„No frede, pikin ipi”
„No frede, pikin ipi, bika oen Tata feni en boen foe gi oenoe a kownoekondre.” — LUKAS 12:32.
1. San ben de a gron foe den wortoe foe Jesus: „No frede, pikin ipi”?
„TAN soekoe [Gado] kownoekondre” (Lukas 12:31). Di Jesus ben taigi den disipel foe en den wortoe disi, a ben taki wan gronprakseri di ben tiri a prakseri foe den kresten bigin nanga den dei foe en te leki now. A Kownoekondre foe Gado moesoe teki a moro prenspari presi ini a libi foe wi (Mateus 6:33). Ma ini a tori foe Lukas, Jesus ben go doro foe taki switi wortoe di e gi korostoe na wan spesroetoe groepoe foe kresten. A ben taki: „No frede, pikin ipi, bika oen Tata feni en boen foe gi oenoe a kownoekondre” (Lukas 12:32). Leki a Toemoesi Boen Skapoeman, Jesus ben sabi taki moeilek ten ben de a pasi e kon gi den krosibei disipel foe en. Ma efoe den ben tan soekoe Gado Kownoekondre, dan den no ben abi no wan reide foe frede. So boen, a froemane di Jesus ben gi no ben de wan tranga komando. Na presi foe dati, a ben de wan lobi pramisi di ben jepi den foe abi froetrow èn foe abi deki-ati.
2. Soema de na ini a pikin ipi, èn foe san ede den abi wan spesroetoe grani?
2 Jesus ben e taki nanga den disipel foe en, èn a ben kari den wan „pikin ipi”. A ben e taki toe nanga den wan di Jehovah ben o ’gi a kownoekondre’. Te joe teki den wan disi gersi nanga den ipi-ipi sma di ben sa erken Jesus baka ten, dan a groepoe disi ben de wan pikin nomroe foe troe. Den ben si den toe leki wan diri sani, bika den ben froekisi den gi wan toemoesi moi tamara, foe den gebroiki den na ini kownoe diniwroko. A Tata foe den, a Bigi Skapoeman Jehovah, e kari den foe den kisi wan hemel erfenis di abi foe doe nanga a Mesian Kownoekondre foe Krestes.
A pikin ipi
3. Sortoe glori fisjoen foe a pikin ipi Johanes ben si?
3 Soema dan, na den sma di de wan pisi foe a pikin ipi disi èn di abi so wan toemoesi moi froewakti? Den na den bakaman foe Jesus Krestes di salfoe nanga santa jeje (Tori foe den Apostel 2:1-4). Di na apostel Johanes ben e si den leki hemel singiman di abi harpoe na ini den anoe, a ben skrifi: „Mi si, èn loekoe! a Pikin Skapoe tanapoe na tapoe a bergi Sion, èn nanga en wán hondro fotenti na fo doesoen sma di en nen nanga a nen foe en Tata ben skrifi na den fesi-ede. Den disi na den sma di no flaka densrefi nanga oema; ija, den de njoenwenke. Den disi na den sma di e tan waka na baka a Pikin Skapoe awansi pe a e go. Den disi den ben bai poeroe na mindri libisma leki fosi froktoe gi Gado èn gi a Pikin Skapoe, èn ini den mofo den no ben feni lei; den de sondro flaka.” — Openbaring 14:1, 4, 5.
4. Sortoe posisi a pikin ipi abi na grontapoe ini a ten disi?
4 Sensi a Pinksterfesa ini 33 Gewoon Teri, den salfoewan disi di ben wiki nanga santa jeje, dini leki sma di teki presi gi Krestes na grontapoe (2 Korentesma 5:20). Ini a ten disi, soso wan fikapisi foe den tan abra èn e wroko makandra leki memre foe a getrow èn koni srafoe groepoe (Mateus 24:45; Openbaring 12:17). Spesroetoe sensi a jari 1935, den „tra skapoe”, kresten di abi wan howpoe foe libi na grontapoe èn di doro now wan nomroe foe foeroe miljoen, moksi densrefi nanga den. Den e jepi den foe preiki a boen njoensoe na heri grontapoe. — Johanes 10:16.
5. San na a fasi fa den wan di tan abra foe a pikin ipi e denki, èn foe san ede den no e frede?
5 San na a fasi fa den wan di tan abra foe a pikin ipi disi di de na grontapoe ete e denki? Foe di den sabi taki den o kisi ’wan Kownoekondre di no kan seki’ meki den e doe a santa diniwroko foe den nanga frede gi Gado èn nanga dipi respeki (Hebrewsma 12:28). Nanga sakafasi den e froestan taki den abi wan grani di warti srefisrefi èn di sa abi leki bakapisi wan prisiri di no abi skotoe. Den feni „a wan-enkri peri foe bigi waarde” di Jesus ben taki foe en di a ben taki foe a Kownoekondre (Mateus 13:46). Den salfoewan foe Gado e tanapoe sondro foe frede, ala di a bigi banawtoe e kon moro krosibei. Awansi san o kon na tapoe a libisma famiri na a ten foe „a bigi èn glori dei foe Jehovah”, den no abi wan takroe frede gi den dei di de na den fesi (Tori foe den Apostel 2:19-21). Foe san ede den ben moesoe frede?
A nomroe e kon moro mendri
6, 7. (a) Foe san ede a nomroe foe a pikin ipi di de na grontapoe ete, pikin srefisrefi? (b) Fa ibriwan foe den moesoe si a howpoe di a abi?
6 Ini den jari no so langa pasa, a nomroe foe a pikin ipi di de na grontapoe ete kon pikin srefisrefi. Disi ben de krin foe si ini a raport foe a Memrefesa foe 1994. Ini wan sani foe 75.000 gemeente foe a pipel foe Jehovah na heri grontapoe, soso 8617 sma ben sori taki den de memre foe a fikapisi, foe di den ben njan foe den simbôl (Mateus 26:26-30). Na a tra sei, ala nanga ala 12.288.917 sma ben de drape. Den salfoe kresten sabi taki den kan froewakti disi. Jehovah seti wan nomroe di skotoe, 144.000, foe meki a pikin ipi. Èn a tjari den kon na wán sensi a Pinksterfesa ini 33 Gewoon Teri. A de wan logis sani taki a kari di Jehovah e kari a pikin ipi, ben sa kon na wan kaba te a nomroe ben sa doro en marki, èn a boeweisi de taki na algemeen tjari kon na wán foe den spesroetoewan disi di kisi blesi, ben kaba ini 1935. Ma a ben taki na fesi taki den tra skapoe ini a ten foe a kaba, ben sa gro foe tron „wan bigi ipi di no wan sma man teri, foe ala nâsi nanga lo nanga pipel nanga tongo”. Foe sensi 1935, Jehovah e tjari a bigi ipi kon na wán di abi a howpoe foe libi foe têgo ini wan paradijs grontapoe. — Openbaring 7:9; 14:15, 16; Psalm 37:29.
7 A moro bigi groepoe foe den wan foe a pikin ipi di de now na grontapoe ete, doro a libimarki foe 70 te go miti 100 jari. Wan toe foe den pasa 100 jari kaba. Den alamala, awansi o owroe den de, sabi taki nanga jepi foe wan opobaka foe libi na hemel, te foe kaba, den sa de makandra nanga Jesus Krestes èn den sa tiri nanga en na ini en glori Kownoekondre. Den wan foe a bigi ipi sa de borgoe na grontapoe, na ondro Krestes, a Kownoe. Meki ibriwan foe wi prisiri foe den sani di Jehovah abi gi den wan di lobi en, ini a ten di de na den fesi. A no e didon na oenoe foe taki sortoe howpoe wi abi. Dati na gi Jehovah foe bosroiti. Ala toe groepoe kan prisiri srefisrefi ini a howpoe foe den foe abi wan kolokoe tamara, awansi a sa de ini a hemel Kownoekondre noso na wan paradijs grontapoe na ondro a Kownoekondre dati. — Johanes 6:44, 65; Efeisesma 1:17, 18.
8. O fara a poti di den moesoe poti a lakstampoe na tapoe den 144.000 de ete, èn san sa pasa te a doe kaba?
8 A pikin ipi di abi a spesroetoe nomroe foe 144.000 e meki „na Israèl foe Gado”, di kon ini a presi foe na Israèl na skin fasi ini den prakseri foe Gado (Galasiasma 6:16). Dati meki, a fikapisi na den wan di tan abra foe a jeje nâsi dati di de na grontapoe ete. Den wan dati di tan abra e kisi a lakstampoe gi a lasti boen di Jehovah feni den boen. Ini wan fisjoen, na apostel Johanes ben si a sani disi e feni presi, èn a ben skrifi: „Mi ben si wan tra engel opo kon foe pe son e opo, di ben abi wan lakstampoe foe a Gado di de na libi; èn a ben bari nanga wan tranga sten gi den fo engel di ben kisi na okasi foe doe ogri na grontapoe èn a se èn a ben e taki: ’No doe ogri na grontapoe èn na a se èn na den bon, te leki wi poti wan lakstampoe na den fesi-ede foe den srafoe foe wi Gado.’ Èn mi ben jere a nomroe foe den wan di ben kisi wan lakstampoe, wán hondro fotenti nanga fo doesoen di kisi wan lakstampoe, foe ibri lo foe den manpikin foe a [jeje] Israèl” (Openbaring 7:2-4). Foe di a de krin taki a wroko disi foe poti wan lakstampoe na tapoe a jeje Israèl pikinmoro kon na wan kaba, meki dati e sori taki heri esi span sani sa feni presi. Wán foe den na taki „a bigi banawtoe” moesoe de heri krosibei, te den sa loesoe den fo winti di e tjari pori na tapoe grontapoe. — Openbaring 7:14.
9. Fa a pikin ipi e prakseri foe a gro di a nomroe foe a bigi ipi e gro?
9 Den wan foe a bigi ipi di tjari kon na wán kaba, doro a nomroe foe miljoenmiljoen sma kaba. Fa disi e waran den ati foe a fikapisi srefisrefi! Ala di den wan foe a pikin ipi di de na grontapoe ete e tan kon moro mendri ini nomroe, tokoe den gi leri èn den sreka bekwaam man foe a bigi ipi foe teki frantiwortoe di abi foe doe nanga na organisâsi foe Jehovah na grontapoe di e gro (Jesaja 61:5). So leki fa Jesus ben sori, sma sa de di sa pasa a bigi banawtoe libilibi. — Mateus 24:22.
„No frede”
10. (a) Sortoe feti wi kan froewakti di sa opo na tapoe a pipel foe Gado, èn san a sa abi leki bakapisi? (b) Sortoe aksi den e poti gi ibriwan foe wi?
10 Satan nanga den ogri jeje foe en ben lagi go krosibei foe grontapoe. En nanga den legre foe en ben tjari kon na wán foe feti nanga ala den makti teige a pipel foe Jehovah. A feti disi, di bijbel e taki foe en na fesi, den e kari a feti foe Gog foe Magog. Na tapoe soema spesroetoe Didibri e poti en prakseri foe opo feti teige den? A no de na tapoe den lasti memre foe a pikin ipi, a jeje Israèl foe Gado, di e libi na wan vredefasi „leti na mindri foe grontapoe”? (Esekièl 38:1-12) Ija, ma a fikapisi foe a getrow salfoe groepoe makandra nanga den loyaal kompe foe den, den tra skapoe, sa si fa a feti di Satan e opo feti teige den sa meki taki, Jehovah foe en sei sa handri wantronso na wan fasi di e naki sma ati. A sa go ini a tori foe kibri a pipel foe en, èn disi sa meki a „bigi dei foe Jehovah di e gi sma frede” broko kon (Joèl 2:31). Ini a ten disi, a getrow èn koni srafoe e doe wan toemoesi prenspari wroko, wan wroko di e kibri sma libi, namkoe, a warskow gi a go di Jehovah sa go ini a tori, di de na pasi e kon (Maleaki 4:5; 1 Timoteus 4:16). Joe e horibaka fajafaja gi a diniwroko dati, foe di joe abi wan prati foe preiki a boen njoensoe foe Jehovah Kownoekondre? Joe sa tan go doro foe doe dati leki wan Kownoekondre preikiman di no e frede?
11. Foe san ede a de prenspari foe abi deki-ati ini a ten disi?
11 Te wi e loekoe a situwâsi foe grontapoe ini a ten disi, dan fa a de joisti ini a ten disi, foe a pikin ipi gi jesi na den wortoe di Jesus ben taigi den: „No frede, pikin ipi”! Te wi e loekoe ala den sani di e doe now akroederi den prakseri foe Jehovah, dan a de prenspari foe abi so wan deki-ati. Ibriwan foe a pikin ipi persoonlijk e froestan taki a de fanowdoe foe horidoro te na a kaba (Lukas 21:19). Neleki fa Jesus Krestes, a Masra èn Edeman foe a pikin ipi, ben horidoro èn ben boeweisi foe de getrow te na a kaba foe en libi na grontapoe, na so toe ibriwan foe a fikapisi moesoe horidoro èn moesoe boeweisi foe de getrow. — Hebrewsma 12:1, 2.
12. Na sortoe fasi Paulus, neleki Jesus, ben gi den salfoe kresten a froemane foe den no frede?
12 Ala den wan di salfoe moesoe abi a srefi fasi foe si sani leki fa na apostel Paulus ben abi. Loekoe fa den wortoe foe en leki wan salfoe poebliki preikiman foe na opobaka, de akroederi a froemane di Jesus ben gi foe no frede. Paulus ben skrifi: „Hori na prakseri taki den ben opo Jesus Krestes na dede èn taki a ben de foe a siri foe David, akroederi a boen njoensoe di mi e preiki; foe dati ede misrefi de ini boei na ini doengroe-oso leki wan ogriman di e njan pina. Tokoe a wortoe foe Gado no tai. Foe dati ede mi e go doro foe horidoro ini ala sani gi a boen foe den wan di a froekisi, so taki densrefi kan kisi a froeloesoe di de ini wánfasi nanga Krestes Jesus, makandra nanga têgo glori. A wortoe de getrow: Foe troe, efoe wi dede makandra, wi sa libi makandra toe; efoe wi e tan horidoro, makandra wi sa tiri leki kownoe toe; efoe wi e meki leki wi no sabi en, dan a sa meki leki a no sabi wi toe; efoe wi no de getrow, en e tan getrow, bikasi en no man doe leki a no sabi ensrefi.” — 2 Timoteus 2:8-13.
13. Sortoe tranga overtoigi den memre foe a pikin ipi abi, èn san disi e boeweigi den foe doe?
13 Neleki na apostel Paulus, den memre foe a salfoe pikin ipi di tan abra, wani foe horidoro na ondro pina, ala di den e meki a krakti boskopoe bekènti di de na ini Gado Wortoe. Na overtoigi foe den sidon steifi na ini den, ala di den e tan froetrow tapoe den pramisi foe Gado di e tjari froeloesoe èn foe a kisi di den e kisi „a kownoe-ati foe libi”, efoe den e tan getrow te na dede (Openbaring 2:10). Te den sa kisi wan opobaka wantewante èn te den sa kenki wantewante, dan den sa tjari den na ini wánfasi nanga Krestes, foe tiri makandra nanga en leki kownoe. Fa dati sa de wan wini gi den sma di hori den soifri retifasi leki sma di wini grontapoe! — 1 Johanes 5:3, 4.
Wan aparti howpoe
14, 15. Na sortoe fasi na opobaka howpoe foe a pikin ipi de wan aparti sani?
14 Na opobaka howpoe di a pikin ipi abi, de wan aparti sani. Na sortoe fasi? Wan reide de, taki a sa waka na fesi na algemeen opobaka foe „den regtfardikiwan nanga den onregtfardikiwan” (Tori foe den Apostel 24:15). Foe taki en leti, na opobaka foe den salfoewan de ini wan bepaalde orde foe prensparifasi, so leki fa dati de krin foe si ini den wortoe na 1 Korentesma 15:20, 23: „Krestes opo na dede, a fosi froktoe foe den wan di fadon sribi na dede. Ma ibri sma na ini en eigi orde: Krestes, a fosiwan, èn baka dati den wan di de foe Krestes ini a ten foe en denoja.” Foe di a pikin ipi abi a srefi sortoe fasi foe horidoro èn a bribi di Jesus ben sori, meki den sabi san de na fesi foe den te den kaba a libi foe den na grontapoe, spesroetoe sensi a ten di a troe Masra ben kon na a tempel foe en foe kroetoe sani ini 1918. — Maleaki 3:1.
15 Paulus e gi wi ete wan reide foe si na opobaka disi leki wan aparti sani. A ben skrifi so leki fa a skrifi na 1 Korentesma 15:51-53: „Loekoe! Mi e froeteri joe wan kibritori: Wi alamala no sa sribi ini dede, ma wi alamala sa kenki, ini wan momenti, ini wan pingi foe wan ai, ini a ten foe a lasti trompeti. . . . Bikasi disi di abi porifasi moesoe weri fasi di no kan pori, èn disi di kan dede moesoe weri fasi foe no man dede moro.” Den wortoe disi fiti gi den wan foe a pikin ipi di dede ini a ten foe a denoja foe Krestes. Sondro taki den abi foe sribi wan langa pisi ten ini dede, den weri a fasi foe no man dede moro, „ini wan momenti, ini wan pingi foe wan ai”.
16, 17. Fa den salfoe kresten blesi na wan spesroetoefasi, ini a tori foe na opobaka howpoe foe den?
16 Foe di wi sabi disi, meki wi kan froestan san den wortoe foe na apostel Johanes wani taki, di wi feni na Openbaring 14:12, 13. A ben skrifi: „’Djaso a wani taki horidoro gi den salfoewan, den wan di e hori den komando foe Gado nanga a bribi foe Jesus.’ Èn mi ben jere wan sten komoto na hemel e taki: ’Skrifi: Kolokoe gi den wan di dede ini wánfasi nanga a Masra, sensi now. Ija, a jeje e taki, meki den rostoe foe den tranga wroko, bikasi den sani di den ben doe e go makandra nanga den.’”
17 Fa dati na wan aparti pai di de na fesi foe a fikapisi foe a pikin ipi! Na opobaka foe den sa kon esi-esi, wantewante baka te den fadon sribi na dede. Fa dati sa de wan toemoesi aparti kenki di den sa ondrofeni te den e teki a toewijzing foe den na ini a jeje kondre! Den lasti memre di tan abra foe a pikin ipi „no [abi foe] frede” troetroe, foe di a kisi di a pikin ipi e kisi glori e feni presi ete, èn foe di den moro prenspari bijbel profeititori de krosibei foe kon troe. Èn a frede di den no e frede, e gi deki-ati na den wan foe a bigi ipi di moesoe kweki wan srefi fasi foe no frede, ala di den e froewakti taki den sa kisi froeloesoe ini a moro tranga ten foe problema di oiti grontapoe sabi.
18, 19. (a) Foe san ede a ten na ini san wi e libi de so prenspari? (b) Foe san ede den salfoewan èn so srefi den tra skapoe no moesoe frede?
18 Te den e froeteri foe den wroko di a pikin ipi doe, dan dati e jepi den nanga a bigi ipi foe tan frede a troe Gado. A joeroe foe en foe kroetoe doro kaba, èn foe dati ede, a pikinso boen ten di tan abra, warti srefisrefi. Foe troe, pikinso ten libi ete foe trawan doe wan sani ete. Ma wi no e frede taki a prakseri foe Gado sa misi. Foe troe, a sa kon troe!
19 Nownow kaba wi jere den tranga hemel sten e taki: „A kownoekondre foe grontapoe ben tron a kownoekondre foe wi Masra èn foe en Krestes, èn a sa tiri leki kownoe foe têgo èn foe ala ten” (Openbaring 11:15). Foe troe, a Bigi Skapoeman, Jehovah, e tiri ala den skapoe foe en go na tapoe „den pasi foe regtfardikifasi foe en nen ede” (Psalm 23:3). Sondro misi, a e tjari a pikin ipi go na den pai di den abi na hemel. Èn a sa froeloesoe den tra skapoe na wan boenfasi pasa a bigi banawtoe, so taki den kan njanboen foe têgo libi na a grontapoe kontren foe a hemel Kownoekondre foe Gado na ondro a tiri foe Krestes Jesus. So boen, ala di Jesus ben taki den wortoe disi gi a pikin ipi, tokoe ala den foetoeboi foe Gado na grontapoe abi reide foe arki den wortoe foe Jesus: „No frede.”
Joe kan tjari disi kon na krin?
◻ Foe san ede wi moesoe froewakti taki a nomroe di tan abra foe a pikin ipi sa kon moro mendri?
◻ San na a situwâsi foe a fikapisi foe den salfoewan ini a ten disi?
◻ Foe san ede kresten no moesoe frede, ala di a feti foe Gog foe Magog e kon krosibei?
◻ Foe san ede na opobaka howpoe foe den 144.000 de wan aparti sani, spesroetoe ini a ten disi?