Kownoekondre preikiman e froeteri
A soekoe di sma e soekoe a troe Gado tjari wini kon
NA INI a di foe tin jarihondro b.G.T. a toe-lo kownoekondre Juda ben foeroe nanga falsi anbegi. Ma na mindri na anbegi foe kroektoe gado disi di ben de so foeroe, wan man ben libi di ben abi wan opregti ati gi Gado. En nen ben de Josafat. A profeiti Jehu ben taki foe en: „Boen sani feni na joe, bika joe . . . sreka joe ati foe soekoe a troe Gado” (2 Kroniki 19:3). Na a srefi fasi na ini a ten disi, na ini den „moeilek ten [disi] di tranga foe pasa”, miljoenmiljoen sma ’sreka den ati foe den’ foe soekoe a troe Gado, Jehovah (2 Timoteus 3:1-5). Na ondrofenitori di e kon now foe Togo na ini West-Afrika e sori taki a troe.
Casimir ben fisiti wan Katolik skoro èn ben doe en fosi Komuni di a ben abi neigi jari. Ma di a ben abi 14 jari, dan Casimir no ben e go na kerki moro. Disi ben meki taki a ben libi na ini frede bika a ben prakseri taki te a no ben e go na a mis dan dati ben sa abi leki bakapisi taki a ben sa go na ini wan faja hèl, noso srefi na ini a vagevuur.
Na skoro, Casimir ben kon makandra nanga wan groepoe jongoe sma di ben miti wán leisi wan wiki foe studeri bijbel. A ben bigin leisi bijbel gi ensrefi toe. Na wan okasi Casimir ben leisi na ini a boekoe Openbaring foe wan kefalek takroe werdri meti di ben opo komoto na se (Openbaring 13:1, 2). Di a ben aksi a fesiman foe a bijbelstudie groepoe foe dati, dan a fesiman ben taigi en taki a meti ben de wan troetroe meti èn taki a ben o opo komoto na se troetroe. A froeklari disi ben gi Casimir broko-ede bika a no ben libi fara foe na Atlantis sjoro. A ben de seiker taki a ben o de wan foe den fosi sma di a werdri meti ben o teki.
Casimir ben bigin kibri en moni so taki a ben kan lowe go na a woestijn na noordsei, foe no meki a werdri meti kisi en. A ben froeteri wan skorokompe san a ben abi na prakseri. Foe di a skorokompe ben de wan foe den Kotoigi foe Jehovah, meki a skorokompe ben gi en a djaranti taki no wan troetroe meti leki disi ben sa opo komoto na se. Sjatoe baka dati, Casimir ben kisi wan kari foe kon na den konmakandra na a Kownoekondre zaal. A ben lobi den konmakandra èn ben bigin fisiti den doronomo. A ben teki wan oso-bijbelstudie toe.
Ala di Casimir ben go na fesi nanga a studie foe en, dan gens foe en osofamiri ben bigin. En osofamiri ben anbegi den fositen tata èn ben njan meti di ben tan abra foe den ofrandi èn di den no ben poeroe a broedoe foe a meti fosi. Di na wan switi fasi Casimir ben weigri foe njan a meti, dan den ben bedreigi èn ben aksi en foe libi gowe na oso. Casimir ben tan bedari èn den no ben doe den sani di den ben bedreigi en nanga dati. Ma dri moen langa, soso a sortoe meti dati ben de na a njanjan foe na osofamiri. Casimir no ben abi nofo njanjan, ma a ben horidoro na ondro disi èn na ondro tra problema.
Casimir ben tan gro na jejefasi te leki a ben gi ensrefi abra na Gado èn ben teki dopoe. Baka ten den ben poti en na wroko leki dinari na ini a diniwroko èn a ben go na a di foe fo klas foe a Bedinari Skoro na Togo. Nownow a e doe friwani wroko nanga prisiri na a bijkantoro.
Ija, den wortoe foe kownoe David sori foe de troe na ini foeroe situwâsi: „Efoe joe e soekoe [Jehovah], dan a sa meki taki joe feni en.” — 1 Kroniki 28:9.
[Prenki na tapoe bladzijde 8]
Casimir (na a reti-anoesei) e doe friwani wroko nanga prisiri na a bijkantoro