Wroko leki skapoeman nanga wi Gran Mekiman

„Jehovah na mi Skapoeman. Noti sa mankeri mi. A e kowroe mi sili. A e tjari mi ini den pasi foe regtfardikifasi foe en nen ede.” — PSALM 23:1, 3.

1. Sortoe lobi kowroe-ati Jehovah e gi?

A DI foe toetentinadri Psalm, „wan singi foe David”, ben tjari kowroe-ati gi foeroe sili di weri. A ben gi den deki-ati foe abi a froetrow di a ben taki foe dati ini vers 6: „Foe troe, soso boen-ati nanga lobi boen-atifasi sa waka ala den dei foe mi libi na mi baka; èn mi sa libi foe troe na ini na oso foe Jehovah te foe têgo.” Na dati na san joe e angri foe en, foe tan foe ala ten na ini Jehovah en oso foe anbegi èn tjari kon na wán nanga en pipel di den e tjari kon makandra now komoto na ala nâsi foe grontapoe? „A skapoeman en opziener foe oen sili”, wi Gran Mekiman, Jehovah Gado, sa jepi joe foe doro a marki dati. — 1 Petrus 2:25.

2, 3. (a) Fa Jehovah e wèi a pipel foe en na wan lobifasi? (b) Fa na „ipi” foe Jehovah ben gro na wan fasi di seki sma troetroe?

² A Mekiman foe „njoen hemel nanga wan njoen grontapoe” de na Orgaman nanga a Moro Hei Opziener toe foe a kresten gemeente, „na osofamiri foe Gado” (2 Petrus 3:13; 1 Timoteus 3:15). A abi foeroe belangstelling foe wèi a pipel foe en, so leki Jesaja 40:10, 11 e taki krin: „Loekoe! A Soeverein Masra Jehovah srefi sa kon neleki wan tranga sma èn en anoe sa e tiri gi en. Loekoe! En paiman de nanga en èn a paiman foe wroko di a e pai de na en fesi. Neleki wan skapoeman a sa wèi en eigi ipi. Nanga na anoe foe en a sa tjari den pikin skapoe kon na wán èn na en borsoe a sa tjari den. Denwan di de na bobi a sa tjari nanga lobi.”

³ Na wan bradi fasi, na „ipi” disi abi na ini toe den sma di foe wan langa pisi ten kaba ben waka ini a kresten waarheid èn „pikin skapoe” di den ben tjari kon makandra ini ten di no pasa so langa srefisrefi — so leki den bigi nomroe foe sma di e kisi dopoe now na Afrika nanga Owstoe-Europa. A tranga anoe foe Jehovah, di e kibri sma, e tjari den kon na en borsoe. Ala di den ben de leki skapoe di ben lasi pasi, den kon now na ini wan krosibei matifasi nanga a lobi Gado nanga Skapoeman foe den.

A kompe Skapoeman foe Jehovah

4, 5. (a) Soema na a „toemoesi boen skapoeman” èn fa profeititori ben sori go na en? (b) Sortoe wroko foe prati sma Jesus e tiri, nanga sortoe toemoesi moi bakapisi?

⁴ Jesus Krestes „a toemoesi boen skapoeman” di e dini na a reti anoe foe en Tata na hemel, e poti prakseri toe na wan switifasi na tapoe den „skapoe”. A ben gi en libi abra foe tjari wini fosi gi a „pikin ipi” foe den salfoewan èn baka dati, ini a ten disi, gi a bigi ipi foe den „tra skapoe” foe en (Lukas 12:32; Johanes 10:14, 16). A Gran Skapoeman, Jehovah Gado, e taki nanga ala den skapoe disi te a e taki: „Dja mi de, misrefi, èn mi sa poti sani reti troetroe . . . na mindri wan skapoe nanga wan skapoe. Èn mi sa poti wan skapoeman gi den èn a moesoe gi den njanjan, ija, srefi mi foetoeboi David. Ensrefi sa gi den njanjan, èn ensrefi sa tron a skapoeman foe den. Èn misrefi, Jehovah, sa tron troetroe a Gado foe den èn mi foetoeboi David wan edeman na den mindri. Misrefi, Jehovah, ben taki so.” — Esekièl 34:20-24.

⁵ Den wortoe „mi foetoeboi David” e sori go na wan profeiti fasi na Krestes Jesus, a „siri” di ben kisi a kownoestoeroe foe David (Psalm 89:35, 36). Ini a ten disi foe a kisi di den nâsi e kisi kroetoe, Jehovah en kompe Skapoeman èn Kownoe, Krestes Jesus, a Manpikin foe David, e go doro foe prati den „skapoe” foe a libisma famiri foe denwan di e taki, dati den na „skapoe” ma di na troetroe „bokoboko” (Mateus 25:31-33). A „wan enkri skapoeman” disi poti toe foe gi njanjan na den skapoe. Fa wi e si wan toemoesi moi kontroe foe a profeititori disi ini a ten disi! Ala di politiekman e taki foe a tjari di den o tjari a libisma famiri kon na wán nanga jepi foe wan njoen grontapoe ordroe, a wan enkri Skapoeman e tjari den skapoe foe ala nâsi troetroe kon na wán nanga jepi foe a kotoigiwroko di e doe na ini foeroe tongo na wan fasi so leki soso Gado en organisâsi na grontapoe ben kan bigin nanga dati oiti.

6, 7. Fa „a getrow èn koni srafoe” ben hori ai na tapoe taki den skapoe kan kisi „njanjan na a joisti ten”?

⁶ Ala di den e panja a Kownoekondre boskopoe doronomo go na ini njoen kontren, „a getrow èn koni srafoe” foe den salfoe kresten, so leki den kisi a komando foe a wan enkri Skapoeman, e hori ai na tapoe taki ibri sani seti foe seni „njanjan [go] na a joisti ten” (Mateus 24:45). Foeroe foe den 33 bijkantoro, di abi wan drukkerij, foe a Waktitoren genootschap na heri grontapoe, e meki a druk foe boekoe go moro esi foe kan doro a tranga fanowdoe foe kisi moro èn moro boen bijbel boekoe nanga tijdschrift.

⁷ A Tiri Skin foe Jehovah Kotoigi e doe ala san den man foe meki a kwaliteit foe vertaling na ini so wan 200 tongo kon moro boen èn foe bigin foe vertaal sani na ini tra tongo, so leki fa dati de fanowdoe foe wroko ini a heri veld foe grontapoe. Disi de akroederi a komando di Jesus ben gi den disipel foe en na Tori foe den Apostel 1:8: „Oenoe sa kisi tranga te a santa jeje kon na oenoe tapoe èn oenoe sa de kotoigi foe mi . . . te na den moro farawe kontren foe grontapoe.” Boiti dati, a Njoen Grontapoevertaling foe den Santa Boekoe, di den druk a heri boekoe kaba noso pisi foe en ini 14 tongo, den e vertaal now na ini 16 tra tongo foe Europa, Afrika, nanga den Farawe Owstoesei pisi foe grontapoe.

Njanboen foe „a vrede foe Gado”

8. Fa den skapoe ben kisi foeroe blesi nanga jepi foe a froebontoe foe vrede di Jehovah ben sroto nanga den?

⁸ Nanga jepi foe en wan enkri Skapoeman, Krestes Jesus, Jehovah e meki wan „froebontoe foe vrede” nanga En skapoe, di e njan heri boen (Jesaja 54:10). Foe di den skapoe e poti bribi ini a broedoe di Jesus trowe, den man waka ini a leti (1 Johanes 1:7). Den e njanboen foe ’vrede foe Gado di e pasa ala prakseri èn di e kibri den ati foe den èn a jeje vermogen foe den nanga jepi foe Krestes Jesus’ (Filipisma 4:7). So leki fa Esekièl 34:25-28 e go doro foe taki, dan Jehovah e wèi den skapoe foe en go ini wan jeje paradijs, wan toemoesi prisiri situwâsi foe seikerfasi, boen di e gi kowroe-ati, nanga foeroe boen bakapisi. A lobi Skapoeman disi e taki foe den skapoe foe en: „Den sa moesoe sabi taki mi na Jehovah te mi e broko den oedoe foe a tjatjari foe den èn mi froeloesoe den foe na anoe foe denwan di ben gebroiki den leki srafoe. Èn den no sa tron moro langa wan sani di den nâsi kan ròs; . . . èn den sa tan troetroe ini seikerfasi, nanga no wan sma di e meki den e beifi.”

9. Sortoe okasi ben opo gi a pipel foe Gado nanga jepi foe a ’broko di den e broko den oedoe’?

⁹ Ini den jari di pasa no so langa, Jehovah Kotoigi na foeroe kondre ben ondrofeni kaba a broko di „den oedoe foe a tjatjari foe den” ben broko. Den fri foe preiki leki ini wan ten na fesi. Èn meki wi alamala, na ibri kondre, meki wan boen gebroiki foe a seikerfasi di Jehovah e gi te wi e go doro foe tjari a wroko kon na wan kaba. Fa Jehovah e gi wi wan korostoe firi, ala di wi e kon moro krosibei foe a ten foe a moro bigi banawtoe di a libisma famiri sa si wan ten! — Danièl 12:1; Mateus 24:21, 22.

10. Soema Jehovah ben gi foe asisteri a Toemoesi Boen Skapoeman Krestes Jesus èn fa na apostel Paulus ben taki nanga wan toe foe den sma disi?

¹⁰ Leki wan sreka gi a dei dati foe en atibron nanga na ogriwan, Jehovah ben sorgoe gi ondroskapoeman foe jepi a Toemoesi Boen Skapoeman, Krestes Jesus, foe sorgoe gi na ipi. Den e taki foe den na Openbaring 1:16 leki wan heri nomroe foe „ seibi stari” na ini Jesus reti anoe. Ini a fosi jarihondro, na apostel Paulus ben taki nanga wan skin foe den ondroskapoeman disi di ben teki presi gi trawan, ala di a ben taki: „Poti prakseri na oensrefi èn a heri ipi, di na mindri den a santa jeje ben poti oenoe leki opziener, foe wèi a gemeente foe Gado di a ben bai nanga a broedoe foe en eigi Manpikin” (Tori foe den Apostel 20:28). Ini a ten disi wan sani foe tin doesoendoesoen ondroskapoeman e dini ini den 69.558 gemeente na heri grontapoe.

Ondroskapoeman di e teki fesi!

11. Fa son skapoeman ben teki fesi ini kontren pe den e wroko foeroe na ini nanga boen bakapisi?

¹¹ Na foeroe presi den skapoeman disi moesoe teki fesi na kontren di den ben wroko kaba omeni leisi, den lasti ten disi. Fa den kan hori a faja foe na ipi na wan hei marki? Den skapoeman ben doe sani na wan fasi di den moesoe kisi prèise foe dati èn wan foe den fasi di den ben abi boen bakapisi nanga dati, ben de a poesoe di den ben poesoe a jepi pionierwroko nanga a gewoon pionierwroko. Foeroe skapoeman densrefi ben teki prati na a dienst disi èn srefi den preikiman di no man doe disi ben sori a pionierjeje, foe di den ben dini nanga wan prisiri di e jepi foe wini a mi-no-ke fasi ini a kontren (Psalm 100:2; 104:33, 34; Filipisma 4:4, 5). Na so fasi, ala di ogridoe nanga pikinmoro a de foe troetroe broeja e soekoe foe tapoe grontapoe, foeroe sma di gersi skapoe den ai e kon opo gi a Kownoekondre howpoe. — Mateus 12:18, 21; Romesma 15:12.

12. Sortoe serjoesoe problema de nanga a gro di den veld e gro so esi èn fa den e handri sontron nanga disi?

¹² Wan tra problema de, taki foeroetron nofo bekwaam skapoeman no de foe sorgoe gi na ipi. Pe esi-esi gro de, so leki na Owstoe-Europa, na drape foeroe njoen gemeente de, di no abi no wán owroeman di den poti. Skapoe di wani e jepi tjari a lai, ma den abi pikinso ondrofeni nomo èn jepi de fanowdoe foe gi leri na den skapoe di e kon ini den gemeente. Na kondre so leki Brasion, Meksikow nanga Saire, pe a gro e go esi srefisrefi, den abi foe gebroiki Kotoigi di jongoe srefisrefi, foe orga a diniwroko èn gi leri na tra njoen wan. Pionier e gi toemoesi boen jepi èn dja wan veld de pe sisa kan gi leri na njoen sisa. Jehovah e blesi den bakapisi nanga jepi foe en jeje. A gro e tan kon nomo. — Jesaja 54:2, 3.

13. (a) Gi san ala Kotoigi moesoe begi foe di a kotiwroko bigi so? (b) Fa den begi foe Gado en pipel ben kisi piki bifo èn na a ten foe a di foe toe grontapoefeti?

¹³ Na kondre pe a preikiwroko seti boen, na kondre pe skotoe ben poeroe no sa langa pasa, nanga na ini kontren di opo njoenjoen, den wortoe foe Jesus na Mateus 9:37, 38 e fiti ete: „Ija, a kotiwroko bigi, ma pikinso wrokoman de. Begi foe dati ede a Masra foe a kotiwroko dati a e seni wrokoman go ini a kotiwroko.” Wi moesoe begi, toe, taki Jehovah sa meki moro skapoeman kon. A ben sori taki a kan doe disi. Bifo èn na a ten foe a Di foe Toe Grontapoefeti, ogri-ati tiriman di gersi Asiriaman, ben proeberi foe pori Jehovah Kotoigi. Ma leki wan piki tapoe den begi foe den, Jehovah ben soifri na organisâsi foe den, ben meki a tron troetroe theokrasia èn ben gi den „skapoeman” di ben de fanowdoe.a Disi ben de ini akroederi nanga a profeititori: „Ini a tori foe na Asiriasma, te a e kon na ini a kondre foe wi èn te a e kon na ini den toren foe wi pe wi e libi, dan wi sa moesoe poti seibi skapoeman kontrari en, ija, aiti heiman foe a libisma famiri” — srefi moro leki san de nofo foe owroeman di gi densrefi foe teki fesi. — Mika 5:5.

14. Sortoe aparti fanowdoe de ini na organisâsi èn sortoe deki-ati den brada e kisi?

¹⁴ Wan toemoesi aparti fanowdoe de gi ala man-nengre Kotoigi di dopoe foe soekoe foe kisi moro grani (1 Timoteus 3:1). A situwâsi kon tranga fanowdoe moro nanga moro. A kaba foe a seti foe sani e kon moro krosibei esi-esi. Habakuk 2:3 e taki: „A fisjoen de ete gi a fasti ten èn a e tan feti foe go na a kaba èn a no sa froeteri no wan lei. . . . Sondro misi a sa kon. A no sa kon lati.” Brada, joe kan soekoe foe de bekwaam so taki joe kan kisi moro grani ini a skapoeman wroko disi — bifo a kaba kon? — Titus 1:6-9.

Doe skapoeman wroko na wan theokrasia fasi

15. Na sortoe fasi a pipel foe Jehovah de wan theokrasia tiri?

¹⁵ Foe abi wan dorodoro prati ini a gro foe Jehovah en organisâsi, a pipel foe en moesoe de theokrasia ini a fasi fa den e si sani. Fa den kan doe disi? We, san a wortoe „theokrasia” wani taki? Webster’s New Twentieth Century Dictionary (wan wortoeboekoe) e taki foe „theokrasia” leki „a tiri di Gado e tiri wan nâsi”. A de na a fasi disi taki a „santa nâsi” foe Jehovah en pipel de wan theokrasia tiri (1 Petrus 2:9; Jesaja 33:22). Leki memre noso kompe foe a theokrasia nâsi dati, troe kresten moesoe libi èn dini ala di den e gi jesi na a Wortoe foe Gado èn den markitiki foe en.

16. San na a moro prenspari fasi fa wisrefi kan sori taki wi abi theokrasia fasi?

¹⁶ Na apostel Paulus e froeklari krinkrin fa kresten moesoe abi theokrasia fasi. Fosi, a e taki, dati den „moesoe weri a njoen fasi fa wan sma moesoe de, di ben meki akroederi a wani foe Gado ini troetroe regtfardikifasi nanga loyaalfasi.” A kresten fasi fa wan sma de moesoe meki akroederi den regtfardiki markitiki foe Gado di a poti ini a Wortoe foe en. A moesoe de loyaal na Jehovah nanga den wet foe en. Baka di Paulus e agersi fa sma kan doe disi, a e gi deki-ati: „Waka na baka Gado, leki lobi pikin” (Efeisesma 4:24–5:1). Neleki pikin-nengre di e gi jesi, wi moesoe waka baka Gado. Dati na troetroe theokrasia di e wroko, foe di wi e sori taki Gado e tiri wi troetroe. — Loekoe toe Kolosesma 3:10, 12-14.

17, 18. (a) Na baka sortoe aparti eigifasi foe Gado, kresten di abi theokrasia fasi e waka? (b) Fa Jehovah ben poti krakti na tapoe en moro prenspari eigifasi, ini den wortoe di a ben taigi Moses, ma sortoe warskow A ben gi moro fara?

¹⁷ San na a moro prenspari eigifasi foe Gado di wi moesoe waka na baka dati? Na apostel Johanes e piki na 1 Johanes 4:8 te a e taki: „Gado na lobi.” Aiti vers moro fara, na vers 16, a e taki baka foe a prenspari gronprakseri disi: „Gado na lobi èn soema e tan ini a lobi e tan ini wanfasi nanga Gado èn Gado ini wanfasi nanga en.” A Gran Skapoeman, Jehovah, de a persoon foe lobi. Skapoeman di abi theokrasia fasi, e waka na en baka, foe di den e sori dipi lobi gi den skapoe foe Jehovah. — Teki gersi 1 Johanes 3:16, 18; 4:7-11.

¹⁸ A Gran Theokrasiaman ben tjari ensrefi kon na krin gi Moses leki „Jehovah, Jehovah, wan Gado di abi sari-atifasi èn boenfasi, di no e kisi atibron esi-esi èn di abi lobi boen-atifasi èn waarheid , di e kibri lobi boen-atifasi gi doesoendoesoen sma, di e gi pardon foe fowtoe nanga a pasa foe wet èn sondoe, ma a no sa gi kwetikweti fri foe strafoe, foe di a e tjari strafoe foe den fowtoe denki foe papa go tapoe manpikin èn tapoe granpikin na tapoe a di foe dri geslakti èn na tapoe a di foe fo geslakti” (Exodus 34:6, 7). Na so fasi Jehovah e poti krakti na tapoe den difrenti tori foe en toemoesi aparti theokrasia eigifasi, lobi, ala di na wan kraktifasi a e warskow taki a sa strafoe sma gi fowtoe te den e froedini dati.

19. Fa kresten skapoeman moesoe handri na wan theokrasia fasi, heri tra fasi leki den Fariseiman?

¹⁹ San a wani taki gi den sma di abi frantiwortoe posisi ini na organisâsi, foe abi theokrasia fasi? Jesus ben taki foe den sabiman foe Boekoe nanga den Fariseiman ini den dei foe en: „Den e tai hebi lai makandra èn e poti dati tapoe den skowroe foe den sma, ma srefi den no wani fasi den nanga den eigi finga” (Mateus 23:4). Fa dati ben kwinsi sma èn ben de sondro lobi! Troetroe theokrasia, noso a tiri foe Gado, wani taki foe tiri na ipi, foe di den e doe den lobi bijbel gronprakseri, no foe di den e poti hebi lai na den skapoe tapoe nanga seti di libisma meki èn di no abi wan kaba. (Teki gersi Mateus 15:1-9.) Na a srefi ten, skapoeman di abi theokrasia fasi, moesoe waka na Gado baka, foe di den e poti na a lobi foe den, wan kraktifasi foe hori a soifrifasi foe a gemeente. — Teki gersi Romesma 2:11; 1 Petrus 1:17.

20. Sortoe seti foe orga sani theokrasia skapoeman e erken?

²⁰ Troe skapoeman e erken taki na ini den lasti dei disi, Jesus ben poti en getrow èn koni srafoe tapoe ala den goedoe foe en èn taki santa jeje ben tiri a srafoe disi foe poti owroeman foe wèi den skapoe (Mateus 24:3, 47; Tori foe den Apostel 20:28). Foe dati ede, a abi di wan sma abi theokrasia fasi wani taki foe abi dipi lespeki gi a srafoe disi, gi den seti foe na organisâsi di a srafoe ben poti, èn gi a seti foe owroeman ini a gemeente. — Hebrewsma 13:7, 17.

21. Sortoe boen eksempel Jesus ben gi den ondroskapoeman?

²¹ Jesus srefi ben gi wan toemoesi boen eksempel, foe di a ben loekoe doronomo na Jehovah èn na a Wortoe foe en foe kisi tiri. A ben taki: „Mi no kan doe no wan sani foe misrefi; leki fa mi e jere, na so mi e kroetoe; èn a kroetoe di mi e tjari kon, de regtfardiki, bika mi no e soekoe mi eigi wani, ma a wani foe en di ben seni mi kon” (Johanes 5:30). Ondroskapoeman foe Masra Jesus Krestes moesoe kweki a srefi fasi foe abi sakafasi. Efoe wan owroeman ala ten e soekoe a Wortoe foe Gado foe kisi tiri, so leki fa Jesus ben doe, dan a abi troetroe theokrasia fasi. — Mateus 4:1-11; Johanes 6:38.

22. (a) Na sortoe fasi ala sma moesoe doe moeiti foe abi theokrasia fasi? (b) Sortoe switi kari Jesus e gi den skapoe?

²² Oenoe man-nengre di dopoe, oenoe soekoe foe kon bekwaam foe kisi grani ini a gemeente! Ala oen lobi skapoe, proeberi foe abi theokrasia fasi, ala di oenoe e waka baka Gado nanga Krestes ini a sori di oenoe e sori lobi! Meki den skapoeman nanga na ipi prisiri na a srefi fasi bika den ben piki tapoe a kari foe Jesus: „Kon na mi, oenoe alamala di e naki oenoe skin èn di abi hebi lai èn oenoe sa feni kowroe-ati gi oenoe sili. Teki mi tjatjari na oenoe tapoe èn leri foe mi, bika mi abi safrifasi èn sakafasi foe ati èn oenoe sa feni kowroe-ati gi oen sili. Bika mi tjatjari safoe èn mi lai lekti.” — Mateus 11:28-30.

[Foetoewortoe]

Joe kan froeklari disi?

◻ San na a „ipi” foe Jehovah èn soema de na ini toe?

◻ Fa Jesus ben handri leki „a toemoesi boen skapoeman” ini a fosi jarihondro èn ini a ten disi?

◻ Sortoe prenspari ròl den ondroskapoeman e plèi ini a sorgoe di den e sorgoe gi na ipi?

◻ San a wortoe „theokrasia” wani taki troetroe?

◻ Fa wan kresten — spesroetoe wan ondroskapoeman — moesoe handri so taki a abi theokrasia fasi?

[Prenki na tapoe bladzijde 14]

Neleki wan skapoeman di gi ensrefi foe dini, Jehovah e sorgoe gi na ipi foe en.

[Prenki na tapoe bladzijde 16]

Foe waka baka Jehovah Gado en eigifasi lobi, na theokrasia di e doe wan sani