Kownoekondre preikiman e froeteri
Jehovah tranga moro den feanti foe en
DIDIBRI nanga den ogri jeje foe en proeberi langa ten kaba foe hendri a preiki foe a boen njoensoe, nanga jepi foe falsi relisi nanga afkodrei. Na 2 Korentesma 4:4 bijbel e taki foe a didibri prakseri foe Satan: „A gado foe a seti foe sani disi ben breni a froestan foe sma di no e bribi, so taki a leti foe a glori boen njoensoe foe Krestes, di de a prenki foe Gado, no ben sa skèin go na ini.”
Ma Jehovah Gado tranga moro Satan. Den feanti foe Jehovah no man doe noti foe stòp a doe di a wani foe Gado moesoe doe, di de taki „ala sortoe sma moesoe kisi froeloesoe èn moesoe kisi wan soifri sabi foe waarheid” (1 Timoteus 2:4). Den verslag di e kon now foe Kownoekondre preikiman ini Australia e poti krakti na tapoe disi.
◻ Wan oema ben bigin leisi bijbel agen, baka di a ben broko nanga relisi so wan 20 jari langa. A belangstelling disi, di a ben kisi baka gi bijbel, ben meki taki a abi wan lo aksi. So boen, a ben begi Gado foe jepi en foe man feni den piki na tapoe den aksi disi. A ben wani soekoe waarheid, ma a ben sabi taki efoe a e go baka na a fosi relisi foe en, dan dati no ben sa loesoe a problema foe en. Na presi foe a doe dati, a ben bigin soekoe foe di a ben go na ini wan boekoe wenkri di e seri boekoe di gebroiki kaba èn a ben e aksi efoe den ben abi boekoe di e taki foe relisi.
A sma di abi a wenkri ben memre ensrefi, taki a ben abi wan relisi boekoe, no na ini wenkri, ma na oso. A titel foe a boekoe ben de U kunt voor eeuwig in een paradijs op aarde leven (Joe kan libi foe têgo ini wan paradijs na grontapoe), di Jehovah Kotoigi tjari kon na doro. Nanga faja na oema ben leisi a boekoe èn a ben feni den piki na tapoe foeroe foe den bijbel aksi foe en. Baka di a ben e soekoe Jehovah Kotoigi ini a telefon boekoe, a ben feni den te foe kaba, èn a ben bigin foe studeri bijbel doronomo.
◻ Wan jongoe oema ben aksi wan koranti ini a birti foe en foe den meki wan advertentie foe seri wan tapoe. Na advertentie ben kari a tapoe wan ’tapoe foe a mindri-jarihondro di abi foeroe krakti’. Wan Kotoigi foe Jehovah ben si na advertentie dati. A ben teki a bosroiti foe bèl a telefon nomroe di den ben gi èn foe taki nanga na oema foe a fonten foe pe a makti di sma e denki taki a tapoe abi, e kon. Wan takimakandra ben bigin foe a fasi fa bijbel e si den wroko foe den ogri jeje. A jongoe oema di ben abi a tapoe ben tjari kon na krin, taki wan dei na fesi ete, a ben begi Gado foe jepi en nanga den problema foe en di a abi nanga den ogri jeje. A Kotoigi ben sreka sani gi wan tra takimakandra nanga jepi foe a telefon.
Di a ben bèl, a jongoe oema no ben de na oso. A mama foe en ben teki a telefon èn ben taki: „Mi no sabi san joe ben taigi na oemapikin foe mi, ma a sani di pasa na wan wondroe!” A ben froeteri taki, baka a fosi leisi di a Kotoigi ben bèl, na oemapikin foe en ben trowe ala den fowtow nanga boekoe foe en di ben abi foe doe nanga Satan èn a ben bigin foe leisi bijbel.
Heri esi na baka, sani ben seti foe fisiti a jongoe oema na en oso. Wantewante a ben agri foe studeri bijbel doronomo nanga Jehovah Kotoigi. A ben bigin abi demakandra toe nanga den Kotoigi foe di a ben e fisiti den kresten konmakandra foe den. Agen Jehovah wini den ogri jeje foe di a ben e meki a soifri sabi foe bijbel waarheid skèin go doro.