekti na monisei gro. Njoen Kownoekondre zaal de fanowdoe, makandra nanga njoen bijkantoro nanga njoen kongreshal, makandra nanga na ondrow foe denwan di bow kaba. Foe man tapoe den kostoe foe den sma di ben gi densrefi foe doe spesroetoe dienst — nofotron den e tjari bigi persoonlijk ofrandi foe doe dati — dati toe na wan bigi tjalensi. Ini 1991 den kostoe foe ondrow zendeling, opziener di e rèis nanga spesroetoe pionier wawan ben de moro leki 40 miljoen Amerkan dala, ala disi ben gi nanga jepi foe den friwani bijdrage.
17. San wi moesoe gi nomo leki wi di foe tin pisi na jeje fasi?
17 San wi moesoe gi dan leki wi di foe tin pisi na jeje fasi? Jehovah no e poti omeni. Ma tokoe, wan fasi foe gi wisrefi abra, wan opregti lobi gi Jehovah nanga den brada, so boen leki wan fasi foe a tranga fanowdoe di e kon foe a froestan di wi e froestan taki libi de di moesoe kisi kibri, e gi wi deki-ati foe tjari kon na ini ala den di foe tin pisi foe wi. Wi abi a firi foe dini Jehovah so fara leki dati man. Efoe wi e skotoe wisrefi noso sondro prisiri e gi wisrefi noso san wi abi, dan disi ben sa de a srefi leki wi e ròs Gado. — Teki gersi Lukas 21:1-4.
Blesi te leki sani no e mankeri moro
18, 19. Fa a pipel foe Jehovah ben kisi blesi foe di den ben tjari ala den di foe tin pisi kon na ini?
18 Sensi 1919, dan na wan fasi foe lobi foe gi sani, a pipel foe Jehovah ben doe boen nanga a ten, a krakti nanga a moni di den abi, na tapoe a fanowdoe foe a preikiwroko. Den ben tjari troetroe ala den di foe tin pisi kon na ini a maksin. Leki wan bakapisi, Jehovah ben meki en pramisi kon troe èn ben kanti wan blesi te leki sani no e mankeri moro. Disi wi ben kan si kefarlek boen ini a gro foe den nomroe foe den. Foe den wan toe doesoen salfoewan di ben dini Jehovah di a ben kon na a tempel foe en ini 1918 den ben gro te leki, ini a ten disi, den salfoewan makandra nanga den kompe foe den, den tra skapoe, kon tron now moro foeroe leki fo miljoen na 211 difrenti kondre (Jesaja 60:22). Den ben kisi blesi toe nanga wan doronomo gro foe a froestan di den e froestan a waarheid. A profeiti wortoe ben kon de moro seiker gi den. A froetrow foe den ini a kontroe foe den prakseri foe Jehovah ben kon kisi fasti gron (2 Petrus 1:19). Den na troetroe wan pipel di „ben kisi leri foe Jehovah.” — Jesaja 54:13.
19 Nanga jepi foe Maleaki Jehovah ben taki na fesi foe moro blesi: „Na a ten dati den sma di ben frede Jehovah ben taki nanga makandra, ibriwan nanga en kompe èn Jehovah ben tan poti prakseri èn arki. Èn den ben bigin foe skrifi wan memre boekoe na en fesi gi den sma di e frede Jehovah èn den sma di e prakseri en nen” (Maleaki 3:16). Foe ala den organisâsi di e taki, dati den na kresten, soso Jehovah Kotoigi e denki foe a nen foe en so boen leki foe gi en glori na mindri den nâsi (Psalm 34:3). O kolokoe den de foe di den de seiker taki Jehovah e memre a getrowfasi foe den!
20, 21. (a) Foe sortoe blesi matifasi troe kresten e njanboen? (b) Sortoe difrenti e kon krin foe si moro nanga moro, ini a tori foe a krestenhèit?
20 A salfoe fikapisi na Jehovah en spesroetoe pipel èn a bigi ipi, di e kon makandra foe de nanga den, e koti den blesi foe soifri anbegi nanga den (Sakaria 8:23). Nanga jepi foe Maleaki, Jehovah e pramisi: „’Seiker den sa tron foe mi’, na so Jehovah foe den legre taki, ’na a dei di mi e meki wan spesroetoe goedoe. Èn mi wani sori den sari-ati, neleki wan man di e sori sari-ati gi en manpikin di e dini en’” (Maleaki 3:17). Fa a de wan blesi taki Jehovah e prakseri den na so wan safoefasi!
21 Ija, moro nanga moro a difrenti na mindri den troe kresten nanga den falsi wan e kon de foe si. Ala di a pipel foe Jehovah e doe moeiti foe hori den markitiki foe en, a krestenhèit e soengoe go moro nanga moro dipi ini a doti swampoe foe a grontapoe disi. Foe troe, den wortoe foe Jehovah ben sori foe de troe: „Seiker oenoe sa si a difrenti baka na mindri wan regtfardikiwan nanga wan ogriwan, na mindri wan sma di e dini Gado nanga wan sma di no e dini en.” — Maleaki 3:18.
22. Foe sortoe blesi wi kan de seiker taki wi sa njanboen foe dati efoe wi e tan tjari ala wi di foe tin pisi kon na ini?
22 Heri esi a dei foe pai sa kon gi den falsi kresten. „’Loekoe! a dei e kon di e bron leki wan onfoe èn ala den heimemre wan èn ala denwan di e doe ogri moesoe tron leki tompoe. Èn a dei di e kon seiker sa njan den’, Jehovah foe den legre taki” (Maleaki 4:1). A pipel foe Jehovah sabi taki a sa kibri den na a ten dati, so leki fa ben kibri a nâsi foe en na jeje fasi ini 70 G.T. (Maleaki 4:2). O kolokoe den de foe abi a djaranti dati! Foe dati ede, te na a ten dati, meki ibriwan foe wi sori wi warderi èn lobi gi Jehovah foe di wi e tjari ala den di foe tin pisi foe wi, kon na ini a maksin. Dan wi kan abi a froetrow taki a sa tan blesi wi te leki sani no e mankeri moro.
[Foetoewortoe]
a Gi moro bodoi, loekoe A Waktitoren foe 15 juni 1987 bladzijde 4-10.
Joe kan froeklari disi?
◻ Oten Jehovah ben kon na a tempel nanga a boskopoeman foe en foe a froebontoe, ini a ten disi?
◻ Soema na a getrow en koni srafoe èn sortoe krin den ben abi fanowdoe baka 1918?
◻ Sortoe òfer na jeje fasi troe kresten e tjari gi Jehovah?
◻ San na a di foe tin pisi di kresten e kisi a kari foe tjari kon na ini a maksin?
◻ Foe sortoe blesi a pipel foe Gado e njanboen, foe di den e òfer den jeje di foe tin pisi?
[Prenki na tapoe bladzijde 15]
Wi di foe tin pisi na jeje fasi abi na ini toe na òfer di wi e òfer wi krakti èn san wi abi foe bow Kownoekondre zaal
[Prenki na tapoe bladzijde 16]
Foe di Jehovah en blesi ben de na tapoe a pipel foe en, foeroe bow ben de fanowdoe so srefi Kownoekondre zaal nanga kongreshal