Jehovah na wan reidelek sma!

„A koni foe tapoesei . . . reidelek.” — JAKOBUS 3:17.

1. Fa son sma prenki Gado leki wan Gado di no reidelek, èn fa joe e prakseri foe so wan fasi foe denki foe Gado?

SORTOE Gado joe e anbegi? Joe e bribi taki a de wan Gado di no man fiti ensrefi, di e kroetoe sani na wán fasi nomo, di krasi èn di strak ini a fasi fa a handri? Gi Johanes Calvijn, wan anitri hervormsma, a ben gersi leki Gado de so. Calvijn ben taki dati Gado abi wan „têgo plan di no man kenki”, di abi foe doe nanga ibri sma èn di e taki na fesi foe ibri sma efoe a sa libi foe têgo na ini kolokoe noso, efoe a sa pina foe têgo na ini hèlfaja. Prakseri pikinso: Efoe disi ben troe, dan noti di joe ben kan doe oiti, awinsi omeni moeiti joe ben doe, ben sa kenki Gado en plan di strak, di de langa ten kaba èn di abi foe doe nanga joe nanga a tamara foe joe. Sani ben sa hari joe go na so wan Gado di no reidelek? — Teki gersi Jakobus 4:8.

2, 3. (a) Fa wi kan agersi a fasi fa den seti nanga organisâsi foe libisma no reidelek? (b) Fa a fisjoen di Esekièl ben kisi foe a hemelwagi foe Jehovah e tjari a fiti di A man fiti ensrefi, kon na krin?

² Fa a de wan froelekti gi wi foe kon sabi taki a Gado foe bijbel reidelek srefisrefi! A no Gado, ma na libisma di lobi foe de strak èn di no man fiti densrefi, foe di den de ini a makti foe den eigi onvolmaaktifasi. Libisma organisâsi kan hebi neleki den container loko di e tjari lai èn di, foe dati ede, moeilek foe boeweigi noso foe poesoe den. Te wan kefalek bigi container loko di e tjari lai, e lolo go miti wan sani di de na tapoe en pasi, dan a no man drai baka èn a moeilek srefisrefi toe foe stòp. Son loko e boeweigi densrefi so krakti go na fesi, taki den e teki moro leki wán nanga afoe kilometer foe stòp, baka di den bigin foe rèm! Na a srefi fasi, wan kefalek bigi oli-sipi kan grati ete wan aiti kilometer go doro, baka te den kiri den motor. Srefi efoe den poti den motor so foe man meki a sipi go nanga baka, a kan boeweigi ensrefi ete dri kilometer moro fara na ini a watra! Ma loekoe wan wagi now di e foeroe sma nanga lespeki moro leki den toe sani disi, wan wagi di e teki presi gi Gado organisâsi.

³ Moro leki 2600 jari pasa, Jehovah ben gi a profeiti Esekièl wan fisjoen di ben prenki En hemel organisâsi foe jeje mekisani. A ben de wan wagi, di e foeroe sma nanga lespeki, Jehovah en eigi „wagi” di a e tiri ala ten. A moro moi sani ben de a fasi fa a wagi ben e boeweigi. Den kefalek bigi wiel ben abi fo sei èn ben foeroe nanga ai, so taki den ben kan si ala presi èn ben kan kenki wantewante foe a sei pe den ben e go na a tra sei, sondro foe stòp noso foe drai. Èn a kefalek bigi wagi disi no ben abi foe boeweigi safrisafri neleki wan kefalek bigi oli-sipi noso wan container loko di foeroe nanga lai. A ben kan boeweigi nètso esi leki faja di e koti èn e meki wenkraki boktoe srefi! (Esekièl 1:1, 14-28) Jehovah de krinkrin tra fasi leki a Gado di Calvijn ben preiki, neleki fa a wagi foe En de tra fasi leki den machine di libisma meki èn di moeilek foe sma handri nanga den. Na wan volmaakti fasi a man foe fiti ensrefi. A warderi di wi e warderi a fasi disi foe a sma di Jehovah de, moesoe jepi wi foe man tan fiti wisrefi èn foe tan farawe foe a trapoe foe no de reidelek.

Jehovah — a Sma di e fiti ensrefi moro leki iniwan sma ini na universum

4. (a) Na sortoe fasi Jehovah en eigi nen e tjari En kon na krin leki wan Gado di e fiti ensrefi? (b) San na wan toe foe den nen di den ben e gebroiki gi Jehovah Gado èn foe san ede den fiti?

⁴ Ini a nen foe Jehovah srefi, a de foe si taki a man fiti ensrefi. „Jehovah” wani taki troetroe „A e meki kon tron”. Disi, so leki fa a sori, wani taki dati Jehovah e meki ensrefi kon tron a Sma di e meki ala den pramisi foe en kon troe. Di Moses ben aksi Gado san na a nen foe Gado, dan Jehovah ben taki finifini san a nen wani taki, na a fasi disi: „Mi sa sori foe de san mi sa sori foe de” (Exodus 3:14). Rotherham vertaling e taki en krin: „Mi sa kon tron awansi san mi e winsi.” Jehovah e sori taki a de, noso e froekisi foe kon tron, awinsi san de fanowdoe foe meki den regtfardiki prakseri nanga pramisi foe en kon troe. So boen, a e tjari wan lo nen di e foeroe sma nanga lespeki, so leki Mekiman, Tata, Soeverein Masra, Skapoeman, Jehovah foe den legre, Jereman foe begi, Kroetoeman, Gran Leriman, a Sma di e bai wi baka. A meki ensrefi tron ala den sani disi èn moro sani ete, so taki a man doe den lobi prakseri foe En. — Jesaja 8:13; 30:20; 40:28; 41:14; Psalm 23:1; 65:2; 73:28; 89:26; Kroetoeman 11:27; loekoe toe Nieuwe-Wereldvertaling, Appendix 1J.

5. Foe san ede wi no moesoe denki taki a man di Jehovah man fiti ensrefi wani taki dati en fasi noso markitiki kenki?

⁵ Disi wani taki dan, taki a fasi foe Gado noso den markitiki foe en kenki? Nôno; so leki fa Jakobus 1:17 e taki en, dan „nanga en no wan kenki de ini a drai foe a skaduw”. Sani de kontrari makandra dja? Kwetikweti. Foe eksempre, sortoe lobi papa noso mama no e kenki ròl foe a boen foe den pikin? Ini wan-enkri dei, wan papa noso mama kan de wan raiman, boriman, wan sma di e krin oso, wan sma di e gi leri, wan sma di e piri-ai gi den, wan mati, wan monteur, wan verpleegster — a lijst e go nanga langa. A papa noso mama no e kenki a sma di a de te a e teki den ròl disi; a papa noso mama e fiti ensrefi nomo na den fanowdoe di de na a momenti dati. So a de nanga Jehovah, ma na tapoe wan moro bigi kontren. No wan sani no de di a no man doe foe meki ensrefi tron san a wani tron, foe tjari wini gi den mekisani foe en. A dipi foe a koni foe en e froewondroe sma foe troe! — Romesma 11:33.

Reidelekfasi na wan marki foe a koni foe Gado

6. San a Griki wortoe di Jakobus ben gebroiki, di a ben taki foe a koni foe Gado, wani taki troetroe èn san joe kan froestan na ini?

⁶ A disipel Jakobus ben e gebroiki wan moi wortoe foe froeteri foe a koni foe a toemoesi hei Gado disi di man fiti ensrefi. A ben skrifi: „A koni foe tapoesei . . . reidelek” (Jakobus 3:17). A Griki wortoe di a ben gebroiki dja (e·pi·ei·kesʹ) moeilek foe vertaal. Sma di e vertaal, gebroiki den sortoe wortoe leki „safoefasi”, „abi pasensi”, „froedrage sani”, èn „hori trawan na prakseri”. A Nieuwe-Wereldvertaling e gi en baka nanga „reidelek” nanga wan foetoewortoe di e sori taki san a wani taki troetroe na, „no e loekoe so fini”.a A wortoe e tjari a prakseri abra toe foe no tan hori tranga na ala den moro finifini pisi foe a wet, foe no loekoe sani soifri pasa marki noso de sondro sari-ati. A sabiman William Barclay e gi komentaar ini New Testament Words: „A gron nanga a fondamenti sani foe epieikeia de, taki a e bigin na Gado. Efoe Gado ben tan hori tranga na den reti foe en, efoe Gado ben gebroiki noti moro leki den strak markitiki foe a wet na wi tapoe, dan pe wi ben sa de? Gado na a moro boen eksempre foe wan sma di de epieikēs èn di e handri trawan nanga epieikeia.”

7. Fa Jehovah ben sori reidelekfasi ini a djari foe Eden?

⁷ Prakseri a ten di a libisma famiri ben opo ensrefi kontrari a soevereinfasi foe Jehovah. O makriki a ben sa de gi Gado foe tjari strafoe kon na tapoe den dri sma dati — Adam, Eva nanga Satan — di ben opo densrefi kontrari en èn di no ben sabi tangi! Gi omeni sari gi ensrefi a ben kan wai pasi nanga dati! Èn soema ben kan hari taki nanga Jehovah taki A no ben abi a reti foe e hori anoe na geregtighèit na so wan soifrifasi? Tokoe, noiti Jehovah ben meki en organisâsi, di gersi wan hemelwagi, go fasi na ini wan sortoe strak markitiki foe retidoe, di no kan fiti ensrefi. So boen, a wagi dati no ben e lolo go doro sondro sari-ati abra a libisma famiri nanga ala den froewakti gi a kolokoe tamara foe a libisma famiri. Na kontrari, Jehovah ben boeweigi a wagi foe en nètso esi leki fa faja e koti. Wantewante baka di sma opo densrefi kontrari Jehovah Gado, dan A ben tjari wan prakseri kon na krin di ben sa de foe wan langa ten èn di ben gi ala den bakapikin foe Adam sari-ati nanga howpoe. — Genesis 3:15.

8. (a) Fa a fowtoe loekoe di a krestenhèit abi foe reidelekfasi, de tra fasi leki a troetroe reidelekfasi foe Gado? (b) Foe san ede wi kan taki dati Jehovah en reidelekfasi no wani taki dati a ben sa kan meki skeki nanga den gronprakseri foe En?

⁸ Ma a reidelekfasi foe Jehovah no wani taki dati a ben kan skeki nanga den gronprakseri foe en. Den disiten kerki foe krestenhèit kan denki taki den reidelek, te den no e poti prakseri na tapoe a tori foe hoeroedoe soso foe proeberi foe kisi boen nen na den tranga-ede ipi foe den. (Teki gersi 2 Timoteus 4:3.) Noiti Jehovah e broko den wet di ensrefi poti, èn a no e skeki nanga den gronprakseri foe en. Na presi foe dati, a e sori taki a de klariklari foe boigi èn no loekoe so fini, foe fiti ensrefi na den situwâsi, so taki den gronprakseri dati kan gebroiki nanga reti èn sari-atifasi. Ala ten a abi na prakseri foe hori a sori di a e sori retidoe nanga makti, ini balansi nanga lobi nanga koni di reidelek. Meki wi loekoe dri fasi fa Jehovah e sori reidelekfasi.

„De klariklari foe gi pardon”

9, 10. (a) San a de di sma de „klariklari foe gi pardon” abi foe doe nanga reidelekfasi? (b) Fa David ben feni boen foe a de di Jehovah de klariklari foe gi pardon èn foe san ede?

⁹ David ben skrifi: „Bika joe, o Jehovah, boen èn de klariklari foe gi pardon; èn a lobi boen-atifasi gi ala den sma di e kari joe, de pasa marki” (Psalm 86:5). Di den ben vertaal den Hebrew Boekoe foe bijbel na ini Grikitongo, dan a wortoe gi „de klariklari foe gi pardon” den ben gi en baka nanga e·pi·ei·kesʹ, noso „reidelek”. Ija, foe de klariklari foe gi pardon èn foe sori sari-ati de a moro prenspari fasi kande foe sori reidelekfasi.

¹⁰ David srefi ben sabi heri boen o reidelek Jehovah de ini a tori disi. Di David ben doe soetadoe nanga Batseiba èn ben seti sani foe meki den kiri a masra foe Batseiba, dan en nanga Batseiba ben kon na ondro a dedestrafoe (Deuteronomium 22:22; 2 Samuèl 11:2-27). Efoe libisma kroetoeman di de strak ben kroetoe na afersi, dan a ben sa kan heri boen taki ala toe ben o lasi a libi foe den. Ma Jehovah ben sori reidelekfasi (e·pi·ei·kesʹ), di, so leki fa Vine’s Expository Dictionary of Biblical Words e taki en, „e sori a fasi dati foe hori trawan na prakseri, ’di gersi libisma fasi èn di reidelek ini den sani foe wan kefal’”. Den sani di ben abi krakti na tapoe a sari-ati bosroiti foe Jehovah, so leki fa a sori, abi na ini toe na opregti berow foe den sma di doe ogri èn a sari-ati di David srefi ben sori na fesi foe a boen foe trawan (1 Samuèl 24:4-6; 25:32-35; 26:7-11; Mateus 5:7; Jakobus 2:13). Ma akroederi san Jehovah e taki foe ensrefi na Exodus 34:4-7, a ben de reidelek taki Jehovah ben moesoe piri-ai gi David. A ben seni a profeiti Natan go na David nanga wan krakti boskopoe èn ben meki David firi taki David ben wisiwasi a wortoe foe Jehovah. David ben sori berow èn foe dati ede a no ben dede foe a sondoe foe en. — 2 Samuèl 12:1-14.

11. Fa Jehovah ben sori taki a ben de klariklari foe gi pardon ini a kefal foe Manase?

¹¹ Na eksempre foe kownoe Manase foe Juda de wan moro aparti sani foe si ini a tori disi, foe di Manase, tra fasi leki David, ben ogri srefisrefi wan heri pisi ten. Manase ben meki tegoe relisi go na fesi ini a kondre, makandra nanga na òfer di den ben òfer libisma. Kande en ben de frantiwortoe toe, taki den ben „sá” a getrow profeiti Jesaja „na pisipisi” (Hebrewsma 11:37). Foe strafoe Manase, Jehovah ben gi pasi taki den ben teki en leki wan katiboman go na Babilon. Ma Manase ben sori berow na ini doengroe-oso èn ben begi tranga foe kisi sari-ati. Leki wan piki tapoe a serjoesoe berow disi, Jehovah ben de „klariklari foe gi pardon” — srefi ini a toemoesi aparti kefal disi. — 2 Kroniki 33:9-13.

Kenki a fasi foe doe sani te njoen situwâsi e opo ede kon

12, 13. (a) Sortoe kenki foe situwâsi ben meki Jehovah kenki a sei pe a ben e go ini a kefal foe Ninifei? (b) Fa Jona ben sori foe no de so reidelek leki Jehovah Gado?

¹² A reidelekfasi foe Jehovah de foe si toe ini a de di a de klariklari foe kenki wan fasi foe doe sani di a ben abi na prakseri, te njoen situwâsi e opo ede kon. Foe eksempre, di a profeiti Jona ben waka na ini den strati foe Ninifei foe owroeten, a boskopoe di ben gi nanga jepi foe santa jeje, ben de wan eenvoudig sani: A makti foto ben sa kisi pori baka 40 dei. Ma den situwâsi ben kenki — na wan fasi di e naki sma ati! Den sma foe Ninifei ben sori berow. — Jona, kapitel 3.

¹³ Wi e leri foeroe te wi e teki a fasi fa Jehovah ben handri tapoe a kenki disi di ben kon ini den sani di pasa, gersi nanga a di foe Jona. Te joe e loekoe en boen, dan Jehovah ben meki a hemelwagi foe en go na wan tra sei. Ini a kefal disi a ben fiti ensrefi, a ben e meki ensrefi tron wan sma di e gi pardon foe sondoe na presi foe a de wan „mansma foe orlokoe” (Exodus 15:3). Jona, na a tra sei, no ben man fiti ensrefi so makriki. Na presi foe hori skinskin nanga a wagi foe Jehovah, a ben handri moro leki a container loko di e tjari lai noso a kefalek bigi oli-sipi di wi ben kari na fesi kaba. A ben meki kroetoe bekènti, so boen, kroetoe ben moesoe de! Kande a ben abi a firi taki ibri kenki foe a sei pe a ben go, ben sa meki en fesi fadon na ini den ai foe den sma foe Ninifei. Ma nanga pasensi Jehovah ben leri a tranga-ede profeiti foe en, wan sani ini reidelekfasi èn ini sari-ati, foe a tan memre dati. — Jona, kapitel 4.

14. Foe san ede Jehovah ben kenki a sei pe a ben e go ini a tori foe en profeiti Esekièl?

¹⁴ Jehovah kenki a sei pe a ben go na tra okasi — srefi ini den moro pikin afersi, te joe ben o teki dati gersi nanga trawan. Foe eksempre, wan leisi di a ben gi a profeiti Esekièl a komando foe doe wan profeiti drama, dan den sani di Jehovah ben taigi en foe doe, ben abi na ini wan komando taki Esekièl ben moesoe bori en njanjan na tapoe wan faja di ben meki nanga libisma koenkoen. Disi ben de toemoesi foeroe gi a profeiti di ben bari taki: „Tje, o Soeverein Masra Jehovah!” èn di ben begi taki Jehovah no ben meki a doe wan sani di de so tegoe gi en. Jehovah no ben poti den firi foe a profeiti na wan sei leki den no ben de reidelek; na presi foe dati, A ben gi Esekièl pasi foe gebroiki koenkoen foe kaw, wan sani di sma ini foeroe kondre gwenti foe meki faja nanga dati te na a dei foe tide. — Esekièl 4:12-15.

15. (a) Sortoe eksempre e sori taki Jehovah ben de klariklari foe arki èn piki libisma? (b) Sortoe lès disi kan leri wi?

¹⁵ A no e waran na ati foe wi te wi prakseri a sakafasi foe wi Gado Jehovah? (Psalm 18:35) A hei krinkrin moro leki wi; tokoe a e arki onvolmaakti libisma nanga pasensi èn ten na ten a e kenki srefi a sei pe a e go akroederi dati. A ben gi Abraham pasi foe aksi en nanga tranga fanowdoe wan heri pisi ten, ini a tori foe a pori di Sodom nanga Gomora ben o kisi (Genesis 18:23-33). Èn A ben meki Moses kon nanga genstaki di A ben poti na prakseri foe pori den Israèlsma di ben opo densrefi kontrari En èn foe meki na presi foe dati wan makti nâsi komoto kon foe Moses. (Exodus 32:7-14; Deuteronomium 9:14, 19; teki gersi Amos 7:1-6.) Na so a ben gi wan volmaakti eksempre na den libisma foetoeboi foe en, di moesoe sori a srefi fasi foe de klariklari foe arki trawan te a reidelek èn te den man foe doe so. — Teki gersi Jakobus 1:19.

Reidelekfasi ini a sori foe makti

16. Fa Jehovah de tra fasi leki foeroe libisma ini a fasi fa a e gebroiki a makti foe en?

¹⁶ Oiti joe ben si taki te sma e kisi moro makti, dan a gersi leki foeroe foe den no de so reidelek moro? Jehovah, na kontrari, abi a moro hei posisi ini na universum, tokoe a de a moro bigi eksempre foe reidelekfasi. A e sori en makti na wan reidelekfasi di no e misi. Tra fasi leki foeroe libisma, Jehovah de seiker foe a makti foe en, èn foe dati ede a no abi a firi taki a de tranga fanowdoe foe kibri dati na wan djaroesoefasi — neleki te a ben o gi trawan wan pikinso foe en makti, dan na a wán noso tra fasi a makti dati, ben sa kan meki a makti foe en kon ini kefar. Te joe loekoe en boen, dan di soso wán tra sma ben de ini na universum, Jehovah ben gi foeroe makti na a sma dati. A ben meki a Logos tron en „meester wrokoman” èn foe sensi a ten dati a ben tjari ala sani kon na libi nanga jepi foe a lobi Manpikin disi (Odo 8:22, 29-31; Johanes 1:1-3, 14; Kolosesma 1:15-17). Baka ten a ben gi en „ala makti . . . ini hemel èn na grontapoe”. — Mateus 28:18; Johanes 5:22.

17, 18. (a) Foe san ede Jehovah ben seni engel go na Sodom nanga Gomora? (b) Foe san ede Jehovah aksi den engel foe gi rai fa foe kori Akab?

¹⁷ Na a srefi fasi, Jehovah e froetrow foeroe wroko di ensrefi ben kan doe moro boen srefi, ini anoe foe foeroe foe den mekisani foe en. Foe eksempre, di a ben taigi Abraham: „Mi abi a fasti bosroiti foe saka go [na Sodom nanga Gomora], so taki mi kan si efoe den e handri krinkrin akroederi a tranga babari di abi foe doe nanga den èn di kon na mi.” A no ben wani taki, dati ensrefi ben sa go drape. Na presi foe dati Jehovah ben froekisi foe gi makti na trawan èn a ben poti engel foe tjari den sortoe bodoi dati kon makandra gi en. A ben gi den makti foe teki fesi ini a wroko disi foe feni troetori èn foe kon froeteri en baka fa sani waka. — Genesis 18:1-3, 20-22.

¹⁸ Na wan tra okasi, di Jehovah ben bosroiti foe tjari strafoe kon na tapoe na ogri kownoe Akab, A ben kari engel kon na wan konmakandra na hemel foe gi rai foe a fasi fa foe „kori” a kownoe dati di ben fadon komoto na bribi, meki a go na ini wan feti, di ben sa tjari wan kaba kon na a libi foe en. Seiker, Jehovah, a Fonten foe ala koni, no ben abi jepi fanowdoe foe kan feni a moro boen fasi foe handri! Tokoe a ben gi den engel a grani foe kon nanga fasi foe loesoe a problema èn a ben gi den makti foe handri akroederi a fasi di en ben froekisi. — 1 Kownoe 22:19-22.

19. (a) Foe san ede Jehovah skotoe a nomroe foe wet di a e meki? (b) Fa Jehovah sori taki a reidelek ini a tori foe san a e froewakti foe wi?

¹⁹ Jehovah no e gebroiki a makti foe en foe basi trawan pasa marki. Na ini disi toe a e sori reidelekfasi di sma no kan teki gersi nanga di foe trawan. A loekoe boen te a e skotoe a nomroe foe den wet di a e meki èn e tapoe den foetoeboi foe en foe ’no go na dorosei foe den sani di skrifi’, foe di den e poti moro hebi wet di densrefi meki. (1 Korentesma 4:6; Tori foe den Apostel 15:28; teki gersi Mateus 23:4.) Noiti a e aksi foe den mekisani foe en foe den gi jesi na en na wan fasi di no de reidelek, ma a gwenti foe gi nofo bodoi foe tjari den. Èn a e poti na den fesi a froekisi di den moesoe froekisi sani foe di a e meki den sabi den boen di den sa kisi te den e gi jesi na en èn den bakapisi te den no e arki en (Deuteronomium 30:19, 20). Na presi foe dwengi sma, foe di a e meki den firi fowtoe, sjen, noso e meki den frede, a e soekoe foe doro sma ati; a wani taki sma moesoe dini en foe di den lobi en troetroe, na presi den doe dati na ondro dwengi (2 Korentesma 9:7). Ala den sortoe diniwroko disi, di sma e doe nanga den heri ati, e prisiri na ati foe Gado. Foe dati ede, a no de wan sma di no reidelek èn di „tranga pasa marki foe sma plisi en”. — 1 Petrus 2:18; Odo 27:11; teki gersi Mika 6:8.

20. Fa a reidelekfasi foe Jehovah abi krakti na joe tapoe?

²⁰ A no de wan aparti sani foe si taki Jehovah Gado, di abi makti moro iniwan sma, ini den sani di a meki, noiti e gebroiki a makti dati na wan fasi di no de reidelek èn noiti e gebroiki en foe dwengi trawan? Ma sma, di de so pikin te joe e teki den gersi nanga En, abi wan historia foe e basi makandra (Preikiman 8:9). A de krin, taki reidelekfasi na wan warti eigifasi, wan eigifasi di e boeweigi wi foe lobi Jehovah moro srefi. Dati baka, kan boeweigi wi foe wisrefi kweki na eigifasi disi. Fa wi kan doe dati? A tra artikel sa taki foe na afersi disi.

[Foetoewortoe]

Fa joe ben sa piki?

◻ Fa a nen foe Jehovah nanga a fisjoen foe a hemelwagi foe en e poti krakti tapoe a man di a man fiti ensrefi?

◻ San na reidelekfasi, èn foe san ede a de wan marki foe a koni foe Gado?

◻ Na sortoe fasi Jehovah sori taki a de „klariklari foe gi pardon”?

◻ Foe san ede ini wan toe kefal Jehovah froekisi foe kenki wan fasi foe doe sani di a ben poti na en ede?

◻ Fa Jehovah sori reidelekfasi ini a fasi fa a e gebroiki makti?

[Prenki na tapoe bladzijde 9]

Foe san ede Jehovah ben gi na ogri kownoe Manase pardon?