„A lasti feanti” sa poeroe na pasi!
DI JOE ben de wan pikin-nengre, kande joe ben frede doengroe. Jorka tori èn srefi wan toe anansi tori ben kan meki joe kon foeroe nanga frede. Fa a ben gi joe deki-ati te joe mama noso papa ben libi a lampoe leti na a ten di joe ben proeberi foe fadon a sribi!
Na a srefi fasi dede e meki foeroe sma frede. Ma dati no abi foe de so. Foe san ede? Foe san dede de troetroe.
Sabi joe feanti
Koni kownoe Salomo foe owroeten Israèl ben froeklari: „Den sma di e libi sabi taki den o dede; ma foe den dedewan, den no sabi noti kwetikweti” (Preikiman 9:5). Akroederi a prakseri disi di skrifi ondro a krakti foe Gado èn di joe kan feni ini joe eigi bijbel, dede de gewoon a tra sei foe libi. Den dedewan no de na libi.
Di a ben sori na tapoe dede na wan agersi fasi, a kresten apostel Paulus e skrifi: „Dede, pe joe wini de? Dede, pe joe maka de?” San na a maka di e tjari dede kon? Paulus e taki: „A maka di e tjari dede kon na sondoe” (1 Korentesma 15:55, 56; Hosea 13:14). San na a bigin foe a maka disi dan di e kiri sma? Na wan tra presi ini den Boekoe foe bijbel, Paulus e taki: „Nanga jepi foe wán man sondoe kon na ini grontapoe èn nanga sondoe dede, èn na so fasi dede panja go na ala sma bikasi den alamala ben sondoe” (Romesma 5:12). Na apostel no e libi wan sani foe tweifri te a e go foe soema a „wan man” de te a e taki: „Ini Adam ala sma e dede” (1 Korentesma 15:22). Ija, a tranga jesi foe wi fosi papa, Adam, meki taki a maka foe dede kan soetoe wi alamala. — Genesis 3:1-19.
Nanga wan boen gosontoe èn wan lobi oso-famiri ini wan switi kontren, no wan foe wi ben sa wani foe dede. Ma, so leki fa bijbel e sori, „ten nanga sani di e pasa sondro foe joe kan si dati na fesi” kan foefoeroe wi foe a libi di wi abi (Preikiman 9:11). Te joe e loekoe en boen, wi no sabi san kan pasa nanga wi libi tamara (Jakobus 4:14). Wan sani de seiker — wi alamala kisi sondoe nanga dede. Foe dati ede, dede e kroipi kon safrisafri na wi tapoe èn a e naki wi leki wan feanti.
San joe kan doe te wan lobiwan foe joe dede
Dede de spesroetoe wan feanti te a e naki wan lobiwan foe wi. „A sa de moro hebi gi joe”, na so wan oema, di ben siki so taki a no ben kon betre moro, ben taigi en masra di a ben e prakseri dede. Foe san ede a ben kan taki dati? Bikasi bijbel e taki: „Ala sani san joe anoe feni foe doe, doe dati nanga ala joe krakti, bikasi no wan wroko, no wan prakseri, no wan sabi, no wan koni de ini Sjeool [a gewoon grebi foe libisma], a presi pe joe e go” (Preikiman 9:10). Den dedewan no e pina moro. Ma a hebi foe a sari e fadon kon na tapoe den famiri nanga den mati di e tan na libi. Wan sani de di wi kan doe teige a pina disi?
Den bladzijde foe Gado Wortoe, bijbel, abi foeroe wortoe foe trowstoe. Foe eksempre, a leisi èn a prakseri dipi foe den psalm seiker na wán fonten foe trowstoe. Ija, wi e kisi trowstoe foe den wortoe leki disi: „Blesi gi Jehovah, di ibri dei e tjari den lai foe wi, a troe Gado foe wi froeloesoe.” — Psalm 68:19.
Wan tra fonten foe trowstoe na a kresten gemeente. Ini a fosi jarihondro Gewoon Teri, na apostel Paulus ben skrifi: „Gi grani na den weduwe di de troetroe weduwe. Ma efoe wan weduwe abi pikin noso granpikin [di kan sorgoe gi en na skin fasi], meki den dati leri fosi foe sori taki den e gi densrefi na a dini foe Gado ini den eigi osofamiri èn foe tan pai wan paiman di fiti den papa nanga mama foe den nanga den granpapa nanga granmama foe den, bikasi disi de boen na Gado ai. Meki den poti wan weduwe tapoe a lijst, te a no jongoe moro leki siksitenti jari, wan wefi foe wán masra, foe soema den e gi kotoigi foe den boen wroko foe en, efoe a ben teki freimdesma na en oso, efoe a ben wasi den foetoe foe den santawan, efoe a ben gi jepi na den sma di ben de ini banawtoe, efoe a ben doe nanga faja ibri boen wroko” (1 Timoteus 5:3, 4, 9, 10). Na a srefi fasi Jehovah Kotoigi ini a ten disi e jepi èn e gi trowstoe na den sortoe kompe bribiman disi.
Foeroetron a moro bigi kenki di wan sma moesoe tjari kon te a e lasi wan sma ini dede, na wan kenki na emotioneel sei. „Mi ben lobi mi wefi troetroe”, na so wan man ben skrifi di ben lasi en patna ini dede toe jari kaba. „Disi na a moro sari sani di miti mi ini mi libi èn mi feni en wan moeilek sani foe tjari.” Wan sma di trow wan pisiten kaba, ben prati en libi nanga en oema noso en masra na ini a moro krosibei matifasi di libisma kan abi ini den demakandra. Te wan trowpatna e dede, a patna di e tan na libi a no de foe taki e firi wan bigi lasi. Na soema a sma dati kan go foe kisi jepi?
Na den sortoe omstandigheid disi, boen kresten mati kan bow sma. „Wan troe kompe abi lobi ala ten, èn a de wan brada di meki foe a ten te banawtoe de”, na so wan koni odo e taki (Odo 17:17). Wan oema di en masra dede noso wan man di en wefi dede abi jepi fanowdoe — kompe di e horibaka troetroe gi en. Koni mati e gi a wan di e sari deki-ati foe a taki, awansi disi e tjari watra ai kon. Kande wan kresten, di ben ondrofeni a pen nanga a sari dati ini en ati kaba foe di a ben lasi en trowpatna ini dede, kan pristeri jepi na wan switi fasi. „Taki na wan fasi di e gi trowstoe nanga den sma di lasi ati”, na so bijbel e gi rai (1 Tesalonikasma 5:14). Ma memre taki wan oema di en masra dede èn wan man di en wefi dede e misi den trowpatna. Foe dati ede, a sma di e lasi wan sma ini dede moesoe teki trawan na ini froetrow, soso na ondro omstandigheid di e meki taki den alamala kan tan abi wan krin fasi foe tjari densrefi. — 1 Petrus 2:12.
A moro betre dresi di kan jepi nanga a pen di dede e tjari kon na tapoe wan sma, de taki wan sma moesoe tan abi foeroe foe doe foe jepi trawan — wan sani di no de makriki gi den wan di e bribi taki den de sma di abi jepi fanowdoe! Djaso wi e si, pe no soekoe wini gi joesrefi nomo e prei wan bigi ròl. A doe foe sani gi trawan na wan fasi sondro foe soekoe wini gi joesrefi, e jepi foe jagi ala sari nanga pen poeroe foe na ati, bikasi Jesus ben taki: „Moro foeroe kolokoe de ini a gi leki foe kisi sani.” — Tori foe den Apostel 20:35.
A wini di den e wini dede
Wan djoekoe foe wan marbonsoe kan hati troetroe, a kan kiri joe srefi. Ma nofotron, te joe e poeroe na insekt en maka di boro go na ini joe skin, joe sa firi froelekti. Ma sortoe froewakti de foe kan kisi froelekti foe a maka di e tjari dede kon?
Baka di a ben froeklari taki sondoe na a maka di e tjari dede kon, Paulus bari taki: „Tangi foe Gado, bikasi a e gi wi a wini nanga jepi foe wi masra Jesus Krestes!” (1 Korentesma 15:57) Fa a wini di den e wini dede abi foe doe nanga Krestes? Jesus ben sori taki disi de so di a ben taki foe ensrefi: „A libisma pikin ben kon, no foe den dini en, ma foe en dini sma èn foe gi en sili leki wan froeloesoe paiman ini a presi foe foeroe sma” (Mateus 20:28). Ija, gi den sma di e poti bribi ini Gado Manpikin, Jesus Krestes, èn ini a froeloesoe ofrandi di Jehovah Gado ben seti nanga jepi foe en, a dede di wi ben kisi foe Adam no sa abi leki bakapisi taki den no sa kon na libi noiti moro. — Johanes 3:16.
Den wortoe di Jesus ben taki e gi troetroe deki-ati: „A joeroe e kon taki ala sma di de ini den memregrebi sa jere en sten èn den sa kon na doro, den wan di ben doe boen sani foe kisi wan opobaka foe libi, den wan di ben doe ogri sani foe kisi wan opobaka foe kroetoe.” — Johanes 5:28, 29.
Hondrohondro jari na fesi, a profeiti foe Gado, Jesaja, ben taki na fesi: „En [Jehovah Gado] troetroe sa swari dede foe têgo, èn a Soeverein Masra Jehovah seiker sa figi poeroe ala watra-ai foe den fesi foe den” (Jesaja 25:8). Agen, na Openbaring 21:4, bijbel e pristeri a froewondroe froewakti disi: „[Gado] sa figi poeroe ala watra na den ai èn dede no sa de moro, no wan sari, no wan krei, no wan pen sa de moro. Den fosi sani ben pasa gowe kaba.” Nanga a deki-ati di den e kisi nanga jepi foe a bijbel howpoe disi gi denwan dati di e sribi na ini dede, den sma di ondrofeni wan lasi ini dede no abi foe „sari so leki den trawan e doe di no abi howpoe”. — 1 Tesalonikasma 4:13.
Proeberi foe si, leki na wan prenki na fesi, san Gado abi na prakseri gi libisma, so leki fa bijbel e tjari kon na krin. A „bigi banawtoe” di de krosibei foe kon wani taki pori gi a disiten ogri seti foe sani (Openbaring 7:14). Den sma di e tan hori densrefi na falsi relisi sa kisi pori. Den gridi politiek nanga bisnis elementi di e sorgoe taki angriten nanga orlokoe e kon, pasa gowe. Jesus Krestes e go doro foe iti Satan Didibri, di ben meki taki so foeroe libisma dede, ini a peti di no abi gron. Baka dati Krestes e bigin en Doesoen jari tiri, ala di a e meki a waarde foe en slakti-ofrandi wroko gi libisma. Den dedewan sa drai kon baka ini na opobaka di den ben howpoe na tapoe, èn a leti foe a Wortoe foe Gado e skèin so krin, taki kroektoe bribi fasi foe si dede, a feanti foe libisma, no sa de moro. Ala den sma di e libi ini a ten dati abi na okasi foe leri den pasi foe Gado èn tjari densrefi akroederi den regtfardiki markitiki foe en. — Odo 4:18; Tori foe den Apostel 24:15; Hebrewsma 2:14, 15; Openbaring 18:4-8; 19:19-21; 20:1-3.
’Baka dati, a kaba sa kon’, Paulus e taki, ’te Krestes Jesus e gi a kownoekondre abra na en Gado èn Tata. Bikasi a e tiri leki kownoe te leki Gado poti ala en feanti ondro en foetoe. Leki lasti feanti, den e tjari dede kon na wan kaba’ (1 Korentesma 15:24-26). Ibri skotoe di de a bakapisi foe a sondoe foe Adam no de moro. Wan lasti tesi e feni presi, èn den sma di lobi Gado e pasa a tesi disi na wan getrowfasi (Openbaring 20:4-10). Den sma disi di e gi jesi na Gado, sa kon volmaakti baka, no foe libi foe dri tron toetenti nanga tin jari nomo noso srefi foe feifi tron toetenti nanga tin jari nomo, ma foe têgo. Fa dati de wan bigi presenti di Gado e gi nanga jepi foe en lobi Manpikin! — Romesma 6:23.
So boen, o langa joe kan libi dan? A libiten foe joe kan go doro foe têgo. A libi so leki joe e libi now ini a „ten foe a kaba” foe a grontapoe disi, kande noiti joe no abi foe dede kwetikweti (Daniel 12:4; Johanes 11:25, 26; 17:3). Efoe joe e doe a wani foe Gado, joe kan libi langalanga go na ini a njoen grontapoe di Gado pramisi. — 2 Petrus 3:13.
Ma, efoe joe de wan sma di de tapoe jari kaba, dan troetroe joe abi foe hori na prakseri taki joe kan dede. Foe troe, a howpoe foe kisi wan opobaka e tjari prisiri kon. Ma, kande joe e prakseri fa Gado sa seti a famiri libi ini a njoen seti foe sani dati. No gi pasi taki den sortoe sani dati meki joe e broko joe ede, bikasi Jehovah sa sorgoe gi a têgo kolokoe foe den sma di de ala ten getrow na en.
Ala di den moeilek „lasti dei” foe Satan ogri seti foe sani e go miti en kaba, no meki frede foe dede foefoeroe a grani foe joe foe dini Jehovah nownow (2 Timoteus 3:1). Efoe joe e lasi wan lobiwan ini dede, trowstoe joesrefi nanga a sabi taki dede e hori a sma dati nomo foe wan sjatoe pisi ten (Openbaring 20:13, 14). Froetrow na ini na opobaka howpoe. Dan, efoe joe go na ini a njoen grontapoe foe di joe pasa a bigi banawtoe libilibi noso foe di joe kisi wan opobaka, joe kan de seiker foe a djaranti di skrifi nanga jepi foe santa jeje taki den sa tjari dede, a lasti feanti, kon na wan kaba. — Openbaring 7:9, 14.
[Prenki na tapoe bladzijde 6]
Foe di joe tan abi foeroe foe doe foe jepi trawan, dan dati e meki a pen ini joe ati, di joe kisi foe di joe lasi wan lobiwan na ini dede, kon moro lekti