Wan bigi ipi foe troe anbegiman — Foe pe den komoto?

„Loekoe! wan bigi ipi, . . . foe ala nâsi, nanga lo, nanga pipel, nanga tongo, e tanapoe na fesi a kownoestoeroe èn na fesi a Pikin Skapoe.” — OPENBARING 7:9.

1. Foe san ede den profeitis fisjoen ini Openbaring de troetroe prenspari gi wi ini a ten disi?

NA A KABA foe a fosi jarihondro Gewoon Teri, na apostel Johanes ben si fisjoen foe toemoesi moi sani di feni presi, èn di abi foe doe nanga a prakseri foe Jehovah. Sonwan foe den sani di a ben si ini fisjoen, e kon troe nownowde. A froewakti de, taki den trawan sa kon troe ini a ten di de krosibei. Ala den fisjoen disi e drai lontoe a doro di a bigi prakseri foe Jehovah e doro en hei marki foe santa a nen foe en na fesi foe ala mekisani, na wan fasi di e naki sma ati (Esekièl 38:23; Openbaring 4:11; 5:13). Moro fara, den abi foe doe nanga den libi froewakti foe ibriwan foe wi. Fa so?

2. (a) San na apostel Johanes ben si ini a di foe fo fisjoen foe en? (b) Sortoe aksi wi e go loekoe di abi foe doe nanga a fisjoen disi?

² Ini a di foe fo fisjoen foe den fisjoen di de ini Openbaring, Johanes ben si engel di ben e hori den winti di e tjari pori kon, te leki „den srafoe foe wi Gado” kisi a lakstampoe na a fesi-ede foe den. Baka dati a ben si fa sani ben waka moro fara na wan fasi di e naki sma ati srefisrefi — „wan bigi ipi, di no wan sma ben kan teri, foe ala nâsi, nanga lo, nanga pipel, nanga tongo”, di de ini wánfasi ini na anbegi di den e anbegi Jehovah èn a grani di den e gi en Manpikin. Johanes ben kisi foe jere taki den sma disi na sma di ben sa komoto na a bigi banawtoe (Openbaring 7:1-17). Soema na den wan di den ben taki foe den leki „srafoe foe wi Gado”? Èn soema sa de ini a „bigi ipi” di e pasa a banawtoe libilibi? Joe sa de wan foe den?

Soema na „den srafoe foe wi Gado”?

3. (a) Fa Jesus ben agersi a matifasi di a abi nanga den bakaman foe en, na Johanes 10:1-18? (b) San Jesus ben meki taki den skapoe foe en ben kan doe, nanga jepi foe na ofrandi dede foe en?

³ So wan fo moen bifo a dede foe en, Jesus ben kari ensrefi „a toemoesi boen skapoeman”, èn a ben kari den bakaman foe en den „skapoe”, di a ben sa gi en libi abra gi den. A ben taki spesroetoe foe skapoe di a ben feni ini wan agersi skapoe-koi èn baka dati a ben sorgoe gi den na wan spesroetoe fasi (Johanes 10:1-18).a Na wan lobifasi Jesus ben gi en sili abra gi a boen foe den skapoe foe en, èn nanga dati a ben e gi a froeloesoe prijs di ben de fanowdoe, so taki den ben kan kon fri foe sondoe nanga dede.

4. Soema na den fosiwan di den ben poti kon makandra leki skapoe, so leki fa Jesus ben taki djaso?

⁴ Ma bifo a ben e doe dati, Jesus srefi leki a Toemoesi Boen Skapoeman, ben tjari den disipel kon na wán. Johanes a Dopoeman, a „doro waktiman” foe na agersitori foe Jesus, ben meki Jesus kon sabi den fosi disipel. Jesus ben e soekoe sma di ben sa handri na wan boenfasi na tapoe na okasi foe tron wan pisi foe a ’siri foe Abraham’ di meki foe difrenti pisi (Genesis 22:18; Galasiasma 3:16, 29). A ben meki den kisi warderi ini den ati gi a Kownoekondre foe hemel, èn a ben gi den a djaranti taki a ben e go foe sreka wan presi gi den ini na oso foe en hemel Tata (Mateus 13:44-46; Johanes 14:2, 3). Foe dati ede a ben fiti di a ben taki: „Foe den dei foe Johanes a Dopoeman te leki now, a kownoekondre foe hemel na a marki di libisma e poesoepoesoe foe doro, èn den wan di e poesoepoesoe go na fesi, e graboe en hori” (Mateus 11:12). Den wan disi di ben waka na en baka foe doro a marki dati, ben sori taki den de na ini a skapoe-koi di Jesus ben taki foe dati.

5. (a) Soema na „den srafoe foe wi Gado”, di Openbaring 7:3-8 ben taki foe den? (b) San e sori taki moro foeroe sma ben sa de ete di ben sa moksi densrefi nanga den jeje Israèlsma ini na anbegi?

⁵ Na Openbaring 7:3-8 den e kari den wan di abi boen bakapisi ini a poesoepoesoe di den e poesoepoesoe go na fesi foe doro a hemel marki dati, „den srafoe foe wi Gado”. (Loekoe 1 Petrus 2:9, 16.) A de so dati den 144.000 di den e taki drape foe den, na soso den sma di gebore leki djoe? A de so dati den wan di de na ini na agersi skapoe-koi foe Jesus en agersitori, na soso djoe? Kwetikweti; den na memre foe a jeje Israèl foe Gado, di alamala na kompe nanga Krestes ini a jeje siri foe Abraham (Galasiasma 3:28, 29; 6:16; Openbaring 14:1, 3). Te foe kaba, seiker a ten ben sa kon te den ben sa doro a fasti nomroe foe 144.000. San ben sa pasa dan? Neleki fa bijbel ben taki na fesi, dan trawan — wan bigi ipi foe den — ben sa moksi densrefi nanga den jeje Israèlsma disi ini na anbegi di den e anbegi Jehovah. — Sakaria 8:23.

Den „tra skapoe” — Den na heiden kresten?

6. Na sortoe fasi fa sani sa waka Johanes 10:16 e sori?

⁶ Baka di Jesus ben taki foe wan skapoe-koi na Johanes 10:7-15, dan a ben taki foe ete wan tra groepoe ini a tori, èn a ben e taki: „Mi abi tra skapoe, di no de foe a koi disi; den wan dati mi moesoe tjari kon toe, èn den sa arki mi sten, èn den sa tron wán ipi, wán skapoeman” (Johanes 10:16). Soema na den „tra skapoe” dati?

7, 8. (a) Foe san ede na idea taki den tra skapoe na heiden kresten, abi en gron tapoe wan fowtoe prakseri? (b) Sortoe troe tori di abi foe doe nanga a prakseri di Gado abi nanga grontapoe, moesoe abi krakti na tapoe a fasi fa wi e froestan soema na den tra skapoe?

⁷ Den sma foe krestenhèit di e froeklari sani, moro foeroe abi a denki taki den tra skapoe disi na heiden kresten, èn taki den wan na ini a skapoe-koi di wi ben taki foe den na fesi kaba, na den djoe di ben de na ondro a Wet froebontoe, èn den e taki dati ala toe groepoe e go na hemel. Ma Jesus ben gebore leki wan djoe, èn foe di a ben de wan djoe meki a ben de na ondro a Wet froebontoe (Galasiasma 4:4). Boiti dati, den wan di e si den tra skapoe leki den heiden kresten di sa kisi libi na hemel leki pai, e frigiti wan prenspari afersi foe a prakseri foe Gado. Di Jehovah ben meki den fosi libisma èn ben poti den na ini a djari foe Eden, dan a ben taki krin dati a ben de a prakseri foe en taki grontapoe ben moesoe kon foeroe nanga sma, dati heri grontapoe ben moesoe de wan paradijs, èn dati den libisma di ben sa sorgoe gi a paradijs, ben moesoe njanboen foe têgo foe a libi — ma a ben aksi foe den taki den e respeki èn e gi jesi na a Mekiman foe den. — Genesis 1:26-28; 2:15-17; Jesaja 45:18.

⁸ A prakseri foe Jehovah no ben broeja di Adam ben sondoe. Na wan lobifasi Gado ben seti sani gi den bakapikin foe Adam so taki den kan abi na okasi foe njanboen foe den sani di Adam no ben warderi. Jehovah ben taki na fesi dati a ben sa opo wan froeloesoeman, wan siri, di nanga jepi foe en, blesi ben sa de foe kisi gi ala nâsi (Genesis 3:15; 22:18). A pramisi dati no ben wani taki dati ala boen sma ben sa go na hemel. Jesus ben leri den bakaman foe en foe begi: „Joe kownoekondre moesoe kon. Joe wani moesoe pasa so leki na ini hemel, na grontapoe toe” (Mateus 6:9, 10). No so langa bifo Jesus ben taki foe na agersitori di skrifi na Johanes 10:1-16, a ben taigi den disipel foe en taki a Tata foe en ben feni soso wan „pikin ipi” boen foe gi den a hemel Kownoekondre (Lukas 12:32, 33). So boen, te wi e leisi na agersitori foe Jesus di e taki foe ensrefi leki a Toemoesi Boen Skapoeman di gi en sili abra gi a boen foe den skapoe foe en, dan a ben sa de wan fowtoe sani foe no prakseri den wan di Jesus e tjari na ondro a lobi sorgoe foe en, den wan di e tron borgoe na ondro en hemel Kownoekondre. — Johanes 3:16.

9. Soema na den tra skapoe so leki fa den Bijbel Ondrosoekoeman ben prakseri ini 1884 kaba?

⁹ Froekoe na ini a jari 1884 kaba, a Watch Tower ben taki, dati den tra skapoe na sma di ben sa kisi na okasi foe libi na a grontapoe disi, na ondro situwâsi di ben sa de wan kontroe foe a prakseri di Gado ben abi fosi. Den fosi Bijbel Ondrosoekoeman dati ben kon froestan taki wan toe foe den tra skapoe disi, ben sa de sma di ben libi èn di ben dede bifo Jesus en diniwroko na grontapoe. Ma wan toe finifini tori ben de di den no ben froestan boen. Foe eksempre, den ben prakseri taki a tjari kon na wán foe den tra skapoe, ben sa feni presi baka te ala den salfoewan ben kisi den hemel pai. Tokoe, den ben kon froestan heri boen taki den tra skapoe no ben de den heiden kresten nomo. Na okasi foe tron wan foe den tra skapoe, opo gi den djoe èn gi den heiden, gi sma foe ala nâsi nanga lo. — Teki gersi Tori foe den Apostel 10:34, 35.

10. San moesoe de troe foe wi, so taki wi kan de den sma di Jesus troetroe e si leki den tra skapoe foe en?

¹⁰ Foe fiti a fasi fa Jesus ben taki, dan den tra skapoe moesoe de sma di, awinsi sortoe ras background den abi, e erken Jesus Krestes leki a Toemoesi Boen Skapoeman. San dati wani taki? Den moesoe sori safri-atifasi èn den moesoe sori taki den wani foe Jesus tjari den, sani di de eigifasi foe skapoe (Psalm 37:11). Neleki fa a de nanga a pikin ipi, na so den moesoe „sabi a sten [foe a toemoesi boen skapoeman]” èn den no moesoe gi densrefi pasi foe meki trawan di kande e proeberi foe abi krakti na den tapoe, tjari den gowe (Johanes 10:4; 2 Johanes 9, 10). Den moesoe warderi a prensparifasi foe den sani di Jesus ben doe foe gi en sili abra gi a boen foe den skapoe foe en èn den moesoe abi tranga bribi ini a seti dati (Tori foe den Apostel 4:12). Den moesoe „arki” a sten foe a Toemoesi Boen Skapoeman te a e gi den tranga foe doe santa diniwroko gi Jehovah nomo, foe tan soekoe a Kownoekondre fosi, foe de aparti foe grontapoe, èn foe sori lobi foe òfer densrefi gi makandra (Mateus 4:10; 6:31-33; Johanes 15:12, 13, 19). Joe e fiti a fasi fa Jesus e taki foe den wan di a e si leki den tra skapoe foe en? Joe wani dati? Fa dati na wan toemoesi warti matifasi di de foe kisi gi ala sma di troetroe e tron den tra skapoe foe Jesus!

Respeki gi a tirimakti foe a Kownoekondre

11. (a) San Jesus ben taki foe den skapoe nanga den bokoboko na ini a marki foe en denoja? (b) Soema na den brada di Jesus ben taki foe den?

¹¹ Wan toe moen bifo Jesus ben gi na agersitori di wi ben taki foe en na tapoesei, dan Jesus ben de na Jerusalem agen. Di a ben sidon na tapoe na Olijfbergi èn ben e loekoe go na tapoe a kontren foe a tempel, dan a ben gi den disipel foe en finifini tori foe ’a marki foe en denoja èn foe a kaba foe a seti foe sani’ (Mateus 24:3). Ete wan tron a ben taki foe a tjari di den skapoe ben sa tjari kon na wán. Wan foe den sani di a ben taki ben de: „Te a Manpikin foe libisma e kon ini en glori, èn ala den engel nanga en, dan a sa sidon na tapoe en glori kownoestoeroe. Èn ala den nâsi sa tanapoe makandra na en fesi, èn a sa prati sma foe makandra, neleki fa wan skapoeman e prati den skapoe foe den bokoboko. Èn a sa poti den skapoe na en reti-anoesei, ma den bokoboko a sa poti na en kroektoe-anoesei.” Ini na agersitori disi, Jesus ben sori taki den wan di a Kownoe ben sa poti en prakseri na tapoe, ben sa kisi kroetoe tapoe a gron foe a fasi fa den ben handri nanga den „brada” foe en (Mateus 25:31-46). Soema na den brada disi? Den na kresten di wiki nanga Gado santa jeje èn foe dati ede den na „den manpikin foe Gado”. Jesus na a fosi gebore Manpikin foe Gado. So boen, den na den brada foe Krestes. Den na „den srafoe foe wi Gado” di Openbaring 7:3 e taki foe den, den wan di a froekisi na mindri foe a libisma famiri foe abi prati nanga Krestes na ini en hemel Kownoekondre. — Romesma 8:14-17.

12. Foe san ede a fasi fa sma e handri nanga den brada foe Krestes, de toemoesi prenspari?

¹² A fasi fa tra libisma e handri nanga den erfgenaam disi foe a Kownoekondre, de toemoesi prenspari. Joe e prakseri foe den na a fasi fa Jesus Krestes nanga Jehovah e prakseri foe den? (Mateus 24:45-47; 2 Tesalonikasma 2:13) A fasi fa wan sma e prakseri foe den salfoewan disi, e prenki a fasi fa a sma disi e prakseri foe Jesus Krestes srefi èn foe en Tata, na Universeel Soeverein. — Mateus 10:40; 25:34-46.

13. Sortoe sani den Bijbel Ondrosoekoeman ben froestan foe na agersitori foe den skapoe nanga den bokoboko, ini 1884?

¹³ Na ini na eksemplaar foe augustus 1884, a Watch Tower ben sori na wan joisti fasi taki den „skapoe” ini na agersitori disi, na den wan di ben sa poti na den fesi a froewakti foe kisi volmaakti libi na grontapoe. Den ben froestan toe, taki na agersitori moesoe foe fiti a ten te Krestes e tiri foe en glori hemel kownoestoeroe. Tokoe, na a ten dati den no ben man si krin o ten Jesus ben sa bigin nanga a pratiwroko, di den e taki foe en drape, noso o langa a pratiwroko ben sa tan.

14. Fa wan kongreslezing ini 1923 ben jepi den Bijbel Ondrosoekoeman foe froestan o ten a profeiti agersitori foe Jesus ben moesoe kon troe?

¹⁴ Ma ini 1923, ini wan kongreslezing, J. F. Rutherford, di ben de presidenti foe a Waktitoren Genootschap na a ten dati, ben tjari a ten kon na krin foe a kontroe foe na agersitori foe den skapoe nanga den bokoboko. Foe san ede? Wan reide ben de, foe di na agersitori e sori taki den brada foe a Kownoe — awinsi wan toe foe den — ben sa de na grontapoe ete. Na mindri foe libisma, soso den bakaman foe en di wiki nanga Gado santa jeje den ben kan kari troetroe den brada foe en (Hebrewsma 2:10-12). Den wan disi no ben sa de na grontapoe na ini a heri Doesoen-jari tiri, foe kan gi sma na okasi foe doe boen gi den na den fasi fa Jesus ben taki dati. — Openbaring 20:6.

15. (a) Sortoe sani di ben feni presi, ben jepi den Bijbel Ondrosoekoeman foe kon sabi na wan joisti fasi soema na den skapoe foe Jesus en agersitori? (b) Fa den skapoe boeweisi taki den e warderi a Kownoekondre?

¹⁵ Ini 1923, ini a lezing dati, den ben proeberi foe kon sabi den wan di fiti a fasi fa Jesus ben taki foe den skapoe nanga den bokoboko. Ma a ben de fanowdoe foe froestan tra afersi bifo den ben kan sabi san na agersitori ben wani taki krinkrin. Na ini den jari di ben kon na baka, Jehovah ben tjari den finifini tori disi safrisafri kon na ondro a prakseri foe den foetoeboi foe en. Disi abi na ini toe taki, ini 1927, a ben kon de krin taki „a getrow èn koni srafoe” de a heri skin foe kresten na grontapoe di ben salfoe nanga Gado santa jeje; wan sani di den ben kon froestan toe ini 1932, ben de taki a ben de fanowdoe foe abi krosibei demakandra nanga den salfoe foetoeboi foe Jehovah sondro foe frede, neleki fa Jonadab ben abi krosibei demakandra nanga Jehu (Mateus 24:45; 2 Kownoe 10:15). Na a ten dati, tapoe a gron foe Openbaring 22:17, den sma disi di wi kan teki gersi nanga skapoe, ben kisi spesroetoe deki-ati foe abi wan prati foe tjari a Kownoekondre boskopoe gi trawan. A warderi di den ben abi gi a Mesian Kownoekondre ben sa boeweigi den no soso foe abi boenfasi gi den salfoewan foe Masra na wan libisma fasi, ma foe gi a libi foe den abra na Jehovah nanga jepi foe Krestes èn foe kon abi krosibei demakandra nanga den salfoewan foe en, ala di den abi wan fajafaja prati ini a wroko. Joe e doe dati? A Kownoe sa taigi den wan di e doe dati: „Kon, oenoe di mi Tata ben blesi, teki a kownoekondre di ben sreka gi oenoe sensi a fondamenti foe grontapoe.” Na fesi foe den, a bigi froewakti foe têgo libi ini volmaaktifasi sa de ini a grontapoe kontren foe a Kownoekondre. — Mateus 25:34, 46.

A „bigi ipi” — Pe den e go?

16. (a) Sortoe fowtoe prakseri den fosi Bijbel Ondrosoekoeman ben abi foe soema a bigi groepoe sma noso bigi ipi foe Openbaring 7:9 de? (b) O ten èn tapoe gron foe sortoe sani a fasi fa den ben prakseri ben poti kon reti?

¹⁶ Gi wan pisi ten langa, den foetoeboi foe Jehovah ben bribi taki a bigi groepoe sma (noso, bigi ipi) foe Openbaring 7:9, 10, ben difrenti foe den tra skapoe na Johanes 10:16 èn foe den skapoe na Mateus 25:33. Foe di bijbel e taki dati den „e tanapoe na fesi a kownoestoeroe”, meki den ben prakseri taki den ben sa de na hemel, no na tapoe kownoestoeroe e tiri leki kompe erfgenaam foe Krestes, ma na a di foe toe presi, na fesi a kownoestoeroe. Sma ben si den leki kresten di no ben de so getrow, den wan di no ben sori wan jeje foe òfer densrefi troetroe. Ini 1935 den ben poti a prakseri dati kon reti.b Di den ben ondrosoekoe Openbaring 7:9 èn den ben hori tekst so leki Mateus 25:31, 32 na prakseri, dan a ben kon na krin taki sma djaso na grontapoe ben kan de „na fesi a kownoestoeroe”. Den ben tjari kon na fesi toe, taki Gado no abi toe fasi fa a e si getrowfasi foe sma. Ala sma di ben sa wani taki Gado feni den boen, moesoe tan hori den soifri retifasi na en. — Mateus 22:37, 38; Lukas 16:10.

17, 18. (a) San ben de a sani di ben meki taki a nomroe foe den wan di ben froewakti foe libi foe têgo na grontapoe, ben kon moro bigi sensi 1935? (b) Na sortoe prenspari wroko den wan foe a bigi ipi e teki prati fajafaja?

¹⁷ Foeroe jari langa a pipel foe Jehovah ben taki foe den pramisi foe Gado di abi foe doe nanga grontapoe. Foe a sani ede di den ben froewakti taki a ben sa feni presi na a ten dati ini den jari foe 1920 te go miti 1930, meki den ben meki bekènti taki „Miljoenmiljoen sma di e libi now noiti no sa dede.” Ma na a ten dati, miljoenmiljoen sma no ben de ete di ben teki den sani di Gado ben seti foe kisi libi. Ini a moro bigi pisi foe den wan di ben teki a waarheid, a santa jeje ben poti a howpoe foe libi na hemel. Ma spesroetoe baka 1935, wan kenki di ben de krin foe si ben feni presi. A no ben de taki A Waktitoren no ben poti prakseri srefisrefi na tapoe a howpoe foe libi foe têgo na grontapoe. Foeroe tenti jari, den foetoeboi foe Jehovah ben taki foe disi èn den ben soekoe den wan di fiti a fasi fa bijbel e taki foe den. Ma na a joisti ten foe Jehovah, a ben tiri sani na so wan fasi, taki den wan di ben moesoe tron memre foe a bigi ipi ete, ben sori densrefi.

¹⁸ Den raport foe fisitiman, di de ete, e sori taki foeroe jari langa moro foeroe sma di ben fisiti a Memrefesa, ben njan foe den simbôl. Ma ini 25 jari baka 1935, den sma di ben fisiti a Memrefesa foe a dede foe Krestes ala jari, ben kon moro foeroe srefisrefi, moro leki wán hondro tron a nomroe foe den sma di ben njan foe den simbôl. Soema ben de den tra sma disi? Sma di ben moesoe tron memre foe a bigi ipi ete. A de krin taki a ten foe Jehovah ben doro foe tjari den kon na wán èn foe sreka den foe pasa a bigi banawtoe libilibi, di de krosibei. Neleki fa a ben taki na fesi kaba, den komoto „foe ala nâsi, nanga lo, nanga pipel, nanga tongo” (Openbaring 7:9). Den e teki prati fajafaja na a wroko di Jesus ben taki na fesi foe dati, di a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala den nâsi, èn dan a kaba sa kon.” — Mateus 24:14.

[Foetoewortoe]

San na joe komentaar?

◻ Foe san ede a fisjoen ini Openbaring kapitel 7 de spesroetoe prenspari?

◻ Foe san ede den tra skapoe foe Johanes 10:16 no de soso den heiden kresten?

◻ San moesoe de troe foe den wan di fiti a fasi fa bijbel e taki foe den tra skapoe?

◻ Fa na agersitori foe den skapoe nanga den bokoboko e poti krakti na tapoe a respeki di wi moesoe abi gi Kownoekondre tirimakti?

◻ San e sori o ten a ten foe Jehovah ben doro foe tjari a bigi ipi foe Openbaring 7:9 kon na wán?