Abi a froetrow taki Jehovah sa meki en prakseri kon troe
„Den regtfardikiwan sa abi grontapoe, èn den sa libi na tapoe foe têgo.” — PSALM 37:29.
1. San na a prakseri di Jehovah abi nanga libisma èn nanga a grontapoe disi?
DI JEHOVAH ben meki wi fosi papa nanga mama, Adam nanga Eva, a ben meki den volmaakti. Èn a ben meki den so, taki den ben kan libi foe têgo na tapoe a grontapoe disi — efoe den ben gi jesi na den wet foe en (Genesis 1:26, 27; 2:17). Moro fara Gado ben poti den ini wan kontren di ben de wan paradijs (Genesis 2:8, 9). Jehovah ben taigi den: „Meki pikin èn kon foeroe èn foeroe grontapoe èn poti en na oenoe ondro” (Genesis 1:28). So boen, te foe kaba den pikin foe den ben sa panja na tapoe heri grontapoe, èn a grontapoe disi ben sa tron wan paradijs di ben foeroe nanga volmaakti, kolokoe libisma. Fa a libisma famiri ben abi wan heri boen bigin! „Gado ben si ala san a ben meki èn loekoe! a ben de heri boen.” — Genesis 1:31.
2. Sortoe aksi e kon ini a tori foe a fasi fa libisma afersi de?
2 Tokoe a fasi fa libisma afersi de, di de doesoendoesoen jari kaba, no gersi srefisrefi a prakseri di Gado ben abi ini a bigin. A libisma famiri de boen fara foe volmaaktifasi èn den no de kolokoe kwetikweti. Den situwâsi na grontapoe ben de foe sari, èn so leki fa ben froeteri na fesi, dan den kon krinkrin moro takroe ini a ten foe wi (2 Timoteus 3:1-5, 13). Foe dati ede, fa wi kan abi a froetrow, taki a prakseri di Gado abi gi libisma sa kon troe ini a ten di de krosibei na wi fesi? A sa de so, taki moro langa pisi ten sa pasa, nanga sari situwâsi di e tan go doro?
San ben meki taki sani kon moro takroe?
3. Foe san ede Jehovah no ben tjari wan kaba kon wantewante na a opo di libisma opo densrefi kontrari en?
3 Den sma di abi wan soifri sabi foe Gado Wortoe di skrifi nanga jepi foe santa jeje, sabi foe san ede Jehovah ben gi pasi foe den takroe situwâsi disi de na grontapoe. Den sabi toe san a sa doe na den. Foe tori di skrifi na ini bijbel, den leri taki wi fosi papa nanga mama ben meki wan fowtoe gebroiki foe a toemoesi moi presenti di Gado ben gi libisma foe de fri foe froekisi san den wani. (Teki gersi 1 Petrus 2:16.) Den ben froekisi na wan fowtoefasi foe waka nanga libi sondro foe hori Gado na prakseri (Genesis, kapitel 2 nanga 3). Na opo di den ben opo densrefi kontrari Gado, ben meki aksi kon ini a tori foe a moro bigi makti, aksi so leki: Na Universeel Soeverein abi a reti foe tiri libisma? A tiri foe en de a moro boenwan gi den? Libisma kan tiri nanga boen bakapisi sondro a tiri foe Gado? A moro boen fasi foe kisi den piki tapoe den aksi disi ben de, foe meki hondrohondro jari foe libisma tiri pasa. Den bakapisi ben sa sori sondro misi efoe libisma ben kan abi boen bakapisi sondro a Mekiman foe den.
4, 5. (a) San ben de a bakapisi foe a trowe di libisma trowe a tiri foe Gado? (b) San a ten di pasa sori sondro misi?
4 Di Adam nanga Eva gowe libi Gado, a no ben meki den abi a volmaaktifasi foe den moro. Sondro a jepi foe en, den ben go na baka. A bakapisi ben de onvolmaaktifasi, owroedei, èn dede te foe kaba. Nanga jepi foe den wet foe kon gebore nanga san wi kisi foe wi papa nanga mama, wi fosi papa nanga mama ben gi den takroe eigifasi dati abra na ala den bakapikin foe den, so srefi wi (Romesma 5:12). Èn san de foe taki foe a bakapisi foe doesoendoesoen jari di libisma ben tiri? A ben de wan rampoe, neleki fa Preikiman 8:9 e taki en nanga leti: „A wan libisma ben tiri tapoe a tra libisma nanga ogri bakapisi gi en.”
5 A pasa di ten ben e pasa, ben sori sondro misi taki libisma no man foe tiri den afersi foe den nanga boen bakapisi sondro a Mekiman foe den. A bijbel skrifiman, Jeremia, di ben skrifi nanga jepi foe santa jeje, ben froeklari: „Mi sabi heri boen, o Jehovah, taki a no de na a grontapoe sma foe a bepaal en foetoe na pasi. A no de na wan man di e waka srefi foe bepaal pe foe poti en foetoe na pasi.” — Jeremia 10:23; Deuteronomium 32:4, 5; Preikiman 7:29.
A prakseri foe Gado no kenki
6, 7. (a) Den doesoendoesoen jari historia ben kenki a prakseri foe Jehovah? (b) San de ini a prakseri foe Jehovah toe?
6 A pasa di doesoendoesoen jari foe libisma historia pasa — di ben lai nanga ogridoe nanga pina — kenki a prakseri foe Gado? A Wortoe foe en e taki: „Disi na san Jehovah ben taki, a Mekiman foe hemel, En, a troe Gado, a Sma di seti grontapoe èn a Mekiman foe en, En, a Sma di ben poti en steifi, di no ben meki en foe soso, di ben seti en foe sma libi na tapoe” (Jesaja 45:18). Foe dati ede Gado ben meki grontapoe foe libisma libi na en tapoe, èn dati de a prakseri foe en ete.
7 Jehovah no ben meki grontapoe foe sma libi na en tapoe wawan, ma a ben abi na prakseri toe taki a ben sa tron wan paradijs, di volmaakti, kolokoe sma ben sa njanboen foe dati. Dati meki bijbel ben taki na fesi, taki „wan njoen grontapoe” ben sa de, wan njoen libisma libimakandra, pe „regtfardikifasi sa de” (2 Petrus 3:13). Èn Gado Wortoe e froeteri wi ini Openbaring 21:4, taki na ini en njoen grontapoe, „a sa figi ala watra-ai poeroe na den [libisma] ai, èn dede no sa de moro, no wan krei, no wan babari, no wan pen no sa de moro”. Na dati meki Jesus ben kan taki foe a njoen grontapoe dati di ben sa kon, leki „Paradijs”. — Lukas 23:43.
8. Foe san ede wi kan de seiker taki Jehovah sa meki en prakseri kon troe?
8 Foe di Jehovah de a Mekiman foe na universum èn a abi ala makti èn ala koni, meki no wan sma kan gens a prakseri foe en. „Jehovah foe den legre ben meki wan sweri, taki: ’Foe troe, joisti so leki mi prakseri, na so a sa pasa; èn joisti so leki mi denki, dati na san sa kon troe’” (Jesaja 14:24). So boen, te Gado e taki dati a sa meki a grontapoe disi kon tron wan paradijs di volmaakti libisma sa libi na tapoe, dan dati na san sa pasa. Jesus ben taki: „Kolokoe foe den safri-atisma, bika den sa kisi grontapoe!” (Mateus 5:5; teki gersi Psalm 37:29.) Wi kan de seiker taki a pramisi dati sa kon troe. Foe taki en leti, wi de klariklari foe lasi wi libi gi a pramisi disi.
Den ben froetrow tapoe Jehovah
9. San Abraham ben doe san ben sori a froetrow foe en tapoe Jehovah?
9 Na ini a heri historia, foeroe sma di ben abi frede gi Gado, ben de klariklari foe lasi a libi foe den gi a prakseri di Gado abi gi grontapoe, bika den ben abi na overtoigi taki a ben sa meki a prakseri dati kon troe. Ala di den ben abi pikinso sabi kande, den ben froetrow tapoe Gado èn den ben bow a libi foe den lontoe a doe foe en wani. Foe eksempre, teki Abraham, di ben libi so wan 2000 jari bifo Jesus ben waka na grontapoe — langa ten bifo sma ben bigin skrifi bijbel. A ben froetrow na tapoe taki Jehovah ben sa meki den pramisi foe En kon troe. Kande Abraham ben leri sani di abi foe doe nanga a Mekiman foe en getrow fositen tata Sem, di ben kisi leri foe Noa. Foe dati ede, di Gado ben taigi Abraham foe froisi komoto na Ur foe den Kaldewsma, pe ala sani ben e go heri boen, foe go na a kefarlek kondre Kanan di a no ben sabi kwetikweti, a famiri-edeman dati ben sabi taki a ben kan froetrow na Jehovah tapoe, èn foe dati ede a ben go (Hebrewsma 11:8). Baka wan pisi ten, Jehovah ben taigi en: „Mi sa meki wan bigi nâsi kon foe joe.” — Genesis 12:2.
10, 11. Foe san ede Abraham ben de klariklari foe òfer en wan-enkri manpikin, Isak?
10 San ben pasa baka di Abraham ben kisi Isak? Jehovah ben sori Abraham taki a ben sa de nanga jepi foe Isak, taki den bakapikin foe en ben sa gro kon tron wan bigi nâsi (Genesis 21:12). So boen, a ben moesoe foe gersi taki a ben de wan heri tra sani, di Jehovah ben taigi Abraham, leki wan tesi tapoe en bribi, foe òfer en manpikin Isak (Genesis 22:2). Tokoe, nanga ala froetrow tapoe Jehovah, Abraham ben bigin foe doe san a ben moesoe doe, èn te joe e loekoe en boen, a ben opo en nefi foe kiri Isak. Na a lasti momenti, Gado ben seni en engel go foe tapoe Abraham foe doe disi. — Genesis 22:9-14.
11 Foe san ede Abraham ben gi jesi na so wan fasi? Hebrewsma 11:17-19 e tjari kon na krin: „Nanga bribi, joe ben sa kan taki dati Abraham ben òfer Isak kaba, di a ben kisi tesi, èn a man, di nanga prisiri ben kisi den pramisi, ben proeberi foe òfer en wan-enkri manpikin, ala di den ben taigi en: ’San den sa kari „joe siri” sa de nanga jepi foe Isak.’ Ma a ben sabi taki Gado ben man foe opo en baka srefi foe dede; èn foe drape a ben kisi en baka toe, na wan agersifasi.” Romesma 4:20, 21 e taki na a srefi fasi: „Ma foe a pramisi foe Gado [Abraham] no ben degedege foe di a ben mankeri bribi, . . . a ben abi na overtoigi dorodoro taki [Gado] ben man foe doe san a ben pramisi.”
12. Fa Abraham ben kisi pai gi a bribi foe en?
12 Abraham ben kisi pai foe a bribi foe en, no wawan foe di Isak ben tan na libi èn foe di wan „bigi nâsi” ben kon foe en, ma na wan tra fasi toe. Gado ben taigi Abraham: „Èn nanga joe siri ala nâsi foe grontapoe seiker sa blesi densrefi, foe di joe ben arki mi sten” (Genesis 22:18). Fa? A Kownoe foe Gado hemel Kownoekondre ben sa kon nanga jepi foe a famirilin foe Abraham. A Kownoekondre dati ben sa masi ala sani poeroe foe na ogri grontapoe disi di Satan e tiri (Danièl 2:44; Romesma 16:20; Openbaring 19:11-21). Baka dati, ini wan krin grontapoe ondro Kownoekondre tiri, wan Paradijs ben sa kon na heri grontapoe, èn foe „ala nâsi”, sma di doe a wani foe Gado, ben sa njanboen foe wan volmaakti gosontoe èn libi foe têgo (1 Johanes 2:15-17). Èn ala di Abraham ben abi soso wan pikinso sabi foe a Kownoekondre, a ben froetrow tapoe Gado èn ben froewakti taki a Kownoekondre ben sa opo. — Hebrewsma 11:10.
13, 14. Foe san ede Job ben froetrow tapoe Gado?
13 Wan toe hondro jari baka dati, joe ben abi Job, di ben libi na mindri a di foe 17 nanga a di foe 16 jarihondro bifo Gewoon Teri, na ini a kondre di de now Arabia. En toe ben libi bifo sma ben bigin skrifi bijbel. Job „ben sori taki a de sondro fowtoe èn opregti, èn a ben frede Gado èn no ben doe san takroe” (Job 1:1). Di Satan ben meki wan hebi, takroe siki di e gi skin-ati, kon tapoe Job, a getrow man dati „no ben taki no wan sondoe wortoe” na ini a heri pina ten foe en (Job 2:10, The New English Bible). Job ben froetrow tapoe Gado. Èn ala di a no ben sabi finifini foe san ede a ben pina so hebi, a ben de klariklari foe lasi en libi gi Gado èn den pramisi foe En.
14 Job ben sabi taki srefi efoe a ben dede, dan wan dei Gado ben kan gi en libi baka nanga jepi foe na opobaka. A ben sori taki a ben abi a howpoe disi, di a ben taigi Jehovah Gado: „O efoe joe ben sa kibri mi ini Sjeool [a grebi], . . . taki joe ben sa poti wan pisi ten gi mi èn dan ben sa memre mi! Wan man di tranga na skin fasi kan libi baka te a dede? . . . Joe sa kari, èn misrefi sa piki joe” (Job 14:13-15). Ala di Job ben de ini hebi banawtoe, a ben sori bribi ini a soevereinfasi foe Jehovah, di a ben taki: „Te leki mi lasti bro koti, mi no sa meki mi soifri retifasi libi mi!” — Job 27:5.
15. Fa David ben taki foe en froetrow tapoe a prakseri foe Jehovah?
15 So wan siksi jarihondro baka Job èn so wan doesoen jari bifo Jesus ben kon na grontapoe, David ben sori en froetrow tapoe wan njoen grontapoe. A ben taki ini den psalm: „Den sma di e howpoe tapoe Jehovah na denwan di sa kisi grontapoe. Wan pikin ten libi ete, èn na ogrisma no sa de moro . . . Ma den safri-ati sma sa abi grontapoe leki a porsi foe den, èn den sa feni switi prisiri troetroe na ini vrede di de pasa marki. Den regtfardikiwan sa abi grontapoe, èn den sa libi na tapoe foe têgo.” Bika David ben abi wan howpoe di no ben degedege, meki a ben gi tranga: „Froetrow tapoe Jehovah . . . Abi switi prisiri ini Jehovah toe, èn a sa gi joe san na ati foe joe e aksi.” — Psalm 37:3, 4, 9-11, 29.
16. Sortoe howpoe ’wan bigi wolkoe foe kotoigi’ ben abi?
16 Na ini ala den hondrohondro jari, getrow man nanga oema ben abi a srefi howpoe disi foe têgo libi na grontapoe. Foe taki en leti, den ben de ’wan bigi wolkoe foe kotoigi’ di ben lasi den libi troetroe gi den pramisi foe Jehovah. Foeroe foe den owroeten kotoigi dati foe Jehovah ben kisi hebi skin-ati èn den ben kiri den, foe a bribi foe den ede, „foe den ben kan feni wan moro betre opobaka”. Fa so? Ini a njoen grontapoe, Gado sa pai den nanga wan moro betre opobaka èn a froewakti foe libi foe ala ten. — Johanes 5:28, 29; Hebrewsma 11:35; 12:1.
Kresten Kotoigi e froetrow tapoe Gado
17. O tranga den fosi jarihondro kresten ben froetrow tapoe Jehovah?
17 Ini a fosi jarihondro Gewoon Teri, Jehovah ben tjari moro finifini tori ini a tori foe a Kownoekondre èn a tiri di a ben sa tiri grontapoe, kon na krin gi a kresten gemeente di no ben opo so langa ete. Foe eksempre, a santa jeje foe Jehovah ben meki na apostel Johanes skrifi, taki a nomroe foe den sma di ben sa de makandra nanga Jesus Krestes ini a Kownoekondre foe hemel ben sa de 144.000. Den disi ben sa de getrow foetoeboi foe Gado di a ben „bai poeroe na mindri a libisma famiri” (Openbaring 7:4; 14:1-4). Den ben sa tiri grontapoe „leki kownoe” nanga Krestes na hemel (Openbaring 20:4-6). So tranga den fosi jarihondro kresten disi ben froetrow tapoe Jehovah taki a sa meki en prakseri kon troe gi a hemel Kownoekondre èn a grontapoe di a ben sa tiri, taki den ben de klariklari foe dede gi a bribi foe den. Foeroe foe den ben doe dati toe.
18. Fa Jehovah Kotoigi ini a ten disi e waka na baka den kompe foe den foe a ten di pasa someni langa?
18 Ini a ten disi, pikinmoro feifi miljoen Kotoigi foe Jehovah abi a srefi froetrow tapoe Gado di den kompe foe den ben abi di ben libi hondrohondro jari bifo den. Den disiten Kotoigi disi, ben de klariklari toe foe lasi a libi foe den gi den pramisi foe Gado. Den gi den libi abra na en èn den abi a heri bijbel foe tranga a bribi foe den (2 Timoteus 3:14-17). Den disiten Kotoigi disi foe Jehovah e waka na baka Jesus fosi jarihondro bakaman, di ben froeklari taki den ben sa „gi jesi na Gado leki tiriman moro leki na libisma” (Tori foe den Apostel 5:29). Ini a jarihondro disi, foeroe foe den kresten Kotoigi disi ben kisi bita-ati froefolgoe. Den ben kiri sonwan foe den srefi foe den bribi ede. Trawan dede foe siki ede, wan ongolokoe, noso foe di den ben kon owroe. Ma neleki getrow kotoigi foe a ten di pasa, den froetrow tapoe Gado, bika den ben sabi taki a ben sa gi den libi baka na ini en njoen grontapoe nanga jepi foe na opobaka. — Johanes 5:28, 29; Tori foe den Apostel 24:15; Openbaring 20:12, 13.
19, 20. San wi e erken foe den bijbel profeititori gi a ten foe wi?
19 Jehovah Kotoigi e froestan taki langa ten pasa kaba bijbel profeititori ben froeteri na fesi, taki dati den ben sa tjari den komoto na ala nâsi kon na ini wan bradafasi na heri grontapoe (Jesaja 2:2-4; Openbaring 7:4, 9-17). Èn Jehovah e meki den doe wan preikiwroko na heri grontapoe foe tjari ete tra opregti sma kon na ini a boen-ati foe en èn a kibri di a e gi (Odo 18:10; Mateus 24:14; Romesma 10:13). Ala den sma disi e poti ala den froetrow tapoe Jehovah, foe di den sabi taki heri esi a sa tjari en kefarlek moi, njoen grontapoe kon. — Teki gersi 1 Korentesma 15:58; Hebrewsma 6:10.
20 Bijbel profeititori e sori taki foe sensi a prenspari jari 1914, a grontapoe foe Satan de na ini en lasti dei, pikinmoro 80 jari now. A grontapoe disi e doro en kaba (Romesma 16:20; 2 Korentesma 4:4; 2 Timoteus 3:1-5). Jehovah Kotoigi, foe dati ede, e hori deki-ati èn de nanga fasti bosroiti, bika den e froestan taki heri esi Gado Kownoekondre sa teki ala makti tapoe ala afersi foe grontapoe. Foe di Gado sa tjari na ogri grontapoe foe a ten disi kon na wan kaba èn tjari en regtfardiki njoen grontapoe kon, a sa poeroe a takroe situwâsi krinkrin, di ben de na grontapoe someni hondrohondro jari langa. — Odo 2:21, 22.
21. Foe san ede wi kan abi prisiri, ala di wi abi broko-ede ini a ten disi?
21 Dan, na ini a têgo libi, Gado sa sori en bigi lobi gi wi te a sa saka blesi kon na wi tapoe di sa de wan pai gi ala a pen di wi ben kisi ini a ten di pasa. Someni boen sani sa pasa nanga wi ini a njoen grontapoe, taki wi no sa memre den broko-ede moro di wi ben abi fosi. Fa a de wan trowstoe foe sabi taki na a ten dati Jehovah sa ’opo en anoe èn satisferi na angri foe ala san e libi’. — Psalm 145:16; Jesaja 65:17, 18.
22. Foe san ede wi e poti wi froetrow tapoe Jehovah?
22 Ini a njoen grontapoe, a getrow libisma famiri sa si a kontroe foe Romesma 8:21: „Mekisani srefi sa kon fri toe foe a katibo foe pori èn abi a glori fri foe den pikin foe Gado.” Den sa si fa a begi di Jesus ben leri den bakaman foe en, sa kon troe: „Joe kownoekondre moesoe kon. Joe wani moesoe pasa so leki na ini hemel, na grontapoe toe” (Mateus 6:10). Foe dati ede, poti ala joe froetrow tapoe Jehovah, bika a seiker pramisi foe en de: „Den regtfardikiwan sa abi grontapoe, èn den sa libi na tapoe foe têgo.” — Psalm 37:29.
Fa joe ben sa piki?
◻ San na a prakseri di Jehovah abi nanga libisma èn nanga a grontapoe disi?
◻ Foe san ede Gado ben gi pasi taki takroe situwâsi de na grontapoe?
◻ Fa getrow sma foe owroeten ben sori a froetrow foe den tapoe Jehovah?
◻ Foe san ede foetoeboi foe Gado ini a ten disi e froetrow tapoe Jehovah?
[Prenki na tapoe bladzijde 29]
Gado ben meki libisma foe libi foe têgo ini kolokoe na wan paradijs grontapoe
[Prenki na tapoe bladzijde 31]
Abraham ben poti en froetrow tapoe a man di Jehovah ben man foe opo den dedewan baka