Na disiten skapoekoi gi den „tra skapoe”
„Mi abi tra skapoe ete, di no de foe disi koi; den dati toe mi moe tjari, èn den sa arki mi sten, èn den sa tron, wan ipi, wán herder.” — JOHANNES 10:16.
1. Sortoe uitbreiding ini a tori foe na skapoekoi foe na jeje Israël ben kon ini 36 G.T.?
NANGA na tjari kon foe na njoen skapoekoi foe na jeje Israël tapoe na pinksterdé ini na jari 33 G.T., dan na fosi skapoekoi foe den djoe na skinfasi na ondro na Wet foe Mozes ben lasi gwe, foe di a ben doro en marki. Dri nanga afoe jari na baka na Romein-edeman foe hondro man Cornelius nanga en bribi famiri nanga mati na ini Cesaréa ben teki bribi, ben dopoe èn ben kisi salfoe nanga na jeje. Na so fasi den heiden di no ben besnij èn no ben tron proseliet ben tjari kon na ini na skapoekoi foe san Jezus Kristus de „na doro” (Tori foe den Apostel kap. 10). Na koi disi lontoe tapoe „na Israël foe Gado”, Israëlsma na jejefasi, ofoe jeje Israëlsma. Wi ben kan sa taki foe wan foe den — djoe ofoe heiden — dati a ’no de foe na koi disi’, no de foe na ipi di ini na krakti foe na seti foe na njoen verbontoe ben tjari kon makandra? Kwetkweti! — Galaciasma 6:16; Johannes 10:16.
2. Fa Jezus e doe te now ete dienst leki Toemsi Boen Herder foe den skapoe di teki poti ini na njoen verbontoe?
2 Na a lati pisten disi ete wan fikapisi foe na Israël foe Gado disi de na grontapoe, èn disi e bewijsi taki Jezus Kristus, na Mindriman foe na njoen verbontoe, de wan Getrow èn Toemsi Boen Herder. Srefi now ete, aladi now moro leki tinanégi hondro jari psa kaba, dan a glori Jezus Kristus soboen kan taki nanga reti san a ben taki bifo en dede nanga opobaka, sondro foe a meki bigi, èn san skrifi na ini Johannes 10:14, 15: „Mi de na Toemsi Boen herder, èn mi sabi mi skapoe èn mi skapoe sabi mi, neleki na Tata [na Granherder] èn mi sabi na Tata; èn mi e gi mi sili abra foe na boen foe den skapoe.”
3, 4. Foe san-ede joe moe si den „tra skapoe” aparti foe na pikin ipi?
3 Di Jezus ben kon na tapoe na punt disi, dan a ben taki den aparti wortoe di e kon now, ma sondro bigi memre: „Èn mi abi tra skapoe ete di no de foe disi koi, den dati toe wi moe tjari, èn den sa arki mi sten èn den sa tron wan ipi, wán herder” (Johannes 10:16). Soema de den „tra skapoe” disi foe soema a e taki dja?
4 Foe di den „tra skapoe” no ben de foe „a koi disi”, meki taki den no ben sa de foe na Israël foe Gado, foe san den memre abi wan jeje ofoe hemel goedoe. Den jeje Israëlsma disi moro foeroe ben sa de makandra wan „pikin ipi”, bika Jezus ben taki gi den discipel tapoe soema na santa jeje ben sa kanti kon na tapoe den: „No frede, pikin ipi, bika oen Tata ben feni en boen foe gi oenoe na kownoekondre” (Lukas 12:32). Na pikin ipi skapoe di den ben gi na hemel kownoekondre èn di ben sa tiri makandra nanga na toemsi Boen Herder Jezus Kristus, na ini na kownoekondre dati, sa de soso 144.000 jeje Israëlsma. — Openbaring 7:1-8; 14:1-5.
5. Fa joe ben sa kan gebroiki Openbaring 14:4 foe sori dati den tra skapoe logischerwijs abi wan tra howpoe leki na pikin ipi?
5 Na ini Openbaring 14:4 tanapoe: „Den disi den ben bai poeroe na mindri foe den sma leki fosiwan foe Gado èn na Lam.” Fa den 144.000 jeje Israëlsma disi, ben sa kan de den agersi fosiwan foe na mindri foe den libisma efoe tra froktoe no ben sa de, froktoe di ben sa koti bakaten? A no kan de tra fasi soboen dati na sé den 144.000 jeje Israëlsma di de na pikin ipi kownoe skapoe foe na njoen verbontoe skapoekoi, dati tra skapoe moesoe de toe di bakaten ben sa tjari kon na wan. Èn so den troe tori de toe a no so?
6, 7. Fa Openbaring 22:17 e kon troe, èn soema no e kisi a kari dja foe ’kon’?
6 Na ini Openbaring 22:7 e taki na fesi taki „na jeje èn na bruid e taki: ’Kon!’ Èn meki ibriwan sma di e jere en, taki: ’Kon!’ Èn ibri sma di abi dréwatra, kon; ibri sma di wani teki na watra foe libi foe soso”. Na jeje bruid foe Kristus e gi na kari „Kon!” no na ensrefi, dati wani taki, no na den sma di Jehovah Gado ben sa abi fanowdoe ete foe tron wan pisi foe na bruidsklasse foe tjari den kon na tapoe wan totaal foe 144.000. Na ini na ten foe na „bosroiti foe na seti foe sani disi”, di ben bigin na ini 1914 G.T., wi kan jere dati na „bruid” ini en wroko makandra nanga na santa jeje foe na Gran herder, e gi na kari dati. — Mattéus 24:3.
7 Den wortoe dati di de wan kari e go na den sma di e libi dja na grontapoe èn di abi na winsi foe kisi volmaakti libisma libi na a prenki èn na gersi foe Gado na ini na paradijs, di Gado kownoekondre na ini anoe foe Jezus Kristus sa tjari kon na grontapoe. Now, na ini „na bosroiti foe na seti foe sani disi”, den wan di kisi na kari, de den tra skapoe foe na profétitori na ini Johannes 10:16, pe Jezus ben e taki foe a farawe ten di moe kon. Den no de foe „disi koi” foe san na Toemsi Boen Herder Jezus ben taki na a ten dati. Ma den e kisi na kari via na fikapisi foe den „skapoe” di de na ini na „koi disi” èn den sroiti densrefi na a jeje fikapisi foe meki na kari go baka na tra sma, wan wroko di sa go doro te na kaba foe na bosroiti foe sani disi.
8. Sortoe loekoe den ben abi tapoe den tra skapoe na ini 1905?
8 Na ini na uitgave foe 15 maart 1905 foe Zion’s Watch Tower wan artikel ben tjari kon na doro nanga leki titel „na troe herder, den troe skapoe, na troe koi”. Na ini na artikel disi wan difrenti meki na mindri den skapoe foe „disi koi” èn den sma di den e kari den tra skapoe. Krakti ben poti na tapoe na artikel disi, dati „a koi disi” ben abi foe doe nanga na gemeente foe kristensma di ben tjari kon makandra na ini a ten „foe na Evangeliumten disi”, soleki den ben kari na pisten disi na a ten dati. Baka den edeprakseri di ben abi leki nen „Tra skapoe foe wan tra ipi” nanga „Mede-erfgenaam foe densrefi pramisi” (blz. 89, 90) den ben taki:
„Na ipi di na Masra ben tjari kon makandra na a ten di a ben taki na agersitori disi, no ben de na Israël na skinfasi, ma na jeje Israël . . . Foe dat’ede meki na fasi fa son sma e loekoe a sani, dati wi di de foe den heiden ofoe den ’tra skapoe’ di kari dja e tjari go now na ini na wan ipi, na wan fowtoe fasi foe loekoe sani . . . Den „tra skapoe” ini na agersi tori disi de èn dati de krin, de den sma di e tron skapoe foe na Masra baka te na disiten ’pikin ipi’ kon doro na heri nomroe.”
9, 10. (a) Foe san-ede na agersitori foe den skapoe nanga den bokoboko no sa kon troe na ini na ten foe na milennium? (b) Oten den tra skapoe ben sa tjari kon na wan?
9 Na ini wan bakaten paragraaf foe na artikel dati den „tra skapoe” dati e poti na ini na srefi lin leki den „skapoe” di Mattéus 25:31-46, na agersitori foe Jezus foe den skapoe èn den bokoboko. Na ini na jari 1905 den ben abi na prakseri taki na agersitori dati ben sa kon troe na ini na doesoen jari tiri foe Kristus baka na „feti foe na bigi dé foe Gado na Almaktiwan” na tapoe na fetigron foe Armageddon (Openbaring 16:14-16). Ma wi moe hori na ini prakseri taki na agersitori foe den skapoe nanga den bokoboko ben de na laatste pisi foe Jezus piki na tapoe na aksi foe en discipel san ben sa de na marki foe „en denoja èn foe na bosroiti foe na seti foe sani” (Mattéus 24:3). Na agersitori disi foe dat’ede moe kon troe na ini na bosroiti foe na seti foe sani di ben bigin na ini na jari 1914.
10 A de foe dat’ede krin dati na Toemsi Boen Herder Jezus Kristus no ben bigin tjari den „tra skapoe” foe Johannes 10:16 kon makandra na ini na fosi jarihondro, di den Samaritaansma di ben besnij ben tjari kon na ini na kristendom; èn a no ben doe disi toe di na Romein edeman foe hondro man, na heiden Cornelius di no ben besnij ben bekeer na ini 36 G.T. We, oten na Toemsi Boen Herder ben bigin foe tjari den tra skapoe kon makandra dan? Foeroe hondrohondro jari na baka, ija na ini na di foe 20 jarhondro disi, soleki den troe tori e sori disi. — Tori foe den Apostel 8:4-17; 10:9-48.
11. Nanga san den jeje Israëlsma moro foeroe ben hori densrefi bezig na ini 1935?
11 Na wan sani di e kon krin gi wi taki na fikapisi foe jeje Israëlsma di de na ini „disi koi”, te na a lente foe na jari 1935 ben de moro foeroe bezig nanga a tjari kon na ini na koi dati foe den laatste wan di ben de fanowdoe foe meki na nomroe foe 144.000 jeje Israëlsma kon foeroe. Den ben sa de den laatste wan di en sa teki na ini na njoen verbontoe, nanga leki Mindriman na Toemsi Boen Herder, di ben dede leki na Lam foe Gado foe gi „na broedoe foe wan tégo Verbontoe” (Hebrewsma 13:20; Psalm 50:5). San ben psa dan na ini 1935?
12. Sortoe ongewoon situwasi ben sori ensrefi na ini na congres foe 1935?
12 Na ini na mamafoto foe den Verenigde Staten foe Amerkankondre Washington (D.C.), wan algemeen congres foe Jehovah Kotoigi ben hori, pe bijbelondrosoekoeman di ben frede Gado spesroetoe ben kisi na kari èn di ben de leki a no-Israëlman Jonadab. Na tapoe a di foe toe dé foe a congres, 31 mei, na president foe a ten dati foe na Watch Tower Bible and Tract Society ben gi den sma di ben kon na a congres faja nanga na taki foe en di ben go foe Openbaring 7:9-17 èn na bigi ipi di ben kari drape. A ben tjari kon na krin dati na „bigi ipi” di ben taki dja na fesi ben sa abi na ini en „tra skapoe”, den sma di Jonadab ben e agersi, na no-Israël man di ben waka go makandra nanga Jehu, na kownoe foe Israël di a ben sori ensrefi nanga foeroe faja gi Jehovah èn di ben drai ensrefi tége den anbegiman foe na falsi Gado Baäl (2 Kownoe 10:15-28; Jeremia 35:6-19). Na so fasi Jehu e sori dati en „no ben wani si wan tra sma a fesi foe Jehovah” ofoe leki fa na Njoen Vertaling foe na Nederlands Bijbelgenootschap, „ben abi faja gi Masra”. — 2 Kownoe 10:16.
13, 14. (a) Soema ben tron den disiten Jonadab? (b) Sortoe libifasi ben fiti den èn foe san-ede?
13 Hondrohondro sma di ben wani de leki Jonadab èn di ben wani foe de den „tra skapoe” foe na Toemsi Boen Herder, ben gi jesi na a kari tapoe papira èn ben go na a congres na ini Washington. Foe ben tron disiten agersi Jonadab, a ben de fanowdoe leki fa a ben sori taki den ben gi densrefi krinkrin abra na Gado nanga jepi foe Jehovah Toemsi Boen Herder èn sori na gi densrefi abra disi nanga na dipi go na ondro watra krinkrin, neleki den skapoe di ben de wan pisi foe „disi koi” ben doe disi. A so a ben psa a tapoe satra 1 juni 1935 dati 840 sma di ben de na a congres ben dopoe na ini watra, wan sani di ben de leki wan bigi dopoe di ben feni presi na tapoe na dé foe na pinksterfesa na ini na jari 33 G.T. na ini Jeruzalem. Na tapoe wan kefarlek moi fasi na Toemsi Boen Herder ben sori dja taki a ben tanapoe klari now foe tjari den tra skapoe foe en di ben sa arki en sten èn ben sa waka na baka na lobi herder foe den — kon ondro en sorgoe leki herder! Disi ben meki wan njoen pisiten kon! Fa disi ben moe de wan bigi prisiri gi den! Baka na congres na ini 1935 na ini Washington na thema lezing ben tjari kon na krin ini den kolom foe na tijdschrift Na Wachttoren pe Openbaring 7:9-17 ben tjari kon a krin. Disi ben psa na ini den tijdschrift foe november nanga december 1935, ondro na titel „Na bigi ipi” (deel 1 en 2; Ingrisi tijdschrift foe 1 nanga 15 augustus).
14 Doesoendoesoen èn ete doesoendoesoen lésiman ben kon ferstan na grani foe tron troetroe tra skapoe foe na Toemsi Boen Herder èn foe kisi na joisti koi foe go na ini. Nanga disi na ini prakseri den ben meki den dopoe den na a fosi èn na moro boen okasi leki wan marki foe na gi di den gi densrefi abra na a Gran Herder, baka di den prakseri boen nanga jepi foe en Ondro Herder Kristus. Foe di den ben erken dati Jehovah Ondro Herder ben gi en libi abra foe na boen foe ala skapoe, meki te i loekoe en boen den ben wasi „den langa [identificatie-]krosi” na ini na „broedoe” foe na „Lam” disi foe Gado èn „meki den kon weti” foe psa na ondrosoekoe foe Gado. — Openbaring 7:14.
15. O foeroe den tra skapoe kon de now, èn tapoe san disi e sori?
15 Na bosroiti foe na seti foe sani, di ben bigin na a kaba foe den ten foe den heiden na ini 1914, no ben kon na wan kaba na ini 1935, foe di na toemsi Boen Herder foe ferloesoe sma ben poti en prakseri tapoe den tra skapoe, ma a e go doro te na ini na jari 1984, èn na kaba sa doro pas te na préki foe na kownoekondre boen dorodoro. Na nomroe foe sma di ben sori taki den de na ini na koi foe den tra skapoe dé foe dé e gro kon ini den miljoenmiljoen, soleki de foe si na ini den nomroe foe na Avondmaal aladi boen foeroe tra sma de na ini na pasi foe go ini a koi. Den e psa krinkrin now na wan toemsi bigi fasi na nomroe foe 144.000 di ben poti a fesi kaba, na beperkte nomroe di ben poti gi den sma disi na ini disi koi, di ben de gi den jeje Israëlsma, den medeërfgenaam nanga na Toemsi Boen Herder na ini en hemel kownoekondre. Disi na wan bewijs moro foeroe, dati den no de na ini „disi koi” foe na „bigi ipi” foe na Toemsi Boen Herder. — Lukas 12:32.
16, 17. (a) Sortoe matifasi de a mindri den tra skapoe èn na pikin ipi? (b) Fa den wortoe foe Jezus kon troe dati ala den toe groepoe ben sa de wan „wán ipi”?
16 Na difrenti na ini howpoe — na hemel howpoe gi den skapoe na ini „disi koi” èn na grontapoe howpoe gi den tra skapoe di de na ini na tra koi foe no langa psa ete, ben de gi den skapoe wan réde foe na ki prati foe makandra neleki den no abi noti foe doe nanga makandra? Den sani di ben psa sensi na jari 1935 e sori taki dati séker no de so, Jezus na Toemsi Boen Herder ben taki a fesi taki disi no ben sa de so, bikasi a ben taki moro fara „èn den sa tron wan ipi” (Johannes 10:16). Wi e si taki a no ben taki: „Wán ipi ini wán koi”. Ma awinsi aparti koi de dan, tokoe soso „wán herder” ben sa de, èn dati de na herder kownoe di sensi na kaba foe den ten foe den heiden na ini 1914 e tiri na ini hemel. Ini akroederi nanga na troe tori disi „den skapoe” ben kon abi wan gemeenschappelek wroko, ’na préki foe na boen njoensoe foe na kownoekondre na tapoe na heri grontapoe pe libisma e libi leki wan kotoigi gi ala naatsi’ bifo na kaba foe na owroe grontapoe seti foe sani sa kon. — Mattéus 24:14.
17 Den tra skapoe no e prakseri kwetikweti dati den de aparti foe na a pikin ipi. Nanga makandra den de na wan ipi skapoe foe na Toemsi Boen Herder. Den tra skapoe e prisiri foe na krosbé demakandra foe den nanga na pikin ipi èn den e feni en wan bigi grani foe kan doe diniwroko wan pisiten nanga den kownoe nanga priester foe a ten di e kon, foe soema den sa de na ini na doesoen jari kownoekondre en onderdaan.
18. (a) San a ten di e kon sa tjari kon gi na njoen verbontoe èn den salfoe skapoe na ini „disi koi”? (b) Sortoe ferwakti den tra skapoe abi?
18 Te den memre foe na fikapisi foe den jeje Israëlsma tapoe den faste ten foe Gado tjari a grontapoe waka foe den kon a wan kaba èn gwe libi a grontapoe foe kisi den hemel paiman, dan na njoen verbontoe — di meki tapoe na fundamenti foe na broedoe foe na Mindriman, na Toemsi Boen Herder Jezus Kristus, — no sa abi krakti moro langa foe di a sa dini en doel na wan boen fasi. Nanga dati na ala jari hori foe na Avondmaal foe Masra tapoe na Pascha dé sa kon na wan kaba. Dan ooktoe „disi koi” no sa de moro gi na ipi foe jeje Israëlsma. Den tra skapoe di gi densrefi abra foe dopoe sa tan na grontapoe foe kisi den blesi foe na konwoekondre di de foe na Toemsi Boen Herder Jezus Kristus nanga en 144.000 medepriester nanga -kownoe, di sa kon na tapoe den. Na ipi di sa tan abra na grontapoe, di sa kon krin, sa de soso foe den tra skapoe san kon na wan. Den sa tan arki na sten foe den Herder-Kownoe, èn disi sa meki taki den sa kisi tégo libi na ini libisma volmaaktifasi na wan paradijsgrontapoe.
Joe kan gi bodoi foe disi?
◻ San e sori dati den tra skapoe kenki foe den skapoe di de foe na bigi ipi?
◻ Fa Openbaring 22:17 e kon troe now?
◻ Oten èn pe den tra skapoe ben bigin kon na fesi?
◻ Fa den tra skapoe nanga den salfoewan ben de wán ipi ala di den no de na ini na srefi koi?
[Prenki na tapoe bladzijde 7]
Na artikel „Na bigi ipi”, di den ben tjari kon na doro ini 1935, ben jepi foe kon sabi soema na „den tra skapoe”
[Prenki na tapoe bladzijde 8]
Di na kari foe na „pikin ipi” ben e kon na wan kaba, Jezus ben tjari wan ipi foe „tra skapoe” kon na wan