Foe san ede Jehovah Kotoigi e tan de na ai
„Tan de na ai . . . bika oenoe no sabi sortoe dei oen Masra e kon.” — MATEUS 24:42.
1. Gi soema a froemane foe „tan de na ai” e fiti?
GI IBRI foetoeboi foe Gado — efoe a jongoe noso efoe a owroe, efoe a gi ensrefi abra no so langa ete noso efoe a e doe a diniwroko foeroe jari kaba — a bijbel froemane e fiti, di e taki: „Tan de na ai”! (Mateus 24:42) Foe san ede disi de prenspari?
2, 3. (a) Foe sortoe marki Jesus ben taki krin, èn san a kontroe foe profeititori ben sori? (b) Sortoe omstandigheid di Mateus 24:42 e taki foe dati, de wan tesi tapoe na opregtifasi foe wi bribi, èn fa?
2 Na a kaba foe Jesus en diniwroko na grontapoe, a ben froeteri na fesi foe a marki foe en denoja ini Kownoekondre makti, di sma no ben sa man si nanga ai (Mateus, den kapitel 24 nanga 25). A ben taki krin foe a ten dati foe en kownoe denoja — èn den sani di ben sa pasa leki wan kontroe foe profeititori, e sori taki a ben poti leki Kownoe na hemel ini 1914. A ben sori toe tapoe wan omstandigheid, di na a ten dati ben sa de wan tesi tapoe na opregtifasi foe wi bribi. Disi ben abi foe doe nanga a ten te a ben sa doe en wroko leki a Sma di e tjari strafoe kon, foe pori a disiten ogri sistema ini a bigi banawtoe, di Jesus ben taki: „Foe a dei nanga a joeroe dati, no wan sma no sabi wan sani, no den engel foe hemel, no a Manpikin, ma soso a Tata.” A ben de nanga dati na ini prakseri di a ben taki: „Tan de na ai, foe dati ede, bika oenoe no sabi sortoe dei oen Masra e kon.” — Mateus 24:36, 42.
3 Foe di wi no sabi a dei nanga a joeroe di a bigi banawtoe sa bigin, dan a wani taki, dati efoe wi e taki dati wi na kresten, dan wi moesoe libi leki troe kresten ibri dei. A fasi fa joe e gebroiki joe libi sa abi leki bakapisi taki Masra sa feni joe boen te a bigi banawtoe doro? Noso efoe dede e kon fosi, a sa memre joe dan leki wan sma di ben dini Jehovah na wan loyaalfasi te na a kaba foe joe disiten libi? — Mateus 24:13; Openbaring 2:10.
Den fosi disipel ben doe moeiti foe de na ai
4. San wi kan leri foe Jesus eksempre foe de na ai na jeje fasi?
4 Jesus Krestes srefi ben gi a moro boen eksempre foe de na ai na jeje fasi. A ben begi en Tata foeroetron èn fajafaja (Lukas 6:12; 22:42-44). Di a ben kisi foe doe nanga tesi, dan a ben froetrow foeroe na tapoe a tiri di de foe feni ini den Boekoe foe bijbel (Mateus 4:3-10; 26:52-54). A no ben gi ensrefi pasi foe meki wan sani poeroe en prakseri foe a wroko di Jehovah ben gi en foe doe (Lukas 4:40-44; Johanes 6:15). Den sma di ben si densrefi leki bakaman foe Jesus ben sa de na ai na a srefi fasi?
5. (a) Foe san ede den apostel foe Jesus ben abi problema foe tan ini balansi na jeje fasi? (b) Sortoe jepi Jesus ben gi den apostel foe en baka di a ben opo baka?
5 Sontron srefi den apostel foe Jesus ben degedege. Leki wan bakapisi foe a faja di den ben faja pasa marki èn foe di den ben abi fowtoe prakseri, meki den froewakti foe den no ben kon troe (Lukas 19:11; Tori foe den Apostel 1:6). Bifo den ben leri foe froetrow dorodoro na tapoe Jehovah, tesi di ben kon wantronso ben broeja den. So boen, di den kisi Jesus foe sroto en, den apostel ben lon gowe. Moro lati a neti dati, Petrus ben taki ibritron baka taki a no ben sabi Krestes kwetikweti, foe di a ben frede. Den apostel no ben teki a rai foe Jesus na ati ete: „Tan de na ai èn begi doronomo” (Mateus 26:41, 55, 56, 69-75). Baka Jesus en opobaka, a ben gebroiki den Boekoe foe bijbel foe tranga a bribi foe den (Lukas 24:44-48). Èn di a ben sori taki wan toe foe den ben sa kan poti a diniwroko di den ben kisi foe doe, na a di foe toe presi, Jesus ben tranga a reide foe den foe poti prakseri na tapoe a wroko di ben de moro prenspari. — Johanes 21:15-17.
6. Gi sortoe toe trapoe Jesus ben warskow den disipel foe en na fesi?
6 Na fesi, Jesus ben warskow den disipel foe en taki den no ben moesoe de wan pisi foe grontapoe (Johanes 15:19). A ben gi den a rai toe foe no basi makandra, ma foe dini makandra leki brada (Mateus 20:25-27; 23:8-12). Den ben waka baka a rai foe en? Den ben tan teki fesi ini a wroko di a ben gi den foe doe?
7, 8. (a) Fa den sani di skrifi foe den fosi jarihondro kresten, e sori taki den ben teki a froemane foe Jesus na ati? (b) Foe san ede a ben de prenspari foe de na ai na jeje fasi doronomo?
7 So langa den apostel ben de na libi ete, den ben kibri a gemeente. Historia e boeweisi taki den fosi kresten no ben abi foe doe nanga politiek afersi foe a Tirimakti foe Rome èn taki den no ben abi wan heihei groepoe tiriman foe krestenhèit. Na kontrari, den ben de fajafaja preikiman foe Gado Kownoekondre. Na a kaba foe a fosi jarihondro, den ben gi kotoigi ini a heri Tirimakti foe Rome, èn ben e meki disipel ini Asia, Europa nanga Noord Afrika. — Kolosesma 1:23.
8 Ma san den ben doe ini a preikiwroko no ben wani taki dati a no ben de fanowdoe moro foe tan de na ai na jeje fasi. A kon foe Jesus di den ben froeteri na fesi foe dati, ben de fara ete. Èn di a gemeente ben go ini a di foe toe jarihondro Gewoon Teri, situwâsi ben opo ede kon di ben tjari a jejefasi foe kresten kon ini kefar. Fa so?
Den sma di ben tapoe foe de na ai
9, 10. (a) Sortoe sani di ben pasa, ben sori taki baka di den apostel dede, foeroe sma di ben kari densrefi kresten, no ben tan de na ai? (b) Sortoe tekst di kari ini a paragraaf disi ben kan jepi den sma di ben kari densrefi kresten foe tan tranga na jeje fasi?
9 Wan toe sma di ben kon ini a gemeente ben bigin sori a bribi foe den di ben de leki a Griki filosofia, foe meki san den ben preiki, kon tron wan sani di sma foe grontapoe ben sa teki moro esi. Safrisafri, heiden leri so leki a Dri-wánfasi nanga a leri taki a sili no man dede, ben kon tron wan pisi foe wan pori fasi foe krestendom. Disi ben abi leki bakapisi taki sma ben lasi a howpoe tapoe a doesoenjari tiri. Foe san ede? Den sma di ben teki a bribi ini a sili di no man dede, ben kon na a bosroiti taki wan sili di ben tan na libi, ala di a libisma skin ben o dede, ben sa kisi den blesi foe Krestes tiri ini a jeje kondre. Foe dati ede den no ben si a fanowdoe foe de na ai gi Krestes denoja ini Kownoekondre makti. — Teki gersi Galasiasma 5:7-9; Kolosesma 2:8; 1 Tesalonikasma 5:21.
10 Tra sani di ben pasa, ben poti krakti na tapoe a situwâsi disi. Wan toe sma di ben taki dati den na kresten opziener, ben bigin gebroiki a gemeente foe den leki wan fasi foe kisi bigi nen gi densrefi. Na wan trikifasi den ben taki dati a fasi fa densrefi ben e denki nanga den leri foe den, ben abi a srefi waarde leki di foe den Boekoe foe bijbel noso den ben de moro hei srefi leki disi. Di na okasi ben kon, dan a kerki disi di ben fadon komoto na bribi, srefi ben gi ensrefi foe dini gi den afersi foe a politiek kondre. — Tori foe den Apostel 20:30; 2 Petrus 2:1, 3.
Den bakapisi foe di sma ben de moro na ai
11, 12. Foe san ede a kenki di den anitrisma ben kenki, no ben marki a drai di den ben drai go baka na a troe anbegi?
11 Baka hondrohondro jari foe tesi di ben kon foe lomsoe kerki, wan toe hervormsma ben taki san den ben denki ini a di foe 16 jarihondro. Ma disi no ben de wan marki taki den ben drai go baka na a troe anbegi. Foe san ede?
12 Ala di difrenti anitri groepoe ben broko komoto na a makti foe Rome, den ben tjari nanga den foeroe foe den gron leri, nanga den doe foe sma di ben fadon komoto na bribi — a prakseri foe wan groepoe tiriman foe krestenhèit kontrari wan groepoe gewoon kerkisma, a bribi di den ben bribi toe ini a Dri-wánfasi, a dede di a sili no man dede, nanga a têgo skin-ati baka te wan sma dede. Èn, neleki lomsoe kerki, den ben tan de wan pisi foe grontapoe, foe di den ben de krosibei kompe foe den politiek groepoe. So boen, den ben lobi foe weigri ala froewakti taki Krestes ben o kon leki Kownoe.
13. (a) San e sori taki wan toe man troetroe ben warderi a Wortoe foe Gado? (b) Sortoe sani di ben pasa ini a di foe 19 jarihondro, ben kisi a spesroetoe belangstelling foe den sma di ben kari densrefi kresten? (c) Foe san ede a froewakti foe foeroe foe den no ben kon troe?
13 Tokoe Jesus ben froeteri na fesi kaba, taki baka a dede foe den apostel, den troetroe erfgenaam foe a Kownoekondre (di a ben agersi nanga tarwe) ben sa tan gro makandra nanga den sma di no ben de troe kresten (noso takroe wiwiri) te leki a ten foe a kotiwroko (Mateus 13:29, 30). Ini a ten disi wi no kan taki nanga seikerfasi soema ben de ala den sma di Masra ben si leki tarwe. Ma a de wan moi sani foe si taki ini a di foe 14, a di foe 15, nanga a di foe 16 jarihondro, man ben de, di ben tjari den eigi libi nanga a fri foe den kon na ini kefar foe poti bijbel ini a tongo foe gewoon sma. Trawan no wawan ben teki bijbel leki a Wortoe foe Gado, ma den ben weigri toe foe teki a Dri-wánfasi leki wan sani di e kroederi nanga bijbel. Wan toe sma ben weigri foe bribi ini a dede di a sili no man dede èn ini skin-ati ini wan hèlfaja, leki wan sani di kwetikweti no ben de ini akroederi nanga a Wortoe foe Gado. Ini a di foe 19 jarihondro toe, leki wan bakapisi foe a studeri di den ben studeri bijbel moro, groepoe ini Verenigde Staten foe Amerkankondre, Doisrikondre, Ingrisikondre nanga Rosiakondre, ben bigin sori na overtoigi taki a ten taki Krestes ben o kon, ben de krosibei. Ma moro foeroe foe den froewakti foe den no ben kon troe. Foe san ede? Moro foeroe, foe di den ben froetrow toemoesi foeroe na tapoe libisma èn no so foeroe na tapoe den Boekoe foe bijbel.
Fa denwan disi ben sori taki den ben de na ai
14. Taki foe a fasi fa C. T. Russell nanga den kompe foe en doe a bijbelstudie foe den.
14 Baka dati, ini 1870, Charles Taze Russell nanga wan toe foe en kompe, ben seti wan bijbelstudie groepoe ini Allegheny, Pennsylvania. Den no ben de den fosiwan di ben abi a koni foe si den foeroe bijbel waarheid di den ben teki, ma te den ben studeri, den ben meki a tron wan gwenti foe ondrosoekoe finifini ala den tekst di ben poti ini wan aksi.a A prakseri foe den no ben de foe feni tekst foe boeweisi wan prakseri di den ben kroetoe sondro foe go ondrosoekoe a tori, ma foe de seiker taki den ben kon na bosroiti di ben de ini akroederi nanga ala sani di bijbel ben taki foe a tori.
15. (a) San trawan boiti brada Russell ben kon froestan? (b) San ben meki taki den Bijbel Studenti ben de tra fasi leki den disi?
15 Wan toe trawan di ben de na den fesi, ben froestan taki Krestes ben sa kon baka leki wan jeje, na wan fasi di sma no ben man si nanga ai. Wan toe foe den ben si taki a prakseri foe a kon di Krestes ben o kon baka, no ben de foe bron grontapoe èn kiri ala libisma libi, ma, na presi foe dati, foe blesi ala famiri na grontapoe. Wan toe sma ben de srefi di ben froestan taki a jari 1914 ben sa marki a kaba foe den ten foe den heiden. Ma gi den Bijbel Studenti di ben de makandra nanga brada Russell, den sani disi ben de moro leki penti foe taki foe dati na wan theologis fasi. Den ben bow a libi foe den lontoe den waarheid disi, èn ben meki den waarheid bekènti na foeroe nâsi, na wan fasi di no ben pasa ete ini a ten dati.
16. Foe san ede brada Russell ben skrifi ini 1914: „Wi de ini wan ten foe tesi”?
16 Tokoe a ben de fanowdoe foe den ben tan de na ai. Foe san ede? Leki wan eksempre, ala di den ben sabi taki bijbel profeititori ben marki a jari 1914, tokoe den no ben sabi seiker san ben o pasa ini a jari dati. Disi ben de wan tesi gi den. Ini The Watch Tower foe 1 november 1914, brada Russell ben skrifi: „Meki wi memre taki wi de ini wan ten foe tesi. . . . Efoe wán reide de, di ben sa meki wan sma tapoe foe bribi ini Masra nanga En Waarheid èn foe tapoe foe tjari ofrandi gi na Afersi foe Masra, dan a no de soso a lobi gi Gado di de ini en ati, di ben meki taki a kisi belangstelling gi Masra, ma na wan tra sani; kande foe di a ben howpoe taki a ten ben sjatoe; a gi di a ben gi ensrefi ben de soso gi wan seiker ten.”
17. Fa A. H. Macmillan, nanga trawan leki en, ben hori a balansi foe den na jeje fasi?
17 Wan toe sma ben gowe libi a diniwroko foe Jehovah ini a ten dati. Ma A. H. Macmillan ben de wan sma di no ben doe dati. Jari na baka, a ben erken na wan eerlijk fasi: „Sontron a froewakti di wi ben froewakti wan seiker dei, ben de moro leki san Boekoe foe bijbel ben djaranti.” San ben jepi en foe tan ini balansi na jeje fasi? A ben froestan, so leki fa a ben taki, dati „te den froewakti dati no ben kon troe, dati no ben kenki den prakseri foe Gado”. A ben taki moro fara: „Mi ben leri taki wi moesoe erken den fowtoe foe wi èn go doro foe ondrosoekoe a Wortoe foe Gado foe froestan sani moro betre.”b Na wan sakafasi, den fosi Bijbel Studenti dati ben meki a Wortoe foe Gado kenki a froewakti foe den baka. — 2 Timoteus 3:16, 17.
18. Fa a de di kresten de na ai safrisafri ben tjari wini kon ini a tori foe a de di den no de wan pisi foe grontapoe?
18 Ini den jari di ben kon na baka, a fanowdoe di a ben de fanowdoe taki den ben moesoe tan de na ai, no ben kon moro mendri. A no de foe taki, dati den ben sabi taki kresten no ben moesoe de wan pisi foe grontapoe (Johanes 17:14; Jakobus 4:4). Ini akroederi nanga dati, den no ben moksi densrefi nanga krestenhèit, foe taki dati a Folkoebontoe ben de a politiek organisâsi di ben teki presi gi Gado Kownoekondre. Ma a no ben de te leki 1939 taki den ben si a tori foe a kresten neutraalfasi krin. — Loekoe The Watchtower, 1 november 1939.
19. Sortoe wini ben kon ini a tori foe na opzicht ini a gemeente, foe di na organisâsi ben tan de na ai?
19 Noiti den ben abi wan groepoe tiriman foe krestenhèit, ala di wan toe owroeman, di den ben froekisi, ben abi a firi taki foe preiki ini a gemeente ben de ala san sma ben moesoe froewakti foe den. Ma foe di na organisâsi ben abi a faja angri foe de ini akroederi nanga den Boekoe foe bijbel, meki den ben loekoe a wroko baka di den owroeman ben abi, ini a leti foe den Boekoe foe bijbel, èn den ben doe disi ibritron baka nanga jepi foe den bladzijde foe A Waktitoren. A fasi fa sani ben orga, ben kenki, foe meki den kon de ini akroederi nanga san den Boekoe foe bijbel ben sori.
20-22. Fa a heri organisâsi ben sreka ensrefi moro esi foe doe a wroko di ben froeteri na fesi, foe preiki a Kownoekondre na heri grontapoe doronomo?
20 A heri organisâsi ben sreka ensrefi moro esi foe doe a wroko dorodoro di Gado Wortoe ben skrifi gi a ten foe wi (Jesaja 61:1, 2). Na sortoe fasi a boen njoensoe ben moesoe preiki ini a ten foe wi? Jesus ben taki: „Ini ala nâsi a boen njoensoe moesoe preiki fosi” (Markus 13:10). So leki fa libisma e si a tori, dan nofotron a wroko ben gersi wan sani di no ben man.
21 Tokoe nanga a froetrow ini Krestes leki na Edeman foe a gemeente, a getrow èn koni srafoe-groepoe ben go na fesi (Mateus 24:45). Na wan getrowfasi èn kraktifasi den sori a pipel foe Jehovah a wroko di ben moesoe doe. Foe sensi 1919, moro krakti ben poti na tapoe a velddienst. Gi foeroe sma, a no ben de wan makriki sani foe go oso foe oso èn foe taki nanga freimdesma (Tori foe den Apostel 20:20). Ma studie-artikel so leki „Blesi foe den sma di de sondro frede” (ini 1919) èn „Hori deki-ati” (ini 1921) ben jepi wan toe sma foe bigin nanga a wroko, nanga froetrow tapoe Jehovah.
22 A kari ini 1922 foe „preiki, preiki, preiki, a Kownoe nanga en kownoekondre”, ben gi a deki-ati di ben de fanowdoe foe meki a wroko disi bekènti, foe di a ben warti dati. Foe sensi 1927, den ben poeroe owroeman di no ben teki a bijbel frantiwortoe dati. Na a ten dati, den sma di ben teki presi gi a Genootschap èn di ben e rèis, den pelgrim, ben kisi a wroko foe de diniwroko fesiman na ini wan kontren, foe gi persoonlijk rai na preikiman ini a velddienst. A no ala sma ben kan pionier, ma na a kaba foe den wiki, foeroe sma ben gi heri dei na a diniwroko, èn den ben bigin froekoefroekoe mamanten, ben tapoe soso wan sjatoe momenti foe njan wan pisi brede, èn baka dati den ben go doro ini a diniwroko te latilati bakadina. Den ten dati ben de spesroetoe ten foe a theokrasia gro, èn wi abi foeroe wini te wi e loekoe a fasi baka fa Jehovah ben tjari a pipel foe en. A e tan doe na a fasi disi. Nanga a blesi foe en, a wroko foe preiki a boen njoensoe foe a Kownoekondre di opo, sa tjari kon na wan boen kaba.
Joe e tan de na ai?
23. Fa wi leki aparti sma kan sori taki wi de na ai ini a tori foe kresten lobi èn foe de aparti foe grontapoe?
23 Foe di na organisâsi foe Jehovah e doe wan sani na tapoe a tiri foe en, meki a e go doro foe warskow wi gi den doe nanga fasi di ben sa meki sma kon sabi wi leki wan pisi foe grontapoe, èn de foe dati ede ini kefar foe kisi pori makandra nanga en (1 Johanes 2:17). Foe dati ede, wi leki aparti sma moesoe de na ai foe di wi e doe wan sani na tapoe a tiri di Jehovah e gi. Jehovah e leri wi toe foe e libi èn e wroko makandra. Na organisâsi foe en jepi wi foe gro ini a froestan di wi e froestan san kresten lobi wani taki troetroe (1 Petrus 4:7, 8). Efoe wi wani tan de na ai, dan dati e aksi foe wi taki wi moesoe doe serjoesoe moeiti foe poti a rai disi ini wi libi, awansi den onvolmaaktifasi foe libisma.
24, 25. Ini a tori foe sortoe prenspari sani wi moesoe tan de na ai, èn nanga sortoe froewakti?
24 Doronomo a getrow èn koni srafoe memre wi: „Froetrow tapoe Jehovah nanga joe heri ati èn no bow tapoe joe eigi froestan” (Odo 3:5). „Begi sondro foe tapoe” (1 Tesalonikasma 5:17). Den ben gi wi a rai foe leri foe meki den bosroiti di wi e teki, abi den gron tapoe Gado Wortoe, èn foe meki a wortoe disi de ’wan lampoe gi wi foetoe èn wan leti tapoe wi foetoepasi’ (Psalm 119:105). Na wan lobi fasi den ben gi wi a deki-ati foe meki a preiki foe a boen njoensoe foe Gado Kownoekondre, a wroko di Jesus ben froeteri na fesi gi a ten foe wi, de na a fosi presi ini wi libi. — Mateus 24:14.
25 Ija, a getrow èn koni srafoe de na ai foe troe. Wi leki aparti sma moesoe tan de na ai toe. Leki wan bakapisi foe disi, meki wi de na mindri den sma di a Manpikin foe libisma feni boen, te a e kon foe tjari kroetoe kon. — Mateus 24:30; Lukas 21:34-36.
[Foetoewortoe]
a Faith on the March, foe A. H. Macmillan, Prentice-Hall, Inc., 1957, bladzijde 19-22.
b Loekoe De Wachttoren foe 1 januari 1967, bladzijde 21-28.
Loekoe sani sjatoe
◻ Foe san ede wi moesoe tan de na ai, so leki fa Mateus 24:42 e sori?
◻ Fa Jesus nanga den fosi jarihondro bakaman foe en ben tan de na ai na jeje fasi?
◻ Sortoe sani ben pasa sensi 1870 foe di den foetoeboi foe Jehovah ben tan de na ai?
◻ San sa sori taki wi leki aparti sma e tan de na ai?
[Prenki na tapoe bladzijde 20]
Jesus ben tan doe a wroko di en Tata ben gi en foe doe. A ben begi fajafaja toe
[Prenki na tapoe bladzijde 21]
Charles Taze Russell, di a ben kon moro owroe
[Prenki na tapoe bladzijde 22]
Moro leki 4.700.000 Kownoekondre preikiman e wroko fajafaja na heri grontapoe