Kolokoe den sma di abi sakafasi
„Gado de kontrari den sma di abi heimemrefasi, ma a e gi no-froedini boen-atifasi na den sma di abi sakafasi.” — 1 PETRUS 5:5.
1, 2. Fa Jesus ben sori ini en Bergitaki, dati na afersi foe a de di wan sma de kolokoe abi foe doe nanga na afersi foe na abi di wan sma abi sakafasi?
A DE di wan sma de kolokoe èn na abi di wan sma abi sakafasi, abi foe doe nanga makandra? Ini en moro barinen taki, Jesus Krestes, a moro bigi libisma foe ala ten, e taki foe neigi fasi foe de kolokoe noso sani di e meki wan sma de kolokoe (Mateus 5:1-12). Jesus ben taki dati a de di wan sma de kolokoe abi foe doe nanga na abi di wan sma abi sakafasi? Ija, a ben taki dati, bika na abi di wan sma abi sakafasi de foe feni toe ini wan toe foe den fasi foe de kolokoe di a ben kari. Wan sma foe eksempre, moesoe abi sakafasi foe sabi taki a abi sani fanowdoe na jeje fasi. Soso den sma di abi sakafasi, e angri èn e dreiwatra gi regtfardikifasi. Èn den sma di abi bigifasi no abi safri-atifasi, den no abi sari-atifasi èn den no e soekoe vrede toe.
2 Den sma di abi sakafasi de kolokoe, bika a de joisti èn eerlijk foe abi sakafasi. Boiti dati, den sma di abi sakafasi de kolokoe bika a de wan koni sani foe abi sakafasi; a e meki taki wi abi boen matifasi nanga Jehovah Gado èn nanga kompe-kresten. Moro fara, sma di abi sakafasi de kolokoe, bika na abi di den abi sakafasi na wan fasi fa den foe den sei e sori lobi.
3. Foe san ede eerlijkfasi e froeplekti wi foe abi sakafasi?
3 Foe san ede eerlijkfasi wani taki dati wi moesoe abi sakafasi? Na a fosi presi, bika wi alamala kisi onvolmaaktifasi foe wi papa nanga mama èn wi e tan meki fowtoe. Na apostel Paulus ben taki foe ensrefi: „Mi sabi taki ini mi, dati wani taki, ini mi skin, no wan sani no de di boen; bika a man di mi man winsi de na ini mi, ma a man di mi man doe san boen no de na ini mi” (Romesma 7:18). Ija, wi alamala sondoe èn no man doro a glori foe Gado (Romesma 3:23). Opregtifasi sa tapoe wi foe abi bigifasi. Sakafasi de fanowdoe foe erken wan fowtoe èn eerlijkfasi sa jepi wi foe teki a frantiwortoe foe a fowtoe, te wi meki wan fowtoe. Foe di wi no man doro den sani di wi e feti na baka foe doe, wi abi boen reide foe abi sakafasi.
4. Sortoe boen reide den e gi ini 1 Korentesma 4:7 foe na abi di wi moesoe abi sakafasi?
4 Na apostel Paulus e gi wi wan tra reide foe san ede eerlijkfasi moesoe meki wi abi sakafasi. A e taki: „Soema e meki joe difrenti foe wan trawan? Ija, san joe abi di joe no ben kisi? Efoe joe kisi en now troetroe, foe san ede joe e skepi neleki joe no ben kisi en?” (1 Korentesma 4:7) Degedege no de ini a tori, taki a no ben sa de wan eerlijk sani efoe wi e gi wisrefi glori, efoe wi abi bigifasi foe den goedoe di wi abi, den sani di wi man doe noso san wi tron ini wi libi. Eerlijkfasi e meki taki wi abi wan boen konsensi na Gado fesi, so taki wi kan „tjari wisrefi na wan eerlijkfasi ini ala sani”. — Hebrewsma 13:18.
5. Fa eerlijkfasi sa jepi wi toe te wi meki wan fowtoe?
5 Eerlijkfasi e jepi wi foe abi sakafasi te wi e meki wan fowtoe. A sa meki wi de moro klariklari foe teki a frantiwortoe foe a fowtoe, na presi foe proeberi foe regtfardiki wisrefi noso gi wan tra sma a frantiwortoe foe a fowtoe di wi ben doe. So boen, ala di Adam ben gi Eva a frantiwortoe foe a fowtoe, tokoe David no ben gi Batseiba a frantiwortoe foe a fowtoe, foe di a ben taki: ’A no ben moesoe e wasi en skin pe ala sma ben kan si en. Mi no ben man jepi taki a ben kori mi’ (Genesis 3:12; 2 Samuèl 11:2-4). Foe troe, wi kan taki dati na a wan sei, a de di wi de eerlijk e jepi wi foe abi sakafasi; èn na a tra sei, a abi di wi abi sakafasi e jepi wi foe de eerlijk.
Bribi ini Jehovah e jepi wi foe abi sakafasi
6, 7. Fa bribi ini Gado e jepi wi foe abi sakafasi?
6 Bribi ini Jehovah sa jepi wi toe foe abi sakafasi. A froestan di wi e froestan o bigi a Mekiman, na Universeel Soeverein, de troetroe, sa kibri wi foe si wisrefi leki toemoesi prenspari. O boen a profeiti Jesaja e memre wi foe a sani disi! Ini Jesaja 40:15, 22 wi e leisi: „Loekoe! Den nâsi de leki wan dropoe foe wan embre; èn leki a fini stòf tapoe a wegi. . . . Wán sma de di e libi na tapoesei foe a lontoe foe grontapoe, di den sma di e libi na tapoe de leki sprenka.”
7 Bribi ini Jehovah sa jepi wi toe te wi e firi taki wi pina, foe di tra sma ben handri nanga wi na wan onregtfardiki fasi. Na presi foe broko wi ede nanga na afersi, dan na wan sakafasi wi sa wakti tapoe Jehovah, so leki fa a psalm singiman e memre wi ini Psalm 37:1-3, 8, 9. Na apostel Paulus e taki foe a srefi sani: „No teki refensi gi oensrefi, oenoe lobiwan, ma gi na atibron pasi; bika Boekoe foe bijbel e taki: ’Refensi na foe mi; mi sa pai baka’, Jehovah e taki.” — Romesma 12:19.
Sakafasi — a pasi foe koni
8. Foe san ede sakafasi e meki taki wi abi wan boen matifasi nanga Jehovah?
8 Foeroe reide de di e meki taki na abi di wan sma abi sakafasi na a pasi foe koni. Wan reide de taki, so leki ben taki kaba, a e meki taki wi abi boen matifasi nanga wi Mekiman. A Wortoe foe Gado e taki krin ini Odo 16:5: „Ibriwan sma di abi bigifasi ini en ati na wan tegoe sani gi Jehovah.” Wi e leisi ini Odo 16:18 toe: „Bigimemre e kon bifo wan fadon, èn wan jeje di abi heimemre fasi bifo wan sma e naki foetoe fadon.” Wan ten sa kon taki sma di abi bigifasi sa ondrofeni sari. A moesoe foe de so troetroe, foe den sani ede di wi e leisi ini 1 Petrus 5:5: „Oenoe alamala, tai oen bere nanga sakafasi foe jeje gi makandra, bika Gado de kontrari den sma di abi heimemrefasi, ma a e gi no-froedini boen-atifasi na den sma di abi sakafasi.” Joe sa feni a srefi penti ini na agersitori di Jesus ben gi foe a Fariseiman nanga a belastingman di, ibriwan foe den, ben begi. A ben de a belastingman di ben abi sakafasi, di ben sori taki a de moro regtfardiki. — Lukas 18:9-14.
9. Fa sakafasi e jepi wi te slag e miti wi?
9 Sakafasi na a pasi foe koni, bika sakafasi e meki en moro makriki gi wi foe poti prakseri na tapoe a rai di wi e feni ini Jakobus 4:7: „Saka oensrefi, foe dati ede, na Gado ondro.” Efoe wi abi sakafasi, wi no sa opo wisrefi kontrari Jehovah te a e gi pasi taki wi e pina foe slag di e miti wi. Sakafasi sa meki wi man foe de tevrede nanga den omstandigheid foe wi èn foe horidoro. Wan sma di abi bigifasi no de tevrede, ala ten a wani moro, èn a e opo ensrefi kontrari omstandigheid di e tjari pina kon. Na a tra sei, a sma di abi sakafasi e horidoro na ondro moeilekhèit èn tesi, neleki fa Job ben doe. Job ben pina foe a lasi di a ben lasi ala den goedoe foe en èn a ben kisi wan siki di ben hati skin, èn baka dati en wefi ben gi en a rai srefi foe teki a pasi foe bigimemre, foe di a ben taki: „Floekoe Gado, èn dede!” San Job ben piki? Bijbeltori e froeteri wi: „A ben taigi en: ’Neleki fa den lasi-ede oema e taki, na so joe e taki toe. Wi sa teki soso boen sani foe a troe Gado èn no teki takroe sani toe?’ Na ini ala den sani disi Job no ben sondoe nanga en mofoboeba” (Job 2:9, 10). Foe di Job ben abi sakafasi, meki a no ben opo ensrefi kontrari Jehovah, ma a ben saka ensrefi na wan konifasi na ondro ala sani di Jehovah ben gi pasi foe pasa nanga en. Èn te foe kaba a ben kisi foeroe pai. — Job 42:10-16; Jakobus 5:11.
Sakafasi e meki taki wi abi boen matifasi nanga trawan
10. Fa sakafasi e meki a matifasi di wi abi nanga kompe-kresten, kon moro boen?
10 Sakafasi na a pasi foe koni, bika a e meki taki wi abi boen matifasi nanga wi kompe-kresten. Heri boen na apostel Paulus e gi wi a rai: „No doe noti foe trobifasi ede noso foe di oenoe e prakseri oensrefi nomo, ma nanga sakafasi foe jeje foe di oenoe e si trawan moro hei leki oensrefi, ala di oenoe no e hori wan ai tapoe oen eigi afersi nomo foe persoonlijk belangstelling ede, ma foe persoonlijk belangstelling toe, tapoe a di foe trawan” (Filipisma 2:3, 4). Sakafasi sa jepi wi na wan konifasi foe no strei nanga trawan noso foe proeberi foe doe sani moro boen moro trawan. So wan fasi foe denki e tjari problema kon gi wi èn gi den kompe-kresten foe wi.
11. Foe san ede sakafasi kan jepi wi foe tan farawe foe meki fowtoe?
11 Na foeroe okasi, sakafasi sa jepi wi foe tan farawe foe meki fowtoe. Fa so? Bika sakafasi sa tapoe wi foe froetrow pasa marki na tapoe wisrefi. Na presi foe dati, wi sa warderi a rai foe Paulus ini 1 Korentesma 10:12: „Meki a sma di e denki taki a e tanapoe, loekoe boen taki a no fadon.” A sma di abi bigifasi e froetrow toemoesi na tapoe ensrefi, èn foe dati ede a e meki fowtoe moro makriki, bika foe den sani na dorosei di abi krakti na en tapoe noso foe den eigi swakifasi foe en.
12. Sakafasi sa boeweigi wi foe doro sortoe bijbel froeplekti?
12 Sakafasi sa jepi wi foe doro a markitiki foe saka wisrefi na trawan ondro. Ini Efeisesma 5:21 wi e kisi a rai: „Saka oensrefi na makandra ondro na ini a frede foe Krestes.” Foe troe, a no wi alamala moesoe saka wisrefi na trawan ondro? Pikin moesoe saka densrefi na den papa nanga mama ondro, wefi na den masra ondro, èn masra na Krestes ondro (1 Korentesma 11:3; Efeisesma 5:22; 6:1). Dan na ini iniwan kresten gemeente, ala sma, so srefi den dinari ini a diniwroko, moesoe sori taki den e saka densrefi na den owroeman ondro. A no de so toe taki owroeman moesoe saka densrefi na a getrow srafoe-groepoe ondro, spesroetoe foe di a kringopziener e teki presi gi a groepoe dati? Dan foe en sei a kringopziener moesoe saka ensrefi na a distriktopziener ondro èn a distriktopziener moesoe saka ensrefi na ondro a bijkantoro-komte foe a kondre pe a e dini. San de foe taki foe den bijkantoro-komte memre? Den moesoe „saka densrefi na makandra ondro” èn na ondro a Tiri Skin toe, di e teki presi gi a getrow èn koni srafoe-groepoe, di, foe en sei, moesoe gi frantiwortoe na Jesus, a Kownoe di Jehovah poti na tapoe a kownoestoeroe (Mateus 24:45-47). Neleki fa a de nanga iniwan skin foe owroeman, memre foe a Tiri Skin moesoe lespeki a fasi fa den trawan e si sani. Foe eksempre, wan foe den kan denki taki a abi wan boen idea. Ma efoe a nomroe foe den tra memre di e agri nanga a rai foe en, no kisi, dan a moesoe libi na afersi dati. Troetroe, wi alamala abi sakafasi fanowdoe, bika wi alamala moesoe saka wisrefi na trawan ondro.
13, 14. (a) Na ini sortoe spesroetoe omstandigheid sakafasi sa jepi wi? (b) Sortoe eksempre Petrus ben gi ini a tori foe a teki di wan sma e teki rai?
13 Sakafasi de spesroetoe a pasi foe koni, foe di sakafasi e meki en moro makriki gi wi foe teki rai nanga tranga leri. Ibriwan foe wi abi tranga leri fanowdoe ten na ten, èn wi moesoe poti prakseri na tapoe a rai ini Odo 19:20: „Arki na rai èn teki tranga leri, so taki joe mag kon koni na ini a ten di de na joe fesi.” So leki ben taki heri boen, dan sakafasi e meki taki wan sma no sa firi taki den hati en noso no de kolokoe te a e kisi tranga leri. Na apostel Paulus e gi wi a rai moro fara ini Hebrewsma 12:4-11, foe a koni foe saka wisrefi na wan sakafasi na tranga leri ondro. Soso na a fasi disi wi kan howpoe foe tjari wisrefi na wan konifasi na tapoe a pasi di de na wi fesi èn kisi na so fasi a prijs foe têgo libi. Fa dati sa de wan kolokoe bakapisi!
14 Ini a tori disi wi ben sa kan sori go na a eksempre foe na apostel Petrus. A ben kisi serjoesoe rai foe na apostel Paulus, so leki wi e leri foe a tori ini Galasiasma 2:14: „Di mi ben si taki den no ben e waka boen ini akroederi nanga a waarheid foe a boen njoensoe, mi ben taigi Cefas [Petrus] na fesi foe den alamala: ’Efoe joe, ala di joe na wan djoe, e libi so leki den nâsi e libi èn no so leki den djoe e libi, fa a kan dan taki joe e dwengi den sma foe den nâsi foe libi so leki fa den djoe e libi?’” Na apostel Petrus ben firi taki a afrontoe en? No foe wan langa ten, èn kande srefi no wan momenti, so leki wi kan si baka ten ini a fasi fa a ben kari en „wi lobi brada Paulus” ini 2 Petrus 3:15, 16.
15. San na abi di wi abi sakafasi èn a de di wi de kolokoe abi foe doe nanga makandra?
15 Dan joe abi a tori toe foe wan sma abi satisfaksi nanga ensrefi. Wi no kan de kolokoe efoe wi no abi satisfaksi nanga wi libi, den grani di wi e kisi, den blesi foe wi. A kresten di abi sakafasi e teki en so: „Efoe Gado e gi pasi foe disi, mi man tjari en”, san na troetroe san na apostel Paulus e taki, so leki wi e leisi ini 1 Korentesma 10:13: „No wan tesi ben kon na oenoe boiti san libisma gwenti. Ma Gado de getrow èn a no sa meki oenoe kisi tesi moro leki san oenoe man tjari, ma makandra nanga a tesi a sa sorgoe toe taki oenoe man kisi froeloesoe, so taki oenoe man horidoro na ondro.” So boen, wi e si agen fa sakafasi na a pasi foe koni, bika a e jepi wi foe de kolokoe awansi sortoe omstandigheid wi abi ini wi libi kande.
Lobi sa jepi wi foe abi sakafasi
16, 17. (a) Sortoe bijbel eksempre e poti krakti na tapoe a moro bigi eigifasi di e jepi wi foe abi sakafasi? (b) Sortoe eksempre foe wan grontapoe sma e agersi a tori disi toe?
16 Moro leki iniwan sani, lobi di no e prakseri en eigi boen nomo, a·gaʹpe, sa jepi wi foe abi sakafasi. Foe san ede Jesus ben man foe horidoro nanga so wan sakafasi na ondro na ondrofeni foe en, na a pina-oedoe, di Paulus e froeteri den Filipisma? (Filipisma 2:5-8) Foe san ede a no ben abi a prakseri foe de a srefi leki Gado? Bika, so leki fa ensrefi ben taki: „Mi lobi a Tata” (Johanes 14:31). Dati meki ala ten a ben gi glori nanga grani na Jehovah, en hemel Tata. So boen, na wan tra okasi a ben poti prakseri na tapoe taki soso en hemel Tata boen. — Lukas 18:18, 19.
17 Wan sani di e agersi a tori disi, na san ben pasa ini a libi foe wan foe den fosi Amerkan poewema skrifiman, John Greenleaf Whittier. Di a man disi ben jongoe, a ben lobi wan jonkoewenke, èn wan leisi na wan wega foe spèl wortoe, a meisje disi ben spèl wan wortoe boen, ala di a man no ben spèl a wortoe boen. A sani disi ben meki a meisje no ben firi boen srefisrefi. Foe san ede? So leki fa a poewema skrifiman ben memre, a meisje ben taki: „Mi e sari taki mi spèl a wortoe dati. Mi no wani foe de moro hei leki joe . . . bika, joe si, mi lobi joe.” Ija, efoe wi lobi wan sma, wi sa wani taki a sma moesoe de moro hei moro wi, no na wi ondro, bika lobi abi sakafasi.
18. Na tapoe sortoe bijbel rai sakafasi sa jepi wi foe poti prakseri?
18 Disi na wan boen leri gi ala kresten, spesroetoe gi den brada. Te a e kon tapoe a kisi di wan sma kisi wan spesroetoe dienstgrani, wi sa prisiri taki a brada foe wi kisi a grani dati na presi foe wi noso wi sa firi pikinso djaroesoe noso abi bigi-ai? Efoe wi lobi a brada foe wi troetroe, wi sa prisiri taki a ben kisi a spesroetoe toewijzing dati noso kisi a warderi foe san a ben doe noso kisi wan dienstgrani. Ija, sakafasi sa meki en makriki foe poti prakseri na tapoe a rai: „Teki fesi na ini a sori foe grani na makandra” (Romesma 12:10). Wan tra vertaling e taki: „Gi makandra grani moro leki joesrefi” (New International Version). Dan ete wan leisi, wi kisi a rai foe na apostel Paulus: „Wroko tranga gi makandra nanga jepi foe lobi” (Galasiasma 5:13). Ija, efoe wi abi lobi, wi sa breiti foe dini den brada foe wi, foe wroko tranga gi den, foe poti a belang foe den èn a boen foe den fosi a di foe wi, san e aksi sakafasi foe wi sei. Sakafasi sa tapoe wi toe foe no skepi èn na so fasi tan farawe foe wiki a jeje foe djaroesoe noso bigi-ai ini trawan. Paulus ben skrifi taki lobi „no e djaf, no e kisi bigimemre”. Foe san ede? Bika a reide di de baka a djaf di wan sma e djaf èn a kisi di a e kisi bigimemre, na wan prakseri di sma e prakseri en eigi boen nomo, e si ensrefi moro hei moro trawan, ala di lobi de a moro prenspari eigifasi foe a prakseri di wan sma no e prakseri en eigi boen nomo. — 1 Korentesma 13:4.
19. Sortoe bijbel eksempre e agersi taki sakafasi nanga lobi e go anoe nanga anoe makandra, neleki fa bigimemre nanga a prakseri di wan sma e prakseri en eigi boen nomo e go anoe nanga anoe makandra?
19 A matifasi foe David nanga kownoe Saul nanga en manpikin Jonatan na wan heri boen eksempre foe a fasi fa lobi nanga sakafasi e go anoe nanga anoe makandra èn fa bigimemre nanga a prakseri di wan sma e prakseri en eigi boen nomo e go anoe nanga anoe makandra. Bika David ben abi boen bakapisi ini feti, den oema foe Israèl ben singi: „Saul ben kiri den doesoen tron doesoen, èn David den tindoesoen tron tindoesoen” (1 Samuèl 18:7). Foe di Saul no ben abi sakafasi kwetikweti, ma ben meki taki bigimemre ben njan en, dan sensi a ten dati a ben prakseri ini ensrefi foe kiri David, foe di a no ben wani si David na ai. Fa disi ben de heri tra fasi foe a jejefasi foe en manpikin Jonatan! Wi e leisi taki Jonatan ben lobi David leki en eigi sili (1 Samuèl 18:1). So boen san Jonatan ben doe, di, ini a fasi fa sani ben pasa baka makandra, a ben de krin taki Jehovah ben blesi David èn taki en, èn no Jonatan, ben sa tron kownoe foe Israèl, baka Saul? Jonatan ben firi djaroesoe noso ben abi bigi-ai? Kwetikweti! Foe di a ben abi foeroe lobi gi David, a ben kan taki, so leki fa wi e leisi ini 1 Samuèl 23:17: „No frede; bikasi na anoe foe mi papa Saul no sa feni joe, èn joe sa de kownoe tapoe heri Israèl, èn baka joe mi sa tron a di foe toe; èn mi papa Saul sabi dati toe.” A bigi lobi di Jonatan ben abi gi David ben meki a teki, na wan sakafasi, san a ben si leki a wani foe Gado ini a tori foe soema ben sa tron kownoe foe Israèl baka en papa.
20. Fa Jesus ben sori taki lobi nanga sakafasi abi foeroe foe doe nanga makandra?
20 San e poti krakti moro fara na tapoe san lobi nanga sakafasi abi foe doe nanga makandra, na san ben pasa a lasti neti di Jesus Krestes ben de nanga den apostel foe en bifo a dede. Ini Johanes 13:1, wi e leisi taki Jesus, „ben lobi den sma foe en di ben de ini grontapoe, èn a ben lobi den te na a kaba”. Baka a sani dati, wi e leisi, taki Jesus ben wasi den foetoe foe den apostel foe en, foe di a ben doe leki wan foetoeboi di ben abi sakafasi. Fa dati na wan krakti leri ini sakafasi! — Johanes 13:1-11.
21. Foe san ede wi moesoe abi sakafasi, foe taki en sjatoe?
21 Foe troe, foeroe reide de foe abi sakafasi. A de a joisti sani, na eerlijk sani foe abi sakafasi. A de a pasi foe bribi. A e meki taki wi abi boen matifasi nanga Jehovah Gado èn nanga den kompe-bribiman foe wi. A de a pasi foe koni. Èn moro leki ala sani, a de a pasi foe lobi èn a e tjari troe kolokoe kon.
Fa joe ben sa piki?
◻ Na sortoe fasi eerlijkfasi na wan jepi foe abi sakafasi?
◻ Foe san ede bribi ini Jehovah kan jepi wi foe abi sakafasi?
◻ San e sori taki na abi di wan sma abi sakafasi na a pasi foe koni?
◻ Foe san ede lobi de spesroetoe wan jepi gi na abi di wi abi sakafasi?
[Prenki na tapoe bladzijde 15]
Na wan sakafasi Job ben saka ensrefi na Jehovah ondro. A no ben „floekoe Gado èn dede”
[Prenki na tapoe bladzijde 17]
Na wan sakafasi Petrus ben saka ensrefi di Paulus ben gi en rai na poebliki