Kweki reidelekfasi

„Meki a reidelekfasi foe joe kon bekènti na ala sma. Masra de krosibei.” — FILIPISMA 4:5.

1. Foe san ede a de wan tjalensi foe de reidelek ini a grontapoe foe tide?

„A REIDELEK MAN” — na Ingrisi journalist Sir Alan Patrick Herbert ben kari en wan sma na ini wan anansitori. Foe troe, son tron a kan gersi taki reidelek sma no de moro ini a grontapoe disi di trobi e priti na pisipisi. Bijbel ben taki na fesi taki ini den moeilek „lasti dei” disi, sma ben sa „abi wan krasi fasi foe doe sani”, „no ke foe noti”, èn den „no sa de klariklari foe meki kroederi” — nanga tra wortoe, no de reidelek kwetikweti (2 Timoteus 3:1-5). Tokoe troe kresten e hori reidelekfasi hei, foe di den sabi taki a de wan marki foe a koni foe Gado (Jakobus 3:17). Wi no e abi a denki taki a no kan srefisrefi foe de reidelek ini wan grontapoe di no de reidelek. Na presi foe dati, nanga wi heri ati wi e teki a tjalensi ini a rai foe na apostel Paulus, di a skrifi nanga jepi foe santa jeje èn di de foe feni ini Filipisma 4:5: „Meki a reidelekfasi foe joe kon bekènti na ala sma.”

2. Fa den wortoe foe na apostel Paulus ini Filipisma 4:5 e jepi wi foe taki efoe wi de reidelek?

² Loekoe fa Paulus wortoe e jepi wi foe ondrosoekoe foe si efoe wi de reidelek. A no de so foeroe wan afersi foe fa wi e si wisrefi; a de wan afersi foe fa tra sma e si wi, foe fa den sabi wi. A vertaling foe Phillips e gi a vers disi baka nanga: „Abi wan nen taki joe de reidelek.” Ibriwan foe wi e doe boen foe aksi wisrefi: ’Fa sma sabi mi? Mi abi wan nen taki mi de reidelek, taki mi no e loekoe so fini èn abi safoefasi? Noso den sabi mi leki wan sma di strak, krasi nanga sma, noso taki mi no e ke foe noti?’

3. (a) San a Griki wortoe di vertaal nanga „reidelek” wani taki, èn foe san ede na eigifasi disi e hari sma? (b) Fa wan kresten kan leri foe de moro reidelek?

³ A nen di wi abi ini a tori disi, sa sori nomo o boen wi e waka na baka Jesus Krestes (1 Korentesma 11:1). Di Jesus ben de djaso na grontapoe, a ben sori na wan volmaaktifasi a moro hei eksempre foe reidelekfasi di en Tata abi (Johanes 14:9). Te joe loekoe en boen, di Paulus ben skrifi foe „a safri-atifasi nanga boen-atifasi foe a Krestes”, dan a Griki wortoe di a ben gebroiki gi boen-atifasi (e·pi·ei·kiʹas) wani taki toe „reidelekfasi” noso, troetroe, „fasi foe no e loekoe so fini” (2 Korentesma 10:1). The Expositor’s Bible Commentary e kari disi „wan foe den bigi wortoe di e froeteri foe eigifasi foe sma ini a N[joen] T[estament]”. A e froeteri foe wan eigifasi di e hari sma na so wan fasi taki wan koniman e gi a wortoe baka nanga „switi reidelekfasi”. Foe dati ede, meki wi taki foe dri fasi fa Jesus ben sori reidelekfasi neleki en Tata, Jehovah. Na so fasi wi kan leri fa wisrefi kan kon moro reidelek. — 1 Petrus 2:21.

„Klariklari foe gi pardon”

4. Fa Jesus ben sori taki a de „klariklari foe gi pardon”?

⁴ Jesus ben sori reidelekfasi neleki en Tata, foe di a ben de „klariklari foe gi pardon” ibri tron baka (Psalm 86:5). Prakseri pikinso foe a ten di Petrus, wan krosibei kompe, ben taki dri tron taki a no sabi Jesus, na a neti di den ben teki Jesus èn ben poti en na fesi kroetoe. Bifo dati, Jesus srefi ben taki: „A sma di no sabi mi na fesi foe libisma, mi no sa sabi en toe na fesi foe mi Tata” (Mateus 10:33). Jesus ben gebroiki a lin disi na tapoe Petrus na wan strakfasi èn sondro sari-atifasi? Nôno; baka na opobaka foe Jesus, ensrefi ben go na Petrus, èn a no abi misi taki dati ben de foe trowstoe na apostel disi di ben sari srefisrefi, di ben sori berow èn gi en korostoe (Lukas 24:34; 1 Korentesma 15:5). Sjatoe baka dati, Jesus ben gi Petrus pasi foe abi bigi frantiwortoe (Tori foe den Apostel 2:1-41). Djaso reidelekfasi di gi na wan switifasi, ben sori na a moro boen fasi! A no e gi wi trowstoe foe prakseri taki Jehovah poti Jesus leki Kroetoeman tapoe a heri libisma famiri? — Jesaja 11:1-4; Johanes 5:22.

5. (a) Sortoe nen den owroeman moesoe abi na mindri den skapoe? (b) Sortoe materiaal den owroeman kan loekoe baka bifo den handri kroetoe afersi, èn foe san ede?

⁵ Te owroeman e handri leki kroetoeman ini a gemeente, den e meki moeiti foe waka baka a reidelek eksempre foe Jesus. Den no wani, taki den skapoe e frede den leki man di e gi strafoe. Na presi foe dati, den e proeberi foe waka baka Jesus, so taki den skapoe sa firi taki den kibri na den leki lobi skapoeman. Ini kroetoe afersi, den e doe ala moeiti foe de reidelek, klariklari foe gi pardon. Bifosi son owroeman e handri so wan afersi, den feni en wan jepi foe loekoe den artikel „Jehovah a ’Kroetoeman foe heri grontapoe’ di no e teki sma partèi”, èn „Owroeman, kroetoe nanga regtfardikifasi”, ini a Waktitoren foe 1 juli 1992. Na so fasi, den e hori a sjatoe loekoe na prakseri foe a fasi fa Jehovah e kroetoe sani: „Krakti pe a de fanowdoe èn sari-ati pe a kan.” A no de wan fowtoe sani foe wani sori sari-ati ini a kroetoe foe sani, te wan reidelek fondamenti de foe doe so (Mateus 12:7). A de wan bigi fowtoe foe de sondro firi noso sondro sari-ati (Esekièl 34:4). Na so wan fasi owroeman e tan farawe foe meki fowtoe, foe di den e soekoe fajafaja a moro lobi, sari-ati sei di den kan foe tan hori densrefi na retidoe. — Teki gersi Mateus 23:23; Jakobus 2:13.

Fiti joesrefi te joe e kisi foe doe nanga situwâsi di e kenki

6. Fa Jesus ben sori reidelekfasi di a ben handri nanga a heiden oema di ogri jeje ben wroko na en oemapikin tapoe?

⁶ Neleki Jehovah, Jesus ben sori taki esi-esi a ben kenki a fasi fa a ben tjari ensrefi noso ben fiti ensrefi na njoen situwâsi efoe den ben opo kon. Na wan okasi wan heiden oema ben begi en foe dresi en oemapikin, di ogri jeje ben wroko tranga na en tapoe. Jesus ben sori dri difrenti fasi ini a bigin, taki a no ben sa jepi en — fosi, foe di a ben weigri foe piki en; di foe toe, foe di a ben froeklari langalanga taki a no ben seni go na den heidensma, ma na den djoe; èn di foe dri, foe di na wan switifasi a ben gi wan agersitori di ben sori a srefi penti. Ma na oema ben tan horidoro na ini ala den sani disi, èn ben sori wan aparti bribi. Foe di Jesus ben hori na aparti situwâsi disi na prakseri, a ben kan si taki disi no ben de a ten foe hori ensrefi na wan algemeen lin; a ben de a ten foe fiti ensrefi na den moro hei gronprakseri.a So boen, Jesus ben doe soifri san a ben sori dri tron taki a no ben sa doe. A ben dresi na oemapikin foe na oema! — Mateus 15:21-28.

7. Na sortoe fasi papa nanga mama kan sori reidelekfasi, èn foe san ede?

⁷ Sma sabi wi toe foe a klari di wi de klariklari foe fiti wisrefi te a joisti? Foeroetron papa nanga mama moesoe sori so wan reidelekfasi. Foe di ibri pikin abi en aparti eigifasi, dan a kan taki fasi di e wroko boen na a wán pikin no e fiti na a trawan. Moro fara, te pikin e gro, dan den sani di den abi fanowdoe e kenki. A kan de so taki a ten di papa nanga mama ben poti gi den pikin oten den moesoe de na oso, moesoe kenki? Joe ben sa abi wini efoe a fasi fa na osofamiri studie e hori, abi moro libi na ini? Te wan papa noso mama e atibron foe wan toe pikin fowtoe ede, a de klariklari foe abi so wan sakafasi èn poti afersi reti? Den papa nanga mama di no e loekoe so fini na den fasi disi, e tan farawe foe e tanteri den pikin foe den foe soso èn foe meki den kon freimdesma gi Jehovah. — Efeisesma 6:4.

8. Fa gemeente owroeman kan teki fesi ini a fiti di den e fiti densrefi na den sani di a kontren abi fanowdoe?

⁸ So srefi owroeman moesoe fiti densrefi te njoen situwâsi e opo ede kon, ala di noiti den e skeki ini a tori foe spesroetoe wet foe Gado. Te joe e taki fesi ini a preikiwroko, joe de na ai taki sani kan kenki ini a kontren? Efoe a fasi fa den sma ini a birti e libi e kenki, dan kande oenoe moesoe gi deki-ati foe gi kotoigi na neti, stratiwroko noso a gi foe kotoigi na telefon. Foe fiti oensrefi na den fasi dati e jepi wi foe doe a preiki wroko di den poti wi foe doe, na wan moro boen fasi (Mateus 28:19, 20; 1 Korentesma 9:26). Paulus ben meki troetroe moeiti toe foe fiti ensrefi na ala sortoe foe sma na ini a diniwroko foe en. Wi e doe a srefi, foe eksempre, foe di wi e leri nofo foe relisi nanga koeltoeroe foe a presi pe wi de, foe man foe jepi sma? — 1 Korentesma 9:19-23.

9. Foe san ede wan owroeman no moesoe tan hori ala ten na a fasi fa a ben handri problema ini a bigin?

⁹ Ala di den lasti dei disi e kon moeilek moro nanga moro, den skapoeman sa moesoe fiti densrefi toe na a broeja fromoefasi èn a prisiri di son wan foe den problema no prisiri, di na ipi foe den e miti now (2 Timoteus 3:1). Owroeman, a ten disi a no a ten gi strakfasi! Foe troe wan owroeman no sa moesoe tan go doro foe handri nanga den problema na a fasi so leki fa a ben doe fosi, efoe a fasi foe en no e wroko boen moro noso efoe „a getrow èn koni srafoe” si taki a fiti foe tjari njoen materiaal di abi foe doe nanga den sortoe tori dati, kon na doro. (Mateus 24:45; teki gersi Preikiman 7:10; 1 Korentesma 7:31.) Wan getrow owroeman ben proeberi opregti foe jepi wan sisa di ben lasi-ati èn di troetroe ben abi wan boen arkiman fanowdoe. Ma a no ben si a lasi-ati foe a sisa leki wan serjoesoe sani èn a ben pristeri en wan toe eenvoudig loesoe. Ne a Waktitoren Genootschap ben tjari wan toe bodoi di abi den gron tapoe bijbel, kon na doro èn di ben taki foe a srefi problema foe en. Na owroeman ben sorgoe taki a ben taki baka nanga en, èn a leisi disi a ben e gebroiki a njoen materiaal èn a ben e sori waran firi gi a situwâsi foe a sisa. (Teki gersi 1 Tesalonikasma 5:14, 15.) Fa dati de wan moi eksempre foe reidelekfasi!

10. (a) Fa owroeman moesoe sori wan fasi foe no loekoe makandra èn na a skin foe owroeman leki wan groepoe, so fini? (b) Fa a skin foe owroeman moesoe si denwan di e sori taki den no de reidelek?

¹⁰ Owroeman toe moesoe sori makandra wan fasi foe no e loekoe so fini. Te a skin foe owroeman e kon na makandra, o prenspari a de taki no wan owroeman e basi a fasi fa sani moesoe waka! (Lukas 9:48) Spesroetoe a wan di e teki fesi moesoe man hori ensrefi ini a tori disi. Èn te wán noso toe owroeman no e agri nanga wan bosroiti foe a heri skin foe owroeman, den no sa tan hori nomo taki sani moesoe doe a fasi fa den wani. Na presi foe dati, so langa den no e pasa bijbel gronprakseri, den no sa loekoe so fini èn den sa hori na prakseri taki reidelekfasi de fanowdoe foe na sei foe owroeman (1 Timoteus 3:2, 3). Na a tra sei, a skin foe owroeman moesoe hori na prakseri taki na wan kraktifasi Paulus ben piri-ai gi a gemeente foe Korente, foe di ’den ben froedrage sma di no ben reidelek’ èn di ben pristeri densrefi leki „toemoesi boen apostel” (2 Korentesma 11:5, 19, 20). So boen den no moesoe draidrai foe gi rai na wan kompe owroeman, di e tjari ensrefi na wan fasi di tranga-ede, èn di no de reidelek, ma densrefi moesoe abi safri-ati nanga switifasi te den e doe so. — Galasiasma 6:1.

Reidelekfasi ini a gebroiki foe makti

11. Sortoe difrenti ben de na mindri a fasi fa den djoe relisi fesiman ini a ten foe Jesus ben gebroiki makti èn fa Jesus ben doe dati?

¹¹ Di Jesus ben waka na grontapoe, a reidelekfasi foe en ben de troetroe krin foe si na ini a fasi fa a ben gebroiki en makti di Gado ben gi en. Fa a ben de tra fasi leki den relisi fesiman foe en ten! Loekoe wan eksempre. A wet foe Gado ben gi ordroe taki no wan wroko, srefi no a piki kon na wan foe oedoe, ben moesoe doe na sabadei (Exodus 20:10; Numeri 15:32-36). Den relisi fesiman ben wani foe basi joisti a fasi fa sma ben doe a wet dati. Foe dati ede den ben teki en na den tapoe foe meki wet di e taki soifri san wan sma ben kan opo na sabadei. Den ben teki a bosroiti: noti di hebi moro leki toe drei figa. Den ben gi srefi wan komando foe san no mag ini a tori foe sandaal di fasi nanga spikri, foe di den ben e taki dati a opo di sma e opo a hebi di e kon foe den spikri, ben sa wani taki dati wroko e doe! Sma taki, dati ala nanga ala, den rabi ben poti ete 39 lin na a wet foe Gado ini a tori foe sabadei èn ben poti baka dati wan heri ipi sani moro na den bosroiti dati. Na a tra sei, Jesus no ben proeberi foe basi sma, foe di a no ben meki den firi sjen èn foe di a no ben poti wan heri ipi lin gi sma di e skotoe den noso foe di a ben poti strak markitiki di sma no ben man doe. — Mateus 23:2-4; Johanes 7:47-49.

12. Foe san ede wi kan taki dati Jesus no ben degedege te regtfardiki markitiki foe Jehovah ben kon ini a tori?

¹² Wi moesoe denki dan taki Jesus no ben tan hori den regtfardiki markitiki foe Gado hei? Seiker a ben doe dati! A ben froestan taki wet e wroko na a moro boen fasi, te libisma e teki den gronprakseri na ati di de baka den wet disi. Di den Fariseiman ben broko den ede foe proeberi foe basi a pipel nanga wan heri ipi lin, Jesus ben proeberi foe doro na ati foe sma. Foe eksempre, a ben sabi boen taki a no kan dati joe no e loekoe so fini ini a tori foe den sortoe wet disi foe Gado, so leki „lon komoto gi hoeroedoe” (1 Korentesma 6:18). Foe dati ede Jesus ben warskow sma gi den prakseri di ben sa kan meki den go doe hoeroedoe (Mateus 5:28). Den sortoe leri dati ben e aksi krinkrin moro koni, èn a man di a ben man foe si sani krin, na presi foe a poti tranga-ati lin nomo, di den ben skrifi foe sma hori.

13. (a) Foe san ede owroeman moesoe tan farawe foe meki wet nanga lin di no kan kenki? (b) San na wan toe kontren pe a de prenspari foe respeki a konsensi foe wan sma?

¹³ Brada di abi frantiwortoe ini a ten disi, abi belangstelling so srefi foe doro den ati foe sma. So boen, den e tan farawe foe poti lin di densrefi wani èn di joe no kan fiti na trawan, noso foe di den kenki den eigifasi foe den foe si sani nanga fasi foe denki, kon tron wet. (Teki gersi Danièl 6:7-16.) Ten na ten, a kan de joisti foe memre trawan na wan switifasi na den sortoe afersi leki fa foe weri krosi èn fa foe sorgoe gi den skin, èn den kan gi dati na a joisti ten. Ma wan owroeman kan tjari a boen nen foe en leki wan reidelek man kon ini kefar, efoe a e tan taki foe den sortoe afersi dati noso e proeberi foe dwengi sma foe teki san na a fosi presi e sori fa ensrefi e firi foe a tori. Foe troe, ala sma ini a gemeente moesoe tan farawe foe proeberi foe basi trawan. — Teki gersi 2 Korentesma 1:24; Filipisma 2:12.

14. Fa Jesus ben sori taki a ben de reidelek ini san a ben froewakti foe trawan?

¹⁴ Owroeman sa wani foe ondrosoekoe densrefi ini wan tra afersi: ’Mi de reidelek ini san mi e froewakti foe trawan?’ A no abi misi, taki Jesus ben de so. Doronomo a ben sori den bakaman foe en taki a no ben froewakti moro leki a moeiti di den ben e doe nanga den heri ati èn a ben warderi disi srefisrefi. A ben prèise a pôti weduwe di ben gi den moni foe en di ben abi pikinso waarde (Markus 12:42, 43). A ben gi piri-ai na den disipel foe en di den ben e kroetoe Maria foe a diri bijdrage foe en, di a ben taki: „Libi en nanga rostoe . . . A ben doe san a ben man” (Markus 14:6, 8). A ben reidelek srefi di den bakaman foe en no ben meki den froewakti foe en kon troe. Foe eksempre, ala di a ben gi den dri moro krosibei apostel foe en tranga foe tan na ai èn foe hori wakti nanga en a neti di den ben teki en na strafoe, den apostel no ben doe san Jesus ben prakseri, foe di den ben fadon na sribi ibri joeroe baka. Tokoe a ben taki nanga waran firi: „A jeje, dati no de foe taki, wani foe doe sani, ma a skin swaki.” — Markus 14:34-38.

15, 16. (a) Foe san ede owroeman moesoe loekoe boen foe no poti druk na tapoe na ipi noso foe tapoe skreki gi den? (b) Fa wán getrow sisa ben kon kenki san a ben froewakti foe trawan?

¹⁵ A troe, Jesus ben gi den bakaman foe en deki-ati foe ’doe moeiti srefisrefi’ (Lukas 13:24). Ma noiti a ben poti druk na den tapoe foe doe so! A ben abi wan boen krakti na den tapoe, ben gi wan eksempre, ben teki fesi, èn ben soekoe foe doro na ati foe den. A ben froetrow tapoe a krakti foe a jeje foe Jehovah foe doe san fika. Na a srefi fasi owroeman na ini a ten disi moesoe gi na ipi deki-ati foe dini Jehovah nanga den heri ati, ma den moesoe tan farawe foe tapoe skreki gi den nanga firi foe fowtoe noso sjen, san wani taki dati san den e doe nownow kaba ini a diniwroko foe Jehovah na a wan noso tra fasi no sari, noso dati Gado no e teki en. Wan strakfasi foe poesoe sma foe „doe moro, doe moro, doe moro!” kan meki denwan, di e doe ala san den kan, lasi-ati. Fa a ben sa de wan sari efoe wan owroeman bow wan nen taki a „moeilek foe sma plisi en” — wan sani di e difrenti srefisrefi nanga reidelekfasi! — 1 Petrus 2:18.

¹⁶ Wi alamala moesoe de reidelek ini san wi e froewakti foe trawan! Wan sisa, baka di en nanga en masra ben libi a zendingtoewijzing foe den, foe go sorgoe gi en mama di ben e siki, ben skrifi: „Den ten disi moeilek troetroe gi wi leki preikiman djaso na ini den gemeente. Foe di wi ben de ini a kringwroko nanga distriktwroko, pe wi ben feni kibri foe foeroe foe den sortoe druk dati no miti wi, dan wantronso wi ben kon sabi disi, na wan fasi di e hati sma. Mi ben gwenti foe taigi misrefi, foe eksempre: ’Foe san ede a sisa dati no e pristeri a joisti boekoe a moen disi? A no e leisi a Kownoekondre Dienst?’ Now mi sabi foe san ede. Gi sonwan dati na ala san den kan doe foe go ini a velddienst.” Omoro boen a de foe prèise den brada foe wi foe san den e doe, leki foe kroetoe den foe san den no e doe!

17. Fa Jesus ben gi wi wan eksempre ini a tori foe reidelekfasi?

¹⁷ Loekoe wan lasti eksempre foe a fasi fa Jesus e gebroiki a makti foe en na wan reidelekfasi. Neleki en Tata, Jesus no e kibri a makti foe en na wan djaroesoefasi. En srefi na wan meester ini a gi di wan sma e gi makti abra na trawan, foe di a e poti en getrow srafoe-groepoe foe sorgoe gi „ala den goedoe foe en” djaso na grontapoe (Mateus 24:45-47). Èn a no e frede foe arki den prakseri di trawan abi. Foeroetron a ben aksi den arkiman foe en: „San oenoe e denki?” (Mateus 17:25; 18:12; 21:28; 22:42). Na so a moesoe de na mindri ala den bakaman foe Krestes ini a ten disi. No foe di den abi pikinso makti, dan dati moesoe meki taki den no de klariklari foe arki. Papa nanga mama, arki! Trowmasra, arki! Owroeman, arki!

18. (a) Fa wi ben kan kon sabi efoe wi abi a nen taki wi de reidelek? (b) San wi alamala e doe boen foe bosroiti?

¹⁸ Foe troe, ibriwan foe wi wani foe „abi a nen taki wi de reidelek” (Filipisma 4:5, Phillips). Ma fa wi sabi efoe wi abi so wan nen? We, di Jesus ben angri foe sabi san sma ben taki foe en, a ben aksi dati na den froetrow kompe foe en (Mateus 16:13). Foe san ede joe no e waka baka na eksempre foe en? Joe ben sa kan aksi wan sma di joe kan froetrow na en tapoe taki a no sa kibri sani gi joe, efoe joe abi a nen taki joe de wan reidelek sma di no e loekoe so fini. Seiker foeroe sani de di wi alamala kan doe foe waka moro krosibei na baka Jesus en volmaakti eksempre foe reidelekfasi! Spesroetoe te wi e abi pikinso makti tapoe trawan, dan meki wi waka ala ten baka na eksempre foe Jehovah nanga Jesus, èn gebroiki a makti disi na wan reidelekfasi, de ala ten klariklari foe gi pardon, foe boigi noso foe no loekoe so fini te a fiti. Foe troe, meki ibriwan foe wi meki moeiti foe „de reidelek”! — Titus 3:2.

[Foetoewortoe]

Fa joe ben sa piki

◻ Foe san ede kresten moesoe wani foe de reidelek?

◻ Fa owroeman kan waka baka Jesus ini a de di a ben de klariklari foe gi pardon?

◻ Foe san ede wi moesoe doe moeiti foe fiti wisrefi neleki fa Jesus ben fiti ensrefi?

◻ Fa wi kan sori reidelekfasi ini a fasi fa wi e gebroiki makti?

◻ Fa wi kan ondrosoekoe wisrefi efoe wi de troetroe reidelek?

[Prenki na tapoe bladzijde 13]

Jesus ben de klariklari foe gi Petrus di ben abi berow, pardon

[Prenki na tapoe bladzijde 14]

Di wan oema ben sori aparti bribi, Jesus ben si taki disi no ben e ten foe hori wan algemeen lin

[Prenki na tapoe bladzijde 16]

Papa nanga mama, arki!

[Prenki na tapoe bladzijde 16]

Trowmasra, arki!

[Prenki na tapoe bladzijde 16]

Owroeman, arki!