Jehovah e meki den pramisi foe en gi den getrow sma kon troe
„A sma di ben pramisi, de getrow.” — HEBREWSMA 10:23.
1, 2. Foe san ede wi kan poti dorodoro froetrow na ini den pramisi foe Jehovah?
JEHOVAH e aksi dati den foetoeboi foe en e kweki èn e tan hori wan tranga bribi na ini en èn den pramisi foe en. Nanga so wan bribi wan sma kan froetrow dorodoro na ini Jehovah taki a sa doe san a pramisi foe doe. En Wortoe di skrifi nanga jepi foe santa jeje e froeklari: „Jehovah foe den legre sweri, taki: ’Foe troe, neleki fa mi ben abi na prakseri, na so a moesoe pasa; èn neleki fa mi ben bosroiti, na so a sa kon troe.’ ” — Jesaja 14:24.
2 Den wortoe „Jehovah foe den legre sweri” e sori taki a meki wan opregti sweri taki a sa doe san a pramisi. Foe dati ede en Wortoe kan taki: „Froetrow tapoe Jehovah nanga joe heri ati èn no froetrow tapoe joe eigi froestan. Poti prakseri na tapoe en na ini ala joe pasi, èn ensrefi sa meki joe pasi kon reti” (Odo 3:5, 6). Te wi e froetrow na ini Jehovah èn e meki a koni foe en tiri wi, dan seiker den pasi foe wi sa tjari wi go na têgo libi, bika a koni foe Gado na „wan bon foe libi gi den wan di e hori en”. — Odo 3:18; Johanes 17:3.
Troetroe bribi, na ini owroeten
3. Fa Noa ben sori bribi na ini Jehovah?
3 A historia foe a fasi fa Jehovah ben handri nanga den wan di abi troetroe bribi e boeweisi taki A de foe froetrow. Foe eksempre, moro leki 4400 jari pasa, Gado ben taigi Noa taki a grontapoe foe den dei foe en ben sa pori nanga wan Froedoe na heri grontapoe. A ben taigi Noa foe bow wan kefalek bigi ark foe hori libisma nanga meti na libi. San Noa ben doe? Hebrewsma 11:7 e taigi wi: „Nanga bribi Noa, baka di a ben kisi wan warskow foe Gado foe sani di a no ben si ete, ben sori taki a ben abi frede gi Gado èn ben bow wan ark foe kibri na osofamiri foe en.” Foe san ede Noa ben abi bribi na ini wan sani di noiti ben pasa bifo, wan sani di „a no ben si ete”? Bika a ben sabi nofo foe den fositen fasi fa Gado ben handri nanga a libisma famiri, foe man froestan taki awansi sortoe sani Gado e taki, a sa kon troe. So boen, Noa ben abi a froetrow taki a Froedoe ben sa kon. — Genesis 6:9-22.
4, 5. Foe san ede Abraham ben froetrow dorodoro na ini Jehovah?
4 Wan tra eksempre foe troetroe bribi na Abraham. Pikinmoro 3900 jari pasa, Gado ben taigi en foe ofer Isak, en wan-enkri manpikin di a kisi nanga en wefi, Sara (Genesis 22:1-10). Fa Abraham ben handri? Hebrewsma 11:17 e taki: „Nanga bribi Abraham ben ofer Isak, di Gado ben tesi en.” Ma na a lasti momenti, na engel foe Jehovah ben tapoe Abraham (Genesis 22:11, 12). Tokoe, fa Abraham ben kan prakseri srefi foe doe so wan sani? Bika, soleki fa Hebrewsma 11:19 e taki, „a ben hori na prakseri taki Gado ben man opo [Isak] baka na dede srefi”. Ma fa Abraham ben kan bribi na ini wan opobaka efoe noiti a ben si wán èn no wan tori ben de taki a ben pasa bifo?
5 Memre, Sara ben de 89 jari di Gado ben pramisi den wan manpikin. A moeroe foe Sara no ben man meki pikin moro — dede, foe taki en so (Genesis 18:9-14). Gado ben gi a moeroe foe Sara libi baka, èn a ben meki Isak (Genesis 21:1-3). Abraham ben sabi taki foe di Gado ben gi a moeroe foe Sara libi baka, taki a ben kan tjari Isak kon na libi baka toe efoe a ben de fanowdoe. Romesma 4:20, 21 e taki foe Abraham: „Foe a pramisi foe Gado ede, meki a no ben degedege taki a no ben abi nofo bribi, ma a bribi foe en ben meki en kon tranga, ala di a ben gi Gado glori èn a ben abi na overtoigi dorodoro taki san En ben pramisi a ben sa man doe toe.”
6. Fa Josua ben sori froetrow na ini Jehovah?
6 Moro leki 3400 jari pasa di Josua ben pasa wán hondro jari kaba èn baka di a ben ondrofeni en heri libi langa taki Gado de foe froetrow, dan a ben gi a reide disi foe abi froetrow: „Oenoe sabi heri boen nanga oen heri ati èn nanga oen heri sili, taki no wán wortoe foe ala den boen wortoe di Jehovah, oen Gado, taigi oenoe, tan sondro foe kon troe. Den alamala kon troe gi oenoe. No wán wortoe foe den tan sondro foe a kon troe.” — Josua 23:14.
7, 8. Sortoe pasi di kibri den libi den getrow kresten ben teki na ini a fosi jarihondro, èn foe san ede?
7 Pikinmoro 1900 jari pasa, foeroe sma di abi sakafasi ben sori troetroe bribi. Den ben froestan foe a kontroe foe den bijbel profeititori taki Jesus ben de a Mesias èn den ben bribi den leri foe en. Foe di den abi wan tranga fondamenti na ini den troetori èn na ini den Hebrew Boekoe foe bijbel, meki den ben bribi na ini den sani di Jesus ben leri sma. So boen, di Jesus ben taki dati a kroetoe foe Gado ben sa kon na tapoe Judea èn na tapoe Jerusalem bika den no ben de getrow, dan den ben bribi en. Èn di a ben taigi den san den ben moesoe doe foe kibri a libi foe den, dan den ben doe dati.
8 Jesus ben froeteri den bribiman foe en taki te den legre ben sa lontoe Jerusalem, dan den ben moesoe lowe gowe. Den legre foe Rome ben kon troetroe na Jerusalem na ini a jari 66 G.T. Ma baka dati den Romesma ben gowe, sondro wan reide. Dati ben de a marki gi den kresten foe gowe libi a foto, bika Jesus ben taki: „Te oenoe e si taki legre kampoe lontoe Jerusalem, sabi dan taki a pori foe en kon krosibei. Dan meki den wan di de na Judea, bigin lon gowe na den bergi, èn meki den wan di de na en mindri, hari gowe foe drape, èn meki den wan di de na den boiti presi, no go na en ini” (Lukas 21:20, 21). Den sma di ben abi troetroe bribi ben gowe libi Jerusalem èn a birti foe en èn ben lowe go feni kibri.
Den bakapisi te bribi no de
9, 10. (a) Fa den relisi fesiman ben sori taki den no ben abi bribi na ini Jesus? (b) San ben de den bakapisi foe di den no ben abi bribi?
9 San den sma di no ben abi bribi ben doe? Den no ben lowe gowe di den ben abi na okasi. Den ben prakseri taki den fesiman foe den ben kan froeloesoe den. Tokoe den fesiman dati nanga den bakaman foe den ben abi a boeweisi taki Jesus ben de a Mesias. So boen, foe san ede den no ben bribi san Jesus ben taki? Bika na ati foe den ben godelowsoe. Disi ben kon na krin na fesi kaba di den ben si foeroe foe a gewoon pipel ben go na ini ipi na Jesus na baka na opobaka foe Lasarus. Johanes 11:47, 48 e froeteri: „Den ede-priester nanga den Fariseiman ben tjari a Sanhedrin [a djoe hei kroetoebangi] kon makandra èn ben bigin taki: „San wi moesoe doe, bika a man disi [Jesus] e doe foeroe marki? Efoe wi meki a go doro na a fasi disi, dan den alamala sa poti bribi na ini en, èn dan den Romesma sa kon poeroe a presi foe wi, so srefi a nâsi foe wi.” Vers 53 e taki: „Dati meki sensi a dei dati den ben meki plan foe kiri en.”
10 A ben de wan toemoesi moi wondroe di Jesus ben doe — foe tjari Lasarus komoto baka na dede! Ma den relisi fesiman ben wani taki Jesus ben moesoe dede foe di a ben doe a sani dati. A takroe godelowsoefasi foe den ben kon moro fara na krin di „den granpriester . . . ben meki plan foe kiri Lasarus toe, bika foe en ede foeroe foe den djoe ben e go drape èn ben poti bribi na ini Jesus” (Johanes 12:10, 11). Didjonsrode Lasarus ben opobaka na dede, èn den priester dati ben wani taki a ben moesoe dede baka! Den no ben broko den ede nanga a wani foe Gado noso nanga a boen foe a pipel. Den ben prakseri densrefi wawan, ben broko den ede nanga den eigi posisi èn den eigi wini nomo. „Den ben lobi a glori foe libisma srefi moro leki a glori foe Gado” (Johanes 12:43). Ma den ben moesoe pai foe di den no ben abi bribi. Na ini a jari 70 G.T., den legre foe Rome ben kon baka èn ben pori a presi foe den nanga a nâsi foe den, èn so srefi foeroe foe den.
Bribi ben sori na ini a ten foe wi
11. Fa troetroe bribi ben sori na ini a bigin foe a jarihondro disi?
11 Na ini a jarihondro disi, so srefi foeroe man nanga oema ben de di abi troetroe bribi. Foe eksempre, na ini a bigin foe a di foe 19 jarihondro, moro foeroe sma ben froewakti wan tamara di abi vrede èn di boen. Na a srefi ten, den wan di ben bribi na ini Jehovah ben e meki bekènti taki a libisma famiri ben de foe miti a moro takroe pisi ten foe problema ete. Dati na san ben taki na fesi na ini Gado Wortoe, na Mateus kapitel 24, 2 Timoteus kapitel 3, nanga tra presi. A sani di den sma dati di ben abi bribi ben taki, ben pasa troetroe, bigin na ini 1914 nanga a Fosi Grontapoefeti. Foe troe, grontapoe ben go na ini „den lasti dei” di ben taki na fesi, makandra nanga ’moeilek ten di tranga foe pasa’ (2 Timoteus 3:1). Foe san ede den foetoeboi foe Jehovah ben sabi a waarheid foe den kondisi na grontapoe na a ten dati, ala di tra sma no ben sabi dati? Bika, leki Josua, den ben bribi taki no wan foe den wortoe foe Jehovah ben sa misi.
12. Na ini a ten disi, sortoe pramisi foe Jehovah den foetoeboi foe en e bribi troetroe?
12 Na ini a ten disi, den foetoeboi foe Jehovah di e froetrow na en tapoe, doro pikinmoro siksi miljoen na heri grontapoe. Den sabi foe den boeweisi di de na ini a kontroe foe a profeiti wortoe foe Gado, taki heri esi a sa tjari wan kaba kon na a hoeroedoe seti foe sani disi di lai nanga ogri di doe nanga tranga. So boen, den abi a froetrow taki a ten de krosibei te den sa si a kontroe foe 1 Johanes 2:17, di e taki: „Grontapoe e pasa gowe èn so srefi a lostoe foe en, ma a sma di e doe a wani foe Gado, e tan foe têgo.” Den foetoeboi foe En e froetrow dorodoro taki Jehovah sa meki den pramisi foe en kon troe.
13. O fara joe kan froetrow na ini Jehovah?
13 O fara joe kan froetrow na tapoe Jehovah? Joe kan poti joe libi na ini en anoe! Srefi efoe joe lasi joe libi now foe di joe e dini en, tokoe a sa gi joe wan moro betre libi na ini na opobaka. Jesus e gi wi a djaranti: „A joeroe e kon pe ala sma di de na ini den memre-grebi [dati wani taki na ini a prakseri foe Gado], sa jere en sten èn sa kon na doro” (Johanes 5:28, 29). Joe sabi wán datra, politik fesiman, sabidensiman, bisnisman, noso iniwan tra libisma di kan doe dati? A historia foe den e sori taki den no kan doe dati. Jehovah kan doe dati, èn a sa doe dati toe!
Wan toemoesi moi tamara gi den getrow wan
14. Sortoe toemoesi moi tamara a Wortoe foe Gado e pramisi den getrow wan?
14 Jesus ben sori a seikerfasi foe wan njoen grontapoe na ondro a hemel Kownoekondre foe Gado, di a ben taki: „Kolokoe foe den safri-atiwan, bika den sa kisi grontapoe” (Mateus 5:5). Dati e poti moro krakti na tapoe a pramisi foe Gado di skrifi na Psalm 37:29: „Na den regtfardiki sma sa abi grontapoe leki a goedoe foe den, èn den sa libi na tapoe foe têgo.” Èn leti bifo a dede foe Jesus di wan ogriman ben sori bribi na ini en, Jesus ben taigi a man dati: „Joe sa de nanga mi na ini Paradijs” (Lukas 23:43). Ija, leki Kownoe foe Gado Kownoekondre, Jesus sa sorgoe taki a man disi e kisi wan opobaka foe libi na grontapoe, nanga na okasi foe libi foe têgo na ini a paradijs dati. Na ini a ten disi, den sma di e bribi na ini Jehovah en Kownoekondre, kan froewakti foe libi na ini paradijs te „[Gado] sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro”. — Openbaring 21:4.
15, 16. Foe san ede libi sa de so switi na ini a njoen grontapoe?
15 Meki wi prakseri taki wi de na ini a njoen grontapoe dati. Prakseri taki wi e libi na ini en kaba. Wantronso wi e si wantewante taki na ala presi sma e libi nanga makandra na ini dorodoro vrede. Den e njan boen foe den srefi situwâsi leki den wan di skrifi na Jesaja 14:7: „Heri grontapoe kon de na ini rostoe, kon fri foe broeja. Sma e prisiri nanga prisiri babari.” Foe san ede den de so? Wan reide, loekoe taki den doro foe den oso no abi sroto. Den no de fanowdoe foe di no wan ogridoe noso ogri di doe nanga tranga de. A de neleki fa Gado Wortoe ben taki dati a ben sa de: „Den sa sidon troetroe, ibriwan na ondro en droifibon èn na ondro en figabon, èn no wan sma sa de di e meki den beifi.” — Mika 4:4.
16 Orlokoe no de moro toe, bika na ini a njoen grontapoe disi, orlokoe na wan sani di no mag. Ala fetisani ben meki kon tron wrokosani foe vrede. Jesaja 2:4 kon troe dorodoro: „Den sa moesoe naki den feti-owroe foe den kon tron proegoe èn den lansri foe den kon tron grasi-nefi. Nâsi no sa opo feti-owroe teige nâsi, so srefi den no sa leri orlokoe moro.” Ma dati na san wi ben froewakti! Foe san ede? Bika foeroe sma di e libi na ini a njoen grontapoe ben leri foe doe dati ala di den ben e dini Gado na ini na owroe grontapoe.
17. Sortoe fasi foe libi sa de foeroe na ondro Gado Kownoekondre?
17 Wan tra sani di joe e si na taki pôtifasi no de. No wan sma e libi na ini wan doti kampoe noso e weri broko krosi noso no abi oso. Ibriwan sma abi wan boen oso èn wan pisi gron di krin moi nanga moi bon nanga bromki (Jesaja 35:1, 2; 65:21, 22; Esekièl 34:27). Èn no wan angri no de bika Gado meki en pramisi kon troe taki njanjan ben sa de pasa marki gi ala sma: „Siri-njanjan sa de bogobogo na grontapoe; na tapoe na ede foe den bergi sani sa de pasa marki” (Psalm 72:16). Ija, na ondro a tiri foe Gado Kownoekondre wan toemoesi moi paradijs sa bradi ensrefi na heri grontapoe, soleki fa Gado ben abi na prakseri na ini Eden. — Genesis 2:8.
18. Sortoe sani no sa de wan kefar moro gi sma, na ini a njoen grontapoe?
18 Joe e froewondroe toe foe a tranga krakti di ibri sma abi. Disi na foe di now den abi volmaakti skin nanga froestan. Siki, pen, noso dede no de moro. No wan sma de na ini wan rolstoeroe noso na ini wan ati-oso bedi. Ala den sani dati gowe foe têgo (Jesaja 33:24; 35:5, 6). Ija, no wan foe den meti de wan kefar toe, bika a krakti foe Gado meki den abi vrede! — Jesaja 11:6-8; 65:25; Esekièl 34:25.
19. Foe san ede ibri dei na ini a njoen grontapoe sa de wan di e gi „switi prisiri”?
19 Wan kefalek moi libimakandra den getrow sma di e libi na ini a njoen grontapoe disi de! Den gebroiki a krakti nanga koni foe den nanga a goedoe foe grontapoe foe doe boen sani, no foe doe takroe sani; foe wroko nanga makandra, no foe strei nanga den. Èn ibri sma di joe e miti na wan sma di joe kan froetrow bika, soleki fa Gado ben pramisi, den alamala na „sma di Jehovah gi leri” (Jesaja 54:13). Foe di den wet foe Gado e tiri ibri sma, meki grontapoe „foeroe nanga a sabi foe Jehovah, soleki fa watra e tapoe se” (Jesaja 11:9). Foe troe, ibri dei na ini a njoen grontapoe disi na san Psalm 37:11 ben taki dati a ben o de, wan di e gi „switi prisiri”.
Wan kolokoe tamara de seiker
20. San wi moesoe doe foe njan boen foe wan switi tamara?
20 San wi moesoe doe foe de wan pisi foe a kolokoe tamara dati? Jesaja 55:6 e taigi wi: „Soekoe Jehovah oen pipel, ala di oenoe kan feni en. Kari en, ala di a sori taki a de krosibei.” Èn te wi e soekoe, dan a denki foe wi moesoe de leki fa a skrifi na Psalm 143:10: „Leri mi foe doe joe wani, bika joe na mi Gado.” Den sma di e doe disi kan waka sondro fowtoe na fesi Jehovah na ini den lasti dei disi èn kan froewakti wan toemoesi moi tamara. „Loekoe a wan di no abi fowtoe èn poti joe ai na tapoe na opregtiwan, bika a tamara foe a man dati sa de nanga vrede. Ma den sma di pasa a wet foe Gado, den dati seiker sa kisi pori makandra; a tamara foe den godelowsoe sma seiker sa koti poeroe.” — Psalm 37:37, 38.
21, 22. San Gado e seti na ini a ten disi, èn fa a leri e gi?
21 Nownowde Jehovah e komanderi sma foe ibri nâsi di wani doe a wani foe en. A e meki den tron a fondamenti foe en njoen libimakandra na grontapoe, soleki fa wan bijbel profeititori ben taki na fesi: „Èn a moesoe pasa na ini den kaba pisi foe den dei [a ten pe wi e libi now na ini] . . . foe troe, foeroe pipel sa go èn taki: ’Kon, meki wi opo go na a bergi foe Jehovah [a hei troe anbegi foe en] . . . A sa leri wi foe den pasi foe en, èn wi sa waka na tapoe den foetoepasi foe en.’ ” — Jesaja 2:2, 3.
22 Openbaring 7:9 e taki foe den sma disi leki „wan bigi ipi . . . komoto na ala nâsi nanga lo nanga pipel nanga tongo”. Vers 14 e taki: „Disi na den sma di komoto na a bigi banawtoe”, foe di den pasa a kaba foe a disiten seti foe sani libilibi. A fondamenti disi gi a njoen grontapoe abi now pikinmoro siksi miljoen sma, nanga foeroe njoen sma di e tron wan pisi foe en ibri jari. Ala den getrow foetoeboi disi foe Jehovah e kisi leri foe libi na ini a njoen grontapoe foe en. Den e leri jeje koni nanga tra koni di de fanowdoe foe kenki a grontapoe disi kon tron wan paradijs. Èn den e froetrow dorodoro taki a paradijs dati sa kon troe bika „en di ben pramisi, de getrow”. — Hebrewsma 10:23.
Penti foe loekoe sani sjatoe baka
◻ Sortoe bakapisi a ben abi foe di sma na ini a fosi-jarihondro no ben abi bribi?
◻ O fara den foetoeboi foe Gado kan froetrow na ini en?
◻ Sortoe tamara e wakti den getrow wan?
◻ San wi moesoe doe foe de seiker gi wan kolokoe tamara gi wisrefi na ini a njoen grontapoe foe Gado?
[Prenki na tapoe bladzijde 18]
Nownowde Jehovah e meki a fondamenti gi wan njoen libimakandra na grontapoe