Abi boen deki-ati!
„Abi boen deki-ati èn taki: ’Jehovah na mi jepiman.’” — HEBREWSMA 13:6.
1. Fa den sma di ben leri a waarheid foe Gado ini a fosi jarihondro Gewoon Teri ben sori taki den de fri èn sondro frede?
A BEN de a fosi jarihondro foe wi Gewoon Teri. A Mesias di sma ben froewakti someni langa, ben kon. A ben gi den disipel foe en boen leri èn a ben bigin nanga wan prenspari preikiwroko. A ben de ten foe sma jere a boen njoensoe foe Gado Kownoekondre. Foe dati ede man nanga oema di ben leri a waarheid ben meki a toemoesi moi boskopoe dati bekènti, fri èn sondro frede. — Mateus 28:19, 20.
2. Foe san ede Jehovah Kotoigi abi deki-ati fanowdoe ini a ten disi?
2 A Kownoekondre no ben opo ini den dei dati. Ma Jesus Krestes, a Kownoe di den ben moesoe poti ete na tapoe kownoestoeroe, ben froeteri na fesi foe en denoja ini Kownoekondre makti di sma no man si, ini a ten di ben de na en fesi. Den sortoe sani leki orlokoe di no abi speri, angriten, siki, gronseki èn a preiki foe a boen njoensoe na heri grontapoe, ben sa marki a denoja dati (Mateus 24:3-14; Lukas 21:10, 11). Leki Kotoigi foe Jehovah, wi abi deki-ati fanowdoe foe kakafoetoe gi den situwâsi disi èn a froefolgoe di wi e ondrofeni. A sa de foe dati ede wan boen sani foe go loekoe den tori foe bijbel di abi foe doe nanga deki-ati Kownoekondre preikiman foe a fosi jarihondro Gewoon Teri.
Deki-ati foe waka baka Krestes
3. Soema e gi a moro boen eksempre foe deki-ati èn san den ben taki foe en ini Hebrewsma 12:1-3?
3 Jesus Krestes e gi a moro boen eksempre foe deki-ati. Baka di na apostel Paulus ben taki foe a ’bigi wolkoe’ foe deki-ati kotoigi foe Jehovah di ben libi bifo kresten ten, a ben poti prakseri na tapoe Jesus, foe di a ben taki: „Foe di wi abi so wan bigi wolkoe foe kotoigi lontoe wi, meki wi poeroe so srefi ibri hebi èn a sondoe di e frekti wi makriki, èn meki wi tan horidoro foe lon a streilon di ben poti na wi fesi, ala di wi e tan loekoe ala ten na Jesus, a prenspari Wrokoman èn a Man di e meki wi bribi kon boen dorodoro. Bikasi a prisiri di ben poti na en fesi ben meki a ben horidoro ondro wan pina-oedoe, broko-ai gi sjen èn ben go sidon na a leti-anoe foe a kownoestoeroe foe Gado. Ija, poti prakseri boen na tapoe a sma di ben horidoro na ondro so wan gens taki foe sondari teige den eigi belang, so taki oenoe no e kon weri èn broko saka ini oen sili.” — Hebrewsma 12:1-3.
4. Fa Jesus ben sori deki-ati di a ben kisi tesi foe Satan?
4 Baka di Jesus ben teki dopoe èn ben prakseri dipi foe sani 40 dei langa, ben begi èn ben tan sondro njanjan ini a sabana, a ben kakafoetoe gi Satan na wan deki-atifasi. Di Didibri ben tesi Jesus foe meki ston kon tron brede, Jesus ben weigri dati, foe di a ben de wan fowtoe sani foe doe wan wondroe foe satisferi joe eigi angri. „Boekoe taki:”, na so Jesus ben taki, „Libisma no moesoe libi foe brede wawan, ma foe ibri wortoe di komoto na Jehovah mofo.” Di Satan ben tjalensi Jesus foe djompo foe a lanki foe a dak foe a tempel, Jesus ben weigri foe doe dati, bika a ben sa de wan sondoe foe tesi Gado foe kibri en foe san ben sa kan de a kiri foe ensrefi. „Agen Boekoe taki:”, na so Krestes ben taki, „Oenoe no moesoe tesi Jehovah, oen Gado.” Satan ben pristeri en ala den kownoekondre foe grontapoe gi wán „fasi foe anbegi en”, ma Jesus no ben sa fadon komoto na bribi èn horibaka gi a tjalensi foe Didibri taki libisma no man tan getrow na Gado na ondro tesi. Foe dati ede Jesus ben taki: „Komoto na mi fesi, Satan! Bika Boekoe taki: ’Oenoe moesoe anbegi Jehovah oen Gado, èn gi en wawan oenoe moesoe doe santa diniwroko.’” Ne a Sma di e kori sma, ben „gowe libi en te leki wan moro betre ten”. — Mateus 4:1-11; Lukas 4:13.
5. San kan jepi wi foe kakafoetoe gi tesi?
5 Jesus ben saka ensrefi na ondro Jehovah èn a ben kakafoetoe gi Satan. Efoe wi toe e ’saka wisrefi na ondro Gado èn e kakafoetoe gi Didibri, a sa gowe libi wi’ (Jakobus 4:7). Neleki Jesus, wi kan kakafoetoe na wan deki-atifasi gi tesi efoe wi e gebroiki den bijbeltekst, kande srefi e teki den wortoe taki na a ten te wi e kisi tesi foe doe wan sondoe sani. A kan taki wi sa fadon gi a tesi foe go foefoeroe sani, efoe na a ten dati wi e taki baka gi wisrefi a wet foe Gado: „Oenoe no moesoe foefoeroe”? A kan taki toe kresten broko kindi gi seks hoeroedoe, efoe srefi wan foe den na wan deki-atifasi e teki den wortoe taki: „Oenoe no moesoe doe soetadoe”? — Romesma 13:8-10; Exodus 20:14, 15.
6. Fa Jesus ben de wan deki-ati sma di ben wini grontapoe?
6 Leki kresten di a grontapoe disi no wani si na ai, wi kan tan farawe foe a jeje foe grontapoe èn a sondoe fasi fa a e tjari ensrefi. Jesus ben taigi en bakaman: „Ini grontapoe oenoe abi banawtoe, ma abi deki-ati! Mi wini grontapoe” (Johanes 16:33). A ben wini grontapoe, foe di a no ben tron leki en. Na eksempre foe Jesus leki wan winiman èn a bakapisi foe a fasi fa a ben hori en soifri retifasi, kan foeroe wi nanga a deki-ati foe waka na en baka, foe di wi no e go moksi wisrefi nanga a grontapoe disi èn foe no e meki a doti wi. — Johanes 17:16.
Deki-ati foe tan preiki
7, 8. San sa jepi wi foe tan preiki awansi wi e kisi froefolgoe?
7 Jesus nanga den disipel foe en ben froetrow na tapoe Gado foe kisi deki-ati foe tan preiki awansi den ben kisi froefolgoe. Awansi Krestes ben kisi froefolgoe, tokoe a ben tjari en diniwroko na wan kaba, fri èn sondro frede. Baka Pinkster 33 Gewoon Teri, den bakaman foe en di ben kisi froefolgoe, ben go doro foe meki a boen njoensoe bekènti, srefi ala di djoe kerki tiriman ben proeberi foe stòp den (Tori foe den Apostel 4:18-20; 5:29). Den disipel ben begi: „Jehovah, poti prakseri na tapoe den tranga wortoe foe den èn gi den srafoe foe joe taki den tan taki a wortoe foe joe fri èn sondro frede.” Èn san ben pasa? „Baka di den ben seni den begi foe den na Gado, a presi pe den ben kon makandra ben e seki”, a tori e froeteri, „èn den alamala, sondro foe poeroe wan, ben kon foeroe nanga santa jeje èn ben taki a Wortoe foe Gado fri èn sondro frede.” — Tori foe den Apostel 4:24-31.
8 Foe di a moro bigi pisi foe sma ini a ten disi no wani teki a boen njoensoe, dan nofotron a de fanowdoe foe tan preiki gi den, fri èn sondro frede. Spesroetoe te den foetoeboi foe Jehovah e kisi froefolgoe, den abi a deki-ati fanowdoe di Gado gi, so taki den kan gi wan boen kotoigi (Tori foe den Apostel 2:40; 20:24). Na so a deki-ati Kownoekondre preikiman Paulus ben taigi wan jongoe kompe wrokoman di no ben abi someni ondrofeni: „Gado no ben gi wi wan jeje foe frede, ma foe krakti èn foe lobi èn foe gosontoe froestan. Foe dati ede, no kon kisi sjen foe a kotoigi foe wi Masra, no gi mi, wan strafoeman foe en ede, ma teki joe pisi ini a pina foe ogri foe a boen njoensoe ede, akroederi a krakti foe Gado” (2 Timoteus 1:7, 8). Efoe wi e begi foe kisi deki-ati, dan wi sa man foe tan preiki, èn srefi froefolgoe no sa poeroe a prisiri foe wi leki Kownoekondre preikiman. — Mateus 5:10-12.
Deki-ati foe teki Jehovah sei
9, 10. (a) San den fosi jarihondro djoe nanga heidensma ben doe foe ben kan tron dopoe bakaman foe Krestes? (b) Foe san ede wan sma ben moesoe abi deki-ati foe tron wan kresten?
9 Foeroe fosi jarihondro djoe nanga heidensma na wan deki-atifasi ben libi kerki gwenti di no skrifi na ini bijbel, foe tron dopoe bakaman foe Krestes. Sjatoe baka Pinkster 33 Gewoon Teri, „a nomroe disipel na Jerusalem ben tan gro nomonomo; èn wan bigi ipi priester ben bigin gi jesi na a bribi” (Tori foe den Apostel 6:7). Den djoe dati ben abi a deki-ati foe broko nanga relisi banti èn foe teki Jesus leki a Mesias.
10 Foe bigin nanga a jari 36 Gewoon Teri, foeroe heidensma ben tron bribisma. Di Kornelius, memre foe en osofamiri nanga tra heidensma ben jere a boen njoensoe, dan wantewante den ben teki en, ben kisi santa jeje, èn ben kisi „dopoe ini a nen foe Jesus Krestes” (Tori foe den Apostel 10:1-48). Na Filipi wan heiden strafoe-oso waktiman nanga en osofamiri ben teki a krestendom esi-esi èn „en nanga den sma foe en ben kisi dopoe wantewante” (Tori foe den Apostel 16:25-34). Deki-ati ben de fanowdoe foe doe den sani dati, bika kresten ben de wan pikin groepoe di sma ben froefolgoe èn di sma no ben lobi. Te now ete a de so. Ma efoe joe no ben gi joesrefi abra na Gado èn teki dopoe leki wan Kotoigi foe Jehovah, dan a no a ten gi joe foe doe den deki-ati sani disi?
Deki-ati ini osofamiri pe wán trowpatna no de na bribi
11. Eunice nanga Timoteus ben gi sortoe moi eksempre foe deki-ati?
11 Eunice nanga en manpikin Timoteus ben de boen eksempre foe deki-ati bribi ini wan osofamiri di prati na relisi sei. Ala di Eunice ben abi wan heiden masra, a ben leri en manpikin „den santa boekoe” sensi en pikin-nengre ten (2 Timoteus 3:14-17). Di Eunice ben tron wan kresten, a ben sori ’bribi sondro hoigrifasi’ (2 Timoteus 1:5). A ben abi a deki-ati toe foe gi kresten leri na Timoteus, ala di a ben sori respeki gi na edeman-wroko foe en masra di no ben de na bribi. Foe troe, a bribi èn a deki-ati foe en ben kisi pai di Paulus ben teki Eunice en manpikin di ben kisi boen leri, foe go makandra nanga Paulus na en zendingwaka. Fa disi kan gi deki-ati na kresten papa nanga mama di de ini den srefi omstandigheid!
12. Sortoe sma Timoteus ben tron, èn soema e sori foe de neleki en ini a ten disi?
12 Ala di Timoteus ben libi ini wan osofamiri di ben prati na relisi sei, a ben teki a krestendom na wan deki-atifasi èn ben tron wan sma di abi jejefasi, èn Paulus ben kan taki foe en: „Mi e howpoe ini Masra Jesus foe seni Timoteus heri-esi kon gi oenoe [Filipisma], so taki mi kan abi wan prisiri sili te mi e kon sabi den sani di abi foe doe nanga oenoe. Bika mi no abi no wan tra sma nanga wan fasi leki en di sa sorgoe opregti gi den sani di abi foe doe nanga oenoe. . . . Oenoe sabi a boeweisi di a ben gi foe ensrefi, taki leki wan pikin nanga wan papa a ben wroko tranga nanga mi foe meki a boen njoensoe go na fesi” (Filipisma 2:19-22). Ini a ten disi, foeroe boi nanga oemapikin ini oso di prati na relisi sei, ben teki a troe krestendom na wan deki-atifasi. Neleki Timoteus den e gi boeweisi foe densrefi, èn fa wi e prisiri taki den na wan pisi foe Jehovah organisâsi!
Deki-ati foe ’tjari wi libi ini kefar’
13. Na sortoe fasi Akila nanga Preskila ben sori deki-ati?
13 Akila nanga en wefi, Preskila (Preska) ben de wan eksempre, foe di na wan deki-atifasi den ben ’tjari a libi foe den ini kefar’ gi wan kompe-bribiman. Den ben teki Paulus na ini na oso foe den, èn ben wroko nanga en foe meki tenti èn den ben jepi en foe bow wan njoen gemeente na Korente (Tori foe den Apostel 18:1-4). Ini a matifasi di den ben abi 15 jari langa, den ben tjari a libi foe den srefi ini kefar gi en, na wan fasi di den no e taki krin foe dati. Den ben libi na Rome di a ben taigi den kresten drape: „Bari Preska nanga Akila, mi kompe-wrokoman ini Krestes Jesus, wan switi odi gi mi, di ben tjari den eigi libi ini kefar gi mi sili, èn di no mi wawan, ma ala den gemeente foe den nâsi wani foe taki grantangi.” — Romesma 16:3, 4.
14. Ini akroederi nanga sortoe komando Akila nanga Preska ben handri, di den ben tjari a libi foe den ini kefar foe Paulus ede?
14 Foe di Akila nanga Preska ben tjari a libi foe den ini kefar foe jepi Paulus, den ben handri ini akroederi nanga den wortoe foe Jesus: „Mi e gi oenoe wan njoen gebod, taki oenoe lobi makandra; neleki fa mi ben lobi oenoe, taki oenoe toe lobi makandra” (Johanes 13:34). A gebod disi ben „njoen”, foe di a ben de moro leki san a Wet foe Moses ben aksi foe wan sma, taki a ben moesoe lobi a sma na en sei neleki fa a lobi ensrefi (Lefitikus 19:18). A ben aksi foe wan sma abi a lobi foe òfer ensrefi, san ben sa go so fara taki wan sma ben sa gi en libi gi tra sma, neleki fa Jesus ben doe dati. A skrifiman Tertulianus foe a di foe toe èn a di foe dri jarihondro Gewoon Teri, ben teki den wortoe taki foe sma foe grontapoe ini a tori foe kresten, di a ben skrifi: „’Loekoe’, sma e taki, ’fa den lobi makandra . . . èn fa den de klariklari foe dede gi makandra’” (Apology, kapitel XXXIX, 7). Spesroetoe na mindri foe froefolgoe wi kan de froeplekti foe sori brada lobi, foe di wi e tjari wi libi ini kefar na wan deki-atifasi, so taki wi kan tan farawe foe meki kompe-bribiman kisi ogri-ati meshandri noso dede na den anoe foe feanti. — 1 Johanes 3:16.
Deki-ati e tjari prisiri kon
15, 16. Fa deki-ati nanga prisiri kan abi foe doe nanga makandra, so leki fa Tori foe den Apostel kapitel 16 e sori?
15 Paulus nanga Silas e gi boeweisi taki a sori foe deki-ati na mindri tesi kan tjari prisiri kon. Tapoe a komando foe lantiman foe a foto Filipi, den ben kisi fonfon nanga tiki na poebliki èn den ben poti den na ini strafoe-oso blòk. Ma tokoe, den no ben kìkbak foe frede ede na wan lasi-atifasi. Ala di den ben de ini moeilek omstandigheid, den ben abi a deki-ati di Gado gi ete èn a prisiri di dati e tjari gi getrow kresten.
16 Na wan sani foe mindrineti, Paulus nanga Silas ben begi èn prèise Gado nanga singi. Wantronso, wan gronseki ben seki a strafoe-oso, ben loesoe den keti foe den èn ben trowe den doro opo. A strafoe-oso waktiman di ben frede èn en osofamiri, den ben gi kotoigi fri èn sondro frede èn dati ben meki den teki dopoe leki foetoeboi foe Jehovah. A waktiman srefi „ben prisiri srefisrefi nanga en heri osofamiri now di a ben bribi Gado” (Tori foe den Apostel 16:16-34). Fa disi ben moesoe tjari prisiri gi Paulus nanga Silas! Now di wi loekoe den bijbel eksempre disi nanga tra bijbel eksempre foe deki-ati, fa wi kan tan abi deki-ati leki foetoeboi foe Jehovah?
Go doro foe abi boen deki-ati
17. Fa a howpoe ini Jehovah abi foe doe nanga deki-ati, so leki fa Psalm 27 e sori?
17 A howpoe ini Jehovah sa jepi wi foe tan abi deki-ati. David ben singi: „Howpoe ini Jehovah; abi deki-ati èn meki joe ati de tranga. Ija, howpoe ini Jehovah” (Psalm 27:14). Psalm 27 e sori taki David ben froetrow na tapoe Jehovah leki „a fortresi” foe en libi (vers 1). Foe di David ben si fa Gado ben handri nanga den feanti foe en ini a ten di ben pasa, dati ben gi David deki-ati (vers 2, 3). Warderi gi Jehovah en centrum foe anbegi, ben de ete wan tra sani (vers 4). A froetrow ini a jepi foe Jehovah, a kibri èn a froeloesoe di a e gi, ben bow a deki-ati foe David toe (vers 5-10). San ben jepi toe, ben de a doronomo leri ini den gronprakseri foe Jehovah en regtfardiki pasi (vers 11). A begi di a ben begi nanga froetrow foe kon fri foe en feanti, makandra nanga bribi èn howpoe, ben jepi David foe abi deki-ati (vers 12-14). Na den srefi fasi dati wi kan bow a deki-ati foe wi èn sori na so fasi taki troetroe wi e „howpoe ini Jehovah”.
18. (a) San e sori taki doronomo demakandra nanga kompe anbegiman foe Jehovah kan jepi wi foe tan abi deki-ati? (b) Sortoe ròl kresten konmakandra e prei ini a bow di wi e bow deki-ati?
18 Doronomo demakandra nanga kompe anbegiman foe Jehovah kan jepi wi foe tan abi deki-ati. Di Paulus ben aksi foe taki nanga Caesar èn ben rèis go na Rome, kompe bribiman ben miti en na a Wowojopresi foe Apius nanga Dri Dringi-oso. „Di Paulus ben si den”, a tori e taki, „a ben taki Gado tangi èn ben kisi deki-ati” (Tori foe den Apostel 28:15). Efoe wi e go doronomo na den kresten konmakandra, wi e poti prakseri na tapoe a rai foe Paulus: „Meki wi poti prakseri na tapoe makandra foe kan gi tranga ini lobi nanga toemoesi boen wroko, foe no libi foe kon makandra nanga makandra, so leki a de a gwenti foe sonwan, ma gi makandra deki-ati èn dati omoro wi e si a dei e kon krosibei” (Hebrewsma 10:24, 25). San a wani taki foe gi makandra deki-ati? Foe gi deki-ati wani taki „foe meki kon foeroe nanga deki-ati, jeje noso howpoe” (Webster’s Ninth New Collegiate Dictionary). Wi kan doe foeroe foe meki tra kresten kon foeroe nanga deki-ati, èn a deki-ati di den e gi kan meki na eigifasi disi gro na ini wi toe.
19. Fa bijbel nanga den kresten poeblikâsi abi foe doe nanga a tan di wi e tan abi deki-ati?
19 Foe tan abi deki-ati, wi moesoe studeri Gado Wortoe doronomo èn poti a rai foe dati ini wi libi (Deuteronomium 31:9-12; Josua 1:8). A doronomo studie foe wi moesoe abi na ini toe, kresten poeblikâsi di abi den fondamenti na tapoe bijbel, so taki a gosontoe rai di wi e kisi na so fasi sa jepi wi foe horidoro na ondro tesi foe bribi nanga a deki-ati di Gado gi. Foe den tori na ini bijbel, wi si fa foetoeboi foe Jehovah ben abi deki-atifasi na ini difrenti situwâsi. Nownow de wi no sabi kande fa so wan bodoi kan jepi wi, ma a Wortoe foe Gado abi krakti, èn san wi e leri foe dati kan de ala ten wan boen gi wi (Hebrewsma 4:12). Foe eksempre, efoe a frede gi libisma e bigin foe abi krakti na tapoe wi diniwroko, dan meki wi memre fa Heinok ben abi a deki-ati foe tjari a boskopoe foe Gado na den ogrisma. — Judas 14, 15.
20. Foe san ede wi kan taki dati begi de prenspari, efoe wi wani tan abi deki-ati leki foetoeboi foe Jehovah?
20 Foe tan abi deki-ati leki foetoeboi foe Jehovah, wi moesoe horidoro na ini begi (Romesma 12:12). Na wan deki-atifasi Jesus ben horidoro na ondro den tesi foe en, bika „nanga tranga babari èn watra-ai a ben seni begi nanga tranga begi toe, go na a Sma di ben kan froeloesoe en foe dede èn Gado ben jere en na wan boen fasi foe a frede ede di a ben abi gi Gado” (Hebrewsma 5:7). Efoe wi e tan krosibei na Gado ini begi, wi no sa de leki den sma ini grontapoe di no abi deki-ati, di sa ondrofeni „a di foe toe dede” pe sma no e kisi opobaka (Openbaring 21:8). A kibri di Gado e gi èn libi ini Gado njoen grontapoe de gi den foetoeboi foe en di abi deki-atifasi.
21. Foe san ede loyaal Kotoigi foe Jehovah kan tan abi deki-ati?
21 Leki loyaal Kotoigi foe Jehovah, wi no moesoe frede ogri jeje èn libisma feanti, bika wi abi a jepi foe Gado èn a deki-ati eksempre di Jesus ben gi leki a sma di ben wini grontapoe. Demakandra nanga Jehovah pipel, di na jeje fasi e bow sma, e jepi wi so srefi foe abi deki-ati. A tiri èn rai foe bijbel èn kresten poeblikâsi e bow a deki-ati foe wi toe. Èn bijbeltori foe Gado foetoeboi foe a ten di pasa, e jepi wi foe waka ini en pasi na wan deki-atifasi. Meki wi go doro foe dati ede foe doe santa diniwroko fri èn sondro frede, ini den moeilek lasti dei disi. Ija, meki ala pipel foe Jehovah abi boen deki-ati!
Fa joe ben sa piki?
◻ Fa na eksempre foe Jesus kan foeroe wi nanga deki-ati?
◻ San ben gi Jesus nanga den disipel foe en deki-ati foe tan preiki?
◻ Foe san ede djoe nanga heidensma ben abi deki-ati fanowdoe foe teki Jehovah sei?
◻ Sortoe eksempre foe deki-ati Eunice nanga Timoteus ben gi?
◻ Sortoe boeweisi de taki deki-ati e tjari prisiri kon srefi na mindri foe froefolgoe?
[Prenki na tapoe bladzijde 29]
Neleki Jesus wi kan kakafoetoe gi tesi efoe wi e gebroiki den bijbeltekst èn e teki den wortoe taki