Foe san ede a de a ten foe teki wan bosroiti?

NA INI a di foe 16 jarihondro bifo Gewoon Teri, Gado ben froekisi den Israèlsma leki en „spesroetoe goedoe di a ben teki poeroe foe ala tra pipel, . . . wan santa nâsi” (Exodus 19:5, 6). A no ben teki langa foe den ben lasi a santafasi foe den, a soifrifasi foe den na relisi sei, foe di den ben gi densrefi pasi meki na anbegi foe kroektoe gado nanga a kroektoedoe foe den nâsi di ben libi na den sei, doti den. Na so fasi den ben sori taki den ben de „wan tranga-ede pipel” (Deuteronomium 9:6, 13; 10:16; 1 Korentesma 10:7-11). Ini wan ten foe moro leki drihondro jari baka a dede foe Josua, Jehovah ben opo kroetoeman, getrow tjariman di ben abi foe tjari Israèl go baka na a troe anbegi. Ma a pipel „no ben tapoe densrefi foe doe den doe foe den èn a tranga-ede fasi fa den ben tjari densrefi”. — Kroetoebakra 2:17-19.

Baka dati, Gado ben opo getrow kownoe nanga profeiti foe meki a pipel drai go baka na a troe anbegi. A profeiti Asarja ben gi kownoe Asa nanga den kompe kondreman foe en, deki-ati foe soekoe Jehovah: „Efoe oenoe e soekoe en, a sa meki oenoe feni en, ma efoe oenoe gowe libi en, a sa gowe libi oenoe.” Asa ben tjari kenki kon na relisi sei ini a kownoekondre Juda (2 Kroniki 15:1-16). Baka dati, Gado ben moesoe meki en profeiti Joèl gi sma a kari baka (Joèl 2:12, 13). Ma tokoe baka ten, Sefanja ben froemane den sma di ben libi na Juda, foe „soekoe Jehovah”. A jongoe kownoe Josia ben doe disi, foe di a ben seti sani foe tjari kenki kon foe tapoe na anbegi di sma ben anbegi kroektoe gado èn foe tapoe kroektoedoe. — Sefanja 2:3; 2 Kroniki 34:3-7.

Ala di pisi ten ben de di a pipel ben sori taki den ben abi berow, tokoe a situwâsi foe den na relisi sei ben kon moeilek moro nanga moro (Jeremia 2:13; 44:4, 5). Jeremia ben kroetoe a relisi seti di ben kon doti nanga na anbegi di sma ben anbegi kroektoe gado, èn a ben taki dati a seti no ben man kenki: „Wan Koesjietsma kan kenki a skin foe en? noso wan penitigri den flaka foe en? Oensrefi ben sa man doe boen toe, di de sma di leri foe doe san takroe” (Jeremia 13:23). Na foe a sani disi ede meki Gado ben tjari bigi strafoe kon na tapoe a kownoekondre Juda. Jerusalem nanga a tempel foe en ben kisi pori ini 607 bifo Gewoon Teri, èn den ben tjari den sma di ben tan na libi, gowe leki srafoe go na Babilon, pe den ben tan 70 jari langa.

Di a pisi ten dati ben pasa, Gado ben sori sari-atifasi. A ben meki kownoe Cirus fri den Israèlsma, èn wan fikapisi foe den ben drai go baka na Jerusalem foe bow a tempel baka. Na presi foe den Israèlsma leri wan sani foe ala den sani disi, den ben drai den baka gi a troe anbegi baka, èn disi ben e meki Jehovah Gado gi den wan kari baka: „Drai kon baka na mi, èn mi sa drai kon baka na oenoe.” — Maleaki 3:7.

Foe san ede Gado ben trowe Israèl

San ben de a situwâsi na relisi sei foe den Israèlsma na ini a ten foe Jesus? Den hoigri relisi fesiman ben de „breni tjariman” di ben leri „komando foe libisma leki fondamenti leri”. ’Den ben pasa a komando foe Gado foe den eigi gwenti ede.’ A pipel ben gi Gado grani „nanga den mofoboeba foe den”, ma na ati foe den ben de fara foe en (Mateus 15:3, 4, 8, 9, 14). Den, leki wan nâsi, ben o kisi ete wan tra okasi foe abi berow? Nôno. Jesus ben taki: „A kownoekondroe foe Gado sa teki poeroe foe oenoe èn a sa gi na wan nâsi di e tjari a froktoe foe en.” Jesus ben taki moro fara: „Den sa libi oen oso”, a tempel na Jerusalem, „leigi na baka” (Mateus 21:43; 23:38). A fowtoe foe den ben de toemoesi bigi. Den ben trowe Jesus leki a Mesias èn den ben meki sma kiri en, èn den ben froekisi a keiser foe Rome, di ben kwinsi den, leki a kownoe foe den. — Mateus 27:25; Johanes 19:15.

Den Israèlsma no ben wani foe froestan taki a pisi ten di Jesus ben doe a diniwroko foe en, ben de wan ten foe kisi kroetoe. Jesus ben taigi den sma foe Jerusalem di no ben de getrow: „Oenoe no ben si krin a ten di oenoe ben kisi kroetoe.” — Lukas 19:44.

Na a Pinksterfesa foe 33 Gewoon Teri, Gado ben seti wan njoen nâsi, noso pipel, den disipel foe en Manpikin, Jesus Krestes, di ben salfoe nanga santa jeje èn di ben sa teki poeroe foe ibri ras nanga nâsi (Tori foe den Apostel 10:34, 35; 15:14). Howpoe ben de taki a djoe relisi seti ben sa kon kenki te foe kaba? Den legre foe Rome ben gi a piki ini 70 Gewoon Teri, foe di den ben pori Jerusalem te noti moro no ben tan abra foe en. Gado ben trowe a relisi seti dati krinkrin. — Lukas 21:5, 6.

A fadon di foeroe sma fadon komoto na bribi ini krestenhèit

Den kresten di ben salfoe nanga santa jeje, so srefi ben de „wan santa nâsi, wan pipel gi wan spesroetoe goedoe” (1 Petrus 2:9; Galasiasma 6:16). Ma srefi a jongoe kresten gemeente no ben hori en soifrifasi na relisi sei wan langa ten.

Bijbel ben taki na fesi dati foeroe sma ben o fadon komoto na bribi, noso fadon gowe foe a troe anbegi. Na agersi takroe wiwiri foe Jesus en agersitori, dati wani taki, den falsi kresten, ben sa proeberi foe tjokro na agersi tarwe, noso den troe kresten, denwan di ben salfoe nanga a jeje foe Gado. Na agersitori e tjari kon na krin taki a panja di a falsi krestendom ben o panja, wan sani di Didibri, a moro bigi feanti foe Gado, ben meki go na fesi, ben de foe bigin, „ala di sma ben e sribi”. Disi ben pasa baka a dede foe den getrow apostel foe Krestes, ini wan pisi ten di ben o kon foe di sma ben sa sribi na jeje fasi (Mateus 13:24-30, 36-43; 2 Tesalonikasma 2:6-8). So leki fa den apostel ben taki na fesi, dan foeroe falsi kresten ben poesoe densrefi na wan trikifasi kon na ini a gemeente (Tori foe den Apostel 20:29, 30; 1 Timoteus 4:1-3; 2 Timoteus 2:16-18; 2 Petrus 2:1-3). Johanes ben de a lasti apostel di ben o dede. Na wan sani foe 98 Gewoon Teri, a ben skrifi taki „a lasti joeroe”, a lasti pisi foe a pisi ten foe den apostel, ben bigin kaba. — 1 Johanes 2:18, 19.

Di relisi nanga politiek makti ben go wroko nanga makandra, wan sani di Constantijn, a keiser foe Rome, ben feni boen, a situwâsi di krestenhèit ben de na ini na jeje fasi, tapoe a kontren foe fondamenti leri, èn ini a tori foe boen gwenti nanga wet, ben kon takroe srefisrefi. Foeroe historia skrifiman e agri taki „a wini di kerki ben wini ini a di foe fo jarihondro” ben de, na a kresten fasi foe si en, „wan rampoe”. ’Krestenhèit ben lasi a hei markitiki foe en di a ben abi ini a tori foe boen gwenti nanga wet’ èn a ben teki foeroe doe nanga filosofia abra foe den heiden, so leki „na anbegi di sma e anbegi Maria” èn a lespeki di sma e gi na den „santawan” foe di den e si den leki gado, so boen leki na idea di den e leri foe a Dri-wánfasi.

Baka a sokari wini foe krestenhèit, a situwâsi foe den ben go na baka. Wet nanga fondamenti leri di pawsoe nanga concili ben poti, makandra nanga a Kroetoebangi foe lomsoe kerki, den kruistocht, nanga den „santa” orlokoe na mindri den katoliksma nanga den protestantsma, ben meki wan relisi seti kon di no ben man kenki.

William Manchester skrifi ini en boekoe, di nen A World Lit Only by Fire: „Den pawsoe ini a di foe tinafeifi nanga a di foe tinasiksi jarihondro ben libi leki den keiser foe Rome. Den ben de den moro goedoe man na grontapoe, èn den nanga den kardinaal foe den ben meki densrefi kon moro goedoe toe, foe di den ben meki sma pai den di ben abi hei posisi ini kerki èn di ben doe santa wroko drape.” Ini a pisi ten di foeroe sma ben fadon komoto na bribi, pikin groepoe noso sma aparti ben soekoe foe feni a troe krestendom baka, foe di den ben sori den eigifasi foe na agersi tarwe. Nofotron den ben kisi hebi froefolgoe. A srefi boekoe e taki: „Son leisi a ben gersi leki den troe santawan foe a krestendom, den protestant-wan nanga den katolik-wan, ben tron sma di ben kon blaka foe di den ben kisi hebi skin-ati nanga a bron di den ben bron den.” Trawan, di den ben kari Reformsma, leki Martin Luther nanga Johanes Calvijn, ben man seti relisi seti di ben tan, èn di ben hari densrefi poeroe foe lomsoe kerki, ma di ben abi prati ete na den gron kerki leri foe en. Den ben abi foeroe foe doe toe nanga den politiek afersi.

Na a sei foe den protestantsma, moeiti ben doe foe tjari san den ben kari a wiki di relisi ben wiki baka. Foe eksempre, ini a di foe 18 nanga a di foe 19 jarihondro, den moeiti disi ben abi leki bakapisi taki fajafaja zendingwroko ben doe na dorosei kondre. Ma ini a ten disi, so leki fa den skapoeman foe relisi srefi e erken, a situwâsi na jeje fasi foe a protestant ipi no e gi deki-ati kwetikweti. No so langa pasa, a protestant theoloog Oscar Cullmann ben erken dati „ini den kerki srefi, a bribi de ini problema”.

Ini lomsoe kerki toe den ben doe sani foe tjari kenki kon èn den ben doe sani di ben de teige den kenki dati. Foe a di foe 11 jarihondro te go miti a di foe 13 jarihondro, ala di joe ben abi a bigi kroektoedoe foe den kerki leriman nanga a boen bigi goedoe foe den, den ben seti monnik groepoe di ben libi krinkrin akroederi a sweri di den ben meki foe tan pôti. Ma den moro hei groepoe foe kerki ben hori den monnik groepoe boen na ai, èn so leki fa sabiman e taki, den monnik ben kisi kwinsi foe den. Baka dati a Kontra-reformatie ben kon ini a di foe 16 jarihondro, èn a Bigi Kroetoe foe Trent ben hori baka gi dati èn a ben de moro foeroe foe feti a protestant Reformatie.

Ini a fosi afoe pisi foe a di foe 19 jarihondro, ini a pisi ten di den ben meki kerki kon boen baka, lomsoe kerki ben teki wan heimemre èn owroeten fasi foe tjari densrefi. Ma sma no kan taki dati troetroe kenki ben kon foe poti a troe krestendom baka. Na presi foe dati, den sani disi ben de moeiti di sma ben doe nomo foe meki a makti foe den kerki leriman kon moro tranga, nanga ini prakseri a kenki di grontapoe ben kon kenki na relisi sei, na politiek sei èn na sociaal sei.

No so langa pasa, ini den jari foe 1960, a ben gersi leki lomsoe kerki ben wani foe bigin foe seti sani foe tjari wan bigi kenki nanga na oekemeinis bigi kroetoe Vatikaan II. Ma a pawsoe di ben de na a ten dati, wantronso ben meki den tapoe nanga a sani di den ben kari wan concili foe tjari bigi kenki kon. A ben doe disi foe poti skotoe gi a fasi foe den fajafaja memre foe a kerki di ben wani foe tjari kenki kon. Wán katolik groepoe ben kari a pisi ten disi, di son sma e kari a wani di Wojtyła ben wani foe sani kon njoen baka, „wan njoen fasi foe Constantijnisme”. So leki fa den taki spesroetoe ini a Jesuït tijdschrift La Civiltà Cattolica, dan lomsoe kerki, neleki tra relisi, e tanapoe na fesi foe „wan boen bigi problema di de na heri grontapoe: a bigi foe di a abi foe doe nanga den krinkrin roetoe foe a bribi nanga a kresten libi; a de na heri grontapoe bika a abi foe doe nanga ala fasi fa a krestendom de”.

Den relisi foe krestenhèit no kenki troetroe, èn den no man doe dati toe, foe di a troe krestendom ben sa kon boen baka soso na a ten foe a „kotiwroko”, te den ben sa tjari na agersi tarwe kon na wán na ini wán soifri gemeente (Mateus 13:30, 39). A langa lijst foe takroedoe nanga ogri di sma e doe ini a nen foe relisi, efoe sma e taki dati na kresten relisi noso tra relisi, e meki na aksi kon: A de wan troetroe sani taki krestenhèit sa kenki?

Wan kenki no man?

A boekoe Openbaring, noso Apocalyps, e taki foe wan agersi bigi hoeroe di abi „Babilon a Bigiwan” leki nen, san de wan kibritori (Openbaring 17:1, 5). Hondrohondro jari langa bijbel leisiman proeberi foe tjari a kibritori foe na agersitori disi kon na krin. Foeroe foe den sma ben tegoe foe a goedoe nanga a kroekafasi foe den kerki leriman. Son sma ben denki taki Babilon a Bigiwan ben prenki den sma foe den kerki di de edeman èn di abi den moro hei posisi. Wan foe den sma dati ben de Jan Hus, wan Boheim katolik priester di den ben bron libilibi ini 1415, nanga Aonio Paleario, wan humanistman foe Italiakondre di den ben anga èn di den ben bron ini 1570. Sondro foe abi boen bakapisi, ala toe man ben feti foe tjari kenki kon ini lomsoe kerki, ini a howpoe taki a ben sa drai go baka na „a wartifasi di a ben abi fosi”.

Tra fasi foe dati, kapitel 17 nanga 18 foe Openbaring e sori taki Babilon a Bigiwan e prenki a grontapoemakti foe ala falsi relisi.a A „bigi hoeroe” disi di abi difrenti pisi, no man kenki, bika „den sondoe foe en kon foeroe te na hemel”. Foe taki en leti, ini a di foe 20 jarihondro disi, pikinmoro ala relisi, no soso den di foe krestenhèit, de frantiwortoe gi den orlokoe di tan trowe foeroe broedoe. Den de frantiwortoe toe gi a go di boen gwenti nanga wet e go na baka krinkrin, wan sani di e kwinsi a libisma famiri. Foe dati ede, Gado gi komando foe meki „Babilon” kisi pori. — Openbaring 18:5, 8.

Now a de a ten foe „komoto na en”

A kontroe foe bijbel profeititori e tjari kon na krin taki a ten foe wi e kroederi nanga „a bosroiti” foe na ogri „seti foe sani” disi (Mateus 24:3). Iniwan sma di troetroe wani foe anbegi Gado no kan gi ensrefi pasi foe waka baka en eigi prakseri èn na baka den sani di en wani. A moesoe ’soekoe Jehovah ala di a de foe feni ete’, ija, nownowde, bika a „bigi banawtoe” di Jesus ben taki na fesi foe en, de krosibei (Jesaja 55:6; Mateus 24:21). Neleki fa a ben de ini a kefal foe a pipel foe Israèl, na so Gado no sa gi pasi na wan kroektoedoe foe wan relisi, soso foe di a relisi e skepi foe na owroe di a owroe. Na presi foe doe moeiti foe repareer wan sipi di o soengoe, ala den sma di wani dati Gado feni den boen èn di wani kisi froeloesoe, sondro draidrai moesoe gi jesi na a komando na Openbaring 18:4 di taki na ondro a krakti foe santa jeje: „Komoto na en, mi pipel, efoe joe no wani foe abi wan prati nanga en ini den sondoe foe en, èn efoe joe no wani foe kisi wan pisi foe den plaag foe en.”

Ma „komoto” foe go pe? Pe moro, froeloesoe de foe feni? A kefar no de, taki wi e go soekoe kibri na a fowtoe presi? Fa wi kan kon sabi a wan-enkri relisi di Gado feni boen? Den wan-enkri piki di de foe froetrow, wi kan feni ini a Wortoe foe Gado (2 Timoteus 3:16, 17). Jehovah Kotoigi e gi joe wan kari foe ondrosoekoe bijbel moro fini. Joe sa man foe froestan soema na den sma di Gado froekisi leki „wan pipel gi en nen”, di a sa gi kibri ini a dei foe en atibron di e kon krosibei moro nanga moro. — Tori foe den Apostel 15:14; Sefanja 2:3; Openbaring 16:14-16.

[Foetoewortoe]

[Prenki na tapoe bladzijde 7]

Efoe a relisi sipi foe joe e soengoe, dan go na a sipi foe a troe krestendom di e gi kibri