„Ondrosoekoe mi, o Gado”
„Ondrosoekoe mi, o Gado, èn sabi mi ati. . . . Tjari mi na tapoe a pasi foe ten di no abi marki.” — PSALM 139:23, 24.
1. Fa Jehovah e handri nanga den foetoeboi foe en?
WI ALAMALA lobi en te wan sma di e froestan wi, e handri nanga wi, wan sma di e hori wi omstandigheid na prakseri, wan sma di e jepi wi te wi e meki wan fowtoe, wan sma di no e aksi moro foe wi leki wi man doe. Jehovah Gado e handri na a fasi dati nanga den foetoeboi foe en. Psalm 103:14 e taki: „Ensrefi sabi heri boen fa wi meki, e memre taki wi na doti.” Èn Jesus Krestes di e prenki en Tata na wan volmaakti fasi, e gi wi a waran kari: „Kon na mi, oen alamala di e wroko tranga èn di abi hebi lai èn oenoe sa feni kowroe-ati. Teki mi tjatjari na oen tapoe [noso, „Kon nanga mi na ondro mi tjatjari”, foetoewortoe] èn leri foe mi, bika mi abi safrifasi èn sakafasi foe ati èn oenoe sa feni kowroe-ati gi oen sili. Bika mi tjatjari safoe èn mi lai lekti.” — Mateus 11:28-30.
2. Poti a fasi fa Jehovah e si sani kontrari a fasi fa libisma e si sani ini a tori foe (a) Jesus Krestes èn (b) den bakaman foe Krestes.
2 A fasi fa Jehovah e loekoe den foetoeboi foe en de nofotron heri tra fasi leki di foe libisma. A e loekoe afersi foe wan tra sei èn a e hori tori na prakseri, di a kan taki trawan no sabi noti foe dati. Di Jesus Krestes ben de na grontapoe, den ben „wisiwasi en èn den ben wai pasi gi en”. Den sma di no ben bribi na ini en leki a Mesias, „ben si en leki noti” (Jesaja 53:3; Lukas 23:18-21). Ma tokoe, ini den ai foe Gado a ben de „[Gado] Manpikin, a lobiwan”, di en Tata ben taki foe en: „Mi feni joe boen” (Lukas 3:22; 1 Petrus 2:4). Na mindri den bakaman foe Jesus Krestes, sma de di trawan e si leki noti, bika den no goedoe na skinfasi èn den e horidoro na ondro foeroe banawtoe. Ma tokoe, ini den ai foe Jehovah nanga en Manpikin, den sma disi kan goedoe (Romesma 8:35-39; Openbaring 2:9). Foe san ede wan difrenti de ini a fasi fa den e si sani?
3. (a) Foe san ede a fasi fa Jehovah e si sma de nofotron heri tra fasi leki a fasi fa libisma e si den? (b) Foe san ede a de toemoesi prenspari gi wi foe ondrosoekoe a sortoe sma di wi de foe inisei?
3 Jeremia 11:20 e piki: „Jehovah . . . e ondrosoekoe den niri èn na ati.” A e si san wi de foe inisei, srefi den sei foe a sma di wi de, di kibri gi den ai foe tra sma. Te a e ondrosoekoe sani, dan a e poti a prakseri foenamkoe na tapoe den eigifasi èn den kondisi di de prenspari foe abi wan boen matifasi nanga en, den eigifasi di sa doe wi boen foe wan langa pisi ten. A e gi wi wan korostoe firi foe sabi disi; a e meki wi prakseri serjoesoe toe foe den sani disi. Foe di Jehovah e poti prakseri na tapoe san wi de foe inisei, a de prenspari gi wi foe ondrosoekoe san wi de foe inisei, efoe wi sa go boeweisi foe de den sortoe sma di a wani ini en njoen grontapoe. A Wortoe foe en e jepi wi foe doe so wan ondrosoekoe. — Hebrewsma 4:12, 13.
O warti den prakseri foe Gado de!
4. (a) San ben boeweigi a psalm singiman foe taki dati den prakseri foe Gado ben de warti gi en? (b) Foe san ede den moesoe de warti gi wi?
4 Baka di a psalm singiman David ben prakseri dipi foe a bradi èn a dipi foe a sabi di Gado sabi den foetoeboi foe en, so boen leki foe a toemoesi aparti fasi fa Gado man gi osortoe jepi toe di den abi fanowdoe, a ben skrifi: „So boen, o warti den prakseri foe joe de gi mi!” (Psalm 139:17a) Den prakseri dati, di de foe si ini a skrifi Wortoe foe en, hei moro iniwan prakseri foe libisma, awansi o koni den prakseri foe den gersi kande (Jesaja 55:8, 9). Den prakseri foe Gado e jepi wi foe poti wi prakseri na tapoe den sani di de troetroe prenspari ini wi libi èn foe de nanga faja ini a diniwroko foe en (Filipisma 1:9-11). Den e sori wi foe si afersi, leki fa Gado e si den. Den e jepi wi foe de eerlijk nanga wisrefi, foe erken na wan eerlijkfasi na wisrefi a sortoe sma di wi de troetroe, dipi ini wi ati. Joe wani foe doe dati?
5. (a) Sortoe sani a Wortoe foe Gado e gi wi a deki-ati foe kibri „moro leki ala tra sani”? (b) Fa a tori di skrifi ini bijbel foe Kain kan de wan wini gi wi? (c) Fa a Wet foe Moses kan jepi wi foe froestan san e plisi Jehovah, ala di wi no de na a Wet ondro?
5 Libisma abi a firi foe poti toemoesi foeroe krakti na tapoe fa den e loekoe na dorosei, ma den Boekoe foe bijbel e gi wi a rai: „Kibri joe ati, moro leki ala tra sani di de foe kibri” (Odo 4:23). Nanga komando so boen leki eksempre, bijbel e jepi wi foe doe dati. A e froeteri wi taki Kain ben doe san a ben moesoe doe foe tjari ofrandi gi Gado, ala di a ben meki takroe prakseri kon ini en ati èn baka dati a no ben wani si en brada Abel na ai. Èn bijbel e gi wi a deki-ati foe no de leki en (Genesis 4:3-5; 1 Johanes 3:11, 12). A e skrifi foe a Wet foe Moses di e aksi foe sma e gi jesi. Ma a e poti krakti toe na tapoe a moro prenspari sani di a Wet ben aksi, taki den sma di ben anbegi Jehovah ben moesoe lobi en nanga den heri ati, froestan, sili èn krakti; èn a e taki dati san ben de prenspari baka dati, ben de a komando taki den ben moesoe lobi a sma na den sei leki densrefi. — Deuteronomium 5:32, 33; Markus 12:28-31.
6. Sortoe aksi wi moesoe poti gi wisrefi, te wi e poti Odo 3:1 ini wi libi?
6 Ini Odo 3:1 wi e kisi a deki-ati foe no hori wisrefi na Gado wet nomo, ma foe de seiker taki a gi di wi e gi jesi na wan fasi foe sori san de troetroe na ini wi ati. Wi alamala moesoe aksi wisrefi: ’A de so toe nanga a gi di mi e gi jesi na den sani di Gado e aksi?’ Efoe wi sabi taki na ini wan toe afersi a reide di e boeweigi wi foe doe sani noso a denki foe wi no boen so — èn no wan foe wi kan taki dati wi de sondro fowtoe — dan wi moesoe aksi wisrefi: ’San mi e doe foe kenki sani, meki a situwâsi kon moro boen?’ — Odo 20:9; 1 Johanes 1:8.
7. (a) Fa a sani di Jesus ben taki foe den Fariseiman na Mateus 15:3-9 kan jepi wi foe kibri na ati foe wi? (b) Sortoe situwâsi kan aksi foe wi dati wi e teki krakti bosroiti gi wisrefi foe gi a froestan èn na ati foe wi tranga leri?
7 Di den djoe Fariseiman ben doe neleki den ben gi grani na Gado, ala di den ben horibaka na wan trikifasi gi doe di ben abi den eigi belang nomo na prakseri, Jesus ben kari den hoigriman èn a ben sori taki na anbegi foe den ben de foe soso (Mateus 15:3-9). Jesus ben warskow toe taki foe plisi Gado, di e si na ati, a no de nofo foe abi wan libi, di foe dorosei e sori boen na moreel sei, ma na a srefi ten, wi e tan denki hoeroedoe sani, so taki wi kan ondrofeni prisiri foe sekslostoe. A kan de fanowdoe foe wi teki krakti bosroiti foe gi tranga leri na a froestan èn na a ati foe wi (Odo 23:12; Mateus 5:27-29). So wan tranga leri de fanowdoe toe efoe, leki wan bakapisi foe wi grontapoe wroko, den marki foe wi ini a tori foe kisi leri noso san wi e teki leki ontspanning, wi e tron sma di e waka baka grontapoe, èn e gi pasi taki a e meki wi kon tron sma akroederi den markitiki foe grontapoe. Meki wi no frigiti noiti taki a disipel Jakobus ben kari den sma di e doe neleki den de foe Gado, ma di wani foe de mati foe grontapoe, „soetaman”. Foe san ede? Bika „heri grontapoe de ini a makti foe na ogriwan”. — Jakobus 4:4; 1 Johanes 2:15-17; 5:19.
8. San wi moesoe doe foe abi wini dorodoro foe den warti prakseri foe Gado?
8 Foe abi dorodoro wini foe a fasi fa Gado e prakseri foe den afersi disi èn tra afersi toe, wi moesoe poti ten na wan sei foe leisi den noso foe arki den. Boiti dati, wi moesoe studeri den, taki foe den èn prakseri dipi foe den. Foeroe sma di e leisi A Waktitoren, e go doronomo na den gemeente konmakandra foe Jehovah Kotoigi, pe den e taki makandra foe bijbel. Den e bai ten foe tra sani di den ben kan doe, foe man go na den konmakandra disi (Efeisesma 5:15-17). Èn san den e kisi foe dati, warti moro leki iniwan goedoe na skin fasi. A no so joe e firi?
9. Foe san ede son sma di e go na den kresten konmakandra e go moro esi na fesi leki trawan?
9 Ma son sma di e go na den konmakandra disi, e go na fesi na jeje fasi moro esi leki tra sma. Den e gebroiki a waarheid moro foeroe ini a libi foe den. San na a reide gi disi? Nofotron, a moro prenspari reide na a faja foe den gi persoonlijk studie. Den e froestan taki wi no e libi foe brede wawan; njanjan na jeje fasi ibri dei de nètso prenspari leki foe njan doronomo njanjan na skinfasi (Mateus 4:4; Hebrewsma 5:14). So boen, den e doe moeiti foe gi awansi fa a no fa, pikinso ten ibri dei foe leisi bijbel noso poeblikâsi di e tjari bijbel kon na krin. Den e sreka densrefi gi gemeente konmakandra, e studeri den bijbellès na fesi èn den e soekoe den bijbeltekst. Den e doe moro leki foe leisi a materiaal nomo; den e prakseri dipi foe dati. A fasi fa den e studeri abi na ini toe, taki den e prakseri serjoesoe foe fa den sani di den e leri, moesoe abi krakti na tapoe den eigi libi. Ala di a jeje fasi foe denki foe den e gro, den e kon firi neleki fa a psalm singiman ben firi di ben skrifi: „O fa mi lobi joe wet! . . . Den froemane foe joe moi srefisrefi.” — Psalm 1:1-3; 119:97, 129.
10. (a) Foe o langa a sa de wan boen sani foe go doro foe studeri a Wortoe foe Gado? (b) Fa den Boekoe foe bijbel e sori disi?
10 Efoe wi ben studeri a Wortoe foe Gado wán jari, 5 jari noso 50 jari, efoe no, noiti a e tron wan sani nomo di wi moesoe doe ibritron baka — no efoe den prakseri foe Gado de warti gi wi. Awansi omeni wi leri foe den Boekoe foe bijbel, moro sani de di wi no sabi. „O Gado, omeni den de dan, te joe e teri den!” David ben taki. „Efoe mi ben sa proeberi foe teri den, dan den ben sa de moro leki den aisanti.” Den prakseri foe Gado de moro leki san wi man teri. Efoe wi ben sa moesoe kari den prakseri foe Gado wan froe wan, heri dei langa èn ben sa fadon na sribi ala di wi e doe dati, te wi ben sa wiki a tra mamanten, moro ben sa de ete foe prakseri. David ben skrifi so boen: „Mi ben wiki èn tokoe mi de ete nanga joe” (Psalm 139:17, 18). Foe têgo wi sa abi moro foe leri foe Jehovah èn den pasi foe en. Noiti wi sa doro a penti pe wi sabi ala sani. — Romesma 11:33.
No wani si na ai san Jehovah no wani si na ai
11. Foe san ede a de prenspari no wawan foe sabi den prakseri foe Gado, ma foe abi den srefi firi leki en?
11 A studie foe wi foe Gado Wortoe a no soso foe di wi wani foe foeroe wi ede nanga troetori. Efoe wi e meki den prakseri foe Gado doro wi ati, wi e bigin abi den srefi firi di Gado abi. O prenspari dati de! Efoe wi no e kweki den sortoe firi dati, san kan de a bakapisi? Ala di wi man foe taki ibritron baka san bijbel e taki, tokoe wi kan si wan sani di no mag, leki wan sani di wi wani troetroe, noso wi kan abi a firi kande taki san den a aksi foe wi, de leki wan hebi. A troe taki srefi te wi no wani si na ai san no boen, wi moesoe doe moeiti kande, foe di wi na onvolmaakti libisma (Romesma 7:15). Ma efoe wi no e doe opregti moeiti foe poti san wi de foe inisei, ini akroederi nanga san boen, wi kan froewakti dan taki wi sa plisi Jehovah, „a sma di e ondrosoekoe ati”? — Odo 17:3.
12. O prenspari gado lobi de èn a si di wan sma no wani si sani na ai so leki fa Gado e doe?
12 Foe no wani si sani na ai so leki fa Gado e doe, na wan krakti sani foe kibri wisrefi foe go doe san no boen, neleki fa gado lobi e meki a doe di wi e doe san boen, kon tron wan prisiri sani (1 Johanes 5:3). Ibritron baka Boekoe foe bijbel e gi wi a deki-ati foe kweki lobi, so boen leki a si di wi no wani si sani na ai. „O, oen sma di lobi Jehovah, no wani si na ai san takroe” (Psalm 97:10). „Drai joe baka gi ogridoe, hori fasti na san boen” (Romesma 12:9). Wi e doe dati?
13. (a) Nanga sortoe begi foe David ini a tori foe a pori foe den ogrisma wi e agri dorodoro? (b) Soema ben de den ogrisma di David ben begi Gado foe pori den, so leki wi kan si ini a begi foe en?
13 Jehovah ben taki krin foe den marki di a abi na prakseri, foe pori den ogrisma foe grontapoe èn tjari wan njoen grontapoe pe regtfardikifasi sa libi (Psalm 37:10, 11; 2 Petrus 3:13). Sma di lobi regtfardikifasi e angri foe a ten dati kon. Den e agri dorodoro nanga a psalm singiman David, di ben begi: „O, taki joe, o Gado, sa kiri na ogriwan! Dati sa meki srefi den man di abi broedoe-paiman na den tapoe, dribi gowe foe mi, di e taki sani foe joe akroederi san den e prakseri; den ben gebroiki joe nen srefi na wan fasi di no warti — den feanti foe joe” (Psalm 139:19, 20). David srefi no ben wani foe kiri den sortoe ogrisma dati. A ben begi taki a paiman ben sa kon foe na anoe foe Jehovah (Deuteronomium 32:35; Hebrewsma 10:30). Den no ben de sma di na wán noso tra fasi ben doe wan sani nanga David srefi. Na wan fowtoe fasi den ben teki presi gi Gado èn ben gebroiki a nen foe en na wan fasi di no warti (Exodus 20:7). Na wan oneerlijkfasi, den ben doe neleki den ben dini en, ma den ben gebroiki a nen foe en, foe horibaka gi den eigi plan foe den. David no ben lobi den sma di ben wani foe de feanti foe Gado.
14. Ogrisma de di kan kisi jepi? Efoe dati de so, dan fa dan?
14 Wan lo sma de di no de foe teri, di no sabi Jehovah. Foeroe foe den, foe di den no sabi, e doe sani di a Wortoe foe Gado e si leki ogri. Efoe den e go doro na a fasi disi, den sa de na mindri den sma di sa dede na a ten foe a bigi banawtoe. Tokoe Jehovah no e plisi nanga a dede foe den ogrisma èn wi no moesoe doe dati toe (Esekièl 33:11). So langa ten de ete, wi moesoe doe moeiti foe jepi den sortoe sma dati foe leri èn doe den pasi foe Jehovah. Ma san efoe son sma kwetikweti no wani si Jehovah na ai?
15. (a) Soema ben de den sma di a psalm singiman ben si leki „troetroe feanti”? (b) Fa wi ini a ten disi kan sori taki wi „no wani si na ai” den sma di opo densrefi teige Jehovah?
15 A psalm singiman ben taki foe den: „Mi no e wani si den sma na ai di kwetikweti no wani si joe na ai, o Jehovah, èn mi no e tegoe foe den sma di opo densrefi teige joe? Mi no wani si den na ai srefisrefi. Gi mi den tron troetroe feanti” (Psalm 139:21, 22). Foe di kwetikweti den no ben wani si Jehovah na ai, David ben si den na wan fasi foe drai en baka gi den. Sma di fadon komoto na bribi, na sma toe di e sori taki den no wani si Jehovah na ai kwetikweti, foe di den opo densrefi teige en. A fadon di sma fadon komoto na bribi, de troetroe na opo di sma e opo densrefi teige Jehovah. Son sma di fadon komoto na bribi, e doe neleki den sabi èn e dini Gado, ma den e trowe den leri noso den sani di Gado e aksi èn di skrifi na ini en Wortoe. Trawan e taki dati den e bribi bijbel, ma den e trowe Jehovah en organisâsi èn na wan aktief fasi den e proeberi foe hendri a wroko foe na organisâsi. Te foe espresi den wani foe doe so wan takroe sani, baka di den ben sabi san boen, te san takroe go so dipi, taki a de wan pisi foe a fasi fa den de, sondro foe joe man prati den toe sani dati foe makandra, dan wan kresten moesoe no wani si den sma disi na ai di (te joe e teki en leki fa bijbel e taki), fasi densrefi na a takroedoe sondro foe joe man prati den toe dati foe makandra. Troe kresten abi densrefi firi di Jehovah abi gi den sortoe sma disi di fadon komoto na bribi; den no wani sabi den prakseri foe den sma di fadon komoto na bribi. Na a tra sei, den „e tegoe” foe den sma di ben meki densrefi kon tron feanti foe Gado, ma den e libi en gi Jehovah foe en teki refensi. — Job 13:16; Romesma 12:19; 2 Johanes 9, 10.
Te Gado e ondrosoekoe wi
16. (a) Foe san ede David ben wani foe Jehovah ondrosoekoe en? (b) Sortoe sani de na ini wi ati, di wi moesoe aksi Gado foe jepi wi foe si dati krin?
16 Na no wan fasi David no ben wani foe de leki den ogrisma. Foeroe sma e proeberi foe kibri san den de foe inisei, ma David ben begi na wan sakafasi: „Ondrosoekoe mi, o Gado, èn sabi mi ati. Ondrosoekoe mi èn sabi den prakseri di e trobi mi èn si efoe wan sari pasi de na ini mi èn tjari mi na tapoe a pasi foe ten di no abi marki” (Psalm 139:23, 24). Di David ben taki foe en ati, a no ben abi en troetroe ati na prakseri. Ini akroederi nanga na agersi sani di a ben abi na prakseri nanga den wortoe dati, a ben taki foe san a ben de na inisei, a sma foe inisei. Wi toe moesoe wani foe Gado ondrosoekoe wi ati èn si krin efoe wi e angri foe sani, abi firi foe lobi, abi firi, marki, prakseri noso boeweigi foe ati, di no de joisti (Psalm 26:2). Jehovah e gi wi a kari: „Mi manpikin, gi mi joe ati, èn meki den ai foe joe abi prisiri ini mi eigi pasi.” — Odo 23:26.
17. (a) San wi moesoe doe, na presi foe kibri den prakseri di e trobi wi? (b) A moesoe froewondroe wi foe kon si taki takroe firi de ini wi ati, èn san wi moesoe doe nanga den?
17 Efoe iniwan prakseri kibri na ini wi di e hati wi èn di e trobi wi, bika wi e angri foe sani di no boen noso abi fowtoe boeweigi foe ati noso bika wi ben doe wan fowtoe sani, dan seiker wi sa wani foe Jehovah jepi wi foe poti a tori reti. Na presi foe den wortoe „iniwan sari pasi”, a vertaling foe Moffatt e gebroiki den wortoe „wan fowtoe fasi foe waka nanga libi”; The New English Bible e taki: „Iniwan pasi di e sari joe [dati wani taki, Gado].” Wisrefi no e froestan krin kande den prakseri di e trobi wi èn foe dati ede wi no sabi fa foe taki nanga Gado foe a problema foe wi, ma a e froestan a situwâsi foe wi (Romesma 8:26, 27). A no moesoe froewondroe wi efoe takroe firi de ini wi ati; tokoe wi no moesoe proeberi foe regtfardiki den (Genesis 8:21). Wi moesoe soekoe a jepi foe Gado foe poeroe den dorodoro. Efoe wi lobi Jehovah èn den pasi foe en troetroe, dan wi kan kon krosibei na en foe a sortoe jepi dati nanga a froetrow taki „Gado bigi moro wi ati èn a sabi ala sani”. — 1 Johanes 3:19-21.
18. (a) Fa Jehovah e tjari wi tapoe a pasi foe ten di no abi marki? (b) Sortoe waran prèise wi kan froewakti foe kisi, te wi e go doro foe waka baka a tiri foe Jehovah?
18 Ini akroederi nanga a begi foe a psalm singiman, taki Jehovah ben moesoe tjari en na tapoe a pasi foe ten di no abi marki, a no de foe taki, dati Jehovah e tjari en foetoeboi di abi sakafasi èn di e gi en jesi. A e tjari den no wawan tapoe wan pasi di kan wani taki wan langa libi, bika a no e koti den poeroe froekoefroekoe foe di den no doe ogri, ma a e tjari den toe na tapoe a pasi di e tjari den go na têgo libi. A e poti krakti na tapoe a fanowdoe di wi abi foe a waarde foe a froeloesoe di a zoen-ofrandi foe Jesus e froeloesoe wi. Nanga jepi foe en Wortoe èn en organisâsi, a e gi wi prenspari leri, so taki wi man foe doe en wani. A e sori wi na wan krakti fasi taki a de prenspari foe doe wan sani tapoe a jepi foe en, so taki foe inisei wi sa tron a sortoe sma toe di wi de na dorosei (Psalm 86:11). Èn a e gi wi deki-ati nanga a froewakti foe wan volmaakti gosontoe ini wan regtfardiki njoen grontapoe, makandra nanga wan libi foe têgo, di wi sa gebroiki foe dini en, a wanenkri troe Gado. Efoe wi e go doro foe doe sani na wan loyaalfasi na a tiri foe en, dan a no de foe taki, dati a sa taigi wi, so leki a ben taigi en Manpikin: „Mi feni joe boen.” — Lukas 3:22; Johanes 6:27; Jakobus 1:12.
San na joe komentaar?
◻ Foe san ede a fasi fa Jehovah e si den foetoeboi foe en nofotron de tra fasi foe a fasi fa libisma e si den?
◻ San kan jepi wi foe si krin san Gado e si te a e ondrosoekoe na ati foe wi?
◻ Sortoe studie e jepi wi foe leri troetori èn foe kibri na ati foe wi?
◻ Foe san ede a de prenspari foe no sabi wawan san Gado e taki, ma foe abi den srefi firi leki en?
◻ Foe san ede wisrefi moesoe begi: „Ondrosoekoe mi, o Gado, èn sabi na ati foe mi”?
[Prenki na tapoe bladzijde 14]
Te joe e studeri, doe moeiti foe meki den prakseri èn den firi foe Gado kon tron wan pisi foe joesrefi
[Prenki na tapoe bladzijde 16]
Den prakseri foe Jehovah de „moro leki den aisanti srefi”
[Sma di abi a reti foe a prenki]
Pictorial Archive (Near Eastern History) Est.