Gi kotoigi gi „ala den nâsi”

„A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala den nâsi; èn dan a kaba sa kon.” — MATEUS 24:14.

1. Foe san ede den wortoe foe Jesus di skrifi na ini Mateus 24:14 ben de wan froewondroe sani gi den bakaman foe en?

FA Jesus wortoe na tapoesei ben moesoe de wan froewondroe sani gi den djoe disipel foe en! Srefi a prakseri, taki den santa djoe ben sa go foe taki nanga den heidensma di „no krin”, a „pipel foe den nâsi”, ben de wan freimde sani gi wan djoe, a ben de srefi wan tegoe sani.a Ija, wan opregti djoe no ben sa prakseri foe go na ini wan oso foe wan heidensma! Den djoe disipel dati ben abi foeroe foe leri ete ini a tori foe Jesus, a lobi foe en, nanga a komando foe en. Èn den ben abi foe leri foeroe ete foe a teki di Jehovah no e teki sma partèi. — Tori foe den Apostel 10:28, 34, 35, 45.

2. (a) Ofara a diniwroko foe den Kotoigi doe? (b) San na dri prenspari sani di meki taki den Kotoigi go na fesi?

² Jehovah Kotoigi preiki a boen njoensoe na mindri den nâsi, so srefi na mindri a disiten Israèl, èn den e meki en bekènti now ini moro nâsi leki oiti na fesi. Ini 1994, moro leki fo nanga afoe miljoen Kotoigi e preiki ini wan sani foe 230 kondre. Den e hori wan sani foe fo nanga afoe miljoen oso-bijbelstudie nanga sma di abi belangstelling. Den e doe disi ala di na heri grontapoe, sma e kroetoe den sondro foe den sma sabi fa a sani de, nofotron foe di den no sabi den sani di den Kotoigi e leri èn den reide di den Kotoigi abi. Neleki fa sma ben taki foe den fosi kresten, na so den kan taki toe foe den Kotoigi: „Foe a sekte disi wi sabi, taki ala presi den e ondrofeni genstaki” (Tori foe den Apostel 28:22). Foe san wi kan taki dan, dati den kisi boen bakapisi ini a diniwroko foe den? No moro mendri leki dri sani de di e meki taki den e go na fesi — waka na baka den tiri foe a jeje foe Jehovah, waka na baka den praktis fasi fa Krestes ben doe sani, èn gebroiki den joisti wrokosani foe taki nanga sma na wan boen fasi.

A jeje foe Jehovah nanga a boen njoensoe

3. Foe san ede wi no kan skepi foe den sani di wi ben doe?

³ Den Kotoigi foe Jehovah e meki bigi foe a boen bakapisi di den abi, neleki a boen bakapisi disi de foe iniwan spesroetoe bekwaam fasi di den abi kande? Nôno, bika den wortoe foe Jesus e fiti: „Te oenoe doe ala sani di oenoe ben kisi foe doe, taki dan: ’Wi na soso-srafoe. Wi doe san wi ben moesoe doe.’” Leki kresten di gi densrefi abra na Jehovah èn di dopoe, Jehovah Kotoigi teki a frantiwortoe na wan friwani fasi foe dini Gado, awinsi san na den persoonlijk omstandigheid. Gi son wan foe den, dati wani taki a foeroeten diniwroko leki zendeling noso leki friwani-wrokoman na ini bijkantoro nanga na ini gebow foe druk kresten poeblikâsi. Gi trawan, so wan fasi foe de klariklari leki kresten, e tjari den foe go doe bow wroko na relisi gebow, foe doe foeroeten preikiwroko leki pionier bedinari, noso foe doe preikiwroko leki preikiman foe a boen njoensoe, ini den gemeente foe a kontren foe den. No wan foe wi kan djaf nanga reti foe a wroko foe wi, di de „san wi ben moesoe doe”. — Lukas 17:10; 1 Korentesma 9:16.

4. Fa Kotoigi ben man pasa a gens di sma na heri grontapoe ben gens a kresten diniwroko?

⁴ Foe ibri boen bakapisi di wi abi, wi kan taki dati wi kisi en foe a jeje foe Jehovah, noso a wroko krakti foe en. Ini a ten disi, a e fiti ete foe taki so leki ini den dei foe Sakaria, foe taki: „Disi na a wortoe foe Jehovah gi Serubabel, di e taki: ‘No nanga wan sroedati legre, no nanga krakti, ma nanga mi jeje’, Jehovah foe den legre taki.” So boen, den Kotoigi ben pasa a gens di sma na heri grontapoe ben gens a preikiwroko foe den, no nanga a moeiti foe libisma, ma nanga a tiri foe Jehovah nanga a kibri foe en di a ben gi. — Sakaria 4:6.

5. Sortoe ròl Jehovah e plèi foe meki a Kownoekondre boskopoe panja na ala sei?

⁵ Gi denwan di e doe wan sani tapoe a Kownoekondre boskopoe, Jesus ben taki: „A skrifi ini den profeititori: ’Èn den alamala sa kisi leri foe Jehovah.’ Ibriwan sma di jere en foe a Tata èn kisi leri e kon na mi. . . . No wan sma kan kon na mi, efoe a Tata no ben gi en disi” (Johanes 6:45, 65). Jehovah man leisi ati nanga froestan, èn a sabi denwan di sa doe wan sani tapoe a lobi foe en, ala di kande den no sabi en ete. A e gebroiki den engel foe en toe foe tiri na aparti diniwroko disi. Dati meki ini wan fisjoen Johanes ben si a prati di den engel ben abi, èn a ben skrifi: „Mi ben si wan tra engel e frei na mindri foe hemel, èn a ben abi têgo boen njoensoe, foe meki dati bekènti leki prisiri ten gi den sma di e libi na grontapoe, èn gi ibri nâsi nanga lo nanga tongo nanga pipel.” — Openbaring 14:6.

Den sabi taki den abi wan jeje nowtoe

6. Sortoe prenspari fasi foe denki de fanowdoe foe wan sma doe boen tapoe a boen njoensoe?

⁶ Jesus e taki foe ete wan sani di e meki taki Jehovah e gi wan sma na okasi foe teki a boen njoensoe: „Kolokoe na den sma di sabi den jeje nowtoe, bika hemel kownoekondre na foe den” (Mateus 5:3). Wan sma di de tevrede nanga ensrefi nomo, noso wan sma di no e soekoe waarheid, no sa sabi taki a abi wan jeje nowtoe. A man-negre noso oema-sma disi, e prakseri soso foe sani na skin fasi. A tevrede di a de tevrede nanga ensrefi nomo, san e meki taki a no e si kefar, e tron wan skotoe gi en. Foe dati ede, te wi e go oso foe oso èn foeroe sma di wi e miti e weigri foe arki a boskopoe, wi moesoe prakseri ala den difrenti reide di sma abi foe handri na so wan fasi.

7. Foe san ede foeroe sma no e doe boen tapoe a waarheid?

⁷ Foeroe sma e weigri foe arki, foe di na wan tranga-ede fasi den e hori steifi na a relisi di den kisi foe a papa nanga mama foe den, èn den no wani bigin nanga wan takimakandra. Trawan ben kon lobi wan relisi di e fiti a persoonlijkheid foe den — son wan wani relisi di e doe dangra sani, trawan e waka na baka den emotioneel firi, ala di trawan e soekoe prisiri demakandra ini a kerki foe den. Foeroe sma ini a ten disi froekisi foe libi na wan fasi di no de ini akroederi nanga den markitiki foe Gado. Kande den e libi wan libi di no de akroederi boen gwenti nanga gebroiki, di de a reide foe san ede den e taki: „Mi no abi belangstelling.” Tokoe, trawan di e taki dati den kisi leri èn taki den e handri na wan sabidensifasi, e weigri foe erken bijbel, foe di den e taki dati a de toemoesi eenvoudig. — 1 Korentesma 6:9-11; 2 Korentesma 4:3, 4.

8. Foe san ede a weigri di sma e weigri foe arki no moesoe meki a faja foe wi kon moro mendri? (Johanes 15:18-20)

⁸ A bribi foe wi nanga a faja foe wi ini a diniwroko di e kibri sma libi, moesoe kon moro mendri foe di moro foeroe sma e weigri foe arki? Wi kan feni trowstoe foe den wortoe foe Paulus gi den Romesma: „San na a tori dan? Efoe wan toe sma no ben sori bribi, dan a bribi di den no abi kande sa meki a getrowfasi foe Gado de sondro krakti? Meki dati no pasa noiti! Ma Gado moesoe kon de troe, awinsi ibriwan sma kon de wan leiman, so leki fa a skrifi: ’So taki oenoe sa sori foe de regtfardiki ini oen wortoe èn oenoe sa wini te sma e kroetoe oenoe.’” — Romesma 3:3, 4.

9, 10. Sortoe boeweisi de, taki ini foeroe kondre Kotoigi ben man pasa gens?

⁹ Wi kan kisi deki-ati foe den foeroe eksempre na heri grontapoe, foe den kondre di ben gersi taki den no handri tapoe a boskopoe èn tokoe bakaten, den ben sori taki den de joisti tra fasi. Jehovah nanga den engel sabi taki boen-atisma ben de foe feni — ma den Kotoigi foe Jehovah ben moesoe tan go doro èn ben moesoe horidoro ini a diniwroko foe den. Teki foe eksempre, wan toe kondre pe, 50 jari pasa, a ben gersi taki a Lomsoe kerki ben de wan problema di wi no ben man foe pasa — Argentinia, Brasjonkondre, Ierland, Italiakondre, Kolombia, Meksikow, Portugal, nanga Spanjorokondre. Den Kotoigi no ben de foeroe ini 1943, soso 126.000 na heri grontapoe, nanga 72.000 foe den disi na ini Verenigde Staten. A mi-no-ke fasi nanga a kroetoe di den sma ben kroetoe den Kotoigi sondro foe den sma sabi fa a sani de, ben gersi leki wan ston skotoe di sma no ben man broko. Tokoe, ini a ten disi, wan toe foe den moro boen bakapisi foe a preikiwroko ben de ini den kondre disi. Na so a de toe ini foeroe foe den kondre di fosi ben de komunist kondre. A dopoe foe 7402 sma na a kongres ini Kiev, Oekraine, ini 1993, de wan boeweisi foe dati.

¹⁰ Sortoe fasi den Kotoigi gebroiki foe froeteri a boen njoensoe na den birtisma foe den? Den gebroiki sani na skin fasi di e hari sma, foe kisi sma foe drai a libi foe den? Disi na san trawan froeklari. Den Kotoigi go fisiti soso den pôtisma nanga denwan di no kisi leri, so leki fa tra sma froeklari?

Den fasi foe froeteri foe a boen njoensoe, di e tjari boen bakapisi

11. Sortoe moi eksempre Jesus ben gi ini en diniwroko? (Loekoe Johanes 4:6-26.)

¹¹ Jesus nanga den disipel foe en ben poti na eksempre di den Kotoigi e waka na baka te na a dei foe tide, ini a wroko foe den foe meki disipel. Jesus ben go ala presi pe sma ben de, goedoewan noso pôtiwan — na den oso, na den poebliki presi, na den pisi watra, na den bergi presi, srefi ini den snoga. — Mateus 5:1, 2; 8:14; Markus 1:16; Lukas 4:15.

12, 13. (a) Fa Paulus ben gi wan eksempre gi kresten? (b) Fa Jehovah Kotoigi waka na baka na eksempre foe Paulus?

¹² Nanga reti na apostel Paulus ben kan taki foe en eigi diniwroko: „Oenoe sabi heri boen foe sensi a fosi dei di mi doro ini a distrikt Asia, taki a heri ten mi ben de nanga oenoe, e doe srafoe wroko gi Masra . . . , ala di mi no ben hori misrefi na baka foe froeteri oenoe ala den sani di boen èn foe leri oenoe na poebliki èn foe oso foe oso.” — Tori foe den Apostel 20:18-20.

¹³ Sma sabi den Kotoigi foe Jehovah na heri grontapoe foe na waki di den Kotoigi e waka na baka na eksempre di den apostel ben gi, na oso-foe-oso diniwroko. Den Kotoigi no e poti foeroe prakseri tapoe wan TV preikiwroko di diri èn di no e taki dipi foe tori èn di no de na wan persoonlijk fasi. Na presi foe dati, den e go na den sma, goedoewan nanga pôtiwan, èn den e miti den persoonlijk. Den e soekoe foe taki foe Gado nanga a Wortoe foe en.b Den no e proeberi foe meki aleisi-kresten, foe di den e gi den sani fri. Gi denwan di wani taki-go-taki-kon, den e tjari kon na krin, taki a wan-enkri troe loesoe gi den problema foe a libisma famiri na a tiri foe Gado Kownoekondre, di sa kenki den situwâsi na grontapoe kon moro boen. — Jesaja 65:17, 21-25; 2 Petrus 3:13; Openbaring 21:1-4.

14. (a) Fa foeroe zendeling nanga pionier poti wan steifi fondamenti? (b) San wi e leri foe na ondrofenitori foe Jehovah Kotoigi na ini Japan?

¹⁴ Foe a wroko kan doe ini someni kondre leki a kan, meki zendeling nanga pionier naki wan broki foe man pasa den problema, so taki trawan ben kan go doro. Den poti wan fondamenti, èn baka dati den Kotoigi foe a kontren teki fesi ini a wroko. So boen, foeroe Kotoigi foe dorosei kondre no de fanowdoe foe meki a preikiwroko tan go doro èn foe meki a tan na wan orga fasi. Wán toemoesi aparti eksempre, na di foe Japan. Ini 1949, moro foeroe zendeling foe Australia nanga Ingrisikondre ben go drape, den ben studeri a tongo, den ben fiti densrefi na a primitief situwâsi foe a ten dati baka na orlokoe, èn den ben bigin foe gi kotoigi oso foe oso. Na a ten foe a Grontapoe Orlokoe Di foe Toe, a wroko foe den Kotoigi na Japan ben tapoe èn sma ben froefolgoe den. So boen, di den zendeling doro, den ben feni soso wan toe Kotoigi foe Japan. Ma ini a ten disi den gro kon tron moro leki 187.000 na ini moro leki 3000 gemeente! San ben de a sroto di meki taki den ben abi boen bakapisi ini a ten dati? Wán zendeling di dini moro leki 25 jari drape, ben taki: „A ben de toemoesi prenspari foe leri taki nanga den sma. Wi ben man gwenti nanga den sma, froestan den èn warderi a fasi fa den ben libi, foe di wi ben sabi a tongo foe den. Wi ben moesoe foe sori taki wi ben lobi den sma foe Japan. Na wan sakafasi wi ben proeberi foe tron wan pisi foe a libimakandra foe a presi, a no de foe taki, sondro foe skeki nanga wi kresten hei gronprakseri.”

A kresten fasi foe tjari wisrefi de wan kotoigi toe

15. Fa den Kotoigi sori kresten fasi foe tjari densrefi?

¹⁵ Ma sma no doe wan sani tapoe a bijbel boskopoe wawan. Den si den sani toe di krestenhèit e doe. Den si a lobi foe den Kotoigi, a fasi fa den de ini akroederi nanga makandra, nanga a wánfasi foe den, srefi ini den moro hebi situwâsi, so leki orlokoe na mindri groepoe borgroe, feti na mindri lo, nanga feantifasi na mindri ras. Den Kotoigi tan hori wan krin posisi foe kresten neutraalfasi ini ala den feti disi, èn den meki den wortoe foe Jesus kon troe: „Mi e gi oenoe wan njoen komando, foe oenoe lobi makandra; neleki fa mi lobi oenoe, na so oenoe moesoe lobi makandra toe. Nanga disi ala sma sa sabi taki oenoe na mi disipel, efoe oenoe abi lobi gi makandra.” — Johanes 13:34, 35.

16. Sortoe ondrofenitori e sori praktis kresten lobi?

¹⁶ A lobi di wan sma lobi a sma na en sei, ben de foe si ini a kefal foe wan owroe man di ben skrifi go na wan koranti foe a kontren, foe „Meneer nanga Mevrouw Switifasi”. A ben froeklari taki di a wefi foe en ben e dede, den ben doe boen gi en. „Sensi mi wefi dede . . . den de toemoesi boen”, a ben skrifi. „Sensi a ten dati, den teki mi foe sorgoe mi . . . , èn den doe ala sortoe pikinpikin wroko èn jepi mi foe loesoe den problema di wan sma foe 74 jari, di de nanga pensjoen, kan abi. Èn san e meki den sani disi de srefi moro aparti, na taki den na blakaman, èn mi na bakra. Den na Jehovah Kotoigi, mi na wan sma di gowe libi a Lomsoe kerki.”

17. Gi sortoe fasi foe handri wi moesoe wai pasi?

¹⁷ Na ondrofenitori disi e sori, taki wi kan gi kotoigi na foeroe fasi, so srefi nanga a fasi fa wi e tjari wisrefi ala dei. Te joe loekoe en boen, efoe wi no ben sa tjari wisrefi leki fa Krestes ben doe, dan a diniwroko foe wi ben o de neleki di foe den Fariseiman, sondro boen bakapisi. Wi no wani de leki denwan di Jesus ben taki foe den: „Doe ala san den e taigi oenoe, ma no doe leki fa den e doe, bika den e taki fa a tori de, ma den no e doe en.” — Mateus 22:37-39; 23:3.

A srafoe-groepoe e gi den joisti wrokosani

18. Fa bijbel boekoe e jepi wi, so taki wi kan jepi opregti sma?

¹⁸ Wan tra prenspari sani foe preiki a boen njoensoe gi ala den nâsi, na a de di bijbel poeblikâsi de foe kisi, di a Watch Tower Bible and Tract Society ben meki. Wi abi boekoe, brochure, traktaat, nanga tijdschrift di kan piki pikinmoro ala aksi foe wan opregtisma. Te wi e miti wan moslim, wan hindoe, wan boedistsma, wan taoistsma, noso wan djoe, wi kan gebroiki a boekoe De mens op zoek naar God (A soekoe di libisma e soekoe Gado) noso difrenti sortoe traktaat nanga pikin boekoe foe bigin wan takimakandra èn efoe a kan, wan bijbelstudie. Efoe wan evolutionistsma e aksi sani foe a meki di Gado meki sani, wi kan gebroiki a boekoe Leven — Hoe is het ontstaan? Door evolutie of door schepping? (Libi — Fa a doe kon? Nanga jepi foe evolutie noso foe di Gado meki sani?) Efoe wan jongoesma e aksi: ’San na a marki foe a libi?’ wi kan sori en a boekoe Jonge mensen vragen — Praktische antwoorden (Jongoesma e aksi — Piki di e wroko). Efoe wan sma e broko en ede srefisrefi nanga persoonlijk problema — lasi-ati, a weri di a weri toemoesi na jeje fasi noso na skin fasi, a dwengi di sma dwengi en foe abi seks nanga en, brokotrow — dan wi abi tijdschrift di taki na wan praktis fasi foe den sortoe tori disi. Foe troe, a getrow srafoe-groepoe di Jesus ben taki foe den na fesi taki den ben o gi „njanjan na a joisti ten”, e doe a wroko foe den. — Mateus 24:45-47.

19, 20. Fa a Kownoekondre wroko gro esi-esi na Albania?

¹⁹ Ma foe doro den nâsi, a ben de fanowdoe foe meki den boekoe disi ini foeroe tongo. Fa a doe kon taki wi ben man vertaal bijbel nanga bijbel poeblikâsi ini moro leki 200 tongo? Albania, wán eksempre di wi o loekoe sjatoe, e sori fa a getrow èn koni srafoe-groepoe ben man meki a boen njoensoe go na fesi, ala di bigi problema ben de èn sondro wan disiten Pinksterfesa foe meki wi man taki den tongo wantewante. — Tori foe den Apostel 2:1-11.

²⁰ Soso wan toe jari pasa, sma ben sabi Albania ete leki a wan-enkri troe atheïst komunist kondre. A tijdschrift, National Geographic, ben taki ini 1980: „Albania e tapoe [relisi], èn ini 1967 a ben meki ensrefi bekènti leki ’a fosi atheïst kondre na grontapoe.’ . . . A njoen geslagti foe Albania sabi soso atheïsme.” Now di komunisme go na baka, Albaniasma di kon sabi den jeje nowtoe foe den, e doe wan sani tapoe a preikiwroko di Jehovah Kotoigi e doe. Ini 1992 den ben tjari wan pikin vertaal groepoe foe jongoe Kotoigi ini Tirania kon na wán, di sabi Italiatongo nanga Ingrisitongo. Bekwaam brada di ben kon foe tra kondre, ben leri den foe gebroiki pikin computer foe poti tekst ini Albaniatongo, na ini. Den bigin vertaal traktaat nanga a Waktitoren tijdschrift. Baka di den kisi moro ondrofeni, den wroko foe vertaal tra bijbel poeblikâsi di abi waarde. Nojaso, 200 aktief Kotoigi de ini a pikin kondre dati (3.262.000 sma e libi drape), nanga 1984 di ben fisiti a Memrefesa ini 1994.

Wi alamala abi wan frantiwortoe

21. Ini sortoe pisi foe a ten wi e libi?

²¹ Sani di e pasa na grontapoe e doro wan heimarki. A e sori taki grontapoe e tron wan presi sondro tiri, sondro sma man tiri en. Disi de so, foe di ogridoe nanga ogri di doe nanga tranga e kon moro nanga moro, a kiri di den e kiri boen foeroe sma nanga a dwengi di den e dwengi sma nanga tranga foe abi seks nanga den ini orlokoe, a mi-no-ke fasi fa sma e si den boen gwenti nanga gebroiki, nanga leki bakapisi foe dati, den siki di sma e kisi foe seks, èn respeki di sma no abi moro gi tirimakti foe lanti di abi a reti foe tiri. Wi de ini a pisi ten di de a srefi leki a ten bifo a Froedoe, di den e taki foe en ini Genesis: „Jehovah ben si taki na ogri foe libisma ben de pasa marki na grontapoe èn taki ibri firi foe den prakseri foe en ati ben de soso ogri ala ten. Èn Jehovah ben firi sari taki a ben meki libisma na grontapoe èn a ben firi pen na ini en ati.” — Genesis 6:5, 6; Mateus 24:37-39.

22. Sortoe kresten frantiwortoe ala den Kotoigi foe Jehovah abi?

²² Jehovah sa handri neleki ini den dei foe Noa. Ma foe di a abi geregtighèit nanga lobi, a wani taki a boen njoensoe nanga a boskopoe foe warskow sma, moesoe preiki fosi gi ala den nâsi (Markus 13:10). Ini a tori disi Jehovah Kotoigi abi wan frantiwortoe — foe feni denwan di warti foe kisi a vrede foe Gado, èn foe leri den en pasi foe vrede. Heri esi, na a joisti ten foe Gado, a komando foe preiki sa kon na wan boen kaba. „Dan a kaba sa kon.” — Mateus 10:12, 13; 24:14; 28:19, 20.

[Foetoewortoe]

Joe e memre disi ete?

◻ Sortoe boen bakapisi den disiten Kotoigi abi ini a diniwroko foe den?

◻ Foe san ede foeroe sma e weigri foe erken a kresten boskopoe?

◻ Sortoe fasi fa den apostel ben preiki den Kotoigi e gebroiki?

◻ Sortoe wrokosani wi abi, foe doe a diniwroko foe wi na wan boen fasi?

◻ San wi alamala moesoe doe ini akroederi nanga Markus 13:10?

[Faki na tapoe bladzijde 27]

KONDRE KOTOIGI DI BEN DE AKTIEF INI 1943 INI 1993

Argentinia 374 102.043

Brasjonkondre 430 366.297

Chili 72 44.668

Ierland 150? 4.224

Kolombia ?? 60.854

Meksikow 1565 380.201

Peru Raport foe a wroko no de 45.363

Portugal Raport foe a wroko no de 41.842

Spanjorokondre Raport foe a wroko no de 97.595

Uruguay 22 9.144

Venezuela Raport foe a wroko no de 64.081

[Prenki na tapoe bladzijde 25]

Jehovah Kotoigi e kon moro foeroe ini foeroe Lomsoe kondre so leki Spanjorokondre

[Prenki na tapoe bladzijde 26]

Jehovah Kotoigi e wroko fajafaja ini den nâsi na heri grontapoe