De gosontoe ini froestan — A kaba de krosibei
„A kaba foe ala sani kon krosibei kaba. De, foe dati ede, gosontoe ini froestan èn de na ai ini a tori foe begi.” — 1 PETRUS 4:7.
1. (a) Sortoe froewakti foe wan kerki tiriman nanga den bakaman foe en no ben kon troe? (b) Sortoe aksi wi kan poti gi wisrefi, bika son froewakti no kon troe?
„MI BEN kisi wan kari foe Gado ini a lasti begi dineti. A ben taki dati 116.000 sma ben sa opo go na hemel èn den grebi foe 3,7 miljoen bribiman di dede sa opo go na hemel.” Na so wan tiriman foe a kerki di nen Zending foe den Dei di e Kon, ben taki a neti foe 28 oktober 1992, a dei di den ben bereken nanga jepi foe profeititori. Ma di 29 oktober doro, no wan sma ben opo go na hemel èn no wan grebi foe dedesma ben opo. Na presi foe den teki den esi-esi go na hemel, den sma disi na Korea di e bribi ini a kroetoedei, ben si taki 29 oktober ben de soso wan gewoon dei. Den joeroe di sma poti foe a kroetoedei ben e kon èn e go, ma den sma di e taki foe a kroetoedei no lasi-ati. San kresten moesoe doe? Den moesoe stòp foe bribi taki a kaba e kon krosibei esi-esi?
2. Soema ben taki nanga den apostel foe wan kroetoedei ini a ten di ben de na den fesi èn na ondro sortoe omstandigheid den ben leri disi?
2 Foe gi wan piki, dan meki wi memre na okasi di Jesus ben abi wan takimakandra nanga den disipel foe en den wawan. Drape ini a distrikt Cesarea Filipi, noord-owstoesei foe a Se foe Galilea, nanga a boen bigi bergi Hermon leki wan moi bakagron, den ben jere en taki langalanga taki sma ben sa kiri en (Mateus 16:21). Tra wortoe di ben o poti den na prakseribroki, ben sa kon baka dati. Baka di Jesus ben tjari kon na krin gi den, taki foe waka na en baka wani taki foe libi wan doronomo libi foe òfer densrefi, a ben warskow: „A Manpikin foe libisma sa kon troetroe ini a glori foe en Tata nanga den engel foe en èn dan a sa pai ibriwan sma akroederi a libi èn waka foe en” (Mateus 16:27). Jesus ben taki foe wan kon di ben de na den fesi ete. Ma na a okasi disi, a ben sa de wan Kroetoeman. Na a ten dati ala sani ben sa anga foe a feni noso no feni foe wan sma di e waka getrow na en baka. A kroetoe foe Jesus ben sa abi en fondamenti na tapoe a fasi fa sma e tjari densrefi, awansi omeni goedoe a sma dati abi noso no abi ini grontapoe. Den disipel foe en ben moesoe hori a tori disi boen na prakseri (Mateus 16:25, 26). Foe dati ede, a de Jesus Krestes srefi di e froeteri den bakaman foe en foe wakti tapoe en glori kon, nanga a kroetoe foe en.
3. Fa Jesus ben agersi a seikerfasi foe a kon di a ben sa kon?
3 San Jesus e taki baka dati e agersi a seikerfasi foe a kon foe en ini a ten di ben de na den fesi ete. Nanga foeroe krakti a e taki: „Foe troe, mi e taigi oenoe taki sonwan foe den di tanapoe dja, no sa si dede kwetikweti bifo den si a Manpikin foe libisma e kon ini en kownoekondre” (Mateus 16:28). Den wortoe disi e kon troe siksi dei na baka. A kefarlek moi fisjoen foe Jesus transfiguratie e froewondroe den krosibei disipel foe en. Den e si troetroe taki Jesus fesi e skèin leki son èn den krosi foe en e brenki fan. A transfiguratie ben de wan sani di ben sori Krestes en glori nanga Kownoekondre, na fesi. Fa dati na wan tranga boeweisi taki Kownoekondre profeititori troe! Fa a de wan krakti sani foe boeweigi den disipel foe de gosontoe ini froestan! — 2 Petrus 1:16-19.
Foe san ede a de tranga fanowdoe foe de gosontoe ini froestan
4. Foe san ede kresten moesoe de na ai na jeje fasi foe a kon di Krestes sa kon?
4 Moro mendri leki wan jari na baka, wi e feni Jesus e sidon na tapoe na Olijfbergi, na ini wan takimakandra di a abi nanga den disipel foe en den wawan baka. Ala di den e loekoe doen go na a foto Jerusalem, a e froeklari san a marki foe en denoja sa de ini a ten di e kon èn baka dati a e warskow: „Tan na ai, foe dati ede, bikasi oenoe no sabi sortoe dei oen Masra e kon.” Ala ten den bakaman foe en doronomo moesoe de na ai, foe di sma no sabi oten a sa kon. Den moesoe de klariklari gi dati. — Mateus 24:42.
5. Fa wi kan agersi a fanowdoe foe de na ai?
5 Ini a fasi fa a e kon, Masra gersi wan foefoeroeman. A e go doro foe taki: „Ma sabi wan sani, taki efoe na ososma ben sabi na o sortoe joeroe foe a neti a foefoeroeman ben sa kon, a ben sa tan na ai èn no ben sa gi pasi taki a broko go ini na oso foe en” (Mateus 24:43). Wan foefoeroeman no e meki bekènti na a ososma oten a sa kon; en moro prenspari fetisani na a kon di a e kon onfroewakti. Foe dati ede, na ososma moesoe de na ai doronomo. Ma gi a getrow kresten, a wakti di a moesoe de na wakti sondro foe weri no de foe di a frede. Na presi foe dati, wan fajafaja froewakti foe a kon di Krestes sa kon ini glori foe tjari a Milenium foe vrede, e boeweigi en.
6. Foe san ede wi moesoe de gosontoe ini froestan?
6 Ma nanga ala a wakti di sma e wakti, noiti den sa kan rai na fesi sortoe dei sa de a joisti dei di a sa kon. Jesus e taki: „Sori srefi toe, foe dati ede taki oenoe de klariklari, bika a Manpikin foe libisma e kon na wan joeroe di oenoe no ben prakseri” (Mateus 24:44). Foe dati ede a de fanowdoe foe de gosontoe ini froestan. Efoe wan kresten ben sa denki taki na wan dei so Krestes no ben sa kon, dan kande dati ben sa de a srefi dei di a ben kon! A no de foe taki, dati ini a ten di pasa getrow kresten nanga den moro boen prakseri, ben proeberi serjoesoe foe taki na fesi oten a kaba ben sa kon. Tokoe Jesus en warskow ben sori foe de troe ibri tron baka: „Ini a tori foe a dei èn a joeroe dati, no wan sma no sabi, no den engel foe hemel, no a Manpikin, ma a Tata wawan.” — Mateus 24:36.
7. Fa wi moesoe libi a libi foe wi foe kan de bakaman foe Krestes?
7 Na sortoe bosroiti wi moesoe kon, foe dati ede? Taki foe de bakaman foe Krestes, wi abi foe libi ala ten nanga a bribi taki a kaba foe na ogri seti foe sani disi sa kon ibri momenti.
8. San ben de wan prenspari marki foe kresten sensi den fosi dei foe a krestendom?
8 So wan fasi foe si sani ala ten ben de wan prenspari marki foe den kresten, so leki grontapoe historiaman nanga bijbel sabiman e erken. Den skrifiman foe The Translator’s New Testament foe eksempre, skrifi na ondro a wortoe „Dei” ini na index foe den: „Kresten foe a N[joen] T[estamenti] ten ben libi ini a froewakti foe a Dei (dati na a ten) te a grontapoe foe a ten disi nanga ala en takroe èn ogri sani ben sa tjari kon na wan kaba èn Jesus ben sa drai kon na grontapoe foe kroetoe a heri libisma famiri, ben sa poti wan njoen pisi ten foe vrede èn ben sa bigin foe tiri leki Masra na heri grontapoe.” Encyclopædia Britannica e skrifi: „A bradi di a krestendom e bradi ensrefi na wan toemoesi aparti fasi abi langalanga foe doe nanga a froewakti di kresten e froewakti a ten foe a kaba, ini a fasi foe wan froewakti di kan kon troe ibri momenti, taki Krestes sa kon baka. A froewakti di Kresten e froewakti a ten foe a kaba noiti ben de foe sidon wakti nomo e angri foe Gado Kownoekondre di e kon.”
San a wani taki foe de gosontoe ini froestan
9. Foe san ede Petrus ben kan tan abi froetrow, ala di wan toe foe den froewakti foe en foe a Mesias no ben de joisti?
9 So wan 30 jari baka den froetrow takimakandra di Jesus ben abi nanga den moro krosibei disipel foe en, na apostel Petrus no ben weri foe tan froewakti a kon foe a kaba. Ala di den froewakti, di en nanga den kompe disipel foe en ben abi fosi foe a Mesias, no ben de joisti, a ben tan froetrow taki Jehovah en lobi nanga makti ben gi a djaranti taki a howpoe foe den ben sa kon troe (Lukas 19:11; 24:21; Tori foe den Apostel 1:6; 2 Petrus 3:9, 10). A e taki foe wan sani di sma ben jere doronomo nanga jepi foe den Griki Boekoe te a taki: „A kaba foe ala sani kon krosibei.” Baka dati a e gi tranga na kompe kresten: „De, foe dati ede, gosontoe ini froestan èn de na ai ini a tori foe begi.” — 1 Petrus 4:7.
10. (a) San a wani taki foe de gosontoe ini froestan? (b) San de ini a tori te wi e si afersi ini a joisti lin nanga a wani foe Gado?
10 Foe de „gosontoe ini froestan” no wani taki foe de koni te joe e loekoe en leki fa grontapoe e si en. Jehovah e taki: „Mi sa meki a koni foe den koniwan lasi gowe èn a froestan foe den sma di sabi sani mi no sa loekoe na wan ai” (1 Korentesma 1:19). A wortoe di Petrus e gebroiki sa kan wani taki „foe de nanga krin froestan”. A krin fasi disi na froestan sei abi foe doe nanga na anbegi foe wi. Foe dati ede, foe di wi de fasti ini froestan, wi e si sani ini a joisti fasi fa den e akroederi nanga a wani foe Jehovah; wi e froestan sortoe sani de prenspari èn sortoe sani no de prenspari (Mateus 6:33, 34). Awansi a kaba kan kon ibri momenti, wi no e go libi wan law fasi foe libi; èn a no de so toe taki wi no abi bisi nanga a pisi ten di wi e libi na ini. (Teki gersi Mateus 24:37-39.) Na presi foe dati wi e kisi tiri nanga jepi foe bescheidenfasi nanga balansi ini denki, a fasi foe denki èn firi, nanga a fasi foe tjari wisrefi, di wi e sori na a fosi presi gi Gado („de na ai ini a tori foe begi”) èn baka dati gi den sma na wi sei („abi tranga lobi gi makandra”). — 1 Petrus 4:7, 8.
11. (a) San a wani taki foe „kon njoen ini a krakti di e poesoe a froestan foe wi”? (b) Fa wan njoen krakti foe a froestan e jepi wi foe teki boen bosroiti?
11 Foe de gosontoe ini froestan wani taki dati wi ben „tron njoen sma ini a krakti di e poesoe oen froestan” (Efeisesma 4:23). Foe san ede tron njoen sma? Foe di wi kisi onvolmaaktifasi èn e libi ini wan sondoe kontren, meki wan firi di de kontrari na abi di wan sma moesoe abi jejefasi e basi wi froestan. A krakti dati doronomo e poesoe prakseri nanga firi go na a sei foe sani na skin fasi èn foe prakseri wisrefi nomo. Foe dati ede te wan sma e tron wan kresten, a abi wan njoen krakti fanowdoe noso wan fasi foe denki di e basi en èn di sa poesoe den prakseri foe en go na a joisti sei, na a jeje sei, go na a de di wan sma de klariklari foe òfer ensrefi. So boen, te a e tanapoe na fesi a teki di a moesoe teki sani na mindri trawan, foe eksempre, ini a tori foe kisi leri, a wroko foe en libi, wroko, ontspanning, prisiriten, a fasi fa foe weri krosi noso awansi sortoe sani toe, dan en fosi firi sa de foe si na afersi foe wan jeje sei na presi foe si en foe wan skin sei èn gridi sei. A njoen fasi disi foe denki e meki a de moro makriki foe teki bosroiti ini afersi nanga wan gosontoefasi foe froestan èn nanga wan fasi foe tan na ai taki a kaba de krosibei.
12. Fa wi kan tan „gosontoe ini bribi”?
12 Foe de gosontoe ini froestan wani taki dati wi abi wan boen gosontoe na jeje fasi. Fa wi kan tan „gosontoe ini bribi”? (Titus 2:2) Wi moesoe gi a froestan foe wi a joisti sortoe njanjan (Jeremia 3:15). Wan boen gwenti foe njan Gado Wortoe foe waarheid nanga a jepi foe a wroko di a santa jeje foe en e wroko tapoe wi, sa jepi wi foe tan hori wi balansi na jeje fasi. Foe dati ede doronomo persoonlijk studie, so boen leki velddienst, begi èn kresten demakandra de prenspari.
Fa wan gosontoefasi foe froestan e kibri wi
13. Fa gosontoefasi foe froestan e kibri wi foe no meki don fowtoe?
13 Foe de gosontoe foe froestan kan kibri wi foe doe wan don sani di kan meki wi lasi wi têgo libi. Fa disi man? Na apostel Paulus e taki foe „a wet foe a froestan”. Gi wan sma di de gosontoe ini bribi, a wet dati foe a froestan e kisi tiri foe wan sani di a abi prisiri na ini, dati wani taki „a wet foe Gado”. A troe taki a „wet foe sondoe”, e feti nanga a wet foe a froestan. Ma a kresten kan wini a strei nanga a jepi foe Jehovah. — Romesma 7:21-25.
14, 15. (a) San na den toe krakti di e feti nanga makandra foe basi a froestan? (b) Fa wi kan wini a feti foe a froestan?
14 Paulus e go doro foe sori wan krin difrenti na mindri a froestan di a sondoe skin e basi, di e poti a prakseri foe en na tapoe a lobi di a lobi prisiri, èn a froestan di a jeje foe Gado e basi, di e poti en prakseri na tapoe wan libi foe òfer ensrefi na a dienst foe Jehovah. Paulus e skrifi ini Romesma 8:5-7: „Den sma di de ini akroederi nanga a skin e poti a prakseri foe den na tapoe den sani foe a skin, ma den sma di de ini akroederi nanga a jeje, na tapoe den sani foe a jeje. Bika a denki foe a skin, wani taki dede, ma a denki foe a jeje, wani taki libi èn vrede; bika a denki foe a skin wani taki feantifasi nanga Gado, foe di a no de na ondro a wet foe Gado èn a no kan de dati toe.”
15 Baka dati Paulus e froeklari ini vers 11, fa a froestan di e wroko makandra nanga a santa jeje e wini a strei: „Efoe now a jeje foe en di opo Jesus baka foe dede sa de na ini oenoe, en di opo Krestes Jesus baka foe dede sa meki den skin foe oenoe di sa dede, kon na libi toe nanga jepi foe en jeje di e tan na ini oenoe.”
16. Gi sortoe tesi wan gosontoefasi foe froestan e kibri wi?
16 Foe dati ede, te wi de gosontoe ini froestan, wi no sa meki den tesi di de na ala sei foe a grontapoe disi, kori wi, a grontapoe di abi leki marki taki sma lobi ala sortoe prisiri sondro foe poti wan skotoe, sani na skin fasi nanga seks jajo libi. A gosontoe froestan foe wi sa froeteri wi foe „lowe gi hoeroedoe” èn kibri wisrefi gi den rampoe bakapisi foe dati (1 Korentesma 6:18). A gosontoe fasi foe wi foe si sani sa meki wi poti Kownoekondre afersi na a fosi presi èn a sa kibri a denki foe wi te wi e kisi kori nanga jepi foe den sani foe wan grontapoe wroko foe wi libi, di kan swaki a matifasi foe wi nanga Jehovah e pristeri.
17. Fa wan pionier sisa ben sori taki a ben abi wan gosontoefasi foe froestan di a ben kisi froeplekti na monisei?
17 Ini wan waran kondre na Zuid-owstoe Asia, foe eksempre, joe abi wan jongoe sisa di ben poti Kownoekondre afersi na a fosi presi. A ben kweki wan lobi gi a foeroeten diniwroko. Ini a kondre dati moro foeroe foe den wrokope e aksi foe sma e wroko siksi noso seibi dei a heri dei. Baka di a ben kaba nanga na universiteit, en papa, di no ben de wan foe Jehovah Kotoigi, ben froewakti taki a ben sa go wroko foeroe moni gi na osofamiri. Ma foe di a ben abi wan tranga winsi foe go pionier, a ben feni wan afoedei wroko èn ben bigin nanga a pionierwroko. Disi ben meki a papa foe en atibron èn a ben frede en taki a ben o trowe den sani foe en go na strati. Foe di a papa ben e dobbel, a ben abi foeroe paiman èn a ben froewakti taki en oemapikin ben moesoe pai den paiman foe en. A moro jongoe brada foe a sisa ben studeri na a universiteit èn foe di den ben abi paiman, moni no ben de moro foe pai a skoro foe en. A moro jongoe brada ben pramisi taki efoe a sisa ben sa jepi en, a ben sa sorgoe gi a famiri te en ben o feni wan wroko. Na ati foe a sisa ben prati na mindri a lobi gi en brada èn a lobi gi a pionierwroko. Baka di a ben prakseri boen foe na afersi, a ben bosroiti foe go doro nanga a pionierwroko èn soekoe wan tra wroko. Leki wan piki tapoe den begi foe en, a ben feni wan boen wroko pe a no wawan ben man foe gi jepi na monisei na en osofamiri nanga en brada, ma a ben man go doro nanga en fosi lobi, a pionierwroko.
Soekoe a jepi foe Jehovah foe tan hori wan gosontoefasi foe froestan
18. (a) Foe san ede son sma e lasi-ati? (b) Sortoe bijbel tekst sa kan gi trowstoe na den wan di lasi-ati?
18 Wan toe bakaman foe Krestes kan feni en wan moeilek sani kande foe tan hori wan gosontoefasi foe froestan. Den kan kon lasi den pasensi foe di a disiten ogri seti foe sani e tan moro langa leki den ben froewakti. Den kan abi a firi taki den e lasi-ati. Ma a kaba sa kon. Jehovah pramisi dati (Titus 1:2). Èn so a sa de toe nanga en pramisi grontapoe Paradijs. Jehovah e djaranti dati (Openbaring 21:1-5). Te a njoen grontapoe e kon, „wan bon foe libi” sa de gi ala den sma di ben tan hori wan gosontoefasi foe froestan. — Odo 13:12.
19. Fa wi kan tan hori wan gosontoefasi foe froestan?
19 Fa wi kan tan hori wan gosontoefasi foe froestan? Soekoe a jepi foe Jehovah (Psalm 54:4). Tan krosibei foe en. Fa wi e prisiri taki Jehovah e angri foe wi de krosibei foe en! „Kon krosibei foe Gado èn en sa kon krosibei na joe”, na so a disipel Jakobus e skrifi (Jakobus 4:8). Paulus e taki: „Prisiri ala ten ini Masra. Ete wan tron mi sa taki: Prisiri! Meki ala sma kon sabi a froestanfasi foe oenoe. Masra de krosibei. No broko oen ede foe noti, ma meki ini ala sani nanga jepi foe begi nanga djeme, makandra nanga taki tangi, oen tranga begi kon bekènti na Gado; èn a vrede foe Gado di e pasa ala prakseri sa kibri oen ati nanga oen jeje koni nanga jepi foe Jesus Krestes” (Filipisma 4:4-7). Èn te den hebi foe a seti foe sani disi di e dede gowe sori foe de toemoesi hebi foe tjari, dan trowe den na tapoe Jehovah èn ensrefi sa jepi joe. — Psalm 55:22.
20. Sortoe fasi foe waka nanga libi wi moesoe tan hori, so leki fa skrifi na 1 Timoteus 4:10?
20 Ija, a kaba de krosibei, de foe dati ede, gosontoe ini froestan! A ben de wan boen rai di gi 1900 pasa kaba; a de wan prenspari rai di gi ini a ten disi. Meki wi go doro foe gebroiki den sani di wi kan doe nanga wan gosontoe froestan foe prèise Jehovah, foe di a e go doro foe tiri wi foe go sondro kefar na ini en njoen grontapoe. — 1 Timoteus 4:10.
Fa joe ben sa piki?
◻ San na wan gosontoefasi foe froestan?
◻ Foe san ede a de so tranga fanowdoe foe de gosontoe ini froestan?
◻ Fa wi kan kon njoen ini a krakti di e poesoe a froestan foe wi?
◻ Sortoe doronomo feti wi moesoe feti ini a froestan foe wi?
◻ Fa wi kan tan hori wan gosontoefasi foe froestan?
[Prenki na tapoe bladzijde 20]
Foe di wi e kon moro krosibei foe Gado ini begi, dan dati e jepi wi foe tan hori wan gosontoefasi foe froestan
[Prenki na tapoe bladzijde 21]
Efoe wi de gosontoe ini froestan, den sani foe a grontapoe disi no sa kori wi