Joe e gi trawan pardon?

BILL nanga en oemapikin Lisa, di ben abi 16 jari, ben abi problema nanga makandra. Pikin kesekese na mindri den nofotron ben kon tron trobi pe den ben e bari tranga. Te foe kaba, a span situwâsi ben doro a momenti taki a papa aksi Lisa foe gowe libi na oso.a

Baka wan pisi ten, Lisa ben kon si taki a no ben abi leti, èn a ben angri foe en papa gi en pardon. Ma na presi foe a papa, di ben hori en na ati, frigiti den fowtoe foe Lisa, a ben weigri foe si den moeiti di Lisa ben doe foe tjari vrede kon. Prakseri nomo foe disi! En eigi oemapikin, a no ben wani foe sori sari-ati!

Hondrohondro jari pasa kaba, wan man sondro fowtoe, ben kisi kroetoe foe dede gi wan ogri di a no ben doe. Kotoigi ben gi falsi kotoigi, èn politiek amtenari ben tapoe den ai, èn foe espresi den no ben wani hori anoe na geregtighèit. A man dati di no ben abi fowtoe, ben de Jesus Krestes. Sjatoe bifo a dede, a ben aksi Gado na ini begi: „Tata, gi den pardon, bika den no sabi san den e doe.” — Lukas 23:34.

Na wan opregtifasi Jesus ben gi trawan pardon pasa marki, èn den bakaman foe en ben kisi deki-ati foe doe neleki en ini a tori disi (Efeisesma 4:32). Ma neleki Bill, foeroe sma di de sondro sari-ati, no wani foe gi trawan pardon. Fa joe e fiti ini a tori disi? Joe de klariklari foe gi trawan pardon te den e doe wan sondoe teige joe? Èn fa a de nanga serjoesoe sondoe? Sma moesoe kisi pardon toe foe disi?

Na wan tjalensi foe gi trawan pardon

A no de wan makriki sani ala ten, foe gi trawan pardon. Èn ini den moeilek ten disi, a fasi fa sma e libi nanga makandra, kon de wan moro bigi problema srefi. Spesroetoe na osofamiri libi lai nofotron nanga hebi banawtoe nanga druk. Langa ten pasa kaba, a kresten apostel Paulus ben taki dati den sortoe omstandigheid dati ben sa de na ala sei ini „den lasti dei”. A ben taki: „Sma sa lobi densrefi nomo, lobi moni, de asranti, abi heimemre, . . . de sondro lobi gi boen sani, de toriman, no ke foe noti, abi bigimemre.” — 2 Timoteus 3:1-4.

Foe dati ede, sondro foe wi man wai pasi gi dati, wi alamala e kisi foe doe nanga krakti di e tesi a man di wi man gi trawan pardon. Boiti dati, wi e feti toe nanga den krakti foe wi skin. Paulus ben kragi: „A boen di mi wani, mi no e doe, ma na ogri di mi no wani, na dati mi e doe. Efoe now mi e doe san mi no wani, dan a sma di e doe en a no mi moro, ma a sondoe di de ini mi” (Romesma 7:19, 20). Leki wan bakapisi foe disi, foeroe foe wi no e gi trawan pardon so leki fa wi ben sa wani foe doe dati. Te joe e loekoe en boen, dan na onvolmaaktifasi nanga a sondoe di wi gebore nanga en, abi boen foeroe krakti tapoe wi alamala, èn sontron a e poeroe a sari-ati di wi abi gi kompe libisma.

Di wan oema ben kisi deki-ati foe gi wan trawan pardon gi wan pikin fowtoe, dan a ben piki: „No wan sma warti a moeiti di a e teki foe gi en pardon.” Te joe e loekoe en frafra, dan so wan sani di na oema taki, kan gersi leki a de sondro switifasi, sondro firi èn wan spotoefasi srefi. Ma te wi e loekoe en moro fini, dan wi e si taki a e tjari a broeja kon na krin di foeroe sma e firi te den e kisi foe doe nanga wan grontapoe di den e si leki wan grontapoe di e prakseri ensrefi nomo, di no e ke, èn di abi feantifasi. Wán man ben taki: „Sma e meki wan fowtoe gebroiki foe joe, te joe e gi den pardon. A de neleki te sma e si joe leki wan figifoetoe.”

Foe dati ede, a no de foe froewondroe taki, ini den lasti dei disi a de wan moeilek sani foe kweki na eigifasi foe gi trawan pardon. Tokoe bijbel e gi wi deki-ati foe gi trawan pardon na wan switifasi. (Teki gersi 2 Korentesma 2:7.) Foe san ede wi moesoe gi trawan pardon?

[Foetoewortoe]