O langa joe kan libi?
A MORO foeroe foe wi moesoe erken gaw taki problema de na tapoe a heri pasi foe wi libi. Tokoe wi breiti taki wi de na libi. Wi no de tevrede foe libi ini wi jongoe jari nomo noso foe libi soso wan sjatoe pisi ten; wi ben sa wani foe libi foeroe jari. Tokoe a sori leki wi no kan wai pasi gi dede. A no so a de?
A de wan sani di kan foe draidrai gi dede? Wi kan meki a pisi ten di wi e libi kon moro langa?
Libi foe wan langa pisi ten?
Ini 1990 wan njoensoe ben meki bekènti taki a kan dati a pisi ten di libisma e libi ben kan kon moro langa te leki „feifi tron toetenti nanga tin jari”. A no de foe taki dati disi ben de wan kibri fasi foe sori go tapoe den wortoe foe a bijbel psalm singiman Moses: „Den dei foe den jari foe wi de dri tron toetenti nanga tin jari; èn efoe foe spesroetoe krakti ede fo tron toetenti jari, tokoe den tranga foe den de wroko nanga sari, bikasi heri esi a e koti, èn wi e frei gowe” (Psalm 90:10, King James Version). So boen, bijbel e gi 70 noso 80 jari leki a pisi ten di gemiddelde sma e libi. Ma san de a nomroe foe jari di wan sma kan froewakti foe libi kande ini a ten disi?
Wan njoensoe di WHO (World Health Organization) ben skrifi ini 1992, ben poti a froewakti di gemiddelde libisma e froewakti foe libi ini a heri grontapoe, na 65 jari. Ini akroederi nanga san WHO ben skrifi, den ben e „froewakti taki a libimarki disi ben o gro kon tron so wan fo moen gi ibri jari ini den feifi jari di ben o kon, spesroetoe foe di a dede di pikin-nengre e dede ben sa kon moro mendri”. Srefi efoe wan wondroe nanga jepi foe datra-dresi ben sa meki taki dede no ben sa kiri wan sma bifo a doro 50 jari, tokoe a tijdschrift Time e taki dati na Amerkankondre, „a gemiddelde pisi ten di sma e froewakti foe libi sa gro nanga soso dri nanga afoe jari”.
Foe san ede a libi de so sjatoe?
Doctor Jan Vijg foe na Instituut foe Experimentele Gerontologie na Bakrakondre e taki-go-taki-kon taki nètso seiker taki son siki abi foe doe nanga mankeri ini a fasi fa den cel ini a libisma skin bow, na so a proces foe kon moro owroe e sori leki a e kon, foe di genetisch faktor e wroko na a proces dati tapoe. Son ondrosoekoeman e bribi taki wi ben sa kan libi moro langa efoe wan „pikin groepoe foe prenspari gen” ben kan kon na a presi foe trawan, te wi e gro kon moro owroe. Trawan e feni taki na idea disi de „toemoesi eenvoudig”.
A winsi fa a no fa, sabidensiman e gi leti taki „a sori taki wan sortoe biologisch skotoe, bow na ini den cel foe a libisma skin”, na so a tijdschrift Time e skrifi. Srefi den sma di e strei taki wi „meki so na fesi foe tan na libi” e gi leti taki „wan sani no e go boen”. Foe troe, na a libiten foe 65, 70 noso 80 jari noso wan toe jari moro, a libi foe wi e „koti heri esi” ini dede, so leki bijbel e taki.
Tokoe, a kresten apostel Paulus foe a fosi jarihondro Gewoon Teri, ben taki nanga froetrow na fesi: „Leki a lasti feanti, dede moesoe tjari kon na wan kaba” (1 Korentesma 15:26). Fa dede kan tjari kon na wan kaba? Srefi efoe dati o pasa, fa wi kan handri nanga a dede di den lobiwan foe wi e dede ini a ten disi?