Wan bigi ipi di e doe santa diniwroko
„Den e doe santa diniwroko gi en, dei nanga neti na ini a tempel foe en.” — OPENBARING 7:15.
1. Sortoe heimarki den ben doro ini 1935, ini a froestan di den ben froestan sani na jeje fasi?
TAPOE 31 mei 1935, bigi prisiri ben de na mindri den sma di ben teki presi gi a kondre foe den na a kongres foe Jehovah Kotoigi ini Washington, D.C. Foe a fosi tron, den ben sori krin drape soema na a bigi groepoe (noso, bigi ipi) foe Openbaring 7:9, akroederi a tra pisi foe bijbel èn akroederi den sani di ben bigin feni presi kaba.
2. San ben sori taki moro nanga moro sma ben kon froestan taki Gado no ben kari den foe kisi libi na hemel?
2 So wan siksi wiki na fesi, na a fesa foe na Avondmaal foe Masra di den ben hori ini den gemeente foe Jehovah Kotoigi, 10.681 foe den sma di ben de drape (wan sani foe 1 sma na mindri foe 6 sma) no ben njan foe a simbôlis brede nanga win, èn 3688 foe den disi ben de fajafaja preikiman foe Gado Kownoekondre. Foe san ede den ben weigri foe njan foe den simbôl? Bika tapoe gron foe san den ben leri foe bijbel, den ben kon froestan taki Gado no ben kari den foe kisi libi na hemel, ma taki na wan tra fasi den ben kan abi wan prati na den sani di Jehovah seti na wan lobifasi. So boen, san ben pasa na a kongres dati di a takiman ben aksi: „Grantangi, opo tanapoe, oenoe alamala di abi a howpoe foe libi foe têgo na grontapoe?” Doesoendoesoen sma ben opo tanapoe èn den arkiman ben e bari doronomo nanga prisiri.
3. Foe san ede a ben gi njoen krakti na a velddienst di sma ben kon sabi soema na a bigi ipi, èn san den Kotoigi ben prakseri foe disi?
3 Den sani di den sma di ben teki presi gi a kondre foe den ben leri na a kongres dati, ben gi njoen krakti na a diniwroko foe den. Den ben kon froestan taki, nownowde, bifo a kaba foe na owroe seti foe sani, a no soso wan toe doesoen, ma wan bigi groepoe sma ben o kisi na okasi foe kon na ini den sani di Jehovah sreka foe kibri sma libi, nanga a froewakti foe libi foe têgo na wan paradijs grontapoe. Fa dati ben de wan prisiri boskopoe di den ben gi drape na sma di lobi waarheid! Den Kotoigi foe Jehovah ben froestan taki wan bigi wroko ben de foe doe — wan prisiri wroko. Foeroe jari baka dati, John Booth, di ben tron wan memre foe a Tiri Skin, ben memre taki: „A konmakandra dati ben gi wi foeroe sani foe prisiri.”
4. (a) O foeroe den ben tjari a bigi ipi kon na wán foe sensi 1935? (b) Na sortoe fasi den wan di de foe a bigi ipi e boeweisi taki a bribi foe den na wan libilibi bribi?
4 Na ini den jari di ben kon na baka, a nomroe foe Jehovah Kotoigi ben kren srefisrefi. Ala di den ben kisi froefolgoe di foeroetron ben doe na wan ogrifasi, èn di ben kon hebi na den tapoe na a ten foe a di foe toe Grontapoe Orlokoe, tokoe na ini wan pisi ten foe tin jari, a nomroe foe den ben kon dri tron moro foeroe. Èn den 56.153 preikiman di ben gi wan poebliki kotoigi na ini 1935, kon tron moro leki 4.900.000 Kownoekondre preikiman di de ini moro leki 230 kondre, ini 1994. A moro bigi pisi foe den wan disi abi a fajafaja howpoe foe de na mindri den wan di Jehovah feni boen foe kisi volmaakti libi na wan paradijs grontapoe. Te joe teki den gersi nanga a pikin ipi, dan troetroe den tron wan bigi ipi. Den a no sma di e taki nanga den mofo taki den abi bribi, ma tokoe no e sori en (Jakobus 1:22; 2:14-17). Den alamala e prati a boen njoensoe foe a Kownoekondre foe Gado nanga trawan. Joe na wan foe den sma foe a groepoe dati di de kolokoe? A de di wan sma de wan fajafaja Kotoigi, na wan prenspari marki foe sma kon sabi en, ma moro de na ini a tori.
Den „e tanapoe na fesi a kownoestoeroe”
5. San a ’tanapoe [di a bigi ipi] e tanapoe na fesi a kownoestoeroe’ e sori?
5 Ini a fisjoen di ben gi na a apostel Johanes, a ben si den „e tanapoe na fesi a kownoestoeroe èn na fesi a Pikin Skapoe” (Openbaring 7:9). A tanapoe di den e tanapoe na fesi a kownoestoeroe foe Gado, so leki fa a skrifi ini a kontekst disi, e sori taki den e erken a soevereiniteit foe Jehovah dorodoro. Disi abi foeroe na ini. Foe eksempre: (1) Den e erken a reti di Jehovah abi foe bosroiti san boen èn san ogri gi den foetoeboi foe en (Genesis 2:16, 17; Jesaja 5:20, 21). (2) Den e arki te Jehovah e taki nanga den nanga jepi foe a Wortoe foe en (Deuteronomium 6:1-3; 2 Petrus 1:19-21). (3) Den e froestan o prenspari a de foe saka densrefi na ondro den wan di Jehovah froetrow nanga na opzicht (1 Korentesma 11:3; Efeisesma 5:22, 23; 6:1-3; Hebrewsma 13:17). (4) Ala di den de onvolmaakti, tokoe den e doe serjoesoe moeiti foe handri na tapoe theokrasia tiri, no na wan fasi di e sori taki den no wani, ma foe di den de klariklari, nanga a heri ati (Odo 3:1; Jakobus 3:17, 18). Den de na fesi a kownoestoeroe foe doe santa diniwroko gi Jehovah, gi soema den abi dipi respeki èn wan tranga lobi. Ini a kefal foe a bigi ipi disi, a ’tanapoe di den e tanapoe’ na fesi a kownoestoeroe e sori taki a Sma di e sidon na tapoe a kownoestoeroe feni den boen. (Teki gersi Openbaring 6:16, 17.) Tapoe a gron foe sortoe sani a Sma disi feni den boen?
Den „weri langa weti krosi”
6. (a) San a wani taki dati a bigi ipi „weri langa weti krosi”? (b) Fa a bigi ipi kisi wan regtfardiki posisi na fesi foe Jehovah? (c) O foeroe krakti a bribi di a bigi ipi e bribi ini a broedoe di Krestes trowe, abi na tapoe a libi foe den?
6 A sani di na apostel Johanes skrifi foe den sani di a ben si, e taki dati den memre foe a bigi ipi disi „weri langa weti krosi”. Den langa weti krosi dati e prenki a krin èn regtfardiki posisi di den abi na fesi Jehovah. Fa den ben doe kisi a posisi dati? Wi si kaba ini a fisjoen foe Johanes, taki den ben e tanapoe „na fesi a Pikin Skapoe”. Den e erken Jesus Krestes leki „a Pikin Skapoe foe Gado, di e teki sondoe poeroe foe grontapoe” (Johanes 1:29). Ini a fisjoen Johanes ben jere wan foe den owroeman di ben de drape na a kownoestoeroe foe Gado e tjari kon na krin: „Den wasi den langa krosi foe den èn den meki den kon weti ini a broedoe foe a Pikin Skapoe. Dati meki den de na fesi a kownoestoeroe foe Gado” (Openbaring 7:14, 15). Na wan agersifasi den wasi den krosi foe den, foe di den abi bribi ini a broedoe foe Krestes di e gi froeloesoe. Den no e erken den bijbelleri foe a froeloesoe-paiman soso nanga den froestan. A warderi di den abi gi dati, abi krakti na tapoe a sma di den de na inisei; so boen, „nanga na ati” den e bribi (Romesma 10:9, 10). Disi abi foeroe krakti na tapoe den sani di den e doe nanga a libi foe den. Foe di den abi bribi, meki den e gi densrefi abra na Jehovah tapoe gron foe na ofrandi foe Krestes, èn nanga jepi foe a dopoe na watra den e simboliseer a gi di den gi densrefi abra na Jehovah, èn den e libi troetroe akroederi a gi di den gi densrefi abra na en, èn na so fasi den e njanboen foe wan boen matifasi nanga Gado. Fa dati na wan toemoesi moi grani — wan di wi moesoe kibri heri boen! — 2 Korentesma 5:14, 15.
7, 8. Fa na organisâsi foe Jehovah jepi a bigi ipi so taki den kan hori den krosi foe den sondro doti?
7 Foe di den e broko den ede na wan lobifasi nanga a têgo boen foe den, meki na organisâsi foe Jehovah poti prakseri doronomo na tapoe a fasi fa sma e denki èn a fasi fa sma e tjari densrefi, di ben kan flaka noso doti a krosi di e sori soema a sma de, so taki ala di a sma e sori tra fasi na dorosei, a sma dati troetroe no ben sa fiti a profeitifasi fa den e taki foe den ini Openbaring 7:9, 10 (1 Petrus 1:15, 16). Foe poti moro krakti na tapoe san den ben tjari kon na doro bifo dati, A Waktitoren foe 1941 èn den wan di ben kon baka dati, ben sori doronomo taki a no ben sa fiti srefisrefi foe preiki gi sma èn baka dati, te wi no e doe diniwroko, wi e gi wisrefi abra na hoeroedoe noso soetadoe (1 Tesalonikasma 4:3; Hebrewsma 13:4). Ini 1947, den ben poti krakti na tapoe, taki den kresten markitiki di Jehovah poti gi a trowlibi, fiti gi ala kondre; awinsi sortoe gwenti den sma foe a presi srefi ben kan feni boen, den wan di ben tan trow nanga moro leki wán patna, no ben kan de Kotoigi foe Jehovah. — Mateus 19:4-6; Titus 1:5, 6.
8 Ini 1973, den ben sori den Jehovah Kotoigi na heri grontapoe, taki den alamala moesoe wai pasi dorodoro gi sani di sondro misi na sani di doti, so leki a fowtoe gebroiki foe tabaka, awinsi pe den ben kan de toe — no soso ini a Kownoekondrezaal noso ini a velddienst, ma so srefi na den grontapoe wroko noso na wan presi pe no wan sma no kan si den (2 Korentesma 7:1). Ini 1987, na den distriktkongres foe Jehovah Kotoigi, den kresten jongoewan ben kisi a tranga rai taki den moesoe loekoe boen foe no libi wan dobroe libi, so taki den kan tan abi wan krin posisi na fesi foe Gado (Psalm 26:1, 4). Ibritron baka, A Waktitoren warskow gi den difrenti fasi foe a jeje foe grontapoe, bika „a fasi foe anbegi di de krin èn di de sondro flaka na a fasi fa wi Gado nanga Tata e si en”, abi na ini toe dati wan sma moesoe tan „sondro flaka foe grontapoe”. — Jakobus 1:27.
9. Soema sa tanapoe troetroe na fesi a kownoestoeroe foe Gado, baka a bigi banawtoe?
9 Na den wan di a bribi foe den e boeweigi den foe libi na so wan fasi taki den e tan krin na jeje fasi èn na moreel fasi, di sa „tanapoe na fesi a kownoestoeroe” ete leki foetoeboi foe Gado di a feni boen, baka a bigi banawtoe di de na pasi e kon. Den wan disi na sma di no wawan e meki wan bigin nanga a kresten libi, ma di e horidoro ini a libi dati na wan loyaalfasi. — Efeisesma 4:24.
„Palmtaki na ini den anoe foe den”
10. San den palmtaki wani taki, di Johanes ben si ini den anoe foe a bigi ipi?
10 Wan foe den toemoesi aparti marki foe a bigi ipi, so leki fa na apostel Johanes ben si den, na taki „palmtaki ben de ini den anoe foe den”. San dati wani taki? A no de foe tweifri, taki den palmtaki dati ben memre Johanes na a djoe wiwirikampoe fesa, a moro prisiri fesa tapoe a Hebrew kalender èn di den ben hori baka a kotiwroko ini a zomer foe a jari. Akroederi a Wet, den ben gebroiki den wiwiri foe den palmbon makandra nanga den taki foe tra bon, foe meki wiwirikampoe na ini san den ben tan na a ten foe a fesa (Lefitikus 23:39-40; Nehemia 8:14-18). Te den anbegiman na a tempel ben e singi den Hallel singi, dan den ben wai nanga den palmtaki toe (Psalm 113-118). Sondro foe tweifri, a wai di a bigi ipi ben e wai nanga den palmtaki, ben memre Johanes toe foe na okasi di Jesus ben rèi go na ini Jerusalem, ala di wan heri ipi anbegiman ben wai nanga den palmtaki nanga prisiri, èn den ben bari: „Blesi a sma de di e kon ini a nen foe Jehovah, srefi a kownoe foe Israèl!” (Johanes 12:12, 13) So boen, a wai di den ben wai nanga den palmtaki, e sori taki a bigi ipi e prèise a Kownoekondre foe Jehovah nanga en salfoe Kownoe nanga prisiri.
11. Foe san ede den foetoeboi foe Gado troetroe e feni prisiri ini a dini di den e dini Jehovah?
11 Srefi now a bigi ipi e sori so wan jeje foe prisiri ala di den e dini Jehovah. Disi no wani taki dati den no e kisi foe doe nanga moeilek ten noso taki den no e ondrofeni sari noso pen. Ma a satisfaksi di e kon foe di den e dini èn e plisi Jehovah, e jepi den foe meki den sani dati tron leki noti. Na so wan zendeling di ben dini 45 jari makandra nanga en masra na Guatemala, ben froeteri foe den primitief situwâsi di ben de lontoe den, a tranga wroko nanga rèis di ben abi kefar na ini, di ben de wan pisi foe den libi, ala di den ben doe moeiti foe doro den Ingi dorpoe nanga a Kownoekondre boskopoe. A ben bosroiti: „A ben de a ten ini wi libi di wi ben prisiri srefisrefi.” Ala di a ben e firi den bakapisi foe di a ben kon moro owroe èn foe siki ede, tokoe wan foe den lasti sani di a ben skrifi na ini a boekoe pe a e skrifi den sani di e pasa ibri dei, ben de den wortoe: „A ben de wan boen libi, nanga so foeroe wini.” Jehovah Kotoigi na heri grontapoe e denki na a srefi fasi foe a diniwroko foe den.
„Santa diniwroko dei nanga neti”
12. San Jehovah e si djaso na grontapoe, awinsi na deiten noso na neti-joeroe?
12 Den anbegiman disi di abi foeroe prisiri, e doe „santa diniwroko [gi Jehovah] dei nanga neti na ini en tempel” (Openbaring 7:15). Na heri grontapoe, miljoenmiljoen sma e teki prati na a santa diniwroko disi. Te a de neti na wan toe kondre èn sma e sribi drape, dan ini tra kondre son e skèin èn den Kotoigi foe Jehovah e wroko tranga foe gi kotoigi. Doronomo den e singi prèisesingi gi Jehovah, ala di grontapoe e drai lontoe, dei nanga neti (Psalm 86:9). Ma a dei-nanga-neti diniwroko di Openbaring 7:15 e taki foe dati, na wan sani di de moro persoonlijk srefi.
13. Fa den Boekoe foe bijbel e sori san „dei nanga neti” diniwroko wani taki?
13 Ibrisma di de na ini a bigi ipi, e doe santa diniwroko dei nanga neti. Disi wani taki dati iniwan sani di den e doe wi kan si leki santa diniwroko? A troe taki, awinsi san den e doe, den e leri foe doe dati na wan fasi di e gi Jehovah grani (1 Korentesma 10:31; Kolosesma 3:23). Ma, „santa diniwroko” e fiti soso sani di langalanga abi foe doe nanga na anbegi di wan sma e anbegi Gado. Te wan sma e doe wan wroko „dei nanga neti” dan dati wani taki dati a moesoe doe sani doronomo noso na wan fasti fasi èn so srefi nanga serjoesoe moeiti. — Teki gersi Josua 1:8; Lukas 2:37; Tori foe den Apostel 20:31; 2 Tesalonikasma 3:8.
14. San ben sa meki taki a persoonlijk velddienst foe wi fiti nanga san „dei nanga neti” diniwroko wani taki?
14 Te den wan di de wan pisi foe a bigi ipi e dini ini na inisei djari na grontapoe foe Jehovah en bigi jeje tempel, dan den e doe moeti foe abi wan doronomo prati na a velddienst, di den e doe na wan fasti fasi. Foeroe foe den poti a marki gi densrefi foe abi wan prati ini a velddienst ibri wiki. Trawan e doe foeroe moeiti leki gewoon pionier noso leki jepi-pionier. Foeroetron, froekoe mamanten, den wan disi abi foeroe foe doe ini a gi foe kotoigi na strati èn na den wenkri. Son Kotoigi e hori bijbelstudie lati na neti foe jepi den wan di abi belangstelling. Den e gi kotoigi te den e go na wenkri, te den e rèis, te den e teki wan bro foe njan, èn den e gi kotoigi nanga jepi foe konkroetitei.
15. Boiti a velddienst, san a santa diniwroko foe wi abi na ini toe?
15 Foe abi wan prati na den gemeente konmakandra na wan pisi foe wi santa diniwroko toe; na so a de toe nanga a wroko di abi foe doe nanga a bow èn nanga a sorgoe di den e sorgoe gi den presi pe den e hori den kresten konmakandra. Disi abi na ini toe, a moeiti di wi e doe foe gi deki-ati èn foe jepi den kresten brada nanga sisa foe wi na jeje fasi èn na skin fasi, so taki den kan tan nanga faja ini a diniwroko foe Jehovah. Disi de so toe gi a wroko foe den Ati-oso kontakt komte foe wi. Den difrenti wroko di e doe na Bethel, so srefi friwani wroko na den kongres foe wi, den alamala na santa diniwroko. Foe troe, te a libi foe wi e drai lontoe a matifasi di wi abi nanga Jehovah, dan a e foeroe nanga santa diniwroko. So leki fa den Boekoe foe bijbel e taki, a pipel foe Jehovah e doe „santa diniwroko dei nanga neti”, èn den e prisiri troetroe foe doe a wroko dati. — Tori foe den Apostel 20:35; 1 Timoteus 1:11.
’Foe ala nâsi, lo, pipel, nanga tongo’
16. Fa a sori foe de troe taki a bigi ipi kon „foe ala nâsi”?
16 Den wan foe a bigi ipi e kon foe ala nâsi. Gado no e teki sma partèi, èn den sani di A seti nanga jepi foe Jesus Krestes foe sma kisi froeloesoe, de nofo foe den alamala kisi wini foe dati. Di sma ben kon sabi a bigi ipi foe a fosi leisi ini 1935, dan Jehovah Kotoigi ben wroko fajafaja na ini 115 kondre. Na ini den jari 1990, a wroko foe soekoe den wan di wi kan teki gersi nanga skapoe, ben doe ini moro leki toe tron a nomroe foe den kondre dati. — Markus 13:10.
17. San e doe foe jepi den sma foe ala ’lo, pipel, nanga tongo’ so taki den kan de ini a bigi ipi toe?
17 Foe feni sma di moesoe tron memre foe a bigi ipi ete, Jehovah Kotoigi no wawan poti prakseri na tapoe nationaal groepoe, ma so srefi na tapoe den lo nanga pipel nanga groepoe di e taki a srefi tongo, ini den nâsi dati. Foe doro den sma disi, den Kotoigi e tjari bijbel poeblikâsi kon na doro ini moro leki 300 tongo. Disi wani taki dati den moesoe gi leri èn den moesoe sorgoe gi groepoe foe bekwaam vertaler, e gi den computer wrokosani foe vertaal ini ala den tongo disi, èn so srefi foe doe a drukwroko srefi. Ini soso den feifi jari di pasa, den poti ete 36 tongo, di so wan 98.000.000 sma e taki, tapoe a lijst foe tongo di den e vertaal. Boiti dati, den Kotoigi e doe moeiti foe fisiti den sma disi persoonlijk, foe jepi den foe froestan a Wortoe foe Gado. — Mateus 28:19, 20.
„Komoto na a bigi banawtoe”
18. (a) Soema sa kisi kibri te a bigi banawtoe broko kon? (b) Sortoe prisiri sani sa meki bekènti na a ten dati?
18 Te den engel sa loesoe den winti di e tjari pori kon, di den e taki foe den na Openbaring 7:1, dan no soso den salfoe „srafoe foe wi Gado”, ma so srefi a bigi ipi di moksi densrefi nanga den na ini a troe anbegi, sa ondrofeni a kibri di Jehovah e gi na wan lobifasi. So leki fa den ben taigi na apostel Johanes, den wan foe a bigi ipi sa „komoto [libilibi] na a bigi banawtoe”. Fa den sa bari tranga srefisrefi foe gi tangi èn foe gi prèise na a ten dati, ala di den e meki bekènti: „Froeloesoe wi de tangi na wi Gado, di sidon na tapoe a kownoestoeroe, èn na a Pikin Skapoe!” Èn ala den loyaal foetoeboi foe Gado na ini hemel sa bari makandra nanga a bigi ipi ala di den e meki bekènti: „Amen! A blesi nanga a glori nanga a koni nanga a taki foe tangi nanga a grani nanga a krakti nanga a tranga moesoe de gi wi Gado foe ala ten èn foe têgo.” — Openbaring 7:10-14.
19. Na sortoe prisiri wroko den sma di pasa libilibi sa angri foe abi wan prati na dati?
19 Fa dati sa de wan prisiri ten! Ala sma di e libi sa de foetoeboi foe a wan-enkri troe Gado! A moro bigi prisiri foe ala den wan disi, sa de ini a dini di den e dini Jehovah. Foeroe wroko sa de foe doe — prisiri wroko! Grontapoe moesoe kenki kon tron wan Paradijs. Doesoendoesoen miljoen foe den dedewan sa kisi wan opobaka èn dan den sa leri den den pasi foe Jehovah. Fa a sa de wan prisiri grani foe abi wan prati na dati!
San na joe komentaar?
◻ Sortoe krakti den sani di ben pasa ini 1935 ben abi na tapoe a velddienst foe den Jehovah Kotoigi?
◻ San a ’tanapoe [di a bigi ipi] e tanapoe na fesi a kownoestoeroe’ e sori?
◻ Na sortoe fasi a warderi di wi abi gi a broedoe foe a Pikin Skapoe moesoe abi krakti na tapoe a fasi fa wi e libi?
◻ San a wai di den e wai palmtaki wani taki?
◻ Na sortoe fasi a bigi ipi e doe santa diniwroko dei nanga neti?
[Prenki na tapoe bladzijde 14, 15]
A santa diniwroko foe den e sori wan doronomofasi foe doe sani, a fajafasi, nanga a serjoesoe moeiti