Bijbel — San na a troetroe waarde foe en?
„BIJBEL na wan kibritori, wan boekoe di no ben de foe sma kan froestan en”, wan ososma e taki. Wan tra ososma e taki: „Mi sabi taki bijbel na wan prenspari boekoe, ma mi no sabi foeroe foe en. A moeilek foe froestan.”
„Foeroe kresten sabi . . . pikinso nomo foe bijbel”, The Toronto Star ben froeklari. Wan lomsoe oema ben taki: „Na abi di mi abi wan bijbel, e meki mi firi boen. A e gi mi vrede na inisei.” „Bijbel de leki wan kompas di e tjari wan sma pasa a boen krasi se foe a libi, go na wan presi pe a man feni kibri”, wan fisiman e taki. So leki fa wan sma di fosi ben de wan hindoe, ben taki, dan „bijbel na a Wortoe foe Gado èn wan presenti gi a libisma famiri èn bijbel de wan dresi gi pina na jeje fasi”.
Foeroe èn difrenti fasi de, fa sma e denki foe a troetroe waarde foe bijbel. Ma san na a troetroe waarde foe en?
Bijbel na a moro prenspari boekoe di de èn di panja na ala sei. Tapoe den bladzijde foe bijbel a piki de gi den moro moeilek problema di libisma ondrofeni kaba noso di den sa kisi foe doe nanga den ete. A praktis waarde foe a rai di de na ini bijbel, no abi speri. Den moreel markitiki di a e horibaka gi, hei srefisrefi. A boskopoe foe en krakti èn a e tjari wini kon. A boekoe disi, di abi wan waarde di joe no kan teki tra sani gersi nanga en, e froedini en foe wi poeroe en na wi boekoekasi èn poti ala wi prakseri na en tapoe èn ondrosoekoe en finifini.
Wi kan opo bijbel nanga ala froetrow taki a soifri dorodoro, sma kan froetrow na en tapoe, èn sma kan bribi en. Historia foe grontapoe e horibaka gi den sani foe fositen di skrifi na ini bijbel. Ibritron baka, den sani di archeoloogman feni, e sori taki a troe dati bijbel abi troe tori na ini èn taki a e froeteri waarheid. A taki di den moro leki 40 bijbel skrifiman e taki sani leti fa a de, e sori taki den de eerlijk man di abi soifri retifasi. A wánfasi di de foe feni ini bijbel, e sori taki a no kon foe libisma. Den sani di pasa èn di skrifi na ini bijbel de troe. Den sma di bijbel e taki foe den, na troetroe sma. Den presi di a e sori go na tapoe, na troetroe presi. Moro fara, bijbel abi toemoesi aparti profeititori, di sondro misi e meki sma kon sabi Jehovah Gado leki a Skrifiman foe bijbel. — 2 Petrus 1:21.
Wi Gran Leriman ben sorgoe taki sma di ben wani foe sabi a wani nanga den prakseri foe en, ben moesoe man doe dati. Foe taki en leti, dan Jehovah e froeteri wi nanga krin wortoe taki na en wani taki ala sortoe sma moesoe studeri a Wortoe foe en èn „kon kisi soifri sabi foe waarheid” (1 Timoteus 2:3, 4; Odo 1:5, 20-33). Disi na wan foe den moro prenspari sani di wi kan doe ini wi libi. Foe kisi soifri sabi na wan tjalensi di wi moesoe tanapoe na fesi foe dati. Den fosi kresten ben froestan disi. Wan foe den ben firi foe taki: „Disi na san mi e tan begi, taki a lobi foe oenoe kan kon moro foeroe ete nanga a soifri sabi nanga a koni foe si sani krin; taki oenoe kan kon sabi seiker san na den moro prenspari sani.” — Filipisma 1:9, 10; Kolosesma 1:9, 10.
Bijbel na a moro prenspari sani di a Mekiman e gebroiki foe meki a libisma famiri kon sabi a wani nanga a prakseri foe en, èn a e tjari kon na krin fa ibriwan foe wi e fiti ini a prakseri dati. Na ini bijbel sani skrifi di pasa fositen, èn a e gi wan krin prenki foe a ten di de na wi fesi. Bijbel e froeteri finifini san na a joisti leri èn a e taigi wi krin san wi moesoe bribi noso no moesoe bribi (Tori foe den Apostel 17:11; 2 Timoteus 3:16, 17). A e gi tirilin fa sma moesoe libi, èn a e tjari libisma go na a pasi pe sani ben kan waka boen nanga den èn den kan kisi kolokoe (Mateus, kapitel 5 te nanga 7). A e poti krakti na tapoe a Kownoekondre foe Gado leki a wan-enkri howpoe gi a heri libisma famiri èn a e sori fa a tiri foe en de a wrokosani di sa meki en nen kon santa èn di sa regtfardiki en soevereinfasi. Bijbel e tjari a fasi kon na krin di wi moesoe feti na baka foe njanboen foe wan krosibei, lobi matifasi nanga Jehovah, a Sma di gi wi libi.
Moro fara, bijbel na a wan-enkri boekoe di sa tjari joe foe kisi a moro bigi prijs di a libisma famiri sa kisi wan ten — têgo libi na wan paradijs grontapoe leki volmaakti libisma (Romesma 6:23). Jehovah en wan-enkri gebore Manpikin e froeteri wi: „Disi wani taki têgo libi, foe den e teki sabi doronomo na ini den foe joe, a wanenkri troe Gado, èn foe en di joe ben seni kon, Jesus Krestes” (Johanes 17:3). Troetroe wan boekoe di warti someni moesoe boeweigi wi foe leri san wi moesoe doe foe kisi a prijs foe têgo libi. Bijbel na wan boekoe di de foe sma kan froestan en, so leki fa a tra artikel sa sori.