Fa joe kan sori troetroe sakafasi?
TROETROE sakafasi abi bigi waarde na ini na ai foe Gado. Jakobus ben skrifi: „Gado e kakafoetoe gi den heimemrewan, ma a e gi no-froedini boen-ati na den sakafasiwan” (Jakobus 4:6). Djaso Jakobus ben sa kan sori go na difrenti prakseri di ben tjari kon na krin na ini den Hebrew Boekoe foe bijbel. „Jehovah hei, èn tokoe a e si a sakafasiwan; ma den wan di abi bigimemre, a sabi soso foe farawe.” „Den heimemre ai foe libisma moesoe saka, èn a bigimemrefasi foe libisma moesoe boigi; èn Jehovah wawan moesoe kon hei.” „Efoe den na sma di e spotoe trawan, ensrefi [Gado] sa spotoe den; ma gi den safri-atiwan a sa doe boen.” — Psalm 138:6; Jesaja 2:11; Odo 3:34.
Na apostel Petrus toe ben gi deki-ati foe abi sakafasi. A ben skrifi: „Oenoe alamala weri sakafasi foe jeje leki wan banti lontoe oen mindribere, gi makandra, bika Gado e kakafoetoe gi den heimemrewan, ma a e gi no-froedini boen-ati na den sakafasiwan.” — 1 Petrus 5:5.
Krestes en eksempre foe sakafasi
Joe ben sa kan aksi joesrefi: San na a boen noso a wini foe abi sakafasi? A piki de prenspari gi a sma di e doe moeiti foe de wan troetroe kresten — efoe wan sma abi sakafasi, dan a de leki Krestes. Jesus ben sori en sakafasi di a ben teki na aparti wroko foe kon na grontapoe komoto na a hemel kontren èn foe kon tron wan lagi libisma, di lagi moro den engel (Hebrewsma 2:7). Ala di a ben de a Manpikin foe Gado, tokoe a ben horidoro na ondro a lagi di den relisi feanti foe en ben e lagi en srefisrefi. A ben tan hori ensrefi na ondro den tesi di a kisi, ala di a ben man srefi foe e kari foeroe legioen engel foe kon jepi en. — Mateus 26:53.
Te foe kaba, Jesus ben anga na ini sjen na a pina-oedoe, ma tokoe a ben tan getrow na en Tata. Foe dati ede Paulus ben kan skrifi foe en: „Tan hori a fasi foe denki disi na ini oenoe, di ben de na ini Krestes Jesus toe, di, ala di a ben de na ini a skin leki di foe Gado, no ben prakseri foe teki sani abra nanga tranga, dati wani taki a moesoe de a srefi leki Gado. Nôno, ma a ben leigi ensrefi èn ben teki a fasi foe wan srafoe èn ben kon de leki libisma. Moro leki dati, di a ben de ini a fasi foe wan libisma, a ben saka ensrefi èn ben gi jesi te na dede, ija, dede na wan pina-oedoe.” — Filipisma 2:5-8.
So boen, fa wi kan sori troetroe sakafasi? Na ini den situwâsi di wi e miti, fa wi kan handri nanga sakafasi na presi foe handri na wan heimemre fasi?
Fa wan sma di abi sakafasi e handri
Meki wi go loekoe fa sakafasi e wroko, na wrokope noso na ini a kresten diniwroko. Efoe wroko moesoe doe na wan boen fasi, dan opziener, driktoro, nanga basi ben sa kan de fanowdoe. Wan sma moesoe teki bosroiti. Fa joe e handri? Joe e prakseri: „San a e prakseri foe ensrefi taki a e taigi mi san mi moesoe doe? Mi doe a wroko disi moro langa leki en.” Ija, efoe joe abi heimemre, dan joe sa firi froeferi foe saka joesrefi na ondro trawan. Na a tra sei, wan sma di abi sakafasi e doe moeiti foe „no doe noti foe di oenoe lobi foe meki trobi noso prakseri oensrefi nomo, ma nanga sakafasi foe jeje, foe di oenoe e si den tra sma moro hei leki oensrefi.” — Filipisma 2:3.
Fa joe e handri te wan sma di moro jongoe noso te wan oemasma e gi joe rai? Efoe joe abi sakafasi, dan seiker joe sa prakseri foe na idea. Efoe joe abi heimemre, dan joe no sa lobi en èn wantewante joe sa weigri foe teki en. Na presi foe dati, joe ben sa wani abi prèise foe sma di e kori joe, di kan tjari pori kon gi joe, noso joe wani rai di kan jepi joe foe gi joe deki-ati? — Odo 27:9; 29:5.
Joe man nanga gens? Sakafasi sa jepi joe foe kakafoetoe gi moeilek situwâsi èn foe horidoro, neleki fa Job ben doe dati. Efoe joe abi heimemre, dan joe sa abi a gwenti foe broeja èn meki oproeroe teige sari situwâsi èn sokari pikinpikin sani. — Job 1:22; 2:10; 27:2-5.
Sakafasi e sori lobi èn e gi pardon
A moeilek gi son sma foe taki „Sorry. Mi meki wan fowtoe. Joe ben abi leti.” Foe san ede? Toemoesi foeroe heimemre! Tokoe, foeroetron wan opregti pardon kan tjari wan kaba kon na wan kesekese na ini a trowlibi na wan makriki fasi.
Joe wani foe gi pardon te wan sma afrontoe joe? Noso, foe heimemre ede, joe e hori a sma na ati, kande foeroe dei èn foeroe moen langa, foe di joe e weigri foe taki nanga a sma di joe denki taki a afrontoe joe? Joe e go doro srefi nanga wan ogri-ati trobi wan langa pisi ten soso foe teki refensi? Sma kiri trawan na ini wan toe foe den sortoe trobi disi. Na ini tra trobi, sma proeberi srefi foe pori a nen foe trawan. Kontrari foe dati, wan sma di abi sakafasi abi lobi èn e gi pardon. Foe san ede? Bika lobi no e tan prakseri na ogri di doe. Jehovah ben wani foe gi den Israèlsma pardon, efoe den ben wini a heimemre foe den. A bakaman foe Jesus di abi sakafasi wani foe gi pardon, srefi ibri tron baka! — Joèl 2:12-14; Mateus 18:21, 22; 1 Korentesma 13:5.
Wan sma di abi sakafasi ’e teki fesi foe gi trawan grani’ (Romesma 12:10). A New International Version e taki: „Gi makandra grani moro leki joesrefi.” Joe e prèise tra sma èn e warderi den sani di den man doe èn den talenti foe den? Noso ala ten joe abi foe feni wan sani foe flaka a nen foe den? Ija, joe man prèise tra sma troetroe na wan opregti fasi? Efoe joe abi problema foe doe dati, dan kande persoonlijk tweifri nanga heimemre na joe problema.
Wan sma di abi heimemre no abi pasensi. Wan sma di abi sakafasi abi pasensi èn langa pasensi. Fa a de nanga joe? Joe e atibron esi-esi foe iniwan takroe fasi fa sma e handri nanga joe? A fasi disi foe handri de kontrari a abi di wan sma abi langa-pasensi. Efoe joe abi sakafasi, dan joe no sa prakseri toemoesi foe joesrefi. Prakseri san ben pasa di den disipel foe Jesus ben prakseri toemoesi foe densrefi — den ben go na ini fajafaja haritaki di abi foe doe nanga soema na a moro prenspariwan. Den ben frigiti taki den alamala ben de „soso-srafoe”! — Lukas 17:10; 22:24; Markus 10:35-37, 41.
A Fransi skrifiman Voltaire ben kari sakafasi „a bescheidenfasi foe a sili . . . a dresi gi heimemre”. Ija, sakafasi na sakafasi foe jeje. Wan sma di abi sakafasi de bescheiden na ini jeje, a no abi heimemre. A e sori troetroe lespeki èn a abi boen maniri.
So boen, foe san ede wi moesoe doe moeiti foe abi sakafasi? Bika sakafasi e meki wi kisi a boen foe Gado èn a e jepi wi foe kisi a tiri foe Gado. So srefi bika foe a sakafasi foe Danièl, meki Jehovah ben si a profeiti leki wan sma di Gado „lobi srefisrefi” èn a ben seni wan engel go na en nanga wan fisjoen! (Danièl 9:23; 10:11, 19). Sakafasi e tjari foeroe wini kon. A e tjari troetroe mati kon di lobi joe. Ma moro prenspari, a e tjari a blesi foe Jehovah kon. „A bakapisi foe sakafasi nanga frede gi Jehovah, na goedoe èn glori èn libi.” — Odo 22:4.
[Prenki na tapoe bladzijde 7]
Foe taki pardon na ini sakafasi, kan meki a libi moro makriki